Stadi 18
Kamgud Moa Long Ol Ansa Blong Yu
1, 2. ?From wanem yumi mas traehad blong givim ol gudfala ansa?
1 Ol Kristin oli mas traehad blong gat gudhan blong givim ol gudfala ansa. Aposol Pol i raetem se: “Yufala i mas tokgud wetem olgeta, long ol tok ya nomo we olgeta oli harem i gud. Mo yufala i mas save rod blong givim ansa long evri man, we i stret gud long olgeta evriwan.” (Kol. 4:6) Mo i stret nomo we yumi stap traehad blong kamgud moa long ol ansa blong yumi. Taem yumi givim gudfala ansa, samting ya i mekem yumi rili haremgud: “Man i haremgud long ansa we i kamaot long maot blong hem, mo wan tok we i kamaot long stret taem blong hem, hem i gud tumas”!—Prov. 15:23.
2 ?Yu yu harem se yu nidim blong kamgud moa long ol ansa blong yu? ?Yu rili glad long ol ansa blong yu long ol miting? ?No i gat sam samting we yu save kamgud moa long hem, we sipos yu mekem bambae yu haremgud? ?Long wok blong prij, samtaem yu stap tingbaot se sipos yu bin givim ansa long narafala fasin, ating bambae i moagud olsem? Yumi evriwan i harem olsem, taswe i gud blong yumi tingbaot olsem wanem yumi save kamgud moa long ol ansa blong yumi.
3, 4. ?Long taem blong miting, olsem wanem i save gat plante ansa long wan kwestin?
3 Ol miting blong kongregesen. I klia se i gat sam man long plante kongregesen blong ol Wetnes blong Jeova we oltaem oli stap mekemrere ol ansa blong ol kwestin long Wajtaoa stadi, buk stadi no ol kwestin blong tingtingbak long Tiokratik Skul. Ansa i no kam hem wan. Maet i dipen hamas yia man i stadi mo i joen wetem ol man blong Jeova; be plante taem, fasin blong mekemrere tu i givhan bigwan. Olgeta nyuwan we oli joen wetem ol Wetnes oli save givim ol gudfala ansa sipos oli traehad blong stadi long haf fastaem.—Prov. 15:28.
4 Sipos yu yu faswan blong givim ansa long wan kwestin, oltaem i gud blong go stret long ansa blong kwestin ya. Be sipos wan man i givim ansa finis long kwestin ya, yu no mas ting se ansa i finis long ples ya. No gat, blong ademap moa ansa long wan kwestin olsem, yu save mekem wan long ol samting ya: Mekem ansa i klia moa, soem olsem wanem ol vas long haf ya oli sapotem ansa ya, no olsem wanem stadi ya i stret long yumi. Sipos stadi i tokbaot ol fasin we oli stap kamaot long wol no fasin blong ol gyaman skul, maet yu save tokbaot wan ekspiryens no samting we i kamaot long ples blong yu we i stret long samting we haf i tokbaot. Samting ya i mekem stadi ya i laef.
5. ?From wanem i gud blong givim sot ansa mo long prapa toktok blong yu?
5 Oltaem ol ansa we oli sot mo oli stret long kwestin oli gat moa paoa mo ol man we oli lesin oli save tingbaot. Plante taem ol ansa olsem oli gud. Sipos wan man i kavremap evri tingting we oli stap long wan haf, bambae i no gat wan samting i kamaot klia mo olgeta we oli lesin oli no stap kasem stret ansa blong kwestin. Mo tu, ol ansa we man i talem long prapa toktok blong hem oli stap givhan moa long ol man. Ansa olsem i givhan long man we i givim blong mekem se hem i holem save ya i stap long tingting blong hem, mo oltaem tok ya blong hem i save givhan long ol narafala blong oli kasem ol tingting we bifo maet oli no luksave. Ol tok we yu stap givim long Tiokratik skul oli blong givhan long yu blong gat gudhan long fasin ya.
6. ?Olsem wanem yumi save kamgud moa blong kwik blong ansa taem brata i askem ol kwestin long yumi?
