Stadi 28
Lukluk Ol Man Mo Yusum Ol Not
1. Eksplenem from wanem i impoten blong lukluk ol man taem yu givim tok mo fasin blong yusum ol not.
1 Fasin blong lukluk ol man taem yu toktok wetem olgeta i save givhan bigwan long fasin blong tij. Hem i pulum respek blong olgeta mo i givhan long yu blong tijgud moa. Taem yu lukluk olgeta, samting ya i pulum yu blong kam kolosap moa long olgeta olsem we yu haremsave kwiktaem tingting blong olgeta. Fasin blong yusum ol not i impoten tumas blong soem sipos yu stap lukluk ol man no no gat. Sipos yu raetem tumas not, samting ya i save blokem yu blong no lukluk ol man; be fasin blong raetemgud ol not i no save blokem yu, nating se samtaem yu mas raetem ol not we maet oli longfala moa. Samting ya i kamaot from man we i gat gudhan blong givim tok i no lusum fasin ya blong lukluk ol man from we hem i luk ol not blong hem, maet hem i no lukluk not blong hem longtaem tumas no maet hem i no lukluk not blong hem long rong taem. Long Pepa Blong Givim Advaes samting ya i stap, mo oli raetem olsem se “Lukluk ol man, yusum ol not.”
2-5. ?Wanem samting i save givhan long yu blong lukluk ol man?
2 Lukluk ol man. Fasin ya i min se yu stap lukluk ol man we oli lesin long tok blong yu. I no min se yu jes lukluk nomo long olgeta be yu luk wanwan man we oli stap long medel blong ol man we oli stap lesin long yu. I min se yu luk olsem wanem oli mekem fes blong olgeta, mo yu jenisim tok blong yu folem samting we yu luk.
3 Fasin blong lukluk ol man we oli lesin i no min se yu lukluk i go long wan saed nao long narasaed oltaem mekem se yu no mestem wan long olgeta. Lukluk wan man long medel blong olgeta ya we oli stap lesin long yu mo talem wan no tu fultoktok long hem. Nao biaen yu save lukluk narafala man mo talem sam fultoktok long hem. I nogud blong lukluk longtaem tumas long wan man nao hem i save sem from mo yu no mas lukluk long wan no tu man nomo we oli stap long medel blong olgeta ya we oli stap lesin long yu. Gohed blong lukluk ol man long fasin ya, be taem yu lukluk long wan man, yu mas rili toktok long hem mo traem luk olsem wanem hem i stap lesin long yu bifo we yu lukluk i go long narafala. Yu mas putum ol not blong yu long ples blong putum buk antap no holem long han blong yu no insaed long Baebol blong mekem se yu mas muvum ae blong yu nomo blong luk ol not blong yu kwiktaem. Sipos yu mas tanem ful hed blong yu blong lukluk ol not blong yu bambae yu no moa save lukluk ol man.
4 Man blong givim advaes bambae i no luk nomo se hamas taem yu stap lukluk long not blong yu, be wetaem yu lukluk olgeta. Sipos yu stap lukluk not blong yu taem yu kasem bigfala poen we yu wantem makem long tok blong yu, bambae yu no luk filing blong ol man we oli stap lesin long yu. Sipos oltaem yu stap lukluk long not blong yu, bambae yu mestem fasin ya blong lukluk ol man. Samting ya i soem se yu yu fraet no maet yu no mekem reregud tok blong yu.
5 Samtaem oli askem ol man blong givim tok we oli gat ekspiryens blong givim wan tok we oli raetemdaon long pepa finis, yes, samting ya i blokem fasin blong lukluk ol man we oli lesin. Be sipos oli savegud tok from we oli reregud long hem fastaem, bambae oli save lukluk ol man we oli lesin sam samtaem, oli no save mestem ples we oli stap ridim, mo samting ya i mekem riding blong olgeta i laef.
6-9. ?Talem narafala rod blong yu save lukluk ol man, mo ol samting we yu mas lukaotgud long hem.
6 Toktok stret long ol man we oli stap lesin. Samting ya i impoten olsem fasin blong lukluk ol man. Hem i minim ol tok we yu yusum blong toktok wetem ol man we oli stap lesin long yu.
7 Taem yu toktok long wan man we i stap hem wan yu toktok stret long hem olsem “yu,” “blong yu” no “yumi,” “blong yumi.” Sipos i stret, yu save toktok long sem fasin long plante man we oli stap lesin long yu. Traem tingbaot tok blong yu olsem storeyan wetem wan no tu man nomo. Luklukgud olgeta blong yu save ansa long olgeta olsem we tufala i toktok long yu. Samting ya bambae i mekem tok blong yu i stret long wanwan man.
8 Be lukaotgud. Yu no mas bitim mak long fasin ya we yu storeyan nomo wetem ol man we oli stap lesin long yu. Yu mas toktok long fasin we i gat respek long ol man olsem we yu mekem long taem blong wok blong prij, be yu mas toktok stret long man olsem we yu mekem long wok blong prij tu.
9 Narafala trabol we i stap. Yu mas lukaotgud long fasin blong yusum ol tok olsem ‘yu,’ ‘yufala’ mo yu no mas mekem ol man we oli lesin oli sem. Eksampel, sipos yu tokbaot wan samting we sam man oli gat fol long hem, yu no mas yusum ol tok we i mekem olgeta oli ting se yu stap jajem olgeta. No, sipos yu tokbaot se ol haoa long wok blong prij oli godaon, yu mas tokbaot yu tu insaed, yusum ol tok olsem, “yumi” i nogud blong oltaem yu yusum tok olsem “yufala.” Fasin blong tingtinggud mo tingbaot narafala i save winim trabol ya.
