?Baebol i Tokbaot Wanem?
SAMFALA oli ting se Baebol i wan buk blong histri from we hem i tokbaot ol samting we God i mekem long ol man plante taosen yia bifo. Sam narafala oli ting se Baebol i wan buk blong ol rul long saed blong fasin we i stret mo fasin we i no stret. Oli talem olsem from ol loa mo rul we God i givim long neson blong Isrel, we i gat bitim 600 long olgeta. Long ol loa ya, i gat olgeta we oli blong stretem ol defren bisnes long kot, olgeta we ol famle oli mas folem, ol loa long saed blong fasin we i stret mo fasin we i no stret, mo ol loa long saed blong wosip. Mo sam narafala man bakegen oli ting se Baebol i wan buk we i soemaot tingting blong God mo i lidim man blong i frengud wetem God.
Evri tingting blong ol man ya oli stret. Baebol i tokbaot hem wan i se: “Olgeta tok blong Baebol oli kamaot long God fastaem. Hem i putum long tingting blong ol man ya bifo, nao oli raetem long buk. Ol tok ya i stret gud blong tijim yumi long ol trutok, mo blong blokem ol krangke tok. Mo i stret gud blong stretem ol krangke fasin, mo blong tijim yumi long ol stret fasin. Ol tok ya, God i givim blong bambae yumi ol man blong hem yumi save kam waes long olgeta samting, nao bambae yumi savegud ol rod blong mekem ol gudfala wok.” (2 Timoti 3:16, 17) I tru, evri toktok insaed long Baebol, wetem ol stori blong ol samting we oli hapen bifo, ol loa, mo ol advaes long saed blong spirit, oli impoten tumas.
Be Baebol i no wan buk we i jes givim ol gudfala save blong halpem yumi nomo. I no gat narafala buk we Jeova God nao i pusum sam man blong raetem, Baebol nomo. Baebol i givim ol advaes we i kamaot long God mo we i givhan gud long man long evri dei laef blong hem. Mo tu, hem i soemaot stamba tingting blong Jeova long saed blong wol mo ol man, mo olsem wanem bambae hem i finisim ol samting we i mekem man i safa. Samting we i moa impoten, hemia se Baebol i eksplenem we Setan i minim nomo blong spolem nem blong God, mo Baebol i talem olsem wanem God bambae i stretem bisnes ya long heven mo long wol.
Setan i Talem Se God i Man Blong Giaman Mo i Wan Rabis King
Baebol i talem se God i wokem faswan man mo woman, Adam mo Iv, we bodi mo tingting blong tufala i stretgud olgeta, mo i putum tufala long wan naesfala ples. Hem i putumap tufala blong tufala i lukaot long ol samting long wol mo ol anamol. (Jenesis 1:28) Adam mo Iv tufala i pikinini blong God. Taswe sipos tufala i obei long Papa blong tufala long heven, tufala i gat janis blong laef olwe long wol. I gat wan samting nomo we Jeova i putum tabu long hem. Hem i talem long tufala se: “Olgeta tri long ples ya, yu yu save kakae frut blong olgeta. Wan tri nomo i stap we i tabu blong yu kakae frut blong hem. Hemia tri ya we frut blong hem i save mekem yu yu save ol fasin we i gud, mo ol fasin we i nogud. Tri ya, sipos yu kakae frut blong hem, be long sem dei nomo, bambae yu ded.”—Jenesis 2:16, 17.
Be wan spirit man we Baebol i kolem Setan, i talem defren, i se: “Yutufala i no save ded.” (Jenesis 3:1-5) Taem Setan i talem tok ya, i olsem we hem i talem se God ya we i Wokem olgeta samting i giaman, fasin blong Hem blong rul i no stret, mo se laef blong ol man bambae i gud moa sipos God i no rul long olgeta. Setan i mekem Iv i bilif se sipos hem i no obei long God, bambae hem i kam fri mo hem i save jusum blong mekem samting we hem nomo i wantem. !Setan i talem se bambae Iv i ‘kam olsem God’! Taswe Setan i spolem gudnem blong Jeova mo i agensem stamba tingting blong hem.