6 ?Yu yu save kamgud moa tu long fasin blong kwik blong givim ansa? Samting ya i minim se yu mas reregud fastaem. Be yu no mas mekemrere taem ol man oli stap ridim haf no taem ol narafala man oli stap givim ansa, from we bambae yu mestem plante gudfala samting long miting. I gud blong gat fasin ya blong makem laen aninit long ol ansa blong yu fastaem. Sipos yu yu makem sam impoten tok nomo bitim we yu makem ol longfala fultoktok, nao taem yu lukluk kwiktaem long ol tok ya bambae yu save tingbaot bakegen mo bambae yu rere blong givim ansa. Sipos i gat tu kwestin long wan haf olsem “a” mo “b,” i gud blong makem long saed blong hem se weswan i ansa long kwestin “a” mo weswan i ansa long kwestin “b” blong bambae yu no save go fastaem long man we i lidim stadi wetem ol ansa blong yu. Sipos hem i wan tok we ol man blong lesin oli mas givim ansa tu, be i no gat ol kwestin long hem, i gud blong makem ol samting we yu ting se oli impoten poen. Olsemia nao bambae yu givim ol ansa olsem we yu wantem, mo bambae i mekem tok i laef. Afta we yu bin ansa wan taem finis long wan miting yu no mas stop long ples ya, blong livim ol narafala ansa long ol narafala man. No gat, yu mas laekem blong givim ansa.
7. ?From wanem yumi evriwan yumi mas harem olsem we i responsabiliti blong yumi blong ansa long ol miting?
7 Maet sam oli sem blong givim ol ansa, from we oli ting se ol narafala oli save givim ol gudfala ansa i bitim olgeta. Be Baebol i pusum yumi blong gat fasin tangkyu long responsabiliti blong yumi wanwan blong givim ol ansa. Aposol Pol i raetem se: “I gud yumi holemtaet fasin ya we yumi talemaot finis se i fasin blong yumi, we yumi putum tingting blong yumi i stap strong long God. . . . I gud yumi stap tingbaot yumi, blong yumi givgivhan long yumi blong mekem yumi strong blong laekem ol man, mo blong mekem ol gudfala fasin. I nogud yumi lego ol miting blong [kongregesen, NW], olsem we sam long yumi oli mekem finis. Oltaem yumi mas stap toktok long yumi blong mekem tingting blong yumi i kam strong moa.” (Hib. 10:23-25) Taem yumi givim ansa yumi stap pulum ol narafala blong laekem mo mekem ol gudfala wok, yumi mekem se oli haremgud long hat blong olgeta mo yumi leftemap tingting blong olgeta. Mo tu, yumi kasem ol blesing from, yumi haremgud from we yumi stap givim ol samting i go long ol narafala man mo yumi stap leftemap tingting blong yumi wanwan.
8-12. Talem sam samting we yumi save mekem long wok blong prij taem ol man oli sakem tok blong traem blokem yumi.
8 Ansarem ol kwestin long wok blong prij. Sipos oltaem yu stap mekem prapa stadi blong yu wan mo yu stap go long ol miting, bambae yu faenem se i no hadwok blong ansa long ol kwestin long wok blong prij long ol haos wanwan. Be sipos yu no save ansa blong wan kwestin we man i askem long yu, yu no mas fraet blong talemaot long man blong haos. Afta, talem long hem se yu glad blong faenem ansa, mo yu save kambak bakegen blong storeyan long hem. Sipos man ya i rili wantem save ansa long kwestin blong hem, bambae hem i glad blong yu mekem olsem.
9 Mo tu antap long ol kwestin olsem, samtaem maet ol man oli sakem tok blong traem blokem storeyan blong yu. ?Olsem wanem bambae yu ansa long ol tok ya? Bifo yu givim ansa long ol tok olsem, i gud blong save tingting blong man ya. Maet yu save askem from wanem hem i tok olsem long yu. Eksampel, maet wan man i talem se hem i harem se yu no bilif long Kraes, be rili tingting blong hem i fasfas from tijing blong Triniti. Plante tok blong blokem storeyan blong yumi oli kamaot from we ol man oli no kasem save long ol samting olsem. Taswe i impoten blong yutufala i agri long mining blong ol stampa toktok bifo yu gohed blong tokbaot samting ya. Olsemia nao maet samting ya nomo i naf blong ansa long tok blong man ya mo mekem se i no nid blong gohed blong tokbaot poen ya.
