Japta 12
?Olsem Wanem Blong Mekem Papa Mo Mama Blong Yu i Glad?
1. ?From wanem i stret nomo we yumi ona long papa mama blong yumi?
ATING yu yu smol pikinini no yangfala yet. No maet yu yu bigman finis. Be yumi evriwan i pikinini blong wan man mo wan woman. Stat long taem we yumi bon gogo yumi kasem 20 yia, papa mama blong yumi tufala i bin givim fulap taem, wok, mane, mo lav long yumi. Mo tufala i givim wan samting long yumi we yumi no save pem tufala from. Hemia laef blong yumi. Sipos tufala i neva laef samtaem, yumi no save bon. Trutok ya nomo i naf blong pulum yumi blong harem wan loa blong God, se: “ ‘Yufala i mas ona long papa mo mama blong yufala,’ hemia faswan long ol loa ya we i gat promes i stap long hem. . . . ‘Blong bambae ol samting blong laef blong yufala oli save ron gud, mo blong bambae laef blong yufala long graon ya, i longfala.’ ”—Efesas 6:2, 3.
2. ?From wanem yumi gat kaon long papa mama blong yumi?
2 Fastaem, yumi gat kaon long God we i wokem yumi, from we hem i stampa blong laef. Be yumi gat kaon long papa mama blong yumi tu. ?Yumi save givim wanem samting long tufala we i gat sem praes long samting we tufala i bin givim long yumi? Pikinini blong God i talem se, sipos yumi givim olgeta samting blong wol, yumi no save pem laef blong yumi. Tru ya, yumi no save putum wan praes long laef blong yumi. (Mak 8:36, 37; Ol Sam 49:6-8) Tok blong God i talem se: “I nogud yufala i gat kaon long sam man. Be i gat wan samting i stap we yufala i mas mekem, we i olsem kaon blong yufala. Hemia we yufala i mas laeklaekem yufala.” (Rom 13:8) I stret nomo we yumi soemaot spesel lav long papa mama blong yumi, gogo laef blong tufala i finis. Yumi no save givim laef long tufala, olsem tufala i bin givim long yumi. Be yumi save mekem tufala i glad mo hapi, from we yumi pikinini blong tufala. Ol narafala man oli no save mekem tufala i hapi olsem.
3. ?Olsem Proveb 23:24, 25 i talem, wanem ol fasin blong yumi we oli save givim glad long papa mama blong yumi?
3 Proveb 23:24, 25 i talem se: “Papa blong pikinini we i gat stret fasin, bambae hem i glad. Papa blong pikinini we i waes, bambae hem tu i hapi. Yes, papa mo mama blong yu bambae tufala i hapi, mo mama blong yu we i bonem yu bambae hem i glad.” Ol papa mama oli wantem harem gud long ol pikinini blong olgeta. Oli wantem harem glad long ol samting we ol pikinini ya oli mekem. ?Olsem wanem nao? ?Papa mama blong yu, tufala i save glad mo harem gud long yu?
4. ?Kolosi 3:20 i talem se ol pikinini oli mas mekem wanem?
4 Samting ya i dipen long yu. ?Yu yu respektem papa mama blong yu mo harem advaes blong tufala, no no gat? God i givim advaes long olgeta we oli yang yet, i se: “Yufala pikinini, oltaem yufala i mas obei long ol papa mo mama blong yufala, from we fasin ya i save mekem Masta blong yumi i glad long yufala.” (Kolosi 3:20) Yumi mas obei “oltaem,” be hemia i i no min se papa mama tufala i gat raet blong askem yumi blong mekem samting we i no stret long loa blong God. Be taem yumi yang yet, tufala i mas lidim yumi long evri rod long laef blong yumi.—Proveb 1:8.
5. ?Sipos wan yangfala i gat pikinini blong hem long fyuja, bambae hem i wantem we pikinini i gat wanem fasin?
