Japta 23

No Fogetem Dei Blong Jeova

1. (a) ?Long fastaem ya we yu yu lanem gud nyus we i talem se bambae ol trabol oli finis, yu yu harem olsem wanem? (b) ?Yu yu mas tinghae long wanem kwestin?

TAEM yu yu stat stadi Baebol, yu yu kasem save long samting ya: Kolosap nomo ol samting we oli mekem man i harem nogud oli finis. (Luk 21:28) Yu yu luksave tu se plan blong God i blong mekem olgeta ples blong wol i kam Paradaes. Bambae ol fasin nogud, ol faet, ol sik mo ded oli mas finis. Yes, ol fren blong yumi we oli ded finis, bambae oli save girap i laef bakegen. !Hemia i gud tumas! Yumi save se taem ya i kolosap nomo from we ol samting we oli kamaot oli soemaot we Jisas i kambak bakegen long 1914 blong rul olsem King. Nao long taem ya tu, ol lastaem blong rabis wol ya oli stat. ?Olsem wanem? ?Save ya i jenisim fasin blong laef blong yu? ?Fasin blong laef blong yu i soemaot we yu yu ting se “dei blong Jeova” i stap kolosap nomo?

2. (a) ?“Dei blong Jeova” bambae i kam long wetaem? (b) ?Jeova i no talem stret wanem taem mo wanem haoa blong dei ya, be from wanem hemia i gud?

² Baebol i soemaot klia we ol man we oli luk ol faswan samting we oli stat kamaot taem Jisas i kambak olsem King [parousia], bambae oli save luk “bigfala dei blong Jeova.” Bambae long dei ya hem i givim panis long ol man we oli mekem fasin nogud. (Mat. 24:34; Sef. 1:14 kasem 2:3) Ol man olsem oli kam olfala finis naoia. Be Baebol i no talem wanem dei mo wanem haoa bambae Jeova i yusum Kraes blong givim panis long rabis fasin blong wol blong Setan. Jisas i talem se: “Be dei blong samting ya, mo taem blong hem i no gat man naoia we i save. Ol enjel blong heven mo mi tu mi Pikinini blong God, be mifala i no save. Papa blong mi, hem nomo i save.” (Mak 13:32, NTB) I gud nomo we yumi no save samting ya. ?From wanem? From we yumi save soemaot wanem samting i rili stap long hat blong yumi. Sipos wan man i no rili laekem Jeova, maet long tingting blong hem, hem i stap seftem “dei” ya i stap longwe yet, from we hat i pulum hem blong ronem ol samting blong wol we hem i wantem tumas. Be Jeova i laekem ol man blong hem we oli rili laekem hem. Hem i glad long ol man we oli mekem wok blong hem long olgeta strong blong olgeta, nomata en blong rabis fasin ya blong wol i kam long wetaem. Jeova God mo Pikinini blong hem, tufala i no laekem ol man we oli gat tu tingting.—Rev. 3:16; Sam 37:4; 1 Jon 5:3.

3. ?Jisas i talem wanem blong yumi lukaotgud long samting ya?

³ From samting ya, Jisas i talem long ol man we oli laekem tumas Jeova, i se: “Yufala i mas lukaotgud, oltaem yufala i mas rere, from we yufala i no save taem ya we olgeta samting ya bambae oli kam.” (Mak 13:33-37, NTB) Hem i tok strong long yumi blong no letem ol kakae, ol dring mo ol “wari blong laef” oli spolem yumi, gogo yumi no moa luksave we taem blong yumi i hareap nomo naoia.—Luk 21:34-36; Mat. 24:37-42.

4. ?Wanem samting bambae i kamaot long “dei blong Jeova,” olsem Pita i talem?

⁴ Biaen aposol Pita i talem long ol man we oli rili bilif long God se ‘oli stap wet mo oli no mas fogetem dei blong Jeova we i stap. [Long dei ya] bambae ol heven oli bon long faea mo oli ronaot, mo ol defren haf oli hot we i hot tumas, !gogo kasem we oli kam wora nomo!’ Dei blong Jeova i stap kolosap nomo, mo yumi mas tingtinggud long samting ya. Bambae i no longtaem, “olfala heven,” hemia olgeta gavman blong wol oli finis wetem olgeta man nogud. Long ples blong olgeta, God bambae i putum “nyufala heven mo nyufala wol” blong jenisim olgeta. Nao “ol defren haf” blong fasin blong wol ya—hemia fasin stronghed, fasin blong slip olbaot, mo fasin blong laekem tumas mane—bambae oli lus long faea blong “dei blong Jeova.” Yes, bambae olgeta fasin ya oli finis. (2 Pita 3:10-13) Olsem nao, yumi mas lukaotgud oltaem, from we yumi save se bambae ol bigfala samting ya oli save kamaot wantaem nomo.—Mat. 24:44.