10 Mo tu, taem man i sakem tok blong blokem yu, i gud blong tingbaot hem olsem we hem i intres, sipos i stret, bitim we yu tingbaot man ya olsem enemi blong yu. Taswe i nogud blong tingbaot tok we i blokem yu, olsem wan nogud samting no wan samting we i spolem yu, tingbaot tok ya olsem wan poen we man blong haos i rili intres long hem. Wetem tingting ya, maet yu save talem long man blong haos se yu glad we hem i tokbaot samting ya. Yusum tok ya blong hem olsem wan rod blong gohed wetem storeyan, olsem wan samting we i save openem tingting blong man, blong hem i kasem ol trutok blong Baebol. I gud blong lanem samting ya long Tiokratik Skul, long ol tok blong yu yusum samting we ol man oli stap talem blong blokem yu.
11 Samtaem taem yu toktok wetem wan man we i intres, narafala man i save talem sam tok blong blokem storeyan blong yu. Long wan taem olsem, askem man ya blong pruvum tok blong hem. Jisas Kraes i askem ol kwestin tu blong satem maot blong ol enemi blong hem we oli stap traem spolem wok blong prij we hem i stap mekem. (Mat. 22:41-46) Taswe i gud blong tingbaot se i stap long ol man we oli gat strong tingting long wan samting blong pruvum samting ya. Eksampel, sipos wan man blong haos i talem long yu se: “Yufala i no bilif long Triniti,” long wan fasin we i fosem se ol Kristin oli mas bilif long hem, maet yu save talem se: “Mi mi bilif long evri samting we Baebol i tijim. ?Yu yu save soemaot long mi long Baebol from wanem mi mas bilif long tijing ya?” Nao man ya i mas soemaot pruf, blong sapotem tok we hem i talem se i trutok.
12 Ansa we i gat paoa moa long man we hem i talem se hem i akseptem Baebol, hemia ansa we i kamaot stret long Tok blong God. Hem i pulum tingting blong man i bitim eni samting we yumi nomo yumi talem. Tru ya, taem yumi givim ansa, oltaem yumi mas stap kwaet mo soem respek, nating se fasin blong man we i askem kwestin i olsem wanem. Samting ya i stret long wan minista blong God.
13, 14. ?Olsem wanem blong ansa long ol kwestin we ol studen oli askem long taem blong ol Baebol stadi?
13 Long ol Baebol stadi. Oltaem long ol Baebol stadi man i frengud wetem yu, ples i kwaet, mo i isi blong storeyan tugeta blong skelem ol samting. Taswe, afta we yu ansa long kwestin blong wan studen, oltaem i gud blong askem sipos hem i kasem save. Maet i gat sam poen we oli no klia long tingting blong hem yet. Sipos yu no suagud long wan ansa, talem se bambae yu faenemaot ansa mo talem long hem. Sipos yu nidim moa help, yu save askem wan pablisa we i gat moa ekspiryens. Tingbaot, taem yu givhan long wan man blong kasem dip save long mesej blong Baebol maet yu stat blong lidim hem long rod ya blong laef, olsem Filip man blong talemaot gud nyus i givhan long man Itiopia ya taem hem i ansarem ol kwestin blong hem.—Wok 8:26-39.
14 Sloslou bambae i gud moa blong no ansa long olgeta kwestin we i kamaot long taem blong Baebol stadi, i gud blong livim sam kwestin blong bambae yu kavremap ansa long ol haf blong stadi we oli kamaot biaen. Mo tu, blong givhan long studen blong hem wan i gohed moa, i gud blong soem olsem wanem hem i save faenem ol ansa hem wan taem hem i mekem dip stadi. Maet yu save tokbaot ol samting blong givhan long hem long Baebol stadi, olsem ol indeks blong ol buk blong Sosaeti no wan stret japta long buk ya Yu Save Laef Foreva Long Paradaes Long Wol. Biaen yu save askem wanem samting hem i faenemaot, mo olsem wanem hem i kasem save long poen ya long tingting blong hem. Tingbaot blong givhan long hem blong stap gru long saed blong speret, be i no blong ansa long ol kwestin blong hem nomo.
