Gavman Ya We Bambae i Mekem Paradaes

Taem Jisas i stap long wol, hem i talem long ol man blong hem we oli mas prea blong Kingdom blong God. Hem i talem se: “Letem Kingdom blong yu i kam. Letem long samting we yu yu wantem oli kamaot long wol, olsem oli kamaot long heven.” (Matyu 6:9,10) Oltaem hem i talemaot “gud nyus blong kingdom.” (Matyu 4:23) Tru ya, hem i tokbaot Kingdom i winim ol narafala samting. ?From wanem? From we Kingdom ya i rod blong God blong winim ol trabol we oli mekem hadtaem tede. God bambae i yusum Kingdom ya blong finisim ol faet, ol fasin we i mekem man i sot long kakae, ol sik, mo ol fasin blong kilim no rabem man. Nao bambae hem i karem pis mo i mekem ol man oli joen wanples.

?Yu yu wantem kasem laef long wol i kamgud olsem? Sipos yes, yu yu mas ridim buk ya. Bambae yu yu save lanem we Kingdom ya i wan gavman. Be gavman ya i moa gud i winim ol narafala gavman we oli bin rulum man samtaem. Bambae yu yu luksave tu olsem wanem God i talem ol plan blong Kingdom blong hem long ol man blong hem. Antap long ol samting ya, bambae yu yu save luk olsem wanem Kingdom ya i save halpem yu tede.

Tru ya, naoia yu yu save kam wan man we i stap aninit long Kingdom blong God. Be, bifo we yu yu jusum samting ya, yu yu mas kasem moa save long hem. Taswe mifala i singaot yu yu ridim smol buk ya. Ol samting we hem i talem oli stanap long Baebol.

Fastaem, yumi luk from wanem Kingdom blong God i mas kam blong givhan long ol man.

I stat bifo, God i mekem man i stretgud olgeta. Hem i putum man i stap long wan paradaes. Long taem ya, i no mas gat Kingdom.

Be, Adam mo Iv, faswan papa mama blong yumi, tufala i lesin long Setan, wan enjel we i agensem God. Hem i gyaman long tufala blong spolem God, mo i mekem tufala tu i agensem God. From samting ya, oli mas kasem ded, from we “pei blong sin, hemia ded.”—Rom 6:23.

Wan sinman we i no stretgud olgeta, i no save gat pikinini we i stret. Taswe olgeta pikinini blong Adam oli bon long fasin we i no stretgud olgeta. Oli sinman we oli save ded from.—Rom 5:12.

I stat long taem ya, i mas gat wan Kingdom blong God blong givhan long ol man, blong oli save kamgud bakegen long sin mo ded. Bambae Kingdom i mekem nem blong God i kam klin long ol gyaman tok blong Setan.

Jeova God i mekem promes se wan spesel “Laen” bambae i bon blong sevem ol man. (Jenesis 3:15) “Laen” ya i mas kam King blong Kingdom blong God.

?Hu i Laen ya?

Samwe long 2,000 yia biaen we Adam i mekem sin, i gat wan man we i gat strong bilif, nem blong hem Ebraham. Jeova i talem long Ebraham we hem i mas aot long taon blong hem blong go long ples blong Palestaen. Hem i mas stap long haos tapolen.

Ebraham i mekem ol samting we Jeova i talem long hem. I gat wan samting we i bitim mak. Jeova i talem long hem se hem i mas givim Aesak olsem sakrafaes long wan olta.

Jeova i no rili wantem wan sakrafaes we i kilim man i ded. Be hem i wantem save olsem wanem Ebraham i laekem hem. Ebraham i rere blong kilim Aesak i ded, be Jeova i blokem hem.

From bigfala bilif blong Ebraham, Jeova i mekem promes blong givim graon blong Palestaen long ol pikinini blong hem. Hem i talem tu se “Laen” ya blong promes i mas kamaot long hem, tru long pikinini blong hem Aesak.—Jenesis 22:17, 18; 26:4, 5.

Aesak i gat twin, Eso mo Jekob. Jeova i talem se Laen blong promes i mas kamaot long Jekob.—Jenesis 28:13-15.

