Mi Wantem Tumas Blong Talem Long Olgeta Se, “!Yumi Evriwan i Stap!”

Abigail Austin i talem stori ya

Long wan naesfala dei long Eprel, 1995, mifala plante lelebet long wan kongregesen blong ol Witnes blong Jeova long Inglan, mifala i plan blong go long ples we i afsaed long taon. Long taem ya mi mi gat naen yia nomo. Ale mifala evriwan i go long trak blong ron i go long ples ya. Long trak blong mifala i gat bigfala sista blong mi Sarah mo wan fren we nem blong hem Deborah, wetem papa mo mama blong mi. Wantaem nomo, wan trak we i ron long rong saed blong rod, i spid i kam mo i sperem mifala. Mi nomo mi laef.

TU WIK biaen, mi wekap mo mi luk se mi stap yet long hospital. Long aksiden ya, bun blong hed blong mi i brobrok, mekem se ol dokta oli putum sam aean long hem blong i joen gud. Nating se i olsem, kwiktaem nomo mi mi kam gud. Biaen ol famle blong mi oli talem long mi samting we i hapen, be mi mi no bilivim olgeta. Mi stap tingting se papa mama blong mi mo sista blong mi oli kam luk mi taem mi stap slip, mo mi no luk olgeta. Taem mi gobak long haos, mi jes luksave se samting we ol famle oli talem i tru. Mi harem nogud tumas.

?Wanem i givhan long mi taem nogud samting ya i hapen?

Papa Mama i Tijim Gud Mi Long Saed Blong Jeova God

Long famle, mifala faef pikinini evriwan mo mi mi lasbon. Long taem blong aksiden Sarah i gat 22 yia blong hem, Shane i gat 20 yia, Jessica i gat 17 yia, mo Luke i gat 15 yia. Papa mama blong mifala i lukaot gud long mifala. Papa blong mi, Steve, hem i wan elda long Kongregesen blong ol Witnes blong Jeova long West Yorkshire, long Shipley. Ol memba blong kongregesen oli laekem hem tumas from we oltaem hem i tekem taem blong lesin long olgeta mo givhan long olgeta. Ol memba blong kongregesen oli laekem tumas mama blong mi tu. Nem blong hem Carol. Hem i lukaot long ol olfala long kongregesen olsem se hem i gel blong olgeta. Hem i singaot mifala ol yangfala long kongregesen blong mifala i joen wanples, blong mifala i fren gud tugeta. Evriwan long kongregesen oli glad blong kam long haos blong mifala. Papa mama blong mifala oli tijim mifala blong gat kaen fasin mo blong tingbaot ol man raonabaot long mifala.

Evri wik long Wenesde naet, mifala evriwan long famle i joen wanples blong stadi Baebol. Samtaem mifala i aktem samting we i hapen long ol stori blong Baebol mo mifala i putum ol klos olsem ol man bifo. Taem mifala i smol yet, Papa mo Mama tufala i tijim mifala blong rerem ol miting blong kongregesen, mo oli tijim mifala olsem wanem blong talemaot tok blong Baebol long ol man long haos blong olgeta. Nating se oli gat plante wok blong mekem blong lukaot long mifala faef pikinini, oltaem oli spenem taem wetem mifala mo oli givhan long mifala blong fren gud wetem Jeova.

Taem Sarah, Shane, mo Jessica oli finisim skul, oli mekem wok blong paenia, hemia Kristin wok ya blong prij fultaem. Fren blong mifala, Deborah, hem tu i mekem wok ya. Mi mi fren gud wetem Sarah. Hem i lukaot long mi olsem se hem tu i mama blong mi. Taem mi spel long skul, mi spenem plante taem wetem hem long wok ya blong givhan long ol narafala blong save Baebol. Mi mi laekem tumas blong mekem olsem. Mi luksave se olgeta we oli mekem wok blong paenia oli glad bigwan, mo mi mi harem gud taem mi stap wetem olgeta. Mi mi wantem mekem wok blong paenia wetem Sarah taem mi mi finisim skul.

Long taem blong spel, plante taem famle blong mi mo sam narafala long kongregesen, mifala i mekem sam samting tugeta. Ol yangfala mo ol olfala oli fren gud mo oli laeklaekem olgeta. !Long taem ya, mi no save se ol gudfala fren ya bambae oli givhan bigwan long mi mo leftemap tingting blong mi bigwan long ol yia biaen!

Afta Long Aksiden

Taem mi aot long hospital, mi gobak long haos blong mifala. Shane mo Jessica, tufala i wok haftaem mo tufala i joen long wok blong prij fultaem. Tufala i wok had blong lukaot long mifala evriwan.

