Japta 18
Yumi Mas Fasgud Long God Insaed Long Famle Blong Yumi
1.(a) ?Plante man we oli kasem save long ol loa blong Jeova long mared, oli mekem wanem? (b) ?Be wan Kristin famle i mas mekem wanem moa?
TAEM yumi stat stadi Baebol, yumi kasem save long sam gudfala trutok blong givhan long mared mo famle. Yumi lanem olsem wanem Jeova i Stampa blong mared, mo olsem wanem hem i givim ol gudfala tok blong Baebol blong soemaot nambawan rod long ol famle. From samting ya, plante man oli lego sam rabis fasin blong laef, mo oli mekem mared blong olgeta i stanap long fes blong gavman. Be i no gat samting ya nomo—i gat plante samting moa we Kristin famle i mas mekem. Yumi save nao se taem yumi mared, hemia i blong oltaem, mo yumi mas mekem wok blong yumi insaed long famle. Yumi mas mekem i stret tu long ol narafala blong famle.—Efes. 5:33 kasem 6:4.
2. (a) ?Ol man we oli save Baebol, oli ona long hem oltaem insaed long famle no nogat? (b) ?Olsem wanem Jisas mo Pol i talem se hemia wan bigfala samting blong ona long ol tok blong Baebol insaed long famle?
2 Plante milyan man oli save finis wanem Baebol i talem long saed blong mared. Be taem oli gat trabol long prapa famle blong olgeta, oli no folem Baebol. ?Olsem wanem long yumi? Jisas i toktok long sam man we oli daonem loa blong God we i talem se ol pikinini oli mas ona long papa mama blong olgeta. Oli ting se wan kaen fasin blong fasgud long God i naf nomo. Yumi no wantem folem fasin blong ol. (Mat. 15:4-9) Yumi no wantem kam olsem ol man we oli gat wan kaen fasin blong fasgud long God nomo, be oli no folem fasin ya “long prapa famle blong olgeta.” Nogat. Yumi rili wantem fasgud long God, from we hemia i wan “rod blong kasem plante samting.”—1 Tim. 5:4; 6:6, NTB; 2 Tim. 3:5.
?Mared i Blong Hamas Yia?
3. (a) ?Wanem samting i kamaot long plante mared naoia? ?Taswe yumi mas mekem wanem? (b) Yusum Baebol blong ansa long ol kwestin we oli stap long haf ya blong soemaot mared i blong hamas yia.
3 Naoia plante man oli brekem mared. Sam man mo woman we oli mared longtaem finis, maet oli mared long 20, 30 no 40 yia, oli brekem mared mo oli mekemap tingting blong olgeta blong mared bakegen wetem wan narafala. Oli ting se oli save statem “wan kaen nyufala laef.” I gat plante yangfala tu we oli mared long sam manis nomo, mo oli seraot wantaem. Nomata ol man oli stap mekem wanem, yumi man blong mekem wosip long Jeova, taswe yumi mas folem ol fasin ya we hem i laekem. ?Oraet nao, Baebol i talem wanem long saed blong mared?
?Taem wan man mo wan woman i mared, tufala i mas ting se tufala i mas stap hamas yia tugeta? (Rom 7:2, 3; Mak 10:6-9)
?Long lukluk blong God, i gat wanem samting nomo blong mekem divos? (Mat. 19:3-9; 5:31, 32)
?Man we i mekem divos we i no stret long Baebol, Jeova i tingbaot hem olsem wanem? (Mal. 2:13-16)
?Sipos trabol i kamaot long mared, Baebol i talem se tufala i save seraot blong stretem trabol ya? (1 Kor. 7:10-13)
4. ?Nating we long wol plante mared oli brok, from wanem sam mared oli stanap gud nomo?
