Japta 16

Lisen Long Ol Advaes We Oli Stretem Yu

1. (a) ?I gat samfala we oli no nidim advaes mo fasin blong stretem olgeta? (b) ?Yumi mas tingbaot wanem kwestin?

BIGHAF blong yumi i agri long tok ya blong Baebol: “Yumi evriwan i foldaon plante taem.” (Jemes 3:2) Yumi save se yumi foldaon samtaem, from we yumi sot long ol gudfala fasin we Baebol i tokbaot. From samting ya, yumi agri we Baebol i stret nomo taem hem i talem long yumi, se: “Lisen long ol advaes mo yu yu mas agri long ol tok we i stretem yu, blong yu yu save kam waes long fyuja blong yu.” (Prov. 19:20) Yumi save se yumi nidim help ya. I klia we yumi mas stretem laef blong yumi, blong mekem hem i laenap wetem ol samting we yumi lanem long Baebol. ?Be olsem wanem long yumi nao, sipos wan Kristin brata i givim advaes long yumi long wan kaen bisnes we yumi no waes long hem? ?Olsem wanem nao, sipos hem i advaesem yumi blong yumi save kam gud moa long sam kaen wok?

2. (a) ?From wanem yumi mas gat tangkyu long ol advaes we yumi wanwan i kasem? (b) ?Be yumi no mas karem wanem kaen fasin?

² From we yumi no stretgud olgeta, sin i pulum yumi wantaem nomo. Be yumi mas rili gat tankyu from ol advaes, mo yumi mas traehad blong ona long olgeta. Sipos i olsem bambae i gat gud frut i kamaot from. (Hib. 12:11) Be, taem yumi kasem advaes, maet yumi traem talem se yumi stret, no maet yumi traem talem se trabol ya i no bigwan tumas, no yumi traem seftem blem ya i go long wan narafala. ?Ating yu yu mekem olsem finis? ?Taem yumi tingtingbak long samting ya, tingting blong yumi i konkon yet long hemia we i givim advaes? ?Yumi rere yet blong lukaot ol smol fol blong hem, no blong agensem fasin blong advaes blong hem? ?Yumi mekem eskyus from, blong haedem prapa fasin slak blong yumi? ?Olsem wanem Baebol i save givhan blong winim olkaen tingting ya?

Sam Eksampel Blong Wekemap Tingting Blong Yumi

3. (a) ?Baebol i talem wanem store we i save halpem yumi blong gat stret tingting long ol advaes? (b) Yusum ol kwestin we oli stap ya blong luklukgud olsem wanem long Sol mo Usaea taem oli kasem advaes.

³ Tok blong God i givim plante woning long yumi long samting ya, be hem i go moa, from we hem i tokbaot sam tru store blong man we oli kasem advaes. Plante taem wan advaes i stretem man tu. Yes, hemia we i kasem advaes, i mas jenisim prapa tingting no sam fasin blong hem. Yu yu save yusum nao ol kwestin we oli stap biaen blong luklukgud long ol eksampel ya. Bambae yu yu save kasem plante blesing from:

SOL, PIKININI BLONG KIS: Hem i no obei olwe long Jeova God, from we taem hem i mekem faet agens long Amalek, hem i no kilim king ya i ded mo i no spolem ol nambawan anamol blong olgeta. (1 Saml. 15:1-11)

?Taem Samuel i givim advaes long Sol, olsem wanem ansa blong hem i soemaot we hem i traem mekem rong blong hem i smol nomo? (Vas 20) ?Hem i traem seftem blem ya i go long hu? (Vas 21) ?Taem hem i agri we hem i rong, hem i mekem wanem eskyus? (Vas 24) ?I luk olsem we hem i wari moa long wanem samting? (Vas 25, 30)

USAEA: Hem i go insaed long haos blong Jeova blong bonem insens, be ol pris nomo oli gat raet blong mekem samting ya. (2 Kron. 26:16-20)

?Taem jif pris i traem blokem king Usaea, from wanem king ya i kros? (Lukluk vas 16.) ?Wanem samting i hapen from? (Vas 19-21)

4. (a) ?From wanem Sol mo Usaea i no harem advaes? (b) ?From wanem hemia i wan bigfala trabol tede yet?

