Japta 14

‘Mi Mi Mekem Wan Kontrak Wetem Yufala Blong Wan Kingdom’

1. ?Long naet bifo hem i ded, Jisas i soemaot wanem hop long ol aposol blong hem?

LONG naet bifo hem i ded, Jisas i talem long ol stret aposol blong hem, se: ‘Long haos blong Papa blong mi, i gat plante rum i stap. Mi mi stap go blong mekem wan ples i rere blong yufala, blong bambae yufala i save stap long ples ya we mi mi stap.’ Biaen hem i talem long olgeta, se: “Mi mi mekem wan kontrak wetem yufala, jes olsem Papa blong mi i mekem wan kontrak wetem mi, blong wan kingdom.” (Jon 14⁠:2, 3; Luk 22:29) !Hemia nambawan hop blong olgeta!

2. ?Hamas man bambae oli joen wetem Kraes long Kingdom blong heven?

² Be ol tok ya blong Jisas oli no min se ol aposol nomo oli mas rul wetem hem long Kingdom blong heven. Biaen ol man oli kasem save se God i pemaot 144,000 man long wol blong kasem bigfala praes ya. (Rev. 5:9, 10; 14:1-4) ?I gat yet sam man tede we oli traem kasem praes ya?

Hivimap Ol Man Blong Kasem Kingdom

3. ?Long wok blong prij, Jisas i talemaot wanem?

³ Biaen we Herod Antipas i putum Jon Baptaes i stap long kalabus, Jisas i stat mekem wok blong prij i kam bigwan moa. Hem i talemaot “kingdom blong heven.” (Mat. 4:12-17) Hem i mekem ol man oli luksave se oli gat jans blong kam insaed long Kingdom ya. Ol disaepol blong hem oli traehad blong kasem praes ya.—Mat. 5:3, 10, 20; 7:21; 11:12.

4. (a) ?Wetaem ol faswan disaepol blong Jisas oli kasem tabu speret? (b) ?Wanem samting i soemaot we oli mas hivimap ol man blong kasem Kingdom fastaem?

⁴ Long Pentekos blong yia 33 K.T., tabu speret i makemaot ol faswan man blong Kingdom. (Wok 2:1-4; 2 Korin 1:21, 22) Nao oli kasem save olsem wanem God i sevem sam man, blong oli kasem laef we i neva save ded long heven. Pita i yusum “ol ki blong kingdom blong heven” blong openem save ya—fastaem long ol man Jyu, biaen long ol man Sameria, mo biaen bakegen long ol hiten man. (Mat. 16:19) God i tingtinggud blong stanemap gavman ya we i mas rulum ol man long 1,000 yia. Kolosap olgeta leta blong Grik haf blong Baebol i go stret fastaem long ol man blong kasem Kingdom—“ol tabu man,” “ol man we oli joen long krae ya we i singaot olgeta blong go long heven.”a

5. ?God i singaot olgeta oli kasem laef long heven from we oli man blong wok blong hem we oli gud moa long ol narafala man blong bifo?

⁵ God i no singaot olgeta blong oli kasem laef long heven, from we oli gudfala moa long olgeta man blong hem we oli ded bifo long Pentekos blong yia 33 K.T. (Mat. 11:11) Nogat, be Jeova i jes stat jusumaot olgeta we oli mas rul wetem Kraes. Samwe long 1,900 yia, i gat krae ya nomo blong singaot ol man, hemia krae ya blong oli go long heven. Wan smol kampani nomo i kasem gladhat ya blong God. Hemia i mekem ol plan blong hem i gohed gud i kamtru long waes mo lav blong hem.—Efes. 2:8-10.

6. (a) ?From wanem taem ya i kam finis blong no moa singaot sam man oli go long heven? (b) ?Hu ya i mekem profet tok long saed blong “bigfala kampani” i kamtru? ?Wetaem samting ya i hapen?

⁶ Taem ol yia oli pas, smol namba ya, 144,000 i kasem mak blong hem. Mo smol taem biaen, ol man Isrel ya blong speret oli mas kasem laswan mak we i soemaot we God i agri long olgeta. (Rev. 7:1-8) Jeova i yusum speret blong hem blong mekem ogenaesesen i kasem moa save long Tok blong hem. Taswe hem i save lidim ol samting blong mekem wan narafala haf blong plan blong hem i kamtru, hemia we Revelesen 7:9-17 i tokbaot. Wan “bigfala kampani” blong olgeta nesen i mas hivap. Hem i gat hop blong sef long bigfala trabol mo kasem laef we i stretgud olgeta blong stap foreva long paradaes long wol. Taem yumi tingbaot ol samting we oli hapen, i klia nomo we krae ya blong singaot man i go long heven i finis long yia 1935. Long yia ya, oli luksave se “bigfala kampani” i gat hop blong kasem laef long wol. I stat long taem ya, “bigfala kampani” ya i joen wetem smol haf blong grup ya we i mas go long heven—we i gat sam taosen nomo oli stap yet. Ol milyan narafala man ya oli mekem wosip long Jeova tu, mo oli gat hop blong kasem laef foreva long wol.