5 ?Olsem wanem long yu? ?Yu yu yangfala yet? Samtaem long fyuja, maet yu tu yu gat pikinini. Sipos i olsemia, ?yu yu wantem we ol pikinini blong yu bambae oli ona long yu? ?No yu wantem se oli stronghed? ?Yu wantem se oli lesin long tok blong yu, be taem yu no stap, oli sakem tok blong yu? Proveb 17:25 i talem se: “Pikinini we i stap mekem krangke fasin, hem i mekem papa blong hem i harem nogud. Mo hem i mekem mama blong hem we i bonem hem, hem i kros.” (The Bible In Living English) Yu yu save givim moa glad long papa mama blong yu, i winim glad we ol narafala man oli save givim long tufala. Be yu yu save stikim hat blong tufala moa bitim ol narafala tu. ?Weswe nao long yu? Ol fasin blong yu nomo bambae oli soemaot samting ya.
BLONG KAM WAES, YU NIDIM TAEM
6. ?Olsem wanem yumi save se taem i mas pas blong yumi kam waes?
6 Blong yu yu kam waes, plante yia i mas pas. I gud we ol yangfala oli save impoten poen ya. ?Yu yu gat 10 yia finis? ?Yu yu gat moa save naoia i winim taem we yu yu gat 5 yia nomo? ?Yu yu gat 15 yia finis? ?Save blong yu naoia i bigwan moa i winim taem yu gat 10 yia nomo? ?Yu yu stap ronem 20 yia blong yu? ?Yu yu luksave se waes blong yu naoia i bigwan moa i winim waes blong yu taem we yu gat 15 yia nomo? Taem yu tingtingbak long laef blong yu, i isi nomo blong luksave se taem i mas pas blong yu yu kam waes. Be i hadwok blong tingting se bambae long fyuja yu yu kam waes moa, i winim naoia. Maet wan yangfala i ting se hem i gat plante waes finis. Be ol yia we oli stap kam, oli save givim plante moa waes long hem.
7. ?Store blong King Rehoboam i tijim wanem long yumi long saed blong fasin waes?
7 ?Ol tok ya i minim wanem? Hem i minim se papa mama blong yu, tufala i waes moa long yu. Tufala i olfala moa long yu, mo tufala i gat moa ekspiryens long laef bitim yu. Taswe tufala i save olsem wanem blong winim plante trabol we oli stap traem yu. I hadwok long plante yangfala blong bilivim tok ya. Samfala oli singaot ol olfala se “krangke olfala.” Maet sam olfala oli mekem krangke fasin, be samting ya i no tru long bighaf blong olgeta. Sam yangfala tu oli mekem krangke fasin, be i no min se evri yangfala i mekem olsem. Fulap yangfala oli ting se oli waes moa bitim ol olfala. Wan king blong Isrel bifo, hem tu i tingting olsemia. Mo hem i kasem bigfala trabol from. Taem Rehoboam i gat 41 yia blong hem, hem i tekem ples blong papa blong hem Solomon, we hem i King blong Isrel. Ol man Isrel oli askem long hem blong mekem baden blong olgeta i no moa hevi tumas. Rehoboam i askem advaes blong sam olfala fastaem. Olgeta oli talem se i moa gud blong rul long kaengud mo kwaet fasin. Afta, hem i askem advaes blong sam yangfala. Olgeta oli talem se i moa gud blong rul long strong, raf fasin. Rehoboam i folem advaes blong ol yangfala ya. ?Wanem frut i kamaot from? Ten laen blong Isrel oli agensem Rehoboam, oli aot long rul blong hem. Tu laen blong kingdom blong hem nomo i stap. Ol advaes blong ol yangfala ya i no waes nating. Be ol advaes blong ol olfala ya i waes tumas. Taswe Baebol i talem se: “Fasin waes i stap wetem ol olfala, mo fasin sore i stap wetem olgeta we oli gat plante yia finis.”—Job 12:12; 1 King 12:1-16; 14:21.