⁴ ?From wanem tufala ya i hadwok blong agri se oli nidim advaes? Stampa trabol blong olgeta hemia fasin flas, from we oli tinghae tumas long olgeta wanwan. Plante man tede oli gat trabol from fasin ya. From we oli ting se oli tekem haenem, maet from ol yia no wan haeples, oli no moa agri blong kasem advaes. Oli ting se ol advaes oli min se oli no naf no maet oli save spolem haenem blong olgeta. Be fasin praod blong olgeta, hemia nao i rili soemaot we oli slak. Oli no save mekem eskyus ya from we plante oli gat fasin ya tede. Fasin flas i wan trap we Setan i yusum blong mekem tingting blong man i tudak. Hem i traem mekem man i agensem Jeova we i givhan from Baebol mo ogenaesesen blong hem. Jeova i wekemap tingting blong yumi, i se: “Bifo man i brokdaon i gat fasin flas, mo bifo man i foldaon i gat tingting we i praod.”—Prov. 16:18; lukluk tu Rom 12:3; Proveb 16:5.

5. Yusum ol kwestin we oli stap long haf ya blong makem ol gud samting we yumi save lanem long store blong Moses mo Deved.

⁵ Baebol i tokbaot sam gudfala eksampel blong man we i harem ol advaes. Yumi save lanem gud samting long ol store ya. Tingbaot:

MOSES: Papa blong woman blong hem i givim sam gud advaes long hem, blong bodi blong hem i no kam slak from strong wok blong hem. Moses i lesingud mo i ona long advaes ya wantaem nomo. (Eks. 18:13-24)

?Nating we Moses i gat big paoa, from wanem tingting blong hem i open long ol advaes? (Lukluk Namba 12:3.) ?Olsem wanem fasin blong hem i impoten long yumi tu? (Sef. 2:3)

DEVED: Hem i mekem nogud from we hem i stilim woman blong wan man. Biaen hem i mekem plan blong hasban blong woman ya i ded, blong hem i save maredem woman ya blong kavremap sin blong hem. Sam manis oli pas bifo Jeova i sanem Natan i go stretem Deved. (2 Saml. 11:2 kasem 12:12)

?Deved i kam kros taem oli stretem hem, i traem talem se fol blong hem i smol no i traem seftem blem i go long narawan? (2 Saml. 12:13; Sam 51:ol tok antap mo vas 1-3) ?From we Jeova i agri long fasin blong Deved blong tanem tingting blong hem from sin ya, hemia i min se Deved mo famle blong hem oli no kasem ol badfrut blong rong fasin blong hem? (2 Saml. 12:10, 11, 14; Eks. 34:6, 7)

6. (a) ?Deved i gat wanem filing long olgeta we oli givim advaes long hem? (b) ?Sipos yumi harem ol advaes, samting ya i save blesem yumi olsem wanem? (c) ?Yumi no mas foget wanem sipos yumi kasem strong tok blong stretem yumi?

⁶ King Deved i savegud ol blesing we man i kasem sipos i harem ol gud advaes. Taem i gat jans from, hem i talem tangkyu long God from hemia we i givim advaes long hem. (1 Saml. 25:32-35; lukluk tu Proveb 9:8.) ?Yumi gat fasin ya? Sipos i olsem, bambae samting ya i sevem yumi long olkaen tok no olkaen wok we yumi mekem fastaem, be biaen yumi save harem nogud from. Sipos oli mas stretem yumi bigwan from sam rong samting olsem sin blong Deved wetem Batseba, yumi mas neva foget we fasin blong Jeova blong stretem yumi i soemaot lav blong hem. Hemia i blong mekem yumi haremgud blong olwe.—Prov. 3:11, 12; 4:13.