Jekob, we Jeova i kolem Isrel, i gat 12 pikinini. Olgeta ya tu oli karem pikinini. Taswe ol pikinini blong Ebraham oli kam plante.—Jenesis 46:8-27.

Taem i gat hadtaem from kakae i sot tumas long ples ya, Jekob mo famle blong hem oli muv i go long Ijip. Fero i singaot olgeta oli kam. Fero i king long Ijip.—Jenesis 45:16-20.

Long Ijip, God i soemaot we Laen blong promes i mas kamaot long pikinini blong Jekob, Juda.—Jenesis 49:10.

Nao Jekob i ded, mo ol pikinini blong hem oli kam plante, gogo oli kam wan nesen. Be ol man Ijip oli fraet mo oli mekem olgeta oli kam slef.—Eksodas 1:7-14.

Nao Jeova i sanem Moses i go. Hem i wan man we i holemstrong long God. Hem i go askem long Fero we i rul long taem ya, blong i letem ol man Isrel oli go.—Eksodas 6:10, 11.

Fero i no wantem. Taswe Jeova i sanem 10 trabol oli kam long ol man Ijip. Laswan trabol, hem i sanem wan enjel blong ded blong i kilim olgeta fasbon blong Ijip.—Eksodas japta 7 kasem 12.

God i talem long ol man Isrel se sipos oli kilim wan smol sipsip blong kakae long sapa, mo sipos oli putum blad blong hem i ron long timba blong doa, be enjel blong ded i mas pas antap long ol haos ya blong olgeta. From samting ya, ol fasbon blong Isrel oli sef.—Eksodas 12:1-35.

Fero i givim oda blong ol man Isrel oli aot long Ijip. Be hem i jenisim tingting blong hem, mo i ronem olgeta blong mekem oli kambak.

Jeova i openem wan rod long ol man Isrel blong ronwe long medel blong Red Si. Taem Fero mo ol man blong hem oli traem folem olgeta, oli draon long solwora ya.—Eksodas 15:5-21.

Jeova i lidim ol pikinini blong Isrel oli go long wan hil, nem blong hem Sinae. Hil ya i stap long draeples. Nao long ples ya, hem i givim Loa blong hem, mo i talem se oli mas holemtaet long hem. Olsem nao, oli save kam wan kingdom blong ol pris, wan tabu nesen. Taswe ol man Isrel oli gat jans blong kam wan bighaf long Kingdom blong God.—Eksodas 19:6; 24:3-8.

Ol man Isrel oli stap wan yia long Hil Sinae, mo biaen Jeova i lidim olgeta oli go long Palestaen. Hemia graon ya we hem i promes blong givim long Ebraham, bubu blong olgeta.

Long Palestaen, God i letem ol man Isrel oli gat king. Nao, God i gat wan kingdom long wol.

Deved i seken king blong Isrel. Hem i laen blong Juda. Deved i winim ol enemi blong Isrel, mo i mekem Jerusalem i kam bigfala taon blong Isrel.

Ol samting we oli kamaot long rul blong Deved, oli soemaot se sipos Jeova i stap wetem wan king, i no gat wan rula blong wol we i save winim king ya.

Jeova i talem se Laen blong promes i mas kamaot long Deved.—1 Kronikel 17:7, 11, 14.

Pikinini blong Deved, Solomon i rul biaen long papa blong hem. Hem i wan waes king, mo Isrel i kasem plante gud samting long rul blong hem.

Solomon i wokem wan gudfala haos prea blong Jeova long Jerusalem. Ol fasin blong Isrel aninit long rul blong Solomon oli soemaot long yumi sam blesing blong God we bambae oli stap aninit long Kingdom.—1 King 4:24, 25.

Be biaen long Solomon, plante king oli no stret.

Taem ol pikinini blong Deved oli stap rul long Jerusalem, Jeova i yusum profet Aesea blong talemaot wan Pikinini Boe blong Deved we bambae i mas kam mo hem i mas stret blong rulum olgeta wol. Hem nao i Laen blong promes.—Aesea 9:6, 7.

Rul blong hem i mas winim glori blong rul blong Solomon.—Aesea japta 11 mo 65.