4 ?From wanem sam mared oli stanap strong, mo sam narafala mared—insaed long Kristin kongregesen tu—oli save brok? Sipos wan man mo wan woman i wet fastaem mo tufala i mared taem tufala i bigman finis, hemia i gud tumas. Wan narafala bigfala samting: Yu yu mas faenem wan man no wan woman we i gat sem tingting nomo wetem yu, mo yu yu save toktok gud wetem hem long olgeta samting. Be i gat wan samting we i bigwan moa: Tufala i mas rili fasgud long Jeova. Hemia we i rili laekem Jeova mo i bilif we ol rod blong hem oli stret nomo, i save putumap wan gudfala samting blong stretem ol trabol we oli save kamaot long mared blong hem. (Sam 119:97, 104; Prov. 22:19) Wan man mo woman olsem i no ting se sipos sam trabol i kamaot, tufala i save seraot no i save mekem divos. Nogat. Hem i no yusum ol smolsmol rong blong man no woman blong hem oli kam olsem eskyus blong bambae hem i no mekem prapa wok blong hem insaed long mared. Be hem i lanem fasin blong skelem ol trabol we oli save kamaot, mo blong faenem rod blong stretem olgeta.
5. (a) ?Olsem wanem fasin blong holemtaet long Jeova i laenap wetem mared? (b) ?Nating sipos i gat hadtaem, yumi save kasem wanem blesing sipos yumi holemtaet long ol rul blong Jeova?
5 Yumi savegud se Setan i talem se sipos yumi kasem trabol, bambae yumi save sakem ol rod blong Jeova blong mekemap prapa tingting blong yumi long samting we i gud mo samting we i nogud. Be ol man we oli holemstrong long Jeova oli no mekem olsem. (Job 2:4, 5; Prov. 27:11) Plante Wetnes blong Jeova we man no woman blong ol i no bilif, mo i mekem trabol long olgeta, be oli no seraot long hem from. (Mat. 5:37) Samfala oli harem nogud long trabol ya long plante yia fastaem, be biaen hasban no waef blong olgeta i joen wetem ol blong mekem wok blong Jeova. Oli haremgud tumas from. (1 Kor. 7:16; 1 Pita 3:1, 2) Be i gat sam Kristin tu we man no waef blong hem i no jenis nating, no maet i lego hem from we hem i holemstrong long bilif. Olgeta ya tu oli luksave we oli kasem blesing from we oli holemtaet long ol rul blong God. ?Olsem wanem oli kasem blesing? Ol trabol ya oli tijim olgeta long fasin blong stap kolosap moa long Jeova. Oli lanem rod blong karem ol gudgudfala fasin blong God taem i gat trabol. Laef blong olgeta i soemaot paoa blong fasin we i fasgud long God.—Sam 55:22; Jem. 1:2-4; 2 Pita 1:5, 6.
Olgeta Wanwan i Mekem Wok Blong Hem
6. ?Yumi mas tingtinggud long wanem samting, blong mared blong yumi i stanap gud?
6 Taem wan man mo wan woman tufala i mared, i no naf we tufala i stap wanples nomo blong haremgud long mared. Nogat. Evriwan long famle i mas agri we Jeova i putumap man blong i hed long famle. Sipos oli folem rod ya, bambae famle i wan sefples nomo mo ol wok blong hem oli stret nomo.—1 Kor. 11:3; Tae. 2:4, 5; Prov. 1:8, 9; 31:10, 28.
7. ?Olsem wanem papa i mas mekem wok blong hem long mared?
7 ?Olsem wanem man i save mekem wok blong hem olsem hed blong famle? Hem i mas folem ol gudgudfala fasin blong Jisas Kraes. Jisas i strong blong folem ol rod blong Jeova; hem i laekem stretfasin mo hem i no laekem nating fasin blong brekem loa. (Hib. 1:8, 9) Kraes i laekem tumas kongregesen blong hem, hem i givim ol samting we hem i nidim, mo hem i lukaot long hem. Hem i no flas, mo hem i no daonem ol narafala man. Hem i “wan kwaet man mo tingting blong [hem] i stap daon,” mo ol man we oli stap aninit long hem oli “faenem we tingting blong [olgeta] i gat spel.” (Mat. 11:28, 29, NTB; Efes. 5:25-33) Taem wan papa i mekem ol fasin ya long famle blong hem, i klia we hem wan i ona long Kraes we i soemaot nambawan rod blong fasin we i fasgud long God. Ol Kristin mama tu oli mas folem ol semkaen fasin ya blong lukaot long ol pikinini blong olgeta.