10, 11. ?Wanem samting i mas leftemap tingting blong yumi blong lanem olsem wanem blong yusum wan plan?
10 Yusum not. Sam man nomo we oli jes stat blong givim tok oli yusum wan plan blong mekem tok. Plante taem oli raetemdaon ful tok blong olgeta fastaem mo biaen oli ridim no oli givim tok ya baehat. Fastaem man blong givim advaes bambae i no tingbaot samting ya, be taem yu kam long haf ya “Yusum wan plan” we i stap long Pepa Blong Givim Advaes bambae hem i askem yu blong yusum ol not. Taem yu gat gudhan long samting ya, bambae yu luk se yu stap tekem bigfala step blong kam olsem wan man blong givim tok long pablik.
11 Ol pikinini mo ol bigman we oli no save rid oli stap givim ol tok, oli save yusum ol pija blong givim sam tingting. Yu yu save mekemrere tok blong yu tu wetem plan we i isi nomo, sem mak olsem ol stampa tok blong prij we oli stap long Kingdom Wok Blong Yumi. Oltaem long wok blong prij yu stap toktok olsem nomo, yu no ridim wan tok we oli raetemdaon finis. Yu save mekem olsem tu long Tiokratik Skul, sipos yu rili traehad.
12, 13. Talem olsem wanem blong mekem wan plan.
12 From we fasin ya blong yusum not i blong givhan long yu blong yu finis long fasin ya blong ridim tok we yu bin raetem, taswe taem yu mekemrere tok blong yu mo taem yu givim tok blong yu, yu no mas holem tok blong yu long memori blong yu. Sipos yu mekem olsem, ol advaes long Japta ya i blong nating nomo.
13 Sipos yu yusum ol vas long Baebol, yu save askem yu wan ol kwestin olsem, ?Olsem wanem? ?Hu? ?Wetaem? ?Weples? mo ol narafala kwestin olsem. Nao sipos i stret long tok blong yu, yusum ol kwestin ya olsem haf blong ol not blong yu. Taem yu givim tok jes ridim wan vas long Baebol, askem ol kwestin ya long yu wan no long man blong haos, sipos i stret, mo talem ansa blong ol kwestin ya. Bambae hem i isi nomo olsem.
14, 15. ?Wanem samting i no mas daonem tingting blong yumi?
14 Plante taem ol nyuwan oli fraet se bambae oli fogetem sam samting. Be, sipos yu mekemrere tok blong yu folem plan we i stret bambae ol man oli no save mestem wan poen sipos yu fogetem. Naoia fasin blong talem evri poen long tok blong yu hem i no bigfala poen. Hem i impoten moa blong lanem blong yusum plan taem yu mekem tok blong yu.
15 Maet bambae yu harem se taem yu givim tok olsem yu lusum ol gudfala fasin blong toktok we yu bin lanem finis. Be yu no mas wari from. Bambae ol fasin ya blong toktok oli kambak bakegen mo bambae yu harem se yu gat gudhan moa long ol fasin ya taem yu save givim tok we yu no ridim long pepa.
16, 17. ?Taem yumi mekem ol not, wanem samting yumi mas tingbaot?
16 Wan advaes long saed blong fasin blong yusum ol not taem yu givim ol tok long Tiokratik Skul. Ol not ya oli blong givhan long yu blong tingbaot ol samting we yu wantem talem, be i no blong ridim ol not ya bakegen. Ol not oli mas sot nomo. Oli mas klin, oli mas stap long stret oda mo oli klia i naf blong ridim. Sipos yu mekem tok olsem wan visit bakegen, yu gat smol not nomo, maet oli stap insaed long Baebol blong yu. Sipos i wan tok we yu mas go long platfom blong mekem, mo yu save se bambae yu stanap blong givim tok ya, bambae i no hadwok long saed blong ol not from yu save putum olgeta long ples blong putum ol not. Be sipos yu no savegud, mekemrere ol not we oli no bigwan tumas.
17 Narafala samting blong givhan long yu i blong raetem stampa tok long pej antap long ol not blong yu. Ol bigfala poen oli mas kliagud blong yu luk. Traem raetem olgeta long ol bigfala leta no putum mak aninit long olgeta.
18, 19. ?Olsem wanem yumi save lan blong yusum wan plan?
18 Fasin blong yusum sot not nomo taem yu givim tok i no min se bambae yu spenem smoltaem nomo blong mekemrere tok blong yu. Mekemrere ful tok blong yu fastaem, mekem wan ful plan olsem we yu wantem. Biaen, mekemrere namba tu plan, we i sot moa. Hemia nao plan we bambae yu yusum taem yu givim tok blong yu.
19 Nao putum tufala plan blong yu long fored blong yu, lukluk long plan ya we i sot moa, traem talem olgeta samting we yu save tingbaot long faswan bigfala poen. Biaen, lukluk long narafala plan ya we i gat moa samting long hem mo traem luk wanem samting yu bin mestem. Nao go long namba tu bigfala poen long plan blong yu we i sot nomo mo mekem sem samting. Bambae yu save plan ya blong tok blong yu we i sot moa mo yu save tingbaot evri samting taem yu lukluk long ol sot not we yu raetemdaon. Taem yu lan olsem mo wetem ekspiryens bambae yu stat blong luksave se i moa gud blong givim tok olsem nomo we yu no ridim mo bambae yu ridim tok taem yu nidim nomo. Bambae yu no seksek tumas taem yu givim tok mo ol man we oli lesin long yu bambae oli gat moa respek long yu.