Stadi 33

Glad Blong Toktok Mo Tok i Gat Filing

1. ?Wanem samting bambae i mekem glad i kamaot?

¹ Fasin glad i mekem tok i laef. Sipos yu no glad long samting we yu talem, ol man we oli lesin long yu bambae oli no glad. Sipos tok ya i no tajem hat blong yu, bambae hem i no tajem hat blong olgeta. Be blong yu soem trufala glad, olsem man blong givim tok, yu mas bilif strong se ol man oli nidim blong harem wanem yu mas talem. Hemia i min se yu stap tingbaot olgeta taem yu mekemrere tok blong yu, yu jusum ol poen we bambae oli givhan moa long olgeta mo talem ol tok ya long wan fasin we bambae oli glad blong luksave ol impoten samting long hem. Sipos yu mekem samting ya, bambae yu harem se yu wantem toktok, mo ol man bambae oli glad blong lesin long yu.

2-5. ?Olsem wanem wan tok we i gat laef i soem fasin glad?

² Glad i kamaot taem yu mekem tok i laef. Glad i kam klia moa taem yu givim tok blong yu long fasin we i laef. Yu no mas givim tok long fasin we yu no tingbaot man no long fasin les. Yu mas soem filing long fes blong yu, long voes blong yu, mo long fasin blong toktok blong yu. Hemia i min se yu mas toktok wetem paoa. Voes blong yu i olsem se yu sua long tok we yu talem be yu no fosem ol man long tok blong yu. Yu mas glad blong toktok, be neva yu mas bitim mak long fasin ya. Sipos yu bitim mak bambae ol man oli no moa lesin long yu.

³ Fasin glad i save pas i go long narafala man. Sipos yu yu glad blong toktok, bambae ol man oli kasem filing ya. Mo, taem yu lukluk ol man we oli stap lesin, bambae yu luk we oli glad mo samting ya bambae i holem glad blong yu i stap. Be long wan saed, sipos yu no glad, bambae ol man we oli stap lesin long yu oli no glad tu.

⁴ Pol i talem se yumi mas gat glad ya we i kamaot from speret blong God. Sipos yu mekem olsem, tok blong yu we i laef bambae hem i mekem speret blong God i go long ol man we oli stap lesin long yu, blong oli mekem ol samting we yu talem i wok. Apolos i mekem olsem long toktok blong hem, mo ol man oli kolem hem se hem i wan gudfala man blong toktok.—Rom 12:11; Wok 18:25; Job 32:18-20; Jer. 20:9.

⁵ Blong glad long wan tok yu mas bilif se yu gat sam gudfala samting blong talem. Yu mas wok long tok we bambae yu givim gogo yu gat samting we fastaem bambae i mekem yu olsem man blong givim tok, yu glad blong toktok. I no se yu nidim nyufala save blong mekem olsem, no gat, be yu save jenisim fasin blong tokbaot poen we i stap. Sipos yu harem se yu gat sam samting we bambae i mekem olgeta ya we oli stap lesin long yu, oli kam strong moa long wosip blong olgeta, kam gud moa olsem ol minista no Kristin, nao yu yu gat olgeta risen blong glad long tok blong yu, mo i tru bambae yu glad blong toktok.

6-9. ?Olsem wanem ol poen long tok blong wan man i save jenisim fasin glad blong toktok, taem hem i givim tok ya?

⁶ Glad blong toktok i laenap wetem ol poen long tok. Blong mekem se tok blong yu i no sem mak oltaem mo blong givhan long olgeta ya we oli stap lesin long yu, yu no mas glad olwe nomo long olgeta haf long tok blong yu. Sipos yu mekem olsem, bambae oli taed bifo we oli stat blong mekem ol samting we yu talem i wok long laef blong olgeta. Samting ya i makem bakegen nid blong yu mas mekemrere tok blong yu long fasin we i save letem yu blong soem ol defren filing taem yu givim tok. I min se yu mas glad moa blong talem sam poen i bitim sam narafala, mo yu mas gat gudhan blong joenem ol poen olsem long ol defren haf long ful tok blong yu.