Ol Nambawan Fasin

7. ?Jisas i soemaot we ol man oli mas gat wanem fasin, blong go insaed long Kingdom blong God?

⁷ Blong yumi frengud wetem Jeova mo ol Kristin brata blong yumi, yumi mas karem sam gudgudfala fasin. Jisas i makemaot wan gudfala fasin ya, taem hem i tekem wan yang pikinini i stap long medel blong ol disaepol blong hem, i talem se: “Sipos yufala i no tanraon, i no kam olsem yang pikinini ya, yufala bambae i no save kam insaed long kingdom blong heven. Be, man ya we i mekem hem i stap daon olsem yang pikinini ya, hemia man ya i hae moa long kingdom blong heven.” (Mat. 18:3, 4) Ol disaepol ya oli mas jenis. Oli mas lego fasin flas blong olgeta mo oli mas gat fasin blong tingting we i stap daon.

8. (a) ?Yumi mas stap daon long fes blong hu? ?Mo from wanem? (b) ?Sipos yumi gat fasin ya, bambae yumi mekem wanem taem yumi kasem advaes?

⁸ Biaen aposol Pita i raetem long ol Kristin brata, i se: “Yufala olgeta i mas stretem tingting blong yufala long fasin we i stap daon wan long narawan, from we God i agensem ol flas man, be hem i givim gladhat blong hem long olgeta we tingting blong olgeta i stap daon.” (1 Pita 5:5) Yumi save finis se yumi mas stap daon nomo long fes blong God. Be vas ya i talem tu we tingting blong yumi i mas stap daon long fes blong ol narafala brata we oli bilif. Sipos yumi gat fasin ya, bambae yumi no kam krangke olsem man we i harem nogud from ol advaes blong ol narafala. Bambae yumi wantem tumas lanem sam samting from ol narafala. (Prov. 12:15) Sipos wan brata blong yumi i ting se i mas givim advaes blong stretem yumi, bambae yumi no sakem advaes ya, from we yumi luksave se Jeova i stap yusum hem blong stretem yumi.—Sam 141:5.

9. (a) ?Wanem narafala fasin i joengud long fasin blong tingting we i stap daon? (b) ?From we fasin blong yumi i save spolem ol narafala, olsem wanem yumi mas keagud long ol­geta?

⁹ Wan narafala gud fasin we i joen long fasin blong stap daon, hemia i fasin we i keagud long ol narafala. Yumi agri nomo we ol samting we yumi mekem oli save gat paoa long ol narafala man. Aposol Pol i givim advaes long ol Kristin blong Korin mo Rom blong oli keagud long voes blong hat mo tingting blong ol narafala. Hem i no talem se oli mas blokem olgeta wanwan samting we oli laekem moa. Be hem i pulum olgeta blong no mekem wan kaen samting we i save pusum wan narafala man blong mekem sam samting we voes blong hat mo tingting blong hem i talem se i rong. From we sipos i olsem, be man ya i save lus long saed blong speret. Aposol Pol i eksplenem rul ya, i se: “I nogud man i stap lukaot rod we i save givhan long hem nomo. Yumi mas lukaot rod we i save givhan long ol narafala man we oli stap raonabaot long yumi. . . . Yes, be long olgeta samting we yufala i kakae mo we yufala i dring, mo long olgeta fasin blong yufala, oltaem yufala i mas leftemap nem blong God. Yufala i mas no mekem samtaem we bambae ol man Isrel, no ol hiten man, no ol memba blong jyos blong God oli save trabol long fasin blong yufala.”—1 Kor. 10:24-33, NTB; 8:4-13; Rom 14:13-23.

10. ?Wanem samting i soemaot sipos yumi ona long advaes ya blong Baebol?