Tok we Setan i talem i mekem plante bigbigfala samting i kamaot. Blong talem stret, stamba tok blong Baebol, hemia tingting blong Jeova blong mekem nem blong hem i kam klin bakegen. Tingting ya i kamaot long prea we Jisas i tijim long ol man blong hem, we plante taem ol man oli kolem Lodsprea no Prea blong Masta. Jisas i tijim ol man blong hem blong prea se: “Nem blong yu i tabu. Plis, yu mekem kingdom blong yu i kam. Plis yu mekem samting we yu yu wantem i kamaot long wol.”—Matiu 6:9, 10, NW.
?Olsem Wanem God i Mekem Se Nem Blong Hem i Kam Klin?
Setan i mekem se ol impoten kwestin ya oli kamaot: ?Hu i talem trutok, Jeova no Setan? ?Fasin blong Jeova blong bos long ol samting we hem i wokem, i stret mo i gud? ?Hem i gat raet blong askem ol man blong oli obei long hem? ?Sipos ol man oli rul long olgeta bakegen, laef blong olgeta bambae i kam moagud? Blong ansa long ol kwestin ya, Jeova i letem ol man blong oli rul long olgeta blong smoltaem.
?Wanem frut i kamaot from? Stat long faswan giaman tok ya long Iden, kam kasem tede, laef blong ol man i fulap long hadtaem mo fasin safa. Hemia i pruvum se Setan i wan bigfala man blong giaman mo se taem man i folem prapa tingting blong hem nomo, hem i kasem trabol. Be from we Jeova i gat lav mo i gat bigfala waes, hem i wantem mekem nem blong hem i kam klin bakegen. Blong mekem olsem, bambae hem i yusum Kingdom blong Mesaea blong stretem olgeta trabol we i stat long Iden. ?Kingdom ya hem i wanem?
God i Yusum Kingdom Blong Stretem Ol Trabol
Oltaem nomo plante milian man oli talem Lodsprea baehat. Be i gud we yu tekem smoltaem blong tingbaot mining blong prea ya. Tingbaot tok ya: “Yu mekem kingdom blong yu i kam.” (Matiu 6:10, NW) Kingdom ya i no wan fasin we i stap long hat blong man, olsem we samfala oli stap talem. Defren olgeta, tok ya “king” i soemaot se kingdom i wan gavman we i stap long heven long han blong Jisas Kraes, we i “King blong olgeta king.” (Revelesen 19:13, 16; Daniel 2:44; 7:13, 14) Baebol i tijim se Jisas bambae i rul antap long fulwol, bambae i putumap pis i stap blong olwe, bambae i mekem ol man oli joengud, mo bambae i tekemaot olgeta rabis fasin long wol. (Aesea 9:6, 7; 2 Tesalonaeka 1:6-10) Long rod ya, i no gavman blong man, be i Kingdom blong God, we bambae i mekem ol tok ya blong Jisas oli kamtru, we i se: “Yu mekem samting we yu yu wantem i kamaot long wol.”
Blong meksua se ol tok ya oli kamtru, Jisas i givim laef blong hem olsem wan ransom, mo i pemaot ol pikinini blong Adam blong oli fri long sin mo ded. (Jon 3:16; Rom 6:23) Taswe, aninit long Kingdom blong God, olgeta we oli soem se oli bilif long sakrefaes blong Jisas, bambae oli luk se sin blong Adam i no moa spolem ol man mo sloslo bambae oli kam stretgud olgeta. (Ol Sam 37:11, 29) Bambae i no moa gat ol samting we oli save blokem yumi, antap moa taem yumi stap kam olfala. Ol trabol long saed blong filing tu we sik mo ded i karem long man bambae oli “lus olgeta.”—Revelesen 21:4.
?Olsem wanem yumi save sua se God bambae i mekem ol promes blong hem oli kamtru? Yumi save sua from we plante handred profet tok long Baebol oli kamtru finis. (Lukluk pej 9.) Taswe, i klia se taem yumi bilif long Baebol, i no from we yumi jes agri nomo long evri samting we hem i talem no from we yumi wantem nomo se oli kamtru. Nogat. Yumi bilif from we bilif ya i stanap long stret save mo ol pruf.—Hibrus 11:1.