⁷ Impoten moa se yu mas glad blong talem ol bigfala poen. Ol poen ya oli mas bigfala samting long tok blong yu, oli bigfala mak we yu wantem kasem taem yu stap givim tok blong yu. From we oli bigfala poen long tok blong yu, oltaem bambae ol poen ya oli blong pulum ol man we oli stap lesin long yu, i makem olsem wanem ol poen olsem, ol risen no ol advaes long tok blong yu oli stret long olgeta. Afta we yu pulum olgeta blong oli bilif, nao yu mas pusum olgeta blong oli mekem wan samting, soem olsem wanem ol poen long tok blong yu oli save givhan long olgeta, fasin blong haremgud mo ol gudfala wok we bambae oli kasem, taem oli folem samting ya we yu bin pulum olgeta blong oli bilif long hem. Samting ya i nidim fasin glad blong toktok.

⁸ Be nating se i olsem, neva yu mas lusum glad long tok blong yu samtaem. Neva yu mas lusum strong filing blong yu long poen we yu tokbaot no yu soem se yu lusum intres. Tingbaot wan dia we i stap kwaet i stap kakae gud long wan smol open ples. Nating i luk olsem we hem i stap kwaet nomo, i gat paoa long ol leg blong hem we i save pusum hem blong ronwe kwik, taem hem i haremsave wan smol denja. Hem i stap kwaet be oltaem hem i stap wekapgud. Taswe yu yu save mekem olsem, nating se samtaem yu no stap soem olgeta glad blong yu long tok blong yu.

⁹ ?Nao ol samting ya oli minim wanem? I min se yu neva mas fosem fasin blong mekem tok i laef. I mas gat risen blong mekem olsem mo tok blong yu nao i mas givim risen ya long yu. Bambae man blong givim advaes i tingbaot sipos fasin glad blong toktok i stret long tok we yu mekem. ?Glad ya i bitim mak, i smol tumas no hem i no stret? I tru bambae hem i tingbaot prapa fasin blong yu wan, be bambae hem i leftemap tingting blong yu sipos yu yu man blong sem mo yu fraet blong toktok, mo bambae hem i talem long yu blong lukaotgud sipos yu yu glad bitim mak long evri samting we yu yu talem. Taswe mekem fasin glad blong toktok i laenap wetem ol poen long tok blong yu. Mo mekem se tok i gat ol defren poen insaed long ol haf blong hem. Olsemia nao fasin glad blong toktok i skelgud long olgeta haf blong tok blong yu.

10-12. ?‘Tok i gat filing’ i minim wanem?

¹⁰ Fasin ya glad blong toktok i kolosap sem mak long tok we i gat filing long hem. Be, oli kamaot from ol defren filing mo oli mekem ol defren samting long ol man we oli stap lesin. Yu olsem wan man blong givim tok, oltaem yu yu glad from tok blong yu, be yu yu gat filing taem yu tingbaot ol man we bambae oli lesin long yu. Yu wantem givhan long olgeta. Poen ya “Tok i gat filing” i stap long Pepa Blong Givim Advaes blong yu tingtinggud long hem.

¹¹ Sipos yu soem filing long tok blong yu, ol man we oli lesin long yu oli haremsave se yu yu wan man we yu stap soem fasin lav, kaen, mo fasin sore. Bambae oli haremgud long tok blong yu olsem man we i kolkol long naet i go long wan faea blong hem i womgud. Wan tok we i laef hem i wekemap tingting blong ol man, be tok ya i nidim filing tu. I no naf nomo blong pulum tingting blong man, yu mas tajem hat.

¹² Eksampel, ?yu ting se i stret blong ridim Galesia 5:22, 23 long saed blong lav, longfala tingting, kaen fasin, mo kwaet fasin, be yu no soem filing blong ol fasin ya? Makem tu, filing long tok blong Pol long 1 Tesalonaeka 2:7, 8. Hemia ol toktok we oli nidim filing long olgeta. ?Olsem wanem blong soem?

13, 14. ?Olsem wanem fes i save soem filing?

¹³ Fes i soem filing. Sipos yu gat filing long ol man we oli stap lesin long yu, yu mas soem filing ya long fes blong yu. Sipos no, oli no save sua se yu gat filing long olgeta. Be fes blong yu i mas soem trufala filing blong yu. Yu no save mekem olsem wan gyaman fes. Mo tu yu no mas meksemap filing long toktok wetem filing ya we man i haremgud nao i laf no i harem nogud nao i krae from. Fes we i soem kaen fasin i soemaot se man i rili gat filing long toktok blong hem mo i rili bilivim samting we hem i stap talem.

