Soem Lav

Problem

Filing blong no laekem narafala, i no save lus kwiktaem. Hemia i sem mak olsem we yu wantem aotem wan vaeras, yu mas traehad mo i tekem taem. ?Yu save mekem wanem blong aotem rabis fasin ya insaed long yu?

Advaes Blong Baebol

Ol pija: 1. Wan Jaenis i openem doa long wan blakman we i karem plante kap blong kofe. 2. Sem blakman ya i serem kofe long ol wokmet blong hem, wetem Indian woman ya tu we i stap long pija bifo.

“Yufala i mas werem lav olsem wan klos, from we lav i olsem wan rop we i save joenem ol man oli kam wan.”—KOLOSI 3:14.

?I minim wanem? Taem yumi kaen long ol narafala, yumi mekem ol man oli joengud. Moa we yu soem lav long narafala, moa we bambae yu lavem olgeta. Moa we yu lavem olgeta, moa we fasin blong agensem olgeta bambae i no moa gat long hat blong yu.

Samting We Yu Save Mekem

Tingbaot sam rod blong yu soem lav long ol man blong wan grup, we maet yu no laekem. I no nid blong yumi eksplenem evri smosmol samting we yu save mekem. Be traem mekem wan o moa long ol samting ya:

Evri smosmol aksen blong lav, i aotem fasin blong no laekem narafala

Ol pija: 1. Wan olfala waet woman i kasem help blong wan Indian woman, blong go antap long step wetem soping blong hem. 2. Sem olfala waet woman ya i karem sam bisket i go long neba blong hem, hemia Jaenis we i stap long wan long ol pija bifo.

Soem gudfala fasin long ol memba blong grup ya, taem yu openem doa long olgeta long stoa, o taem yu letem jea blong yu long wan long olgeta, blong i sidaon long hem long wan pablik transpot.
Traem blong storian smol wetem olgeta, nating sipos oli no toktok gud lanwis blong yu.
Gat longfala tingting taem oli mekem samting we yu no kasemsave.
Kaen long olgeta taem oli tokbaot problem blong olgeta.