I Impoten Blong Save Ansa

?From wanem i impoten blong save sipos i gat wan Krieta? Sipos i gat pruf we i pulum yu blong bilif se i gat wan God, ating bambae yu wantem luk ol pruf we i soem se Baebol i kamaot long hem. Mo sipos yu trastem ol samting we Baebol i talem, hemia bambae i givhan long yu.

Bambae yu haremgud moa long laef

BAEBOL I TALEM SE: “Oltaem [God] i stap . . . givim ren long yufala mo i mekem ol frut oli givim kakae long stret taem blong olgeta, mo hem i stap givim kakae long yufala mo i stap mekem yufala i glad.”—Ol Wok 14:17.

HEMIA I MIN SE: Evri samting we yu haremgud long hem long wol ya, oli ol presen we i kam long Krieta. Taem yu faenemaot se Hem i kea long yu, bambae yu glad moa long ol presen ya.

Kasem ol gudfala advaes

BAEBOL I TALEM SE: “Bambae yu kasemsave wanem i stret mo i gud mo i stret long olgeta man, yes, bambae yu kasemsave olgeta rod blong ol samting we i gud.”—Ol Proveb 2:9.

HEMIA I MIN SE: God i wokem yu, taswe hem i save samting we yu nidim blong yu hapi. Taem yu ridim Baebol, yu save lanem plante samting we oli save givhan long yu.

Faenem ansa long ol kwestin blong yu

BAEBOL I TALEM SE: “Bambae yu faenem save blong God.”—Ol Proveb 2:5.

HEMIA I MIN SE: Taem yu save we God i stap, samting ya i save halpem yu blong faenem ansa blong ol impoten kwestin, olsem: ?From wanem yumi laef? ?From wanem plante man i safa? ?Wanem i hapen long man we i ded? Yu save faenem ol stret ansa long Baebol.

Bambae yu gat wan hop

BAEBOL I TALEM SE: “‘Mi mi save gud ol tingting we mi stap tingbaot blong mekem long yufala, hemia tingting blong givim pis, be i no trabol, blong givim wan fiuja mo wan hop long yufala,’ hemia nao tok blong Jehova.”—Jeremaea 29:11.

HEMIA I MIN SE: God i promes se long fiuja, bambae hem i finisim ol rabis fasin, fasin safa, mo ded. Taem yu trastem ol promes blong God, hop blong yu bambae i givim strong tingting long yu blong fesem ol problem blong laef.

Olsem wanem bilif long wan Krieta i halpem sam man

“Mi mi sapraes taem mi luk olsem wanem God i halpem yumi long plante samting long laef. Hem i halpem yumi blong tingbaot ol impoten samting long laef, olsem fasin blong stretem ol problem wetem ol narafala, mo blong kam fren blong Hem.”—Cyndi, Yunaeted Stet.

“Bilif long Krieta i mekem laef blong mi i intresting. Oltaem mi wantem lanem plante samting long saed blong Krieta, kriesen blong hem, mo Tok blong hem.”—Elise, Franis.

“Mi mi haremgud moa long laef, taem mi folem ol samting we Krieta i tijim mi long hem tru long Baebol. Hemia i halpem mi blong no stap komplen agensem ol narafala, i givhan long mi blong lesin gud, mo blong haremgud long ol samting we mi gat. Mo tu, i halpem mi blong kam wan gudfala papa.”—Pita, Netalan.[3]

“Bifo laef blong mi i blong kakae, slip, mo traehad blong go long wok long taem. !Mi stres tumas! Be naoia mi luk se laef i wan nambawan presen blong enjoem mo lukaotgud long hem.”—Liz, Estonia.

“Mi mi man blong wari tumas. Be taem mi save se bambae i gat en blong ol rabis fasin mo fasin safa, hemia i givhan long mi blong mi no moa wari tumas.”—Adrien, Franis.