Nao, i bitim bifo, ol man blong God oli wantem save se Laen ya i hu.

Bifo Laen ya i kam, ol king blong Isrel oli kam nogud tumas. Nao long yia 607 bifo Kristin taem, Jeova i letem ol man Babilon oli winim Isrel. Bighaf blong ol man Isrel oli go kalabus long Babilon. Be God i no fogetem promes blong hem. Laen ya i mas kamaot yet long famle laen blong Deved.—Esikel 21:25-27.

Ol samting we oli kamaot long Isrel oli soemaot we ol blesing we oli kamaot from wan waes man we i king, oli smol nomo. Ol stret man oli save ded, mo ol man we oli kamaot biaen, maet oli no holemstrong long God. ?I gat wanem rod? Wan nomo: Hemia “Laen” blong promes.

Nao, ol taosen yia oli pas, ol man oli wet yet, mo “Laen” ya i kamtru. ?Hem i hu?

Wan enjel blong God i talem ansa ya long wan gel Isrel we i no mared yet. Nem blong hem Meri. Hem i talem long hem we hem i mas bonem wan pikinini, nem blong hem Jisas. Hemia nao ol tok blong enjel ya, hem i talem se:

“Bambae hem ya i hae mo bambae oli kolem Pikinini Boe blong Hae God; mo Jeova God bambae i givim long hem jea blong king Deved we i papa blong hem, mo bambae hem i rul olsem King.”—Luk 1:32, 33.

Taswe Jisas i Laen blong promes mo King ya blong Kingdom blong God. ?Be from wanem Jisas i narakaen long ol narafala stret man blong bifo?

Jisas i bon from wan merikel. Mama blong hem i wan gel we i no slip wetem wan man yet. I no gat man we i papa blong Jisas. Longtaem bifo, Jisas i laef i stap long heven, mo tabu speret blong God, paoa blong hem, i muvum laef blong Jisas long heven i go long bel blong Meri. Olsem ya nao, Jisas i no kasem sin blong Adam. Long olgeta laef blong hem, Jisas i no mekem sin.—1 Pita 2:22.

Taem hem i gat 30 yia blong hem, Jisas i tekem baptaes.

Hem i tokbaot Kingdom blong God long ol man, mo i soemaot we hem i King blong Kingdom ya.—Matyu 4:23; 21:4-11.

Hem i mekem plante merikel.

Hem i mekem sikman i kam gud bakegen.—Matyu 9:35.

Hem i mekem merikel blong givim kakae long man we i hanggri.—Matyu 14:14-22.

Hem i mekem dedman i girap i laef bakegen.—Jon 11:38-44.

Ol merikel ya oli soemaot ol defren kaen samting we Jisas bambae i mekem blong givhan long ol man, from we hem i King blong Kingdom blong God.

?Yu yu no fogetem olsem wanem Deved i mekem Jerusalem i kam bigfala taon blong kingdom blong hem? Jisas i talem klia se Kingdom blong God i no stap long wol. Hem i stap long heven. (Jon 18:36) Taswe, Kingdom i karem nem ya: “Jerusalem blong heven.”—Hibrus 12:22, 28.

Jisas i talemaot olgeta loa we ol man blong Kingdom oli mas obei long ol. Olgeta loa ya oli stap long Baebol nao. Hemia tufala loa ya we i hae moa: Ol man oli mas laekem tumas God mo oli mas laeklaekem olgeta.—Matyu 22:37-39.

Jisas i soemaot we hem i no stap hem wan nomo long Kingdom. I mas gat man we God i jusumaot blong go long heven blong rul wetem Kraes. (Luk 12:32; Jon 14:3) ?I gat hamas man? Revelesen 14:1 i ansa se: 144,000.

?Sipos i gat 144,000 man nomo we oli go long heven, olsem wanem nao long ol narafala man?

Baebol i talem se: “Ol stret man bambae oli kasem wol, mo bambae oli stap long hem blong olwe.”—Sam 37:29.

Olgeta ya we bambae oli laef blong olwe long wol, Jisas i kolem olgeta “Ol narafala sipsip.”—Jon 10:16.