¹⁴ Plante taem bambae yu givim tok fored long ol fren. Taswe, sipos yu lukluk ol man we oli stap lesin long yu, bambae yu gat filing long olgeta. Bambae yu no fraet mo yu save gat fasin fren. Lukluk long wan we hem i soem fasin fren long fes blong hem. Tekem smol taem blong lukluk mo toktok stret long hem. Nao jusum narafala mo toktok stret long hem. Samting ya bambae i givhan long yu blong lukluk ol man we oli stap lesin long yu, mo tu hem i save pulum yu blong gat filing long olgeta, mo fes blong yu we i soem ol filing blong yu bambae hem i pulum olgeta.

15-19. Talem olsem wanem filing i save kamaot long voes blong man we i givim tok.

¹⁵ Voes i soem filing long toktok. I tru se ol anamol oli save haremsave filing long jun blong voes blong yu. Olsemia nao, ol man we oli stap lesin long yu oli go moa, oli haremsave jun blong wan voes we i soem filing.

¹⁶ Sipos yu harem se yu no gat filing long ol man we oli stap lesin long yu, no sipos yu stap tingting tumas long ol wod we yu yusum bitim we yu stap tingbaot olsem wanem oli save kasem, bambae i isi nomo long ol man we oli stap lesingud long yu, oli luksave samting ya. Be sipos yu rili intres long ol man we yu stap toktok long olgeta, mo sipos yu wantem tumas blong talemaot tingting blong yu long olgeta, blong bambae oli tingting olsem yu, filing blong yu bambae i kamaot long evri jun blong voes blong yu.

¹⁷ Be, hem i mas wan trufala intres. Yu no save mekem olsem we yu soem trufala filing sipos yu no gat, olsem we yu no save soem fasin glad sipos i no rili tru. Neva wan man blong givim tok i mas mekem ol gyaman tok swit blong pulum tingting blong ol man. Mo tu yu no mas meksemap filing wetem fasin blong toktok we i stap pulum filing blong ol man no samting olsem, voes we i seksek.

¹⁸ Sipos yu gat wan strong, raf voes, bambae hem i hadwok long yu blong soem filing long ol tok blong yu. Yu mas tingting strong mo traehad blong winim eni trabol olsem. Hem i dipen long gudfala voes mo bambae i nidim taem, be gudfala tingting mo fasin traehad i save mekem filing long voes blong yu i kam gud moa.

¹⁹ Wan samting we maet i givhan long saed blong stael blong toktok i blong tingbaot se ol wod we yu no talemgud ol ‘vowel’ blong olgeta, i mekem toktok i strong. Lanem blong talemgud ol ‘vowel’ long ol wod. Samting ya bambae i mekem tok i isi mo bambae i mekem toktok blong yu i gat filing long jun blong hem.

20, 21. ?Olsem wanem ol poen long wan tok oli save jenisim filing taem man i givim tok?

²⁰ Filing i mas stret long tok. Sem mak olsem fasin glad blong toktok, fasin ya tok i gat filing, hem i dipen bigwan long samting we bambae yu talem. Eksampel blong samting ya, i stap long store blong Jisas long Matyu 23, taem Jisas i tok strong long ol tija blong loa mo ol Farisi. Yumi no save ting se Jisas i talem ol strong tok ya long fasin we i kwaet nomo. Be insaed long ol tok ya we i soem fasin agensem mo kros, i gat wan fultoktok we i soem filing, i soem fasin sore blong Jisas taem hem i se: “Plante taem, mi mi wantem putum han blong mi i goraon long yufala evriwan, olsem we faol i pulum ol pikinini blong hem oli kam haed aninit long wing blong hem, be yufala i no glad.” Hemia kaen filing we hem i soem, be nekis tok: “Oraet, be yufala i luk. God i gowe long yufala finis, ples blong yufala i emti nomo,” i no givim filing we i sem mak. Jun blong voes ya i blong wan man we i kros mo i no moa laekem wan samting.

²¹ ?Nao weples i stret blong yumi yusum filing long tok blong yumi? Plante long ol samting we bambae yu talem long wok blong prij no long wan tok long tiokratik skul bambae oli folem fasin ya blong toktok. Be impoten moa taem yu traem blong mekem man i tingtinggud long wan poen, yu leftemap tingting, givim advaes long ol man, sore long man, mo ol samting olsem. Tingbaot blong mekem toktok i gat filing, be yu no mas fogetem fasin ya glad blong toktok taem hem i stret blong yu mekem olsem. Skelemgud olgeta samting, be traehad blong givim ful mining long evri samting we yu talem.