Plante Witnes long kongregesen blong mifala, oli givhan long mifala. !Oli mekem plante plante samting blong mifala! Oli kukum kakae blong mifala, oli klinim haos, oli pem samting long stoa, mo oli wasem klos blong mifala. Oli mekem ol samting ya go kasem taem we mifala i naf blong lukaot long mifala. Mifala i wantem talem tangkiu tumas long olgeta from ol samting we oli mekem blong givhan long mifala. Ol Witnes long ol defdefren ples oli tingbaot mifala nao oli sanem ol leta mo ol presen long mifala. Samting ya i soemaot bigfala lav blong ol Kristin brata sista long ogenaesesen blong Jeova.

Wan yia afta long aksiden, tufala brata mo sista blong mi oli mekem desisen se i moagud mi go stap wetem wan famle we i save lukaot gud long mi. Sam famle long kongregesen oli gat kaen fasin, mo oli glad blong givhan long mifala long rod ya. Ale mi wetem tufala brata mo sista blong mi, mifala i sidaon mo storian wanples. Mifala i traem tingbaot sipos Papa mo Mama i stap, wanem samting bambae tufala i luk se i gud blong mekem blong givhan long mi mo long fasin fren blong mi wetem Jeova. Ale i gat wan famle we mifala i luk se bambae i stret blong oli lukaot long mi. Hemia Billy mo woman blong hem Dawn, wetem gel blong tufala Lois, we i gat faef yia blong hem. Billy i wan elda long kongregesen, mo famle blong mifala i fren gud wetem olgeta longtaem finis. Oli glad blong mi stap wetem olgeta, mo kam kasem naoia, oli lukaot long mi olsem stret pikinini blong olgeta. Lois i neva jalus long mi, nating se papa mama blong hem i lukaot long mi mo spenem taem wetem mi tu. Mo tede, mitufala i fren gud olsem se mitufala i stret sista nomo.

Samting We i Givhan Long Mi Taem Nogud Samting Ya i Hapen

Fastaem, mi stap traem tingbaot from wanem nogud samting ya i hapen long famle blong mifala. Papa mama blong mi, Sarah mo Deborah, oli lavem Jeova tumas mo oli lavem ol narafala man tu. Be biaen, mi tingbaot stori blong Job we i stap long Baebol. Job i gohed blong bilif strong long God nating se ol pikinini blong hem oli ded. (Job 1:19, 22) Mi tingbaot se, ‘Yes, Setan nao i stamba blong ol nogud samting we i hapen long wol mo hem i stamba blong ded tu. Bambae hem i glad sipos mifala i lego wok blong God from aksiden ya.’ (Jenesis 3:1-6; Revelesen 12:9) Mi tingbaot tu se, Jeova i lavem yumi tumas mo i mekem wan nambawan promes se bambae ol dedman oli laef bakegen. (Jon 5:28, 29) !Bambae mifala i luk ol famle blong mifala bakegen mo Deborah tu, hemia taem wol i kam paradaes! Blong talem stret, lav blong mi long Jeova i bigwan moa naoia i bitim bifo.

Taem mi storian wetem ol man we oli pastru long ol nogud samting we i hapen long laef blong olgeta, mi harem nogud from we oli no save se Baebol i tokbaot nambawan promes ya blong laef bakegen. Samting ya i mekem se mi wantem talemaot nambawan promes ya long olgeta. Mi save se samting we i givhan long mifala blong gat gudfala tingting long taem ya blong trabol, hemia Jeova nomo wetem ogenaesesen blong hem, mo ol nambawan promes ya blong Baebol.

Maet nogud samting ya we i hapen long mifala i save givhan long wan narafala rod tu. Maet i pulum sam papa mama blong oli askem se, ‘?Mitufala i tijim gud ol pikinini blong mitufala long saed blong Jeova? ?Sipos wan samting olsem i hapen long mitufala, bambae ol pikinini blong mitufala oli stanap strong, bambae oli gohed blong mekem wok blong Jeova nating se mitufala i no stap?’

Long laef blong mi, mi traehad blong folem samting we mi ting se Papa mo Mama oli wantem se mi mekem. Mi save se tufala i wantem we mi mi wok had blong givhan long ol narafala, olsem tufala i mekem. Taswe taem mi finisim skul, mi mi statem wok blong paenia, mo naoia Lois tu i mekem wok blong paenia wetem mi. Tufala brata mo sista blong mi oli mared, mo oli harem gud long wok blong Jeova long ol kongregesen we oli stap long hem.

!Tingting blong mi i stap strong long niufala wol mo taem ya we God bambae i mekem ol dedman oli laef bakegen! Bambae i no moa gat man i harem nogud mo bambae i no moa gat man i ded. (Revelesen 21:3, 4) Mi kasem paoa blong stanap strong from we mi save se wan dei bambae mifala evriwan i joen wanples bakegen. Mi mi wantem tumas blong putum han blong mi i goraon long Papa, Mama, Sarah, mo Deborah, mo bambae mi talem long olgeta se, “!Yumi evriwan i stap!”

[Tok blong pija long pej 23]

Abigail (sekenwan long lefsaed) naoia, wetem famle we i adoptem hem