Taswe i gat 2 kaen samting blong putum tingting i strong long hem. God Jeova i singaot 144,000 blong go long heven blong rul wetem Jisas Kraes. Be plante milyan narafala man, oli bilif strong blong kasem laef foreva olsem man aninit long Kingdom.—Revelesen 5:10.

Setan i no laekem Jisas nating. Hem i agensem hem. Jisas i prij long 3 yia haf, mo biaen Setan i mekem man i holem Jisas blong kilim hem i ded. Oli nilim hem long pos. ?From wanem God i letem samting ya i kamaot?

Yu yu save se olgeta man oli mekem sin mo oli kasem ded from we oli pikinini blong Adam.—Rom 6:23.

Yu yu save tu se Jisas i stretgud olgeta mo i no mas kasem ded, from we hem i bon long wan merikel. Be God i letem Setan i ‘smasem Jisas long leg blong hem,’ blong kilim hem i ded. Biaen God i mekem Jisas i laef bakegen, i kam wan speret we i neva save ded. From we hem i gat yet raet blong laef blong man we i stretgud olgeta, hem i save pemaot yumi long sin mo ded.—Jenesis 3:15; Rom 5:12, 21; Matyu 20:28.

Blong kasem klia save long mining blong sakrafaes blong Jisas, Baebol i yusum sam profet saen.

?Yu yu save olsem wanem Jeova i traem Ebraham blong luksave sipos hem i laekem hem tumas? Jeova i askem long Ebraham blong i mekem sakrafaes long pikinini boe blong hem.

Hemia nao i wan profet saen blong sakrafaes blong Jisas. Hem i soemaot we Jeova i laekem tumas ol man, gogo i letem Pikinini Boe blong hem, Jisas, i ded blong yumi save kasem laef.—Jon 3:16.

?Yu yu no fogetem olsem wanem Jeova i sevem ol man Isrel long Ijip, mo olsem wanem hem i sevem ol fasbon from enjel blong ded i “pas antap” long olgeta?—Eksodas 12:12, 13.

Hemia nao i wan profet saen. Blad blong smol sipsip ya i pemaot laef blong ol fasbon blong Isrel, sem mak nao blad blong Jisas i ron blong givhan long olgeta we oli bilif long hem. Ol samting we oli kamaot long naet ya oli mekem ol man Isrel oli go fri, sem mak nao ded blong Jisas i mekem ol man oli fri long sin mo ded.

Yes, Jisas i “Smol sipsip ya blong God we i tekemaot sin long wol.”—Jon 1:29.

Taem Jisas i stap long wol hem i hivimap ol man blong hem. Hem i lanem olgeta long wok blong talemaot gud nyus blong Kingdom. Oli mas gohed long wok ya, nating we hem i ded.—Matyu 10:5; Luk 10:1.

Hemia nao ol faswan man we God i jusumaot blong rul wetem Jisas long Kingdom blong hem.—Luk 12:32.

?Yu yu no foget se God i mekem promes long ol man Isrel, se sipos oli ona long Loa, oli mas kam “wan kingdom blong ol pris”? Nao oli gat jans blong kam haf blong Kingdom blong God. Oli save kam pris long heven, sipos oli folem Jisas. Be bighaf blong olgeta i sakem Jisas.

From samting ya, i stat long taem ya, ol man Jyu oli no moa nesen ya we God i jusum; Palestaen i no moa wan Graon blong Promes.—Matyu 21:43; 23:37, 38.

I stat long taem blong Jisas kam kasem yumi, Jeova i hivimap ol man we oli mas rul wetem Jisas long heven. I gat sam taosen nomo we oli stap yet long wol tede. Oli man we tabu speret i makemaot.—Revelesen 12:17.

Naoia, yu yu kasem lelebet save long Kingdom blong God. Hemia wan gavman long heven. King blong hem i Jisas Kraes, mo i gat 144,000 man we oli joen long hem. Bambae hem i rul antap ol stret man blong wol, mo i naf blong putum pis long wol ya.

Biaen long ded blong hem, Jisas i girap i laef bakegen mo i go long heven. Nao long ples ya, hem i wet we God i talem long hem we i stret taem blong stat rul olsem King blong Kingdom blong God. (Sam 110:1) ?Samting ya i kamaot long wetaem?

