Wota We i Lidim Man Blong Kasem Laef
Jisas i pastru long Sameria, hemia long not blong Jerusalem. Hem i taed mo i tosta. Taem hem i stap sidaon klosap long wan wel, hem i askem wota long wan woman Sameria. Woman ya i sek se wan man Jiu i askem wota long hem, from we long faswan handred yia, ol man Jiu wetem ol man Sameria oli badfren.
Woman ya i sapraes nao i askem long Jisas se: “!Ei! Yu yu wan man Judia ya. Mo mi mi wan woman Sameria. ?Olsem wanem yu askem wota long mi?”
Jisas i ansa se: “Yu yu no save wanem samting God i wantem givim long yu. Mo yu no save mi tu, we mi talem long yu se, ‘Yu givim smol wota long mi.’ Sipos yu yu save, bambae yu save askem wota long mi, nao mi bambae mi save givim wota long yu we i gat laef long hem.”
Jisas i gohed moa, i eksplenem long woman ya se: “Man we i dring wota blong wel ya bambae i save tosta bakegen. Be man we i dring wota ya we mi bambae mi givim long hem, bambae hem i no save tosta bakegen samtaem. Wota ya we mi bambae mi givim long hem i save kam olsem wan springwota we i save ron oltaem insaed long hem, blong givim laef ya long hem we i no save finis.”—Jon 4:1-15.
?Jisas i stap tokbaot wanem wota?
BAEBOL i kolem God ya we i Wokem olgeta samting, Jeova, se “springwota, we i save givim laef.” (Jeremaea 2:13) Laef i wan presen blong God, mo blong stap laef, yumi mas tekem wota ya we God i givim long yumi, hemia prapa wota mo wota we Jisas i tokbaot tu.
Tede, bitim bifo, yumi nidim moa blong faenem ol ansa blong ol impoten kwestin long saed blong laef. Tru ya, yumi save talem se plante man oli tosta from we oli no save faenem save long ol impoten kwestin ya. Oli wantem tumas blong kasem ansa blong ol kwestin olsem: ?Ol dedman oli stap wea? ?Bambae yumi save joen bakegen wetem olgeta samtaem? ?From wanem God i letem fasin safa i stap? ?Long fiuja bambae i no moa gat faet, raf fasin, kakae i sot, mo ol sik? Ol Witnes blong Jeova oli bilif se yumi save faenem ol gudfala ansa blong ol kwestin ya insaed long Tok blong God, Baebol, we i olsem “wota” blong mekem man i harem gud.
Olsem yumi bin tokbaot fastaem finis, taem Jisas i toktok long woman Sameria long wel, hem i tokbaot wota blong trutok we i save givim laef mo we yumi save faenem insaed long Tok blong God. Ol Witnes blong Jeova oli singaot yu blong yu kam dring klin wota ya blong trutok. Yu save luk tok ya blong singaot yu yu kam, long laswan buk blong Baebol, we i talem se: “Yufala we i tosta, yufala i kam. Yufala we i wantem dring, yufala i kam tekem wota ya blong laef, we i olsem presen blong yufala.”—Revelesen 22:17.
Blong lanem moa olsem wanem Kingdom blong God bambae i givhan long ol man, yu save storian wetem ol Witnes blong Jeova long ples blong yu, no yu save raet i kam long wan long ol adres we oli stap long pej 5. Mo tu, yu save luk long Intenet long Web saet ya www.watchtower.org
[Bokis blong pija long pej 8, 9]
?OL SKUL OLI GIVIM WOTA BLONG TRUTOK LONG OL MAN?
Yumi no save faenem wota blong trutok sipos yumi jes go long jos nomo, no sipos yumi talem nomo se yumi man blong skul. I klia se, plante mama skul tede oli ademap moa problem long ol man i bitim we oli stretem ol problem. Tingbaot eksampol ya: Long taem blong faet, ol Katolik oli kilim ol narafala Katolik, ol Protestan oli kilim ol narafala Protestan. !Be tufala saed ya tugeta, i askem long God blong givhan long tufala long taem blong faet, blong oli save win!
Mo tu, plante ripot i soemaot nogud fasin blong ol jos, olsem rabis fasin long saed blong seks we ol lida blong skul oli mekem long ol pikinini, mo oli stilim mane blong jos tu. I tru tumas se wota we bighaf blong ol skul oli stap givimaot i doti. (Revelesen 17:4-6; 18:1-5) Long Taetas 1:16, Baebol i tokbaot fasin blong olgeta ya, i se: “Ol man ya oli stap talem se oli save God, be ol fasin we oli stap mekem, i soemaot we tok ya blong olgeta i no tru.” Plante long ol skul ya oli no mekem wan samting nating blong givimaot wota blong trutok long ol man we oli tosta.
[Bokis/Tok blong pija long pej 9]
Buk ya ?Wanem Samting We Baebol i Rili Tijim? we i gat 19 japta blong hem, i eksplenem ol ansa we Baebol i givim long ol kwestin olsem:
“?Wanem Stamba Tingting Blong God Long Saed Blong Wol Ya?”
“?Ol Dedman Oli Stap Wea?”
“?Yumi Stap Finis Long ‘Ol Las Dei’?”
“?From Wanem God i Letem Man i Safa?”
[Tok blong pija long pej 9]
Yu save faenem ‘wota blong trutok’ long Haos Kingdom we i stap klosap long ples blong yu