Stori 9
Noa i Bildim Wan Bigfala Sip
NOA mo woman blong hem, tufala i gat tri pikinini boe. Nem blong ol pikinini ya, hemia: Sem, Ham mo Jafet. Mo ol pikinini ya oli gat woman blong olgeta. Taswe, i gat eit man long famle blong Noa.
God i askem long Noa blong mekem wan samting we i defren. Hem i talem long hem se i mas bildim wan bigfala sip. Sip ya bambae i olsem wan bigfala, longfala bokis. God i talem se: ‘Yu mas mekem tri dek blong hem, mo yu mas wokem ol rum insaed long hem.’ Ol rum ya oli blong Noa mo famle blong hem, wetem ol anamol, mo ol kakae we bambae oli nidim.
God i talem long Noa blong wokem gud sip ya, blong wota i no save lik i kam insaed long hem. Hem i se: ‘Bambae mi mekem bigfala ren i foldaon blong draonem ful wol. Olgeta man we oli no stap insaed long sip ya bambae oli ded.’
Noa mo trifala pikinini blong hem oli obei long Jeova mo oli stat blong bildim bigfala sip ya. Be ol narafala man oli laf long olgeta. Mo oli gohed nomo blong mekem ol nogud fasin. Taem Noa i talemaot ol samting we God bambae i mekem, i no gat wan man i bilivim hem.
I tekem taem blong bildim sip ya from we hem i bigwan. Afta we plante yia i pas, oli finisim wok ya. Nao God i talem long Noa blong karem ol anamol oli kam insaed long sip ya. Long saed blong sam kaen anamol, oli mas karem olgeta oli kam tutu, wan we i man mo wan we i woman. Be long saed blong sam narafala anamol, God i talem long Noa blong karem seven blong olgeta i kam. Mo tu, Noa i mas karem olgeta kaen pijin oli kam insaed long sip. Noa i mekem i stret olsem we God i talem long hem.
Biaen, Noa mo famle blong hem oli kam insaed long bigfala sip ya. Nao, God i satem doa. Ale, Noa mo famle blong hem oli stap insaed long sip ya, oli stap wet. Traem tingbaot sipos yu yu stap wet wetem olgeta. ?Bambae bigfala wota i ron olsem God i bin talem, no nogat?