¹⁰ ?Yu yu gat fasin blong putum ol samting blong ol narafala oli stap fastaem long ol prapa samting blong yu? Rul ya i save wok long plante samting, be tingbaot eksampel ya: Fasin blong ol klos mo blong hea i bisnes blong evriwan, olsem wanem hem i laekem, sipos hem i no bitim mak i klin mo i stretgud. Nao sipos yu yu lanem we fasin blong ol klos mo hea blong yu i blokem sam man ples blong no lesin long Kingdom mesej, from sam kaen tingting blong olgeta, ?yu yu rere blong jenisim fasin ya? ?Long lukluk blong yu, laef blong wan narafala man i impoten moa i winim fasin blong tingbaot ol prapa samting blong yu nomo?

11. ?Wanem samting i soemaot we i impoten blong gat ol gudgudfala fasin ya sipos yumi wantem kam wan tru Kristin?

¹¹ Taem ol gudgudfala fasin ya we yumi jes tokbaot oli stap long yumi, samting ya i soemaot we yumi stat gat tingting blong Kraes. Tingting blong hem i stap daon, taswe Jisas i soemaot nambawan eksampel. (Jon 13:12-15; Fil. 2:5-8) From we hem i keagud long ol narafala, Jisas i no stap givhan long hem wan nomo. Hem i soemaot gudfala rod we yumi mas folem.—Rom 15:2, 3.

Letem Jeova i Stretem Yu

12. (a) ?Yumi evriwan i mas jenis olsem wanem? (b) ?Wanem samting i save halpem yumi?

¹² From we yumi olgeta i sinman, yumi mas jenisim sam tingting mo sam fasin blong yumi wanwan, blong saenaot i stret long fasin blong God blong yumi. Yumi mas putum “nyufala fasin.” (Kol. 3:5-14; Taet. 2:11-14) Ol advaes mo ol tok blong stretem yumi oli save halpem yumi blong faenemaot long wanem samting yumi mas jenis, mo olsem wanem yumi save jenis.

13. (a) ?Jeova i yusum wanem blong givim advaes long yumi? (b) ?Yumi mas mekem wanem from?

¹³ Baebol hem wan i stampa blong tijim yumi. (2 Tim. 3:16, 17) Jeova i halpem yumi blong luk olsem wanem yumi save ona long Baebol from ol buk mo ol miting we ogenaesesen blong hem i wokem. ?Tingting blong yumi i stap daon mo yumi agri se yumi nidim samting ya—nomata sipos yumi bin harem olgeta finis?—?Yumi lukaotgud oltaem blong kam moa gud?

14. ?Olsem wanem Jeova i givhan bakegen long yumi wanwan?

¹⁴ Jeova i no livim yumi stap wanwan nomo blong faet strong long sam kaen trabol we oli hadwok blong winim. Hem i gat lav, taswe hem i wokem rod blong givhan long evri man wanwan. Plante milyan man oli kasem help ya from wan Baebol stadi long haos blong olgeta. Ol papa mama oli gat spesel responsabiliti blong stretem ol pikinini blong olgeta, blong sevem olgeta long olkaen fasin we oli save spolem hat blong olgeta biaen. (Prov. 6:20-35; 15:5) Insaed long kongregesen tu, i gat olgeta man we oli naf long speret. Oli gat responsabiliti blong yusum Baebol blong stretem ol narafala, taem oli luksave se i gat nid from. Be oli mekem olsem long tingting we i kwaet nomo. (Gal. 6:1, 2) Long ol rod ya, Jeova i stap givim advaes mo i stretem yumi, blong yumi joengud tugeta long wosip blong hem.

Tingtingbak

● ?Olsem wanem Jeova i givhangud long yumi, blong yumi wanwan i luksave long wanem samting yumi mas jenis?

● ?From wanem i hadwok long plante man blong harem ol advaes? ?Kwestin ya i impoten?

● ?Wanem gudgudfala fasin i save halpem yumi blong harem ol advaes? ?Olsem wanem Jisas i soemaot rod long yumi?