8. ?Baebol i pulum yumi blong tingting olsem wanem long advaes blong papa mama mo ol man we oli olfala moa bitim yumi?
8 Yu no mas ting se ol advaes blong papa mama blong yu i no moa save wok naoia, from we tufala i olfala. Baebol i talem se: “Yu mas lesin long ol tok blong stret papa blong yu, mo yu no mas daonem mama blong yu from we hem i kam olfala.” I stret nomo we yumi soemaot respek long ol olfala from ol yia blong olgeta. Bakegen, Baebol i talem se: “Long fored blong waet hea, yufala i mas stanap. Mo yufala i mas tingbaot mo kea long man we i olfala finis. Mo yufala i mas fraet gud long God blong yufala. Mi mi Jeova.” I tru we plante yangfala oli sakem ol loa ya. Be olgeta oli no hapi from. Mo oli no mekem papa mama blong olgeta i hapi tu.—Proveb 23:22; Levitikas 19:32.
MEKEM PRAPA WOK BLONG YU LONG FAMLE
9. ?Sipos wan long famle i mekem stronghed no hem i stap daonem ol narafala, hem i save mekem wanem long famle?
9 Yumi no save jenisim trutok ya: Ol samting we yumi mekem oli gat paoa long ol narafala man. Sipos wan long famle i harem nogud, ol narafala long famle tu oli no save glad. Sipos wan long famle i stronghed no hem i stap daonem narafala oltaem, hem i save spolem pis long famle. Blong famle i rili hapi, olgeta evriwan oli mas mekem prapa wok blong olgeta.—Ridim 1 Korin 12:26.
10. ?From wanem i gud we ol pikinini oli lan blong wok gud?
10 Yu yu save mekem plante gudfala samting blong givhan long famle. Ol papa mama oli wok strong blong lukaot long ol nid blong famle. Sipos yu yu yangfala, mo yu stap wetem papa mama blong yu yet, yu yu save givhan. Ol man oli spenem plante taem long ples blong wok blong olgeta. From samting ya, samfala oli les finis long wok blong olgeta. Be sipos yu lanem blong wok gud mo blong tinghae long wok blong yu, yu save harem gud long hem. Man we hem i slou tumas long wok blong hem, mo hem i livim ol wok blong hem long narafala, hem i no save harem gud long wok blong hem. Mo hem i mekem ol narafala oli kros tu. Baebol i talem se hem i olsem ‘smok long ae blong ol man.’ (Proveb 10:26; Eklesiastis 3:12, 13) Taswe taem papa mama tufala i givim wok long yu long haos, mekem gud wok ya. Sipos yu wantem se tufala i rili glad long yu, mekem sam moa wok antap bakegen. Mekem samting we tufala i no bin askem long yu. Ating bambae yu harem gud moa long wok ya i winim narafala wok we tufala i givim long yu. ?From wanem? From we yu yu mekem wok ya blong mekem tufala i hapi nomo, i no from we tufala i bin askem long yu.
11. ?Olsem wanem ol tok mo wok blong pikinini i save givim gudnem long papa mama blong hem?
11 Taem ol man oli laekem fasin blong wan yangfala, oli askem se: ‘?Hu papa mama blong yangfala ya?’ Taem Deved i yangfala, hem i no fraet, mo hem i gat bigfala bilif long God. Taswe kwiktaem King Sol i askem se: “?Boe ya i blong hu?” (1 Samuel 17:55-58) Yu yu karem nem blong famle blong yu. Ol samting we yu yu mekem mo ol fasin blong yu oli save leftemap no daonem nem ya. Mo oli save leftemap no daonem tufala we i givim nem ya long yu. Long skul mo raonabaot long ples blong yu, yu save leftemap nem blong papa mama blong yu long plante rod. Yu save soemaot kaengud fasin. Yu save givhan long ol narafala man, mo yu save soemaot fasin fren mo respek long ol narafala. Sipos yu mekem olsem, yu yu stap onagud long God tu, we i wokem yu.—Proveb 20:11; Hibrus 13:16.
