3. ?From Wanem Ol Gudfala Man Oli Safa?

?From Wanem i Impoten?

Yumi harem se i no stret we ol gudfala man oli safa. Maet yumi ting se i blong nating nomo we yumi traehad blong mekem ol gudfala fasin.

Traem Tingbaot

Samfala oli bilif se God i makemaot finis ol samting we bambae oli hapen blong mekem yumi safa. Sam narafala oli ting se taem wan rabis man i safa, God i stap panisim hem, mo taem wan gudfala man i safa, God i stap traem bilif blong hem. Sam narafala bakegen oli talem se yumi no naf blong kasem save from wanem ol gudfala man oli safa. Be . . .

Sipos God i makemaot se bambae yumi safa, ?from wanem yumi traehad blong gat gudfala helt mo no kasem wan aksiden?
Sipos God i lavem ol man, ?olsem wanem hem i save mekem olgeta oli safa blong traem olgeta?

BLONG SAVE MOA

Wajem video ya ?From Wanem God i Letem Ol Man Oli Safa? long jw.org.

Samting We Baebol i Talem

Taem yumi safa, hemia i no min se God i stap panisim yumi.

Plante taem yumi safa from we trabol i kasem yumi long enitaem mo long eniples.

“Sam man oli save ron spid be oli no winim resis, mo sam man oli strong be oli no winim faet. Sam man oli waes be oli no gat kakae, mo sam man oli gat hed be oli no rij. Sam man oli gat save be oli no win. Hemia from we samting we oli no tingbaot i save kasem olgeta enitaem nomo.” —PRIJA 9:11, NW.

Yumi safa from we yumi bon wetem sin.

Plante man oli ting se “sin” i minim wan nogud samting we man i mekem. Be Baebol i talem se i no hemia nomo. Sin i wan samting we yumi evriwan i bon wetem, ol gudfala man mo ol rabis man tu.

“Mi man nogud, i stat long taem we mi mi bon. Fasin blong mi i nogud, i stat long taem we mi stap yet long bel blong mama blong mi.”—OL SAM 51:5.

Sin i spolem ol man.

Sin i mekem se yumi no fren gud wetem God mo yumi no lukaot gud long ol samting raonabaot long yumi we God i wokem. Hemia i mekem se ol man wanwan mo ol man long fulwol oli safa.

“Taem mi wantem mekem samting we i stret, be tingting blong mekem i nogud, hem tu i stap long mi.”—ROM 7:21.

“Olgeta samting we God i mekem, . . . oli stap krae mo oli stap harem nogud.”—ROM 8:22.