Ol Advaes We Oli Wokgud Long Taem Blong Yumi
Baebol i givim wan strong fandesen long ol promes we bambae oli kamaot long fiuja, we yumi save putum tingting blong yumi i stap strong long olgeta. Mo hem i givhan long yumi tu blong yumi save haremgud long laef blong yumi tede. Olsem nao, Tok blong God i givim ol nambawan advaes long saed blong mared, famle laef, fasin fren wetem ol narafala, rod blong faenem trufala glad, mo plante narafala samting bakegen. Bambae yumi lukluk sam long ol advaes ya.
◼ Tingtinggud bifo we yu toktok. “Ol tok nogud we man i sakem we i no tingbaot i save mekem narafala man i harem nogud, olsem we naef blong faet i stikim hem, be tok we i waes i save mekem man i harem gud bakegen.”—Ol Proveb 12:18.
◼ Blokem fasin jalus we i no stret. “Sipos tingting blong man i stap kwaet oltaem, hemia bambae i mekem bodi blong hem i stap gud. Be jalus i olsem sik ya kansa we i save spolem bodi blong man.”—Ol Proveb 14:30.
◼ Stretem pikinini blong yu. “Sipos yu tijimgud pikinini blong yu long fasin we i stret blong hem i folem, taem hem i kam bigman, bambae i no save gowe long hem.” “Pikinini we papa blong hem i no stretem hem, i letem hem i stap mekemhed, mo i stap folem tingting blong hem nomo, hem bambae i mekem papa mo mama blong hem, tufala i sem bigwan.”—Ol Proveb 22:6; 29:15.
◼ Fogivim narafala. Jisas i talem se: “Olgeta we oli gat sore long man, oli save harem gud, from we God bambae i gat sore long olgeta.” (Matiu 5:7) Waes King Solomon i raetem se: “Man we i lavem narafala man, hem i save fogivim hem from ol samting nogud we hem i mekem long hem.” (Ol Proveb 10:12) Sipos wan man i mekem sin agensem yu we i bigwan tumas mo we yu no save fogivim mo fogetem, Baebol i givim advaes ya se: “Yu mas go luk hem, nao taem yutufala nomo i stap, yu mas talemaot long hem, samting nogud ya we hem i mekem.”—Matiu 18:15.
◼ Blokem fasin ya blong laekem mane tumas. “Fasin blong laekem mane tumas, hem i stamba blong olgeta fasin nogud. Mo i gat sam man we oli strong blong folem fasin ya, nao oli . . . stap mekem ol samting we olgeta tu oli harem nogud tumas from.” (1 Timoti 6:10) Makemgud se Baebol i no tok agensem mane, be agensem “fasin blong laekem mane tumas.”
Wan “Leta” We i Kam Long Papa Blong Yumi Long Heven
Taswe, Baebol i wan buk we i tokbaot plante samting. Olsem we yumi bin luk, hem i tokbaot moa long saed blong God mo stamba tingting blong hem. Be hem i tokbaot yumi ol man tu, mo olsem wanem yumi save haremgud long laef blong yumi naoia mo blong olwe aninit long rul blong Kingdom blong God. Yumi save talem se Baebol i olsem wan leta we i kam long ‘Papa blong yumi long heven,’ Jeova. (Matiu 6:9) Tru long leta ya, Jeova i serem ol gudgudfala tingting blong hem wetem yumi mo i soemaot samting we hem i wantem mo ol nambawan fasin blong hem.
Taem yumi ridim Baebol mo yumi tingting dip long hem, yumi stat blong “luk” God, i min se yumi luksave se hem i olsem wanem. Samting ya i tajem hat blong yumi mo i pulum yumi blong kam klosap long hem mo lavem hem. (Jemes 4:8) I sua se Baebol i no wan buk we i tokbaot histri, profet tok, mo ol loa nomo. Hem i tokbaot fasin fren tu, hemia fasin fren blong yumi wetem God. Samting ya i mekem se i no gat wan narafala buk we i olsem Baebol, mo se hem i wan buk we i sas tumas.—1 Jon 4:8, 16.
