PRAES I STAP GO ANTAP

Gat Hop

Long ples blong yu, ?praes blong ol samting i go antap be mane we yu kasem i smol nomo? ?Yu yu wari se bambae yu no naf blong givim samting we famle blong yu i nidim? Sipos yes, i sua se yu stap wari tu long saed blong fiuja. Nating se yumi fesem ol hadtaem ya, be i impoten we yumi gat hop.

?FROM WANEM I IMPOTEN?

Man we i gat hop, hem i no stap tingbaot nomo se ol gudfala samting bambae oli hapen. Be hem i tekem aksen blong dil wetem situesen we hem i stap fesem. Eksampol, sam stadi oli soemaot se man we i gat hop, hem i . . .

naf blong stanap strong
rere blong mekem sam jenis
mekem ol waes desisen we i givhan long laef mo helt blong hem

SAMTING WE YU SAVE MEKEM

Faswan, tingbaot olsem wanem Baebol i save givhan long yu naoia. I gat plante gudfala advaes long Baebol we oli save givhan long yu, taem praes blong ol samting i go antap. Ol advaes ya bambae oli halpem yu blong save wanem blong mekem naoia, mo i rerem yu blong fesem ol hadtaem long fiuja.

“Fasin ya we yu luksave ol samting mo we yu savegud ol mining blong hem, hem bambae i stap lukaot long yu.”—Ol Proveb 2:11, Baebol Long Bislama.

Nambatu, faenemaot samting we Baebol i talem long saed blong fiuja. Taem yu luksave se ol advaes blong Baebol oli wok gud, bambae yu wantem save sipos hem i tokbaot sam samting long saed blong fiuja. Eksampol, bambae yu faenemaot se God i wantem we yu gat “wan fiuja mo wan hop.” (Jeremaea 29:11) Mo tu, Baebol i tokbaot se God bambae i yusum Kingdom blong hem blong mekem samting ya i kamtru.

?WANEM YA KINGDOM BLONG GOD, MO BAMBAE HEM I MEKEM WANEM?

Kingdom blong God i wan gavman we i stap long heven, mo bambae i rulum fulwol. (Daniel 2:44; Matiu 6:10) Taem Kingdom ya i rul, bambae i no moa gat man i safa o i pua, from we evri man bambae oli stap long pis mo oli gat evri samting we oli nidim. Makem samting we ol vas ya oli tokbaot.

“Bambae yu hapi mo yu harem gud from we yu win long laef.”—Ol Sam 128:2.

“Bambae [ol man we oli laef aninit long Kingdom] oli no taetem bun blong nating.”—Aesea 65:23.

“Bambae i gat fulap garen blong sid long olgeta ples long wol.”—Ol Sam 72:16.

Plante milian man oli trastem se ol promes ya bambae oli kamtru, from we God i “no save giaman.” (Taetas 1:2) I gud yu ridim Baebol blong faenemaot. Hop we Baebol i tokbaot, i save givim paoa long yu blong dil wetem ol problem long saed blong mane mo trastem se long fiuja, laef bambae i kam gud moa.