12. ?From wanem i gud we ol pikinini oli traehad blong folem rod we papa mama tufala i soemaot long olgeta?
12 Sipos yu yu hapi, papa mama blong yu tufala bambae i hapi tu. Tufala i stap traehad blong trenem yu, blong yu save gat wan gudfala laef. Folem rod we tufala i soemaot long yu, mo yu save mekem tufala i glad tumas. Tufala i wantem se yu kasem ol nambawan blesing long laef blong yu. God i pulum wan man blong raetem tok ya long Baebol se: “Pikinini blong mi, sipos hat blong yu i kam waes, hat blong mi bambae i hapi tumas.” (Proveb 23:15) Maet papa mama blong yu tufala i luksave wok we God i givim long tufala blong lidim yu long ol rod we oli waes. Ale, i gud yu givhan oltaem long tufala blong mekem wok ya. “Lesin long ol gudfala advaes, mo letem narafala i stretem yu, blong yu save kam waes long fyuja blong yu.”—Proveb 19:20.
13. ?Wanem i save givhan long pikinini blong kasem stret tingting long saed blong ol rul we papa mama tufala i mekem?
13 Samtaem maet yu yu ting se yu no moa save mekem ol samting we papa mama tufala i wantem. Maet yu harem we tufala i mekem i hevi tumas long yu, mo tufala i stap blokem yu tumas. Be yu mas rimemba se i no isi blong tufala i stanemap ol rul we oli no strong tumas mo oli no slak tumas. Sipos samtaem long fyuja yu yu gat sam pikinini blong yu, bambae yu luksave samting ya. Maet tufala i stanemap sam rul blong blokem yu, blong yu no joen wetem sam yangfala. No maet tufala i blokem yu blong yu no tekem drag, no blong yu no fren tumas wetem wan boe no gel. Be rimemba, i moa gud we tufala i stap stretem yu i winim we tufala i no kea nating, i no lukaotgud long yu. (Proveb 13:20; 3:31) Lesin long advaes blong tufala. Bambae yu kasem gudfala frut from. Mo tu, bambae yu mekem hat blong tufala i glad tumas.—Proveb 6:23; 13:1; 15:5; Hibrus 12:7-11.
14, 15. ?Taem trabol i kamaot long famle, Baebol i talem se pikinini i save mekem wanem blong holem pis long famle?
14 Tru tumas, yu yu no stampa blong ol trabol we oli kamaot long famle. Be taem ol trabol ya oli kamaot, fasin blong yu i save givhan long famle no i save spolem famle. Advaes blong Baebol i olsem: “Oltaem, long saed blong yufala, yufala i mas traehad tumas blong yufala i gat pis wetem olgeta man.” (Rom 12:18) I no isi blong folem advaes ya evritaem. Tingting mo fasin blong yumi evriwan i no sem mak. Samtaem long famle, tingting blong yu i defren olgeta long tingting blong brata no sista blong yu. No ating yu wantem wan samting, be olgeta oli wantem wan defren samting. From samting ya, maet yu ting se hem i stap tingbaot hem wan nomo. ?Sipos i olsemia, bambae yu mekem wanem?