[Tok blong makem poen long pej 19]
Long fashaf blong prea blong Jisas, hem i yusum ol gudfala tok blong talemaot stamba tok blong Baebol
[Bokis/Foto blong pija long pej 21]
ROD BLONG FOLEM TAEM YUMI RIDIM BAEBOL
Baebol i wan buk we i pulum intres blong man. Blong talem stret, plante man oli savegud ol stori blong Baebol mo ol tijing blong hem long saed blong fasin blong man. From samting ya, long plante kantri ol man oli yusum ol stori mo ol tijing ya taem oli raetem ol buk blong olgeta. Baebol i givhan long yumi blong kasem save long God ya we i wokem yumi, Jeova. Mo tu, hem i stamba blong ol waes ya we oli wok gud. Wan waestok blong Baebol i talem se: “Waestok ya, hem i nambawan samting blong yu yu kasem. I nomata wanem samting we yu yu gat, be yu mas kasem fasin ya blong luksave mining blong ol samting we i had.” (Ol Proveb 4:7) ?Sipos yu ridim Baebol, olsem wanem samting ya i save givhan long yu?
Traem blong mekem se yu ridim Baebol long ol taem ya we tingting blong yu i wekapgud. Mo taem yu rid, yu no mas hareap blong gotru long ol pej. Yu mas traem blong fulumap tingting blong yu wetem ol tingting blong God mo blong kasem save long olgeta. Afta we yu ridim haf we yu mas ridim long wan dei, tingting long samting we yu jes ridim, mo skelem wetem save we yu gat finis. Hemia bambae i mekem se yu kasem save moa long Baebol mo yu glad moa long hem.—Ol Sam 143:5.
Maet samfala oli askem se: “?Weples long Baebol we mi mas stat blong ridim?” I tru se yu save stat long faswan buk blong Baebol. Be samfala we oli ridim Baebol blong faswan taem, oli luk se i moa isi blong stat long ol Gospel, hemia Matiu, Mak, Luk, mo Jon, we oli tokbaot stori blong laef blong Jisas mo wok we hem i mekem blong talemaot gud nius. Biaen, samfala oli gohed blong ridim ol naesfala toktok mo ol waestok long buk blong Ol Sam, Ol Proveb, mo Prija. Afta long hemia, ating bambae yu harem se yu wantem tumas blong ridim ol narafala haf blong Baebol. (Lukluk haf we i stap daon.) Yu no mas karem giaman tingting ya se yu nidim blong ridim haf ya nomo blong Baebol we oli kolem Niutesteman. Tingbaot se, ‘olgeta tok blong Baebol oli kamaot long God [mo oli] stret gud blong tijim yumi.’—2 Timoti 3:16.
Wan gudfala rod blong stadi Baebol, hemia blong stadi long wanwan tijing blong hem. Olsem nao, tingbaot buk ya, ?Wanem Samting We Baebol i Rili Tijim?, we ol Witnes blong Jeova oli yusum long wok blong prij blong givhan long ol man blong stadi Baebol. Long buk ya, i gat ol gudfala haf we oli stretgud long taem blong yumi tede, olsem: “?Olsem Wanem Blong Mekem Famle Blong Yu i Hapi?,” “Wosip We God i Agri Long Hem,” mo “?Ol Dedman Oli Stap Wea?”—Lukluk bokis long pej 18.
[Bokis blong pija long pej 21]
RIDIM BAEBOL FOLEM OL TIJING
God i wokem man mo man i foldaon long sin Jenesis
Isrel i kam wan neson Eksodas kasem Dutronome
Ol stori we oli pulum tingting blong man from we i gat aksen long olgeta Josua kasem Esta
Ol naesfala toktok mo singsing we i tajem filing blong man Job, Ol Sam, Sing blong Solomon
Ol waes fasin blong laef Ol Proveb, Prija
Profet tok mo ol gudfala fasin blong lidim yumi Aesea kasem Malakae mo Revelesen
Laef blong Jisas mo tijing blong hem Matiu kasem Jon
Kristin skul i stat mo i kam bigwan Ol Wok
Ol leta we oli go long ol kongregesen Rom kasem Jud