8. (a) ?From wanem sam Kristin famle oli no karem ol gud frut we oli save kamaot sipos yumi ona long Baebol? (b) ?Sipos samting ya i kamaot long famle blong yumi, yumi mas mekem wanem?
8 Be yumi evriwan i no stretgud olgeta, nao sam trabol oli save kamaot. Ating taem famle i no stat folem ol rul blong Baebol yet, samfala oli stronghed mo oli no laekem we wan narafala man i bos long hem. Samtaem, fasin we i kaengud mo fasin we i kea long ol narafala, i no karem frut blong hem. Yumi savegud we Baebol i talem se: “Yufala i mas lego olgeta fasin blong kros. Yufala i no mas holem kros, mo yufala i no mas kros kwik. Yufala i mas no sakem tok blong yufala i go antap, mo yufala i mas no tok nogud long yufala.” (Efes. 4:31, NTB) ?Be olsem wanem sipos samfala i no wantem harem? ?Yumi mas mekem wanem? ?Taem oli mekem trabol long Jisas, hem i mekem wanem? Hem i no folem rod blong olgeta we oli stap tokswea long hem mo oli wantem kilim hem. Nogat. Hem i putum hem i stap long han blong Papa blong hem; hem i soemaot we hem i trastem God. (1 Pita 2:22, 23) Long sem fasin nao, taem trabol i kamaot insaed long famle, yumi save soemaot we yumi fasgud long God, sipos yumi stanap long hem, yumi prea long hem, be yumi no traem folem ol fasin blong wol.—Prov. 3:5-7.
9. ?Plante Kristin man we oli no moa stap tok konkon long ol smolsmol rong, oli stap yusum wanem rod nao?
9 Ating fasin blong famle i no save jenis kwiktaem, be ol advaes blong Baebol oli rili save wok. Plante man we fastaem oli save tok konkon long ol smolsmol rong blong woman blong olgeta, oli luksave se fasin blong famle blong ol i kam gud moa taem olgeta wanwan i kasem gud save long fasin sore blong Kraes wetem kongregesen blong hem. Yes, ol man blong kongregesen blong Kraes oli no stretgud olgeta. Be Jisas i laekem tumas kongregesen ya mo hem i soemaot stret rod long hem. Hem i givim prapa laef blong hem blong mekem i gud long hem, mo hem i tijim hem long ol tok blong Baebol blong oli save kam gud moa, blong olgeta wanwan i save mekem hem i glad tumas. (Efes. 5:25-27; 1 Pita 2:21) Fasin blong Kraes i mekem plante Kristin man oli wok gud blong soemaot gudfala rod long famle blong ol. Oli laekem famle mo oli halpem hem blong gohed gud long speret. Gudfala fasin ya i winim fasin blong tok konkon blong talemaot ol smolsmol rong oltaem, mo i winim fasin we man i satap nomo i no moa wantem tok.
10. (a) ?Sam papa long famle—mo samfala we oli talem se oli Kristin—maet oli mekem wanem, we samting ya i mekem trabol long famle blong hem? (b) ?Famle i save mekem wanem blong stretem trabol ya?
10 Be ating sam fasin rong blong papa i save mekem trabol i kam insaed long famle. ?Olsem wanem nao, sipos hem i no luksave ol samting we famle blong hem i nidim blong haremgud? ?Olsem wanem nao, sipos hem i no rili lidim famle blong hem blong mekem Baebol stadi mo sam narafala samting? Sam famle oli toktok gud long trabol ya, oli mekem long kwaet fasin nomo we i gat respek, mo oli karem gud frut from. (Prov. 15:22; 16:23; 31:26) Be sipos gudfala frut ya i no kamaot, olgeta wanwan i save mekem wok blong hem. Oli mas traem karem ol frut blong speret, mo oli mas tingtinggud long ol narafala long famle. Olsem nao, samting ya i save givhan long famle. Yumi no mas wet we ol narafala oli stat mekem i gud insaed long famle fastaem. Nogat. Be yumi wanwan i mas stat mekem prapa wok blong yumi. Olsem ya nao, yumi save soemaot klia we yumi stap fasgud long God insaed long famle blong yumi.—Kol. 3:18-20, 23, 24.