Samtaem Jeova i sanem drim long man blong soemaot sam samting blong Kingdom.

Long taem blong Daniel, Jeova i sanem wan drim olsem long Nebukanesa, king blong Babilon. Drim ya i soemaot wan bigfala tri.—Daniel 4:10-37.

Oli katemdaon tri ya, mo oli fasem stampa blong hem long seven yia.

Tri ya i wan pija blong Nebukanesa. Olsem we oli fasem stampa long seven yia, Nebukanesa i lusum hed blong hem long seven yia. Biaen hem i gat gud hed bakegen.

Ol samting ya oli profet saen. Nebukanesa i saen blong rul blong Jeova long wol. Fastaem, laen blong King Deved i rul long Jerusalem. Taem Babilon i winim Jerusalem long yia 607 bifo Kristin taem, laen ya blong ol king i brok. I no mas gat wan narafala king long laen blong Deved “gogo kasem hemia we i kam, we i gat raet from loa.” (Esikel 21:27) Hemia Jisas Kraes ya.

?I mas gat hamas taem i stat long yia 607 bifo Kristin taem gogo kasem rul blong Jisas? I mas gat seven profet yia, hemia 2,520 yia. (Revelesen 12:6, 14) Nao taem yumi kaontem 2,520 yia i stat long 607 bifo Kristin taem, yumi kasem 1914 long Kristin taem.

Jisas i stat rul long heven long 1914. ?Samting ya i minim wanem?

Baebol i talem mining ya long yumi, long wan samting olsem drim we aposol Jon i luk.

Hem i luk wan woman we i bonem wan pikinini man.—Revelesen 12:1-12.

Woman ya i saen blong ogenaesesen blong God long heven, hemia olgeta enjel blong God long heven. Pikinini man ya i saen blong Kingdom blong God. Hem i bon long 1914.

?Wanem samting i hapen biaen? Faswan samting we Jisas i mekem olsem King i blong sakemdaon Setan mo ol enjel we oli joen long hem, oli aot long heven oli kamdaon long wol.—Revelesen 12:9.

Baebol i talem long yumi, se: “!Yufala i mas glad, yufala heven mo yufala we i stap long hem! Sore tumas long wol mo solwora, from we Devel i kamdaon long yufala, hem i kros tumas, from we hem i save se taem blong hem i sot nomo.”—Revelesen 12:12.

Taswe, taem Jisas i stat rul long heven, ol enemi blong hem oli stat wok tumas long wol. Olsem Baebol i talemaot, hem i stat rul long medel blong ol enemi blong hem.—Sam 110:1, 2.

?Samting ya i minim wanem long ol man?

Jisas i talem long yumi, se: I mas gat faet, kakae i sot, ol sik, mo graon i seksek.—Matyu 24:7, 8; Luk 21:10, 11.

Ol samting ya oli stat hapen long 1914. From samting ya tu, yumi save se Kingdom i stat rul long yia ya.

I gat “ol nesen we oli fraet tumas, oli no save olsem wanem . . . mo ol man oli sek tumas from fraet.” (Luk 21:25, 26) Yumi luk samting ya finis, i stat long 1914.

Aposol Pol i talem we ol man oli “man blong laekem mane, . . . oli no obei long papa mama, . . . oli no save agri, oli gyaman, oli no save bos long olgeta.”—2 Timote 3:1-5.

Naoia yu yu save from wanem i gat hadtaem tede. Setan i stap wok tumas. Be Kingdom blong God tu i stap wok.

Jes biaen long 1914, ol man we oli blong rul long heven wetem Jisas, mo oli stap yet long wol, oli stat talemaot gud nyus blong Kingdom we i stanap. Gud nyus ya i goraon long olgeta wol, olsem Jisas i talemaot finis.—Matyu 24:14.

Fastaem, oli talemaot Kingdom blong God long ol man.

Biaen, oli halpem ol man blong kam man we i ona long Kingdom.

Jisas i talem we long taem blong yumi, ol man oli mas seraot long tu kampani, ol nani mo ol sipsip.—Matyu 25:31-46.