Tingbaot Ol Samting We Oli Mekem Saen Ya i Kamtru

5. (a) ?Taem Jisas i ansa long kwestin we i stap long Matyu 24:3, ol tok blong hem oli soemaot ol samting we oli mas kamaot long en blong taem blong ol man Jyu no olsem wanem? (b) ?Wanem haf blong tok blong hem oli soemaot ol samting we oli mas kamaot long 1914 mo biaen long yia ya?

⁵ Yumi stap long ol “lasdei,” mo yumi mas savegud ol samting we oli olsem saen blong taem ya from we oli soemaot we yumi stap long “ol lastaem blong fasin ya blong wol.” Blong gat gud save long saen ya, yumi mas tingbaot ol tok we Jisas i talem blong ansa long wan kwestin blong ol disaepol blong hem. Kwestin ya i stap long Matyu 24:3. Sam tok blong ansa blong hem oli makem ol samting we oli mas kamaot long en blong taem blong ol man Jyu. Be bighaf blong ol tok ya oli mas kamtru long ol taem we oli kamaot biaen. Ol samting we hem i tokbaot long vas 4 kasem 22, oli kamtru i stat long yia 33 K.T. kasem yia 70 K.T., be long wan fasin we i smol nomo. Be profet tok ya i kasem big blong hem long taem blong yumi naoia. Hem i soemaot we Kraes i kambak olsem King [parousia] long 1914, mo yumi stap long “ol lastaem blong fasin ya blong wol.” (Lukluk Mak 13:5-20 mo Luk 21:8-24.) Matyu 24:23-28 i tokbaot ol samting we oli stat kamaot long yia 70 K.T. gogo kasem taem ya we Kraes i kambak olsem King. (Lukluk tu Mak 13:21-23.) Ol samting we Matyu 24:29 kasem en blong japta 25 oli tokbaot, oli makemaot ol samting we oli stat kamaot long 1914 kam kasem yumi.—Lukluk tu Mak 13:24-37 mo Luk 21:25-36.

6. (a) ?From wanem yumi evriwan i mas tingtinggud long samting we oli kamaot blong mekem “saen” ya i kamtru? (b) Ansa long ol kwestin blong haf ya mo talem olsem wanem “saen ya” i bin kamaot i stat long 1914.

⁶ Yumi evriwan i mas reregud blong luksave olsem wanem olgeta samting blong “saen ya” oli stap kamtru. Sipos yumi skelemgud ol samting ya wetem ol profet tok blong Baebol, bambae hemia i halpem yumi blong “no fogetem dei blong Jeova.” Samting ya i save halpem yumi tu blong wekemap tingting blong ol narafala man, blong oli save bilif se “dei blong givimbak blong God blong yumi” i stap kolosap nomo. (Aes. 61:1, 2) Oraet nao, yu yu save tingbaot tufala samting ya we yumi jes tokbaot, mo yu yu save skelem ol samting blong “saen ya”:

Baebol i talem se “ol nesen oli stanap agens long ol nesen mo ol kingdom agens long ol kingdom.” ?Olsem wanem ol samting ya oli kamaot i stat long 1914? ?Wanem samting i jes kamaot long ol laswan manis blong soemaot we tok ya i tru?

?Nating we ol man naoia oli gat big save, i gat plante moa ples long wol we oli harem nogud from kakae i sot long hem?

?I tru we i gat plante moa ples we graon i seksek long hem i stat long 1914 no nogat?

?Long 1918, wanem bigfala sik i kilim plante man i ded i winim Faswan Bigfala Faet Blong Wol? ?Ol dokta oli kasem bigfala save long ol meresin blong winim sik, be wanem kaen sik i stap spolem ol man yet?

?Yu yu stap luk wanem samting we i soemaot we ol man oli fraet olsem Luk 21:26 i talem?

?Wanem samting i soemaot we olkaen fasin we 2 Timote 3:1-5 i tokbaot oli no stap oltaem bifo, be oli stap kam nogud moa naoia we yumi gohed long ol lasdei?

Seraot Ol Man i Go Long Tufala Kampani

7. (a) ?Long Matyu 13:36-43, Jisas i tokbaot wanem narafala wok we i mas kamaot long “ol lastaem blong fasin ya blong wol”? (b) ?Wanem mining blong pijatok ya?