15 Sam pikinini oli singaot strong long narafala pikinini se trabol i fol blong hem nomo. Mo oli singaot papa mo mama blong kam stretem trabol ya. No maet pikinini nomo i traem stretem trabol ya. Maet hem i pusum no i kilim narafala pikinini blong kasem samting we hem i wantem. Be Baebol i talem se: “Fasin luksave i save mekem kros i godaon.” (Proveb 19:11) ?Olsem wanem? Hem i mekem man i tingbaot fastaem from wanem narafala i mekem samting we hem i bin mekem. (Maet narafala pikinini i no wantem mekem rong ya.) Fasin luksave i save mekem se hem i tingtingbak long plante rong we hem tu i bin mekem. (!Mo hem i glad tumas we God i fogivim hem from!) Nating we brata no sista blong hem i rong, be bambae hem tu i mekem i rong sipos hem i letem kros blong hem i spolem pis long famle. Proveb ya we i tokbaot man we i gat fasin luksave, i se: “Mo i gud tumas sipos hem i fogetem ol mastik blong narafala.”—Ridim Kolosi 3:13, 14.
16. ?Wanem ol fasin blong pikinini we oli save mekem papa mama i glad, sipos tufala i fraetgud long God?
16 Sipos papa mama tufala i fraetgud long God, bambae tufala i glad long ol fasin we Jeova i glad long olgeta tu. Ol samting we i mekem tufala i harem nogud, oli sem samting we i mekem Jeova i harem nogud. (Ol Sam 78:36-41) Ol papa mama we oli no save tingting blong Jeova, maet oli glad sipos ol pikinini blong olgeta oli kasem haenem long wol. No maet oli wantem we oli kasem bigfala pei long wok blong olgeta. Be ol papa mama we oli wosip long Jeova, oli save se wol ya wetem ol samting blong hem oli stap lus. Be “man we i stap mekem ol samting we God i wantem, hem i stap we bambae i no save lus samtaem.” (1 Jon 2:15-17) Taswe tufala i rili hapi sipos pikinini i obei long Jeova, i mekem wok blong hem, mo i folem ol fasin blong hem. Tru ya, ol papa mama we oli wosip long Jeova, oli glad taem ol pikinini blong olgeta oli wok gud long skul. Be olgeta oli glad moa taem ol pikinini oli soemaot long skul mo raonabaot se oli stap fasgud long ol loa blong God, mo oli wantem mekem hem i glad. Mo ol papa mama oli glad moa bakegen taem ol pikinini ya oli stap gohed long ol fasin ya long ful laef blong olgeta.
WOK BLONG LUKAOTGUD LONG PAPA MAMA
17-19. ?Taem ol boe mo gel oli kam bigwan, olsem wanem oli save soemaot tangkyu long papa mama blong olgeta?
17 Taem yumi bigman finis mo yumi aot long haos blong papa mama blong yumi, yumi no mas fogetem tufala. Yumi wantem se tufala i stap hapi olwe. Plante yia finis, tufala i bin lukaotgud long yumi. Plante taem tufala i lego samting we tufala i wantem blong givim samting we yumi nidim. ?Nao yumi save mekem wanem blong soemaot tangkyu long tufala?
18 Yumi save tingbaot loa blong God we i talem se: “Bambae yu ona long papa mo mama blong yu.” (Matyu 19:19) Ating yumi no gat tumas taem from we yumi bisi oltaem nomo. Be i impoten tumas long papa mama blong yumi we yumi sanem toktok i go long tufala no yumi go visitim tufala.
19 Taem ol yia oli stap pas, yumi save “ona” long tufala long plante narafala rod tu. Sipos tufala i nidim sam samting long saed blong bodi, yumi save givim long tufala. Ale, yumi soemaot tangkyu from ol samting we tufala i givim finis long yumi. Olsemia, yumi soemaot se yumi tinghae long ol stret loa blong Jeova tu. Aposol Pol i tokbaot ol olfala i se: “Sipos wan wido i gat pikinini blong hem no smol bubu blong hem, olgeta ya oli mas lan we wan nambawan wok blong ol Kristin man, oli mas lukaotgud long ol famle blong olgeta. Oli mas mekem olsem from we oli pem kaon blong olgeta long ol mama mo papa blong olgeta, from we hemia wan samting we God i glad long hem.”—1 Timote 5:3, 4.