Ol “sipsip” oli laekem Jisas mo ol brata blong hem. Ol “nani” oli no mekem olsem.

Ol “sipsip” bambae oli kasem laef foreva, be ol “nani” oli no kasem laef.

Ol man oli seraot long tu kampani from wok blong talemaot gud nyus blong Kingdom.

Hemia nao wan profet tok blong Aesea.

“Nao hemia i mas kamaot long laswan haf blong ol dei: Hil blong haos blong Jeova bambae i stanap strong antap long ol hil, mo hem bambae i leftemap hil ya antap long ol hil, mo ol nesen oli mas kam long hem.”—Aesea 2:2.

Naoia ol man oli stap long “laswan haf blong ol dei.”

“Haos” blong wosip blong Jeova i stap “antap” long ol gyaman jyos.

“Mo tru ya, plante man bambae oli kam mo oli talem se: ‘Kam, yufala pipol, mo yumi mas go long hil blong Jeova, long haos blong God blong Jekob, mo hem bambae i tijim yumi long ol rod blong hem, mo bambae yumi wokbaot long ol rod ya blong hem.’ ”—Aesea 2:3.

Taswe plante man long ol nesen oli kam mekem wosip long Jeova. Oli singaot ol narafala blong joen wetem olgeta. Oli stap lanem olsem wanem blong mekem ol samting we Jeova i wantem.

“Nao bambae oli kilim naef blong faet blong olgeta i kam aean blong wokem garen, mo ol spia blong olgeta oli kam sisas blong wokem garen. Wan Nesen bambae i no leftemap naef blong faet agens wan nesen, mo bambae oli no moa lanem faet.”—Aesea 2:4.

Olgeta we oli mekem wosip long Jeova oli joengud wanples mo oli gat pis.

Hemia frut blong wok blong Kingdom blong God: I gat samwe long 3 milyan man we oli ona long Kingdom tede.

Oli hivap wetem ol tabu man we oli stap yet, olgeta ya we oli blong go long heven mo rul wetem Kraes.

Oli kasem kakae blong speret from ogenaesesen blong God.—Matyu 24:45-47.

Olgeta ya oli olsem wan famle blong ol Kristin long ol kantri. Oli rili laeklaekem olgeta.—Jon 13:35.

Oli gat pis long tingting blong olgeta. Oli no fraet long fyuja.—Filipae 4:7.

Bambae i no longtaem, wok blong talemaot gud nyus i kasem mak blong hem. Taswe bambae olgeta “sipsip” oli hivap. ?Nao biaen, bambae Kingdom i mekem wanem?

?Yu yu no fogetem olsem wanem stret King Deved i winim ol enemi blong ol man blong God? Oraet nao, bambae Jisas i mekem sem mak nomo.

Wan taem, Nebukanesa i gat drim, i luk wan bigfala pija. Hemia wan saen blong ol bigfala kingdom blong wol, i stat long taem blong hem kam kasem yumi tede.

Ale, hem i luk wan ston we i kamaot long wan hil, nao ston ya i smasem pija ya i brokbrok. Ston ya i saen blong Kingdom blong God.

Samting ya i min se rabis fasin blong wol ya i mas lus. (Daniel 2:44).

Hemia nao sam samting we Kingdom bambae i kafsaedem.

Bambae ol gyaman skul oli lus, olsem we oli sakem wan ston blong graenem sid i go long solwora.—Revelesen 18:21.

Taswe olgeta we oli laekem God oli mas goaot long ol gyaman skul NAOIA.—Revelesen 18:4.

Biaen, King Jisas bambae “i kilim ol nesen . . . mo hem bambae i bos long olgeta wetem wokingstik we oli wokem long aean.”—Revelesen 19:15.

Ol Wetnes blong Jeova oli pem takis mo oli obei long loa, be oli no mekem politik.

Biaen, Jisas i sakem Setan long bigfala hol.—Revelesen 20:2, 3.

Ol “sipsip” nomo we oli ona long King Jisas, bambae oli sef long trabol ya.—Matyu 25:31-34, 41, 46.

Aposol Jon i luk samting olsem drim. Hem i luk ol “sipsip” ya we oli sef.

