STORI BLONG FRAN PEJ | ?BAEBOL I STRET YET TEDE?
Ol Gudfala Fasin We Oli Stap Oltaem—Lav
BAEBOL I TALEM SE: “Yufala i mas lavem ol man, from we fasin ya blong lavem man, hem i save joenemgud olgeta samting, blong oli kam wan.”—Kolosi 3:14.
SAMTING WE I KAMAOT: Taem Baebol i tokbaot lav, hem i no tokbaot lav we man i gat long wan woman, no fasin blong man mo woman blong harem gud tugeta. Be Baebol i tokbaot lav we i tru, we i pulum man blong i gat sore long narafala, i fogivim narafala, i mekem tingting blong hem i stap daon, i stap tru long narafala, i kaen, i kwaet, mo i mekem tingting blong hem i longfala. (Maeka 6:8; Kolosi 3:12, 13) Samtaem lav we man i gat long wan woman, i save lus taem ol yia oli pas, be lav we Baebol i tokbaot, hem i no save lus, hem i stap blong olwe.
Brenda, we i mared klosap 30 yia finis, i talem se: “Lav blong man mo woman we tufala i mared longtaem finis, i stap kam strong moa taem ol yia oli pas. Hemia i defren long lav blong man mo woman we i jes mared.”
Sam, we i mared bitim 12 yia finis, i talem se: “Oltaem mi mo woman blong mi, mitufala i sapraes blong luk se ol advaes blong Baebol oli gat paoa mo oli no strong tumas. Taem yu folem, olgeta samting i rongud. Be i gat samtaem we mi no stap folem olgeta, olsem taem mi kros, mi tingbaot mi nomo, mo taem mi taed. Long taem olsem, mi mas askem long Jehova blong i givhan long mi, blong mi sakemaot ol nogud tingting. Biaen, mi putum han blong mi i goraon long woman blong mi, nao mi harem olsem se i no gat eni samting i hapen.”
“Ol man we oli stap folem waes blong God, oli stap soemaot we waes ya i tru”
Jisas Kraes i talem se: “Ol man we oli stap folem waes blong God, oli stap soemaot we waes ya i tru.” (Matiu 11:19) Tok ya i soemaot se waes we i tru i stap long Baebol. Ol tijing blong Baebol mo ol gudfala fasin we hem i tokbaot, oli wok gud oltaem mo neva oli kam olfala. Oli hae moa i bitim kastom blong man mo kantri we hem i stap long hem. Mo taem yumi folem ol tijing ya mo yumi mekem ol gudfala fasin, ol man oli luksave klia se ol fasin ya oli kamaot long God ya we i wokem olgeta samting, hemia Jehova. Baebol i talem se i gud yumi ‘traem trastem Jehova, nao bambae yumi luk se hem i gud.’ (Ol Sam 34:8, NW) ?Bambae yu yu mekem olsem?