⁷ Jisas i tokbaot sam narafala big samting we oli mas kamaot long ol lastaem blong rabis fasin ya blong wol. I gat wok ya blong seraot “ol pikinini blong kingdom” mo “ol pikinini blong rabiswan” i go long tufala defren kampani. Jisas i tokbaot samting ya long wan pijatok blong hem. Hem i tokbaot wan garen mo wan enemi we i kam planem sam sid blong rabis gras long hem. Long pijatok ya, “gudfala sid ya” [wit] i saen blong ol tru Kristin we tabu speret i makemaot. Nao “ol rabis gras ya” oli ol Kristin we oli gyaman nomo. Long lastaem blong fasin ya blong wol, “ol rabis gras ya”—hemia ol man we oli talem se oli Kristin be oli “man blong Setan” from we oli laekem tumas wol ya blong Setan—oli seraot long “ol pikinini blong kingdom” blong God, mo oli blong lus nomo. (Mat. 13:36-43) ?Olsem wanem? ?Samting ya i kamtru finis?

8. (a) ?Biaen long Faswan Bigfala Faet Blong Wol, olgeta man we oli talem se oli Kristin oli seraot long wanem tufala kampani? (b) ?Olsem wanem ol tru Kristin we tabu speret i makemaot, oli soemaot we oli rili “ol pikinini blong kingdom”?

⁸ Taem Faswan Bigfala Faet Blong Wol i finis, olgeta man we oli talem se oli Kristin oli seraot long tu kampani: (1) Ol lida blong jyos we oli talem se oli Kristin, wetem ol man blong ol. Olgeta ya oli biaenem Ligofnesen (naoia Yunaeted Nesen) mo oli leftemap prapa kantri blong olgeta. (2) Ol tru Kristin we tabu speret i makemaot, i gat smol nomo, be oli biaenem Kingdom blong God. Ol lida blong ol jyos mo ol man blong olgeta oli halpem ol gavman blong wol, from we oli ting se hemia rod nomo blong faenem pis mo seftaem. Be samting ya i soemaot klia we oli no tru Kristin. (Jon 17:16) Be ol man blong Jeova oli kasem stret mining blong Ligofnesen, oli talem se hemia “rabis samting ya” blong naoia we Matyu 24:15 i tokbaot. From we “oli pikinini blong kingdom” blong God, oli stat talemaot “gud nyus ya blong kingdom . . . long olgeta ples blong wol we i gat man.” (Mat. 24:14) ?Oli kasem wanem frut from?

9. ?Taem oli stat talemaot gud nyus blong kingdom, oli kasem wanem frut from?

⁹ Fastaem oli tekem “ol man we God i jusumaot olgeta finis,” oli kam wanples. Hemia nao ol Kristin we tabu speret i makemaot mo oli stap yet long olgeta ples blong wol. I olsem we oli stap “long ol fo kona [win] blong wol.” Be ol enjel oli lukaot long wok blong hivimap olgeta i kam wanples long wan ogenaesesen nomo.—Mat. 24:31.

10. (a) ?Oli mekem wanem wok moa blong seraot ol man? ?Wok ya i stret long wanem profet tok? (b) ?Ol profet tok we oli stap kamtru oli minim wanem?

¹⁰ Nao biaen, olsem Jisas i talemaot finis, hem i stat seraot ol man i go long tufala kampani, “olsem we man blong lukaot long sipsip i save seraot ol sipsip blong hem long ol nani blong hem.” Kraes i sidaon long jea blong king blong hem long heven mo hem i lukaot long wok ya. Hem i mekem wok ya kam kasem taem blong yumi tede, mo wok blong hem i laenap wetem yu tu. Plante man oli sakem Kingdom blong God mo ol “pikinini” blong hem we tabu speret i makemaot. Ol man ya bambae oli “kasem panis ya we i no save finis” long ded. Be Masta ya i singaot ol narafala man oli kasem laef long wol aninit long Kingdom. Bambae oli save stap blong olwe long hem. Ol man ya oli olsem “ol sipsip.” oli joen wetem “ol pikinini blong kingdom” we tabu speret i makemaot, nating we ol narafala man i mekem nogud long olgeta. (Mat. 25:31-46) Oli givhan long ol man ya blong talemaot Kingdom blong God. Naoia bigfala kampani ya i kasem plante milyan man we oli mekem wok ya. Oli talemaot gud nyus blong Kingdom i stat wan ples gogo i finisim olgeta ples blong wol. ?Samting ya we i kamaot i minim wanem? Hemia nao: “Ol lasdei” oli kolosap finis nao, mo “dei blong Jeova” i stap kolosap nomo.

?Wanem Samting Bambae i Kamaot Biaen?

11. ?Yumi mas wok yet blong talemaot gud nyus bifo long dei blong Jeova no olsem wanem?