15-18. ?Wanem fasin yumi mas gat taem ol haeman oli singaot yumi blong askem kwestin long yumi?
15 Taem oli singaot yufala i go fored long ol haeman. Taem Pita i tokbaot bisnes ya we ol man oli stap ronem man from trutok, hem i se: “Yufala i mas mekem Kraes i Masta blong yufala, yufala i mas putumap hem i nambawan long tingting blong yufala. Mo oltaem yufala i mas stap rere blong givim ansa long ol man. Sipos man i askem long yufala from wanem yufala i putum tingting blong yufala i stap long Kraes, bambae yufala i mas rere blong talemaot be long kwaet fasin, we i gat ona long hem.” (1 Pita 3:14-16, NTB) Samtaem maet ol man oli save askem yumi blong toktok fored long ol kot no ol man blong mekem wok long nem blong loa we oli gat raet blong askem wanem bilif blong yumi mo from wanem yumi bilif olsem. Aposol ya i givim advaes ya se, “Yufala i mas mekem Kraes i Masta blong yufala, yufala i mas putumap hem i nambawan long tingting blong yufala.” Yu mas mekem sua se dip insaed long hat blong yu yu givim olgeta respek long Masta Jisas Kraes, putum hem long hae ples olgeta, we yu no save daonem. Nao bambae i no gat samting blong wari from. Sipos yumi mekem Man ya we God i makemaot hem blong i King long olgeta ples long wol i glad, i no gat samting blong mekem yumi fraet long ol man we oli gat haenem.
16 Be, folem advaes we i stap long Rom 13:1-7, yumi mas ona long ol haeman we oli gat paoa. Nating se man we i askem ol kwestin long yu i stap mekem olsem we yu gat ol rong tingting no hem i soem fasin blong no laekem nating ol Wetnes blong Jeova, yu no mas givimbak wetem wan ansa we i strong. (Rom 12:17, 21; 1 Pita 2:21-23) Tingbaot se yu stap fored long olgeta blong givim wan wetnes. Maet wan long ol haeman ya bambae i luksave. Maet from samting ya oli save tinghae long wok blong prij. Soemaot rod blong trutok from gudfala fasin mo toktok blong yu.—Mat. 10:18-20.
17 Samtaem tu i gud blong no talem plante samting. Maet yu save letem ol man we oli agensem yu oli pruvum toktok blong olgeta, olsem aposol Pol i mekem taem hem i go long kot. (Wok 24:10-13) No maet yu yu wantem stap kwaet nomo. Hemia gudfala rod blong folem sipos ol rabis man oli traem blong kasem yu long ol tok blong yu no mekem fani long yu be oli no rili wantem save ol ansa blong ol kwestin blong olgeta. (Luk 23:8, 9) No, maet yu luksave se i waes blong stap kwaet from we oli yusum yu blong lukaot rod, blong spolem ol narafala Wetnes. Deved, man blong raetem Ol Sam i talem se: “I nogud mi letem maot blong mi i mekem mi mi sin. Taem ol man nogud oli stap kolosap long mi.” (Sam 39:1, 2) Yu mas luksave “taem blong stap kwaet” mo “taem blong toktok” samting ya i tru moa long ol ples we fasin blong agensem strong ol trufala Kristin i stap.—Ekles. 3:7.
18 Wan nyuspepa long Engglan i tokbaot gudhan we ol man blong Jeova oli gat blong ansa long ol kwestin, i se: “Stampa risen blong evri samting we wan Wetnes i mekem i stanap long Baebol. Yes, wan stampa bilif blong olgeta se oli luksave ful Baebol, se i stret mo i tru. Mo samting ya i givim moa paoa long olgeta; oli save givim ansa long eni kwestin.” Hem i Tok blong God mo fasin blong dipen long hem i mekem se yumi save ansa long olgeta strong kwestin blong ol man. Olgeta tok blong leftemap man mo ona oli go long God. Be taem yumi wantem kamgud moa long ol ansa blong yumi, yumi stap givim bigfala ona long Jeova, yumi glad moa mo ol ansa oli lidim ol narafala man i go long rod ya blong gat pis wetem God.