20, 21. (a) ?Olsem Matyu 15:1-6 i talem, yumi mas mekem wanem blong “ona” long papa mama blong yumi? (b) ?I gat samting we i save blokem ol pikinini, blong oli no moa lukaotgud long papa mama blong olgeta?
20 Baebol i soemaot klia se yumi “ona” long papa mama blong yumi sipos yumi givhan long tufala blong kasem ol samting long saed blong bodi. Long taem blong Jisas, ol man Farisi oli kam luk Jisas, nao oli tok agens long ol disaepol blong hem, se olgeta oli stap brekem kastom blong ol man Jyu. Nao Jisas i ansa long olgeta, i se: “?Be yufala tu, from wanem yufala i stap brekem loa blong God blong holem ol kastom blong yufala? God i talem se: ‘Yu mas ona long papa mo mama blong yu.’ Mo hem i talem se: ‘Man we i tok nogud long papa mo mama blong hem, yufala i mas kilim hem i ded.’ Be yufala i stap tijim ol man se: ‘Sipos wan man i talem long papa mo mama blong hem se ol samting ya we hem i save yusum blong givhan long tufala oli tabu, oli blong God, bambae i no moa gat tok se hem i mas ona long papa blong hem.’ Long fasin ya, yufala i mekem tok ya blong God i nating nomo, blong yufala i save holem kastom blong yufala.”—Matyu 15:1-6.
21 Long kastom blong olgeta, oli talem se ol mane no graon blong olgeta oli “tabu, oli blong God.” Ale, oli ting se oli no moa stap aninit long loa blong God, mo oli no moa lukaot long papa mama blong olgeta. Be Jisas i no agri long samting ya. Mo yumi tede, yumi mas tinghevi long samting ya. Long samfala ples, gavman i lukaot long ol nid blong ol olfala. ?Be ol samting we gavman i stap givim long tufala, oli naf? Sipos no, no sipos gavman i no stap givim pei long ol olfala, ol pikinini we oli ona long papa mama blong olgeta oli mas givhan long olgeta, blong oli no sot long wan samting. Olsem aposol Pol i talem, fasin blong yumi blong lukaotgud long ol nid blong olfala papa mama blong yumi i rili “wan nambawan wok blong ol Kristin man.” Mo fasin ya i stap soemaot se yumi fasgud long Jeova God, we i wokem famle fastaem.
22. Yumi mas lukaotgud long papa mama blong yumi long saed blong bodi. ?Be yumi mas lukaot long wanem narafala nid blong tufala tu?
22 Sipos olfala papa mama blong yumi tufala i gat naf kakae, naf klos, mo wan haos blong tufala, yumi no mas ting se tufala i no moa nidim wan samting. Tufala i nidim plante samting long saed blong filing mo speret. Tufala i nidim lav mo tufala i nidim we yumi keagud long tufala. Samtaem tufala i nidim samting ya tumas. Oltaem yumi evriwan i nidim lav. Yumi nidim we yumi haf long wan famle, we yumi no stap yumi nomo. Yumi no mas fogetem olfala papa mama blong yumi, mo ol samting we tufala i nidim long saed blong bodi mo filing. Baebol i talem se: “Man we i mekem i nogud long papa blong hem, mo we hem i ronemaot mama blong hem, hem i mekem samting blong sem nomo.”—Proveb 19:26.
23. ?Olsem wanem pikinini i save mekem papa mama blong hem i glad?
23 Taem ol pikinini oli yang, kasem taem we oli kam bigman, oli impoten tumas long papa mama blong olgeta. Plante pikinini oli givim hadtaem mo sem nomo long tufala. Be sipos yu yu gat respek long papa mama blong yu, yu harem advaes blong tufala, mo yu soemaot se yu laekem mo yu tingbaot tufala, yu yu save mekem tufala i hapi evri dei. Yes, “Yu mas mekem papa mama blong yu i hapi. Yu mas mekem stret mama blong yu i glad.”—Proveb 23:25, New English Bible.