?I Tru Se Ol Man Ya Oli Laef Longtaem Olsem?

Baebol i talem se Adam i ded taem hem i gat 930 yia, Set i ded taem hem i gat 912 yia, mo Metusela i ded taem hem i gat 969 yia—sipos Metusela i laef 31 yia moa bambae hem i kasem 1,000 yia blong hem. (Jenesis 5:5, 8, 27) ?Yia blong olgeta ya oli prapa yia olsem we yumi kaontem tede? ?No maet ol yia blong bifo i minim manis nomo, olsem sam man i talem?

I gat plante pruf insaed long Baebol we oli soemaot se ol yia ya oli ol prapa yia sem mak long tede. Tingbaot samting ya: Sipos longfala blong wan yia bifo i olsem longfala blong wan manis tede, hemia i min se ol man bifo oli gat pikinini taem we oli yang nomo. I olsem se man ya Kenan i karem pikinini bifo we hem i gat sikis yia, mo Mahalalel mo Inok tufala i gat pikinini jes afta we tufala i gat faef yia nomo, hemia i narakaen lelebet.—Jenesis 5:12, 15, 21.

Antap long hemia, ol olfala bifo oli makemgud ol dei mo manis mo yia se wan i defren long narawan. (Jenesis 1:14-16; 8:13) Ol dei mo yia we Noa i tokbaot oli halpem yumi blong faenemaot se wan manis bifo i longwan olsem wanem. Skelem Jenesis 7:11, 24 mo Jenesis 8:3, 4. Ol vas ya oli soemaot se faef manis, stat long namba 17 dei blong namba 2 manis i go kasem namba 17 dei blong namba 7 manis, i gat 150 dei evriwan. Taswe, hemia i soemaot klia se taem Noa i tokbaot manis, hem i minim manis we i gat 30 dei long hem, mo 12 manis ya tugeta i mekem wan yia.—Jenesis 8:5-13.a

?Be weswe ol man ya oli save laef bitim 900 yia olsem? Baebol i talem se God i wokem man blong oli laef olwe. Sin blong Adam nao i mekem we olgeta man we oli kamaot biaen long hem oli no moa stretgud olgeta mo oli stap ded. (Jenesis 2:17; 3:17-19; Rom 5:12) Ol man we oli laef bifo we Bigfala Wota i ron, oli klosap moa long taem ya we Adam i bin stretgud olgeta we i no gat sin, mo ating hemia i wan bigfala samting we i mekem se oli laef longtaem. Tingbaot Metusela, hem i namba eit smol bubu blong Adam, hemia i no longwe nating long taem blong Adam.—Luk 3:37, 38.

Be, i no longtaem bambae Jeova God i finisim nogud frut blong sin blong Adam. Nao evri man we oli soemaot bilif long blad blong Pikinini blong hem, Jisas Kraes, bambae oli no moa gat sin. “Ol man we oli stap mekem sin, pei blong olgeta, bambae oli ded from, be ol man we oli joen long Jisas Kraes, Masta blong yumi, presen we God i stap givim i go nomo long olgeta, hemia laef ya we i no save finis.” (Rom 6:23) !Yes, i gat taem i stap kam we bambae yumi save talem se 969 yia blong Metusela i smol nomo!

[Futnot]

[Tok blong pija long pej 30]

(Lukluk niuspepa)

1000

Metusela

Adam

Set

900

800

700

600

500

400

300

200

100

Yia blong man tede