7. ?I gat rod tede blong samfala oli kasem krae ya we i singaot olgeta blong go long heven? ?From wanem yu yu ansa olsem?

⁷ ?Samting ya i min se God i no stap singaot yet sam man blong kasem laef long heven? Gogo kasem we God i givim laswan mak long olgeta wanwan, maet samfala we oli gat hop ya oli save foldaon. Taswe God bambae i mas jusum sam narafala blong tekem ples blong olgeta. Be, i luk olsem we samting ya i no kamtru plante taem.

Ol Pikinini Blong God Long Speret—?Olsem Wanem Oli Save?

8. ?Pol i talem wanem blong soemaot olsem wanem oli luksave se tabu speret i bonem olgeta?

⁸ Speret blong God i mekem ol Kristin we oli baptaes finis oli kasem krae ya we i singaot olgeta blong go long heven. Taswe oli savegud we God i adoptem olgeta olsem pikinini blong hem long speret. Aposol Pol i soemaot samting ya, taem hem i raetem leta blong hem i go long ol “tabu man” blong Rom. Hem i tokbaot fasin blong olgeta Kristin blong taem ya. Hem i talem se: “Olgeta ya we speret blong God i stap lidim olgeta, oli pikinini blong God. Tru ya, yufala i no kasem wan speret blong kam slef, blong mekem yufala i fraet bakegen, be yufala i kasem wan speret we i adoptem yufala olsem pikinini. From speret ya yumi stap singaot, se: ‘!Abba, Papa!’ Speret hem wan i givim wetnes long speret blong yumi we yumi pikinini blong God. Sipos nao yumi pikinini blong God, yumi man blong kasem sam samting tu: yes, yumi kasem ol samting blong God, be yumi kasem ol samting ya wetem Kraes, sipos yumi harem nogud wetem hem, blong bambae yumi save kasem glori tugeta wetem hem.”—Rom 1:7; 8:14-17.

9. ?Olsem wanem ‘speret hem wan i givim wetnes’ wetem speret blong olgeta we oli tru pikinini blong God?

⁹ Yumi save makem we long ol tok ya i gat tu fasin blong yusum wod ya, “speret”: “Speret hem wan” mo “speret blong yumi.” Faswan i stap tokbaot paoa blong God we i wok. Paoa ya i stap pulum ol pikinini blong God long speret, blong oli savegud we God i adoptem olgeta olsem pikinini blong hem we i fri nao. Speret ya tu i givim wetnes from Tok blong God, Baebol, we i olsem wan leta we God i raetem long olgeta wanwan. (1 Pita 1:10-12) Taem olgeta we speret blong God i makemaot, i ridim ol samting we Baebol i talem long ol pikinini blong God long speret, oli save talem, se: ‘Hemia i stret long mi nomo.’ Long defren kaen fasin, prapa paoa blong God i givim wetnes long speret blong olgeta. Hem i pulum

prapa tingting mo hat blong olgeta, se oli pikinini blong God. Stret nomo long ol samting ya we speret blong God i soemaot long olgeta, tingting mo hat blong olgeta i fas nao long hop ya: Oli joen blong kasem olting wetem Kraes. Oli agri long ol responsabiliti blong ol pikinini blong God long speret.—Fil. 3:13, 14.

10. (a) ?Wanem samting i no naf blong makem wan man i kam wan Kristin we tabu speret i makemaot? (b) ?Olsem wanem “ol narafala sipsip” oli tingbaot ples blong olgeta long plan blong God?

¹⁰ ?Samting ya i hapen long yu? Sipos yes, yu yu gat wan nambawan presen. Be, yu yu no mas mastik long sam samting. Sipos yu yu stap laekem tumas ol dip samting blong speret, no sipos yu yu stap wok strong long wok blong prij, no sipos yu yu gat wan bigfala lav long ol brata, yu yu no mas ting se samting ya i soemaot we yu yu wan Kristin we tabu speret i makemaot. Plante “narafala sipsip” oli gat ol gudgudfala fasin ya tu. Hat blong olgeta tu i haremgud, taem oli ridim Baebol long saed blong ol man we oli mas joen wetem Kraes. Be oli no gat praod tingting blong talem se oli kasem wan samting we God i no givim long olgeta. (Lukluk Namba 16:1-40.) Oli luksave plan blong God long saed blong wol, mo oli wok strong blong joen long plan ya.

Fasin Stret Blong Joen Long Memoriol

11. ?Hu ya i kam long miting evri yia blong tingbaot ded blong Kraes? ?From wanem?

¹¹ Evri yia, long Nisan 14, afta we san i go slip finis, ol man blong Jisas we tabu speret i makemaot, oli tingbaot ded blong hem. Oli mekem i stret nomo long oda we Jisas i givim long ol aposol blong hem. (Luk 22:19, 20) Ol “narafala sipsip” tu oli kam long miting ya, be oli no joen blong kakae bred mo waen. Oli lukluk nomo.

