Wol i Fulap Long Ol Laef Samting
WOL ya i ples blong plante milian defdefren kaen laef samting. Bighaf blong ol laef samting ya we oli stap long graon, long win, mo long wota, yumi no save luk olgeta stret long ae blong yumi. Tingbaot samting ya: Sipos yu tekem wan gram nomo blong graon, be insaed long smol graon ya i gat 10,000 defren kaen smosmol bebet i stap, mo i gat plante narafala smosmol laef samting i stap we i nidim strongfala glas blong luk olgeta. Ol man oli bin digim graon i godaon kasem 3 kilometa, mo oli faenem se i gat plante smosmol laef samting oli stap long ples ya tu.
Win we i stap raonem wol, hemia tu i gat fulap fulap laef samting i stap long hem, mo ol laef samting ya i no minim nomo ol anamol olsem pijin, flaengfokis, flae mo narafala anamol we yumi save luk wetem ae blong yumi. I gat sam taem blong yia we win i fulap long ol sid mo paoda blong ol flaoa mo tri, mo long sam ples, win i fulap long defdefren kaen smosmol bebet we i nidim strongfala glas blong luk olgeta. Wan buk we oli kolem Scientific American, i talem se “namba blong ol bebet we oli stap long win, klosap i sem mak olsem namba blong ol bebet we oli stap long graon.”
Solwota i ples we man i no gat plante save yet long hem, from we oli mas yusum ol spesel mesin we praes blong olgeta i sas tumas, blong godaon long dip solwota. Tingbaot ol rif, we i no hadwok tumas long man blong go lukluk olgeta. Nating se oli mekem plante stadi finis long ol rif, be i gat plante milian laef samting we ol man oli no faenemaot yet long ol rif ya, mo oli no gat save long olgeta yet.
I tru se save blong yumi i smol yet. Be i gat wan samting we yumi save long hem, hemia se ol laef samting we oli stap long wol ya oli plante we plante tumas, mekem se oli stap jenisim ol samting insaed long win, wota, mo graon we oli laef long hem. Blong kasem save long samting ya, tingbaot ol sel mo korel long solwota we oli mekem wan samting we oli kolem calcium carbonate. Samting ya i givhan blong mekem se, oltaem, solwota i stret blong ol laef samting oli save stap long hem. Wan ripot (we oli kolem U.S. National Oceanic and Atmosperic Administration) i talem se wok we calcium carbonate i mekem long solwota i “sem mak long wok we meresin ya antacid i mekem taem i gat tumas konkon wota long bel blong yumi.” Ol gras mo nalumlum long solwota, olsem smol nalumlum ya we oli kolem phytoplankton we i stap flot nomo antap long solwota mo lek, ol samting ya tu oli gat wok blong skelem hamas carbon dioxide mo oksijen i stap long wota mo long win. Mo long graon, i gat ol smosmol bebet mo nalumlum tu we wok blong olgeta i blong tantanem ol lif mo samting we oli ded, i kam gudfala graon blong fidim ol tri mo flaoa. Tru ya, wol i rili wan ples we laef i fulapgud long hem.
Be blong mekem we i save gat laef long wol, i nidim ol loa we oli stret gud blong holem ol samting i stapgud. Plante long ol loa ya, yumi ol man yumi jes kasem save long olgeta long ol yia 19 handred. Tingbaot sam long ol samting ya we oli wokgud from we i gat loa i holem olgeta:
1. Ples we wol i stap long hem long galaksi ya Milky Way, fasin blong hem blong raonem san, blong lei smol, spid blong hem blong i tantanem hem wan, mo mun we i stap goraon long hem
2. Win we i stap raonem wol, nem blong hem atmosphere, mo paoa we i olsem magnet we i stap raon long wol ya, nem blong hem magnetic field, tufala samting ya i protektem wol ya olsem wan sil
3. Wota i plante
4. Fasin we wol i stap folem blong i klinim hem wan mo mekem ol samting i kam niuwan bakegen
Taem yu ridim save long saed blong olgeta samting ya, long ol nekis haf we i kam, i gud yu tingbaot ol kwestin ya se: ‘?Ol nambawan samting ya long saed blong wol oli kamaot from laki nomo, no wan man we i gat waes i wokem olgeta? ?Sipos i tru se i gat wan Man i stap we hem nao i wokem olgeta samting ya, ale from wanem hem i wokem olgeta?’ Laswan haf blong storian blong yumi long saed blong wol, bambae i ansa long kwestin ya.