Taem Wan Papa No Mama i Ded

SAMTING WE I HAD

Dami i gat sikis yia taem papa blong hem i ded from sik ya aneurysm. Derrick i gat naen yia taem papa blong hem i ded from sik blong hat. Jeannie i gat seven yia taem mama blong hem i ded, afta we hem i safa wan ful yia from kansa blong ovari.a

Trifala yangfala ya, oli smol nomo taem oli lusum wan we oli lavem tumas. ?Samting olsem i hapen long yu tu? Sipos yes, haf ya bambae i givhan long yu blong harem gud bakegen.b Be fastaem, bambae yumi luk sam samting we i save kamaot taem man i harem nogud.

SAMTING WE YU MAS SAVE

I gat plante rod we man i soemaot se hem i harem nogud. I min se fasin we yu mekem blong soemaot se yu harem nogud, i defren long fasin we narafala i mekem. Buk ya Helping Teens Cope With Death i talem se: “I no gat wan rul we man i folem blong soemaot fasin we hem i mas mekem taem hem i harem nogud from wan we i ded.” Samting we i impoten se, yu no mas haedem ol filing blong yu. ?From wanem? From we . . .

Taem yu haedem ol filing, yu spolem yu wan. Jeannie, we yumi tokbaot finis, i se: “Mi ting se mi mas strong blong givhan long smol sista blong mi. Taswe mi haedem ol filing blong mi. Kasem naoia, mi stap haedem yet ol filing blong mi. Be hemia i no givhan long helt blong mi.”

Ol man we oli stadi long saed ya tu oli agri. Buk ya The Grieving Teen i talem se: “Yu no save blokem ol filing blong yu blong olwe.” Hem i gohed i se: “Bambae ol filing ya oli kambak bakegen mo oli save mekem se yu kros, o yu sik.” Taem man i haedem filing blong hem, samting ya i save pulum hem blong i dring alkol mo i tekem ol drag, blong mekem se hem i no moa harem nogud.

Tingting i save fasfas taem yu harem nogud. Eksampol, sam man oli kros long man we i ded from we hem i “lego” olgeta. Sam narafala oli blemem God from we oli ting se God i sud blokem man ya blong i no ded. Plante oli harem nogud from ol nogud samting we oli bin mekem o talem long man we i ded, mo tu, from we oli no moa gat janis blong talem sore long hem.

I tru se i had blong kasemsave taem man i harem nogud. ?Be wanem i save givhan long yu blong harem gud mo gohed long laef blong yu?

SAMTING WE YU SAVE MEKEM

Storian wetem narafala. Taem yu kasem trabol, maet yu ting se i gud yu stap yu wan mo yu no go storian wetem ol narafala. Be sipos yu tokbaot ol filing blong yu long wan famle, o wan fren, hemia bambae i givhan long yu blong harem gud bakegen.—Rul blong Baebol: Ol Proveb 18:24.

Raetem ol samting we i hapen. I gud yu raetem ol samting we yu tingbaot long saed blong papa o mama blong yu we i ded. Eksampol, yu save raetem wan gudfala samting we yu laekem tumas we yu bin mekem wetem hem. Mo tu, yu save raetem ol gudfala fasin blong hem, mo olsem wanem yu save folem ol fasin ya.

Sipos yu harem nogud, maet from we yu bin talem o mekem wan nogud samting long papa o mama blong yu bifo we hem i ded, i gud yu raetem daon filing ya mo from wanem yu harem olsem. Eksampol, “mi mi harem nogud tumas from we mi bin rao wetem papa long dei bifo we hem i ded.”

I gud se yu stretem tingting blong yu. Buk ya The Grieving Teen i talem se: “Yu no mas blemem yu, from we yu no save se bambae yu no moa gat janis blong talem sore.” Hem i gohed i se: “Sipos yumi talem se man i no mas mekem o talem samting nogud we biaen i mas talem sore from, be samting ya i no save hapen.”—Rul blong Baebol: Job 10:1.

Lukaotgud long yu. Yu mas spel gud, eksasaes, mo kakae gud. Sipos yu no wantem kakae, yu save kakae sam smol kakae nomo, kasem taem we yu harem se yu wantem kakae. Yu no mas dring alkol o kakae ol kakae we i save spolem helt blong yu, blong mekem yu harem gud bakegen. Bambae oli spolem yu nomo.

Prea long God. Baebol i talem se: “Yufala i mas putum ol trabol blong yufala long Hae God, nao hem bambae i blokem yufala, i sevem yufala.” (Ol Sam 55:22) Prea i no wan samting we bambae i mekem yu harem gud nomo. Taem yu prea, yu stap toktok wetem God we “hem i stap givhan long yumi long olgeta trabol blong yumi, blong mekem yumi harem gud.”—2 Korin 1:3, 4.

Baebol i wan long ol samting we God i yusum blong mekem ol man we oli harem nogud oli harem gud bakegen. Taswe i gud yu stadi long Baebol blong faenemaot trutok long saed blong ded, mo hop blong laef bakegen.c—Rul blong Baebol: Ol Sam 94:19. ◼