Lanem Samting Long Ol Bigman

?I MINIM WANEM?

Pikinini i nidim wan bigman blong i lidim mo givim advaes long hem. Taswe hemia wok blong papa mama. Be, sam narafala bigman tu oli save givhan long pikinini blong yu.

?FROM WANEM I IMPOTEN?

Long plante ples, pikinini i no joen tumas wetem ol bigman. Traem tingbaot:

• Long skul, pikinini i spenem moa taem wetem ol narafala pikinini, be i no wetem ol tija mo ol narafala bigman.

• Taem skul i finis, sam pikinini oli stap olgeta wan long haos, from we papa mama i wok yet.

• Wan ripot we i soem se long Yunaeted Stet, ol pikinini we oli gat 8 kasem 12 yia, oli spenem 6 aoa evridei long TV, miusik mo video gem.a

Buk ya Hold On to Your Kids i talem se: “Ol yangfala oli no askem advaes long papa mama, tija mo ol narafala bigman be long . . . ol fren blong olgeta.”

?OLSEM WANEM BLONG GIVIM ADVAES?

Spenem taem wetem pikinini.

ADVAES BLONG BAEBOL: “Sipos yu tijimgud pikinini blong yu long fasin we i stret blong hem i folem, taem hem i kam bigman, bambae i no save gowe long hem.”—Ol Proveb 22:6.

Oltaem pikinini i lukluk i go long papa mama blong givhan long hem. Ol man blong stadi oli talem se taem pikinini i kam yangfala, hem i glad moa blong folem ol advaes blong ol fren blong hem.

Dokta Laurence Steinberg i raetem long buk ya You and Your Adolescent se: “Fasin blong papa mama i save gat paoa long pikinini taem hem i kam yangfala mo i kam bigwan. Ol yangfala oli wantem save tingting blong yu mo oli lesin long samting we yu talem, nating se oli no agri.”

Taem pikinini i nidim help blong yu, i gud yu tekem janis ya blong tijim hem. Spenem taem wetem hem mo talemaot tingting, filing mo ekspiriens blong yu long hem.

Man we i givim advaes.

ADVAES BLONG BAEBOL: “Sipos man i go joen long ol waes man, bambae hem i save kam waes.”—Ol Proveb 13:20.

?Yu yu tingbaot wan bigman we i maet i save stap olsem wan gudfala eksampol long pikinini blong yu? I gud yu mekem plan blong hem i givhan long pikinini blong yu. Hemia i no min se bambae hem i mekem wok blong yu. Be yu save trastem se man ya bambae i givhan moa long hem blong i folem ol advaes blong yu. Long Baebol, nating we Timoti i bigman finis be hem i glad blong joen wetem aposol Pol, mo Pol tu i glad long fasin fren blong tufala.—Filipae 2:20, 22.

Tede plante famle oli no moa laef tugeta long wan haos o long wan sem eria. Samtaem maet ol abu, ol angkel o anti, mo ol narafala famle oli laef long wan defren ples long wol. Sipos ol famle blong yu i olsem, i gud yu givhan long pikinini blong i lanem samting long sam narafala bigman, blong hem i save folem gudfala fasin blong olgeta we yu wantem se hem i gat.