Baebol i Talem Wanem
?Save Blong Ol Saentis i Agensem Save Long Jenesis?
PLANTE man oli talem se ol tok blong Baebol i no laenap wetem save blong ol saentis, long saed blong taem ya we God i wokem ol samting. Be i no tru. Samting we i no laenap wetem save blong ol saentis, hemia tingting blong wan grup we oli talem se oli Kristin, nem blong olgeta, ol Fundamentalist.a Sam grup olsem oli talem se folem ol tok blong Baebol, samwe long 10,000 yia bifo, God i wokem evri samting long sikis dei, we wanwan long ol dei ya i gat 24 aoa long hem.
Be tingting blong olgeta i no stret. Sipos Baebol i talem olsem, bambae hem i no laenap wetem plante save we ol saentis oli jes faenemaot long handred yia we i pas. Taem yumi stadi gud long Baebol, yumi luk se hem i agri nomo wetem save we ol saentis oli pruvum se i tru. From samting ya, ol Witnes blong Jeova oli no agri wetem ol Fundamentalist mo sam narafala man olsem, we oli stap talem se oli “Kristin.” Naoia bambae yumi luk wanem we Baebol i rili talem.
“Fastaem, Bifo Olgeta”—?Hemia Wetaem?
Fastok blong buk blong Jenesis i sot nomo be i gat bigfala mining. Hem i se: “Fastaem, bifo olgeta, God i wokem heven mo wol.” (Jenesis 1:1, NW ) Ol man blong hae save long saed blong Baebol oli talem se vas ya i tokbaot wan samting we God i mekem, bifo we hem i stat blong wokem ol samting long 6 dei, olsem we vas 3 mo ol vas biaen oli tokbaot. Poen ya i impoten. Faswan tok ya blong Baebol i soemaot se heven mo wol i stap finis, bifo we ol dei blong God i wokem ol samting oli stat.
Ol man we oli stadi long ol ston blong luk wanem samting i bin hapen bifo, oli ting se wol ya i stap 4 taosen milian yia finis. Ol man we oli stadi long ol sta mo planet, oli ting se maet skae mo wol i stap 15 taosen milian yia finis. ?Olsem wanem? ?Ol save ya mo ol save we maet bambae oli faenemaot yet, oli agensem ol tok long Jenesis 1:1? Nogat. Baebol i no talem hamas yia stret we “heven mo wol” i stap. Taswe save blong ol saentis i no agensem Baebol.
?Ol Dei Blong Wokem Ol Samting, Oli Longfala Olsem Wanem?
?Ol dei we God i yusum blong wokem ol samting, oli longfala olsem wanem? ?Wanwan long olgeta, oli 24 aoa nomo? Samfala oli talem se wanwan long ol dei ya i mas gat 24 aoa nomo, from we samtaem afta we Moses i raetem Jenesis, hem i talem se loa blong Sabat dei i stanap long namba seven dei, afta long sikis dei ya we God i wokem ol samting. (Eksodas 20:11) ?Olsem wanem? ?Ol tok blong Jenesis i soemaot samting ya?
Nogat. Yumi mas kasem save se Hibru tok we oli tanem i kam “dei,” hem i no minim 24 aoa nomo. Tingbaot wanem we Moses i talem long saed blong sikis dei ya we God i wokem evri samting long olgeta. Hem i kolem olgeta dei ya tugeta se wan dei. (Jenesis 2:4, NW ) Mo tu, long faswan dei we God i wokem samting, hem “i putum nem blong delaet se Dei, mo i putum nem blong tudak se Naet.” (Jenesis 1:5) Vas ya i yusum tok ya “Dei” blong minim ol aoa blong delaet, be hemia i no 24 aoa. Tru ya, i no gat pruf long Baebol se wanwan long ol dei we God i wokem ol samting, oli gat 24 aoa nomo.
?Ale, ol dei ya oli longfala olsem wanem? Ol tok long Jenesis japta 1 mo 2 i soemaot se ol dei ya wanwan oli longfala we i longfala.
God i Wokem Ol Samting Sloslo Nomo
Moses i raetem buk blong Jenesis long lanwis Hibru. Mo taem hem i eksplenem ol samting, hem i tok olsem wan man we i stanap i stap long graon long wol ya nomo. Tufala poen ya i impoten, wetem save ya tu se heven mo wol i stap taem ol “dei” we God i wokem ol samting oli no stat yet. Ol poen ya oli givhan blong stretem plante rao long saed blong buk blong Jenesis. ?Olsem wanem oli givhan?
Taem yumi ridimgud buk blong Jenesis, yumi luk se samting we God i wokem long wan “dei” i stap gohed long nekis dei no long sam dei biaen. Olsem nao, bifo we faswan “dei” i stat, san i stap finis, be laet blong hem i no save kasem wol, maet from we i gat ol bigfala klaod oli blokem. (Job 38:9) Long faswan “dei,” God i stat blong tekemaot ol klaod ya, mekem se laet i kamtru smol.b
Long namba tu “dei,” skae i kam klia moa, nao i gat wan spes bitwin ol bigfala klaod antap mo solwota daon. Long namba fo “dei” skae i kam moa klia bakegen, nao san mo mun i saenaot “long skae.” (Jenesis 1:14-16) Taswe, wan man we i stanap long graon long wol ya bambae i save luk san mo mun. Be ol samting ya oli kamaot sloslo nomo.