¹¹ ?Olsem wanem? ?I gat sam profet tok yet we oli mas kamtru bifo we bigfala dei blong Jeova i kamaot? !Yes i gat! Wok blong seraot ol man i go long tufala kampani, ol man we oli harem Kingdom blong God mo ol man we oli sakem, wok ya i no finis yet. Long sam ples blong wol we bifo ol man oli agensem ol brata bigwan, be naoia plante nyufala disaepol oli joen long yumi long ol ples ya. Mo nating sipos ol man oli sakem gud nyus, be yumi stap leftemap stret fasin mo fasin sore blong Jeova from we yumi givim wetnes long olgeta. !Taswe yumi mas gohed nomo long wok ya! Jisas i talem se taem wok ya bambae i finis, oraet “nao biaen bambae en i kam.”—Mat. 24:14.

12. (a) ?Olsem 1 Tesalonaeka 5:2, 3 i talem, wanem bigfala samting i mas kamaot? (b) ?Taem samting ya bambae i kamaot, olsem wanem long yumi?

¹² Wan narafala profet tok blong Baebol i talem se: “Taem bambae oli talem se: ‘!Pis mo seftaem!’ nao trabol i kam long olgeta wantaem nomo, jes olsem woman we i gat bel i harem bak blong hem i soa; nao bambae oli no save ronwe nating.” (1 Tes. 5:2, 3) Yumi no save yet olsem wanem bambae tok ya “Pis mo seftaem” i kamtru. Be i no olsem we ol lida blong wol ya bambae oli rili stretem ol trabol blong wol. Nogat. Taem oli talem se: “!Pis mo seftaem!” tok ya i no save trikim ol man we oli no fogetem dei blong Jeova. Oli save se taem ol man oli talem tok ya, “nao trabol i kam long olgeta wantaem nomo.”

13. ?Taem bambae ol man oli talem se “Pis mo seftaem,” wanem samting i mas kamaot wantaem nomo? ?Wanem narafala samting bambae oli kamaot biaen?

¹³ Fastaem, olsem Baebol i talem, ol gavman blong olgeta ples blong wol oli mas agensem Bigfala Babilon, hemia olgeta gyaman jyos blong wol, mo i mas spolem hem i finis. (Rev. 17:15, 16) Ol gavman oli stat finis blong agensem ol jyos ya mo yumi save luk samting ya. Oli agensem moa ol jyos we oli talem se oli Kristin. Plante gavman ya oli mekem politik we i agensem ol jyos, mo oli strong blong pusum tingting ya i go long Yunaeted Nesen. Nao long plante ples we bifo oli strong blong go long jyos, plante man oli lego skul blong bubu blong olgeta bifo. ?Samting ya i minim wanem? Samting ya i min se bambae i no longtaem olgeta gyaman jyos ya oli finis. Nao biaen, taem ol man blong wol oli mekem stronghed, ale oli stat mekem faet long ol man we oli holemstrong long Hae Rula Jeova. Be bambae kros blong Jeova i foldaon long ol gavman ya mo ol man we oli givhan long olgeta. Bambae hem i spolem olgeta wantaem. Nao biaen bakegen, Setan wetem ol devel blong hem oli kalabus long bigfala hol. Olsem nao, bambae oli no moa save gyaman long ol man. Hemia nao i “dei blong Jeova.” Olgeta samting we oli kamaot long “dei ya” bambae oli leftemap nem blong Jeova.—Esi. 38:18, 22, 23; Rev. 19:11 kasem 20:3.

14. ?Sipos yumi ting se dei blong Jeova bambae i no kam kwiktaem nomo, olsem wanem yumi no waes long samting ya?

¹⁴ Bambae dei ya i kamaot long stret taem ya we God i makem finis. Bambae hem i no save kam let. (Hab. 2:3) Yufala i no mas fogetem ol samting we oli bin kamaot taem Jerusalem i lus long yia 70 K.T. Hem i lus wantaem nomo, long taem ya we ol man Jyu oli no tingbaot. Oli ting se trabol ya i go finis i no save kasem olgeta. ?Be olsem wanem long taon ya, Babilon blong bifo? Taon ya i gat ol strongfala stonwol we oli stap raonabaot long hem, mo oli ting se ol enemi blong olgeta oli no naf blong spolem hem. Be long wan naet nomo, taon ya i foldaon. Long sem fasin ya, bambae rabis wol ya i save lus “wantaem nomo.” Taem samting ya bambae i kamaot, yumi wantem we God i faenem yumi i joen wanples long wosip blong hem, from we yumi “no fogetem dei blong Jeova.”

Tingtingbak

● ?From wanem yumi no mas “fogetem dei blong Jeova”? ?Yumi mas mekem wanem from?

● ?Wok blong seraot ol sipsip mo ol nani naoia, wok ya i mekem wanem long yumi?

● ?Wanem samting i mas kamaot bifo long dei blong Jeova? ?From samting ya, yumi mas mekem wanem naoia?