“Mi lukluk, nao, !luk ya! Wan bigfala kampani, we i no gat man i naf blong kaontem, i kamaot long olgeta nesen, laen, pipol mo lanwis. Oli stanap long fored blong jea ya mo long fes blong Smol Sipsip, oli werem waet klos. I gat lif blong palm tri long han blong olgeta.”—Revelesen 7:9.

Long “Bigfala kampani” ya, i gat ol man we oli lesin long gud nyus.

“Oli kamaot long bigfala trabol.”—Revelesen 7:14.

“Ol lif blong palm tri” oli soemaot we oli mekem welkam long Jisas we i King blong olgeta.

From we “oli werem waet klos,” oli soemaot we oli bilif long sakrafaes blong Jisas.

“Smol sipsip” ya i Jisas Kraes.

?Oli harem gud from wanem blesing? ?Yu yu save olsem wanem Isrel i harem gud long rul blong King Solomon? Hemia wan smol pija blong glad ya we bambae i stap aninit long King Jisas.

Bambae i gat tru pis long ol man, mo long medel blong ol man mo ol anamol, olsem Aesea i talemaot finis.—Sam 46:9; Aesea 11:6-9.

Taem hem i stap long wol, Jisas i mekem ol sikman oli kamgud bakegen. Taswe bambae hem i tekemaot ol sik long ol man.—Aesea 33:24.

Jisas i givim kakae long plante man, taswe bambae i finisim fasin hanggri blong ol man.—Sam 72:16.

Jisas i mekem dedman i laef bakegen, ale bambae hem i mekem ol dedman we oli no bin gat jans yet blong ona long Kingdom blong God oli save laef bakegen.—Jon 5:28, 29.

Lelebet lelebet, bambae hem i mekem ol man oli gat laef we i stretgud olgeta. Hemia gudfala laef ya we Adam i bin lusum.

?Olsem wanem long gudfala fyuja ya? Yu yu wantem luk samting ya? Sipos yes, yu yu mas obei naoia long Kingdom blong God mo yu yu mas kam wan “sipsip.”

Yu yu mas stadi Baebol mo kasem save long Jeova God mo Jisas Kraes.—Jon 17:3.

Yu yu mas joen wetem ol narafala man we oli ona long Kingdom.—Hibrus 10:25.

Yu yu mas lanem ol loa blong Kingdom blong obei long olgeta.—Aesea 2:3, 4.

Yu yu mas givim laef blong yu i go olgeta long God, mo yu yu mas tekem baptaes.—Matyu 28:19, 20.

Yu yu mas blokem ol nogud fasin, olsem fasin blong stil, fasin drong, fasin nogud blong seks, mo fasin gyaman, we Jeova God i no laekem nating ol fasin ya.—1 Korin 6:9-11.

Yu yu mas joen long wok blong talemaot gud nyus blong Kingdom.—Matyu 24:14.

Olsem ya nao, God i save givhan long yu, blong bambae yu yu save luk Paradaes ya we Adam i lusum. Bambae yu yu save luk promes ya i kamtru, se: “Nao mi harem wan tok we i kamaot long bigfala jea blong God, we i singaot bigfala, i talem se ‘!Yu luk! Naoia God i mekem ples blong hem wetem ol man. Hem bambae i stap oltaem wetem olgeta, nao olgeta bambae oli man blong hem. God bambae i kampani wetem olgeta, mo hem bambae i God blong olgeta. Hem bambae i ravemaot wora blong ae blong olgeta. Nao bambae i no moa gat man i ded mo man we i krae from ded. Bambae i no moa gat man i krae, mo man i harem nogud long bodi blong hem. Ol samting ya blong bifo oli lus olgeta.’ ”—Revelesen 21:3, 4, NTB.

[Map blong pija long pej 20]

(Lukluk niuspepa)

607 B.K.T. 1914 K.T.

B.K.T. | K.T.

500 1,000 1,500 2,000 2,520

[Tok blong pija long pej 11]

Ebraham

Aesak

Jekob

Juda

Deved

[Tok blong pija long pej 14]

144,000

[Tok blong pija long pej 16]

Adam

Jisas