12. ?Olsem wanem samfala Kristin blong Korin oli no gat respek long “Lodsapa”?

¹² Hemia i no wan emti seremoni blong jyos, be hem i gat bigfala mining. Long faswan handred yia, Pol i raetem wan leta i go long ol Kristin blong Korin, Gris, from we samfala oli mestem blong soemaot we oli tinghae long miting ya. Hem i talem se: “Enikaen man we i kakae bred mo i dring kap ya blong Masta long wan fasin we i no stret, bambae i rong long saed blong bodi mo blad blong Masta.” ?From wanem samfala oli gat ‘fasin we i no stret’? From we oli no mekem hat mo maen blong olgeta i rere fastaem. Olsem nao, i gat sam samting we kongregesen i seraot from. I gat tu samfala we oli kakae mo oli dring bitim mak bifo long miting ya. Oli no kea long Lodsapa. Oli no gat gud fasin blong luksave bigfala mining blong bred mo waen long taem ya.—1 Kor. 11:17-34.

13. ?Wanem mining blong bred mo waen we oli tekem long memoriol?

¹³ ?Wanem mining blong bred mo waen ya? Mining ya i no stanap long sam kaen merikel we i mas jenisim bred mo waen. Kraes i no stap givim hem olsem wan sakrafaes bakegen long evri Memoriol. Baebol i talem se: “Kraes i givim laef blong hem wantaem nomo, blong tekemaot ol sin blong plante man.” (Hib. 9:28, NTB; 10:10; Rom 6:9) Taswe bred ya we i no gat is long hem mo red waen ya oli olsem saen. Oli soemaot bodi blong Jisas mo blad blong hem we i ron. !Be tufala samting ya oli gat praes we i bitim mak! Jisas i givim bodi blong hem olsem man we i no gat sin, blong olgeta man oli save laef foreva. (Jon 6:51) Nao blad blong hem we i ron i wok blong stanemap wan plan we i gat tu saed blong hem—hem i klinim olgeta man long sin, sipos oli gat bilif long hem, mo hem i mekem wan nyufala kontrak i wok bitwin God mo kongregesen blong Isrel blong speret, we ol Kristin we tabu speret i makemaot oli blong hem. (1 Jon 1:7; 1 Kor. 11:25; Gal. 6:14-16) Nao from samting ya God i save talem se ol memba blong “smol kampani” oli stret long fes blong hem, from we hem i kaontem olgeta olsem oli stret man. (Luk 12:32) From samting ya nao, hem i save bonem olgeta from tabu speret blong oli kam pikinini blong God. Nao oli save gat hop blong joen wetem Kraes long Kingdom blong heven. Taem oli kakae bred mo waen long Memoriol evri yia, oli givim wetnes we oli gat hop blong go long heven. Evri yia oli gat moa tangkyu bakegen, we i go dip moa, from we oli stap long “nyufala kontrak” we Kraes i wokem long olgeta wetem God.—Hib. 8:6-12.

“Bambae Mifala i Kam Wetem Yufala”

14. (a) ?From wanem “ol narafala sipsip” oli no kakae bred mo waen long memoriol? ?Oli glad tumas blong wet long wanem? (b) ?Olsem wanem oli tingbaot fasin blong olgeta blong joen wanples wetem ol man blong kasem Kingdom?

¹⁴ From we oli luksave ol samting we Jeova i mekem long ol man blong hem we tabu speret i makemaot, “ol narafala sipsip” oli joen wetem olgeta. Oli talem se: “Bambae mifala i go wetem yufala pipol, from we mifala i harem we God i stap wetem yufala.” (Sek. 8:20-23) Tufala kampani ya oli mekem miting tugeta, mo tufala i joen long wok blong talemaot gud nyus blong Kingdom long olgeta ples blong wol. Be, “ol narafala sipsip” oli no stap long “nyufala kontrak” wetem Isrel blong speret. Oli no stap tu long “kontrak ya . . . blong wan kingdom” we Jisas i mekem wetem olgeta we God i jusum blong go long heven. Taswe, “ol narafala sipsip” oli no save kakae bred mo waen blong Memoriol. (Luk 22:20-29) Be, “nyufala kontrak” i stap kasem mak blong hem, i stap hivimap ol laswan memba blong “smol kampani” blong go long Kingdom blong heven. Taswe “ol narafala sipsip” oli luksave se ol blesing we oli kasem bambae long wol from Kingdom ya, oli stap kolosap nomo. Oli haremgud tumas, mo long lukluk blong olgeta, oli gat nambawan presen ya: Long “lasdei,” oli joen wanples wetem ol man blong kasem Kingdom.

[Futnot]

Tingtingbak

● ?From wanem Kristin Grik haf blong Baebol i pulum tingting blong man i go moa long hop blong kasem laef long heven?

● ?Olsem wanem ol Kristin we tabu speret i makemaot oli save se God i bonem olgeta olsem pikinini blong hem? ?Wanem mining blong ol saen we oli tekem long Memoriol?

● ?Olsem wanem “ol narafala sipsip” oli soemaot we oli joengud long “smol kampani”?