Rod Blong Faenem Ansa
11, 12. (a) ?Jeova i givim wanem blong givhan long yumi blong winim ol trabol long famle? (b) ?Yumi mas mekem wanem blong samting ya i rili halpem yumi?
11 Ol man tede oli folem defren kaen advaes we oli tokbaot ol bisnes blong famle. Be yumi savegud we Tok blong God i givim ol nambawan advaes. Yumi tangkyu long God from we hem i yusum ogenaesesen blong hem blong givhan long yumi blong ona long ol advaes ya. ?Yu yu haremgud long rod ya blong givhan long yu?—Sam 119:129, 130; Mae. 4:2.
12 ?Maet yu yu go long ol miting blong kongregesen, be evri wik, yu yu putum dei blong mekem Baebol stadi wetem famle? Ol famle we oli mekem olsem evri wik, oli joen tugeta wanples blong mekem wosip long God. Nao fasin blong famle i save kam gud moa, from we oli stap luksave olsem wanem oli save ona long Tok blong God long prapa haos blong olgeta.—Lukluk Dutronome 11:18-21.
13. (a) ?Sipos yumi gat sam kwestin long saed blong mared no famle, plante taem yumi save faenem ol ansa long weples? (b) ?Taem yumi mekemap tingting blong yumi blong mekem wankaen samting, samting ya i mas soemaot wanem tingting blong yumi?
13 Ating yu yu gat sam kwestin long sam samting blong mared no famle. Olsem ya nao: ?Ating yu yu wantem save sipos wan Kristin i save tekem meresin no yusum sam samting blong fasem bel blong woman, blong no karem plante pikinini? ?I stret we wan dokta i katem bodi blong wan Kristin blong i no moa save karem pikinini no nogat? ?Sipos wan mama i gat bel mo dokta i tok i talem se bambae pikinini ya i nogud, i oraet we mama ya i spolem pikinini ya bifo i bon? ?I gat sam rul blong fasin ya we tufala we i mared i stap slip tugeta no i nogat? ?Sipos wan yangfala i no kea long ol samting blong speret, papa mama blong hem i save strong long hem blong i mekem wosip wetem famle ya no nogat? Maet yu yu gat tingting blong yu long olgeta kwestin ya. ?Be yu yu naf blong ansa long ol kwestin ya from ol rul blong Baebol? Wajtaoa i tokbaot olgeta kwestin ya finis. Yu yu mas lanem rod blong yusum ol index blong faenem ansa long ol kwestin ya. Sipos yu yu no gat ol olfala Wajtaoa no ol narafala buk, yu yu save luk long Haos Kingdom. Be yu yu no mas ting se bambae yu yu faenem ansa we i talem se: “I stret” no “I no stret” long olgeta kwestin. Samtaem i gat sam samting we yu wan yu mas skelem, no yutufala long mared i mas skelem. Be yu yu mas lanem rod blong mekemap tingting blong yu long ol samting ya, blong soemaot we yu yu laekem Jeova mo ol narafala famle blong yu. Yu yu mas mekemap tingting blong yu long ol samting we oli soemaot we yu yu wantem tumas mekem fasin ya we God i glad long hem. Sipos yu yu mekem olsem, bambae i klia nomo long Jeova mo ol narafala we yu yu rili fasgud long God. Yu yu no stap mekem olsem nomo taem i gat man we i lukluk yu, be taem yu yu stap insaed long famle blong yu tu.—Efes. 5:10; Rom 14:19.
Tingtingbak
● ?Taem yumi holemtaet long mared blong yumi, olsem wanem yumi stap holemtaet long Jeova tu?
● ?Taem sam trabol i kamaot insaed long famle, wanem samting i save halpem yumi blong folem fasin we God i laekem?
● ?Nating sipos samfala long famle oli no mekem i stret, yumi save mekem wanem blong famle i haremgud moa?