Buk blong Jenesis i talem se long semtaem we skae i gohed blong kam klia, ol pijin wetem ol bebet mo ol narafala samting we i save flae, olgeta tu oli stat blong kamtru. Hemia long namba faef “dei.” Be long namba sikis “dei,” God i stap wokem yet “ol anamol we oli stap wokbaot long graon, wetem ol pijin we oli stap flae olbaot antap.”—Jenesis 2:19.
Yes, from ol tok we Baebol i yusum, i luk olsem se evri “dei” sam bigfala samting oli kamtru sloslo, i no wantaem nomo. Maet sam long olgeta oli jes kamtru fulwan long nekis “dei” no sam “dei” biaen.
Stret Nomo Long Kaen Blong Olgeta
?Olsem wanem? ?From we ol samting ya oli kamtru sloslo, hemia i min se God i yusum evolusenc blong mekem ol defdefren laef samting oli kamtru? Nogat. Baebol i talem klia se God nao i wokem ol defdefren “kaen” samting we i gru long graon mo ol anamol tu. (Jenesis 1:11, 12, 20-25, NW ) ?Olsem wanem? ?God i wokem ol defdefren “kaen” samting we i gru long graon mo ol anamol blong oli naf blong jenis taem sam samting raonabaot long olgeta i jenis? ?Tok ya “kaen” i min se oli no save jenis nating no olsem wanem? Baebol i no talem. Be Baebol i talem klia se fulap laef samting oli kamaot “stret nomo long kaen blong olgeta.” (Jenesis 1:21, NW ) Tok ya i soemaot se wanwan “kaen” i no save jenis i kam wan narafala kaen, be maet oli save jenis smosmol nomo. Ol samting blong bifo we ol saentis oli faenem mo ol niufala save we oli kasem, i sapotem tingting ya se ol defdefren kaen anamol mo samting we oli gru long graon, oli no jenis bigwan long ol taosen yia we i pas.
Ol Fundamentalist oli gat rong tingting long saed blong Jenesis. Jenesis i no talem se God i wokem heven mo wol wetem ol laef samting long wol ya long wan sot taem nomo, long ol yia we oli jes pas i no longtaem. Ol tok blong Jenesis long saed blong taem ya we God i wokem heven mo wol mo ol laef samting long wol, i laenap gud wetem plante save we ol saentis oli jes faenemaot long ol laswan yia.
From we plante saentis oli folem waes blong man, sam long olgeta oli no bilif long tok blong Baebol se God nao i wokem ol samting. Be tingbaot ol tok long olfala hanraet blong Jenesis. Moses i raetem se i gat wan stret taem we heven mo wol i bin stat, mo se ol laef samting oli kamaot sloslo long wan longfala taem. ?Nao olsem wanem Moses we i raetem tok ya samwe long 3,500 yia bifo, i kasem ol save ya we i laenap gud wetem save blong ol saentis tede? I gat wan stret ansa nomo long kwestin ya. Hae God we i gat paoa mo waes blong wokem heven mo wol, hem nao i givim save ya long Moses. Samting ya i pruvum tok we Baebol hem wan i talem, se Baebol i “kamaot long God fastaem.”—2 Timoti 3:16.
[Ol futnot]
a Wan grup blong ol Protestan long taem blong yumi we oli bilif se yumi no mas putum mining long ol tok blong Baebol, be yumi mas ridim olsem we i stap nomo.
b Long saed blong faswan “dei,” long lanwis Hibru oli yusum tok ya ʼohr we i minim laet no delaet. Be long namba fo “dei” oli yusum tok ya ma·ʼohrʹ we i minim stamba blong laet ya.
c Bilif ya se laef i stat long wan smol samting mo i stap jenis gogo i kam olgeta laef samting.
?YU YU BIN TINGBAOT?
◼ ?God i wokem heven mo wol hamas yia bifo long taem blong yumi?—Jenesis 1:1.
◼ ?God i wokem wol ya long sikis dei we wanwan long olgeta i gat 24 aoa nomo?—Jenesis 2:4, NW.
◼ ?Wanem i save mekem se Moses i raetemdaon ol tok we i laenap gud wetem save blong ol saentis long saed blong stat blong wol ya?—2 Timoti 3:16.
[Tok blong makem poen long pej 25]
Jenesis i no tijim se God i wokem ol samting long heven mo wol long wan sot taem long ol yia we oli pas i no longtaem
[Tok blong makem poen long pej 26]
“Fastaem, bifo olgeta, God i wokem heven mo wol.”—Jenesis 1:1, NW
[Foto Credit Line blong pija long pej 24]
Universe: IAC/RGO/David Malin Images
[Foto Credit Line blong pija long pej 26]
NASA photo