Ol Kongregesen We Oli Reregud Blong Talemaot Kingdom Blong God
Taem Jisas i stap long wol, hem i wokbaot long ol velej mo long ol taon blong talemaot Kingdom blong God. Hem i trenem mo hem i sanemaot ol disaepol blong hem blong mekem sem kaen wok. Bifo we hem i go antap long heven, hem i givim wan oda long olgeta we oli folem hem, se oli mas mekem disaepol long ol man blong olgeta nesen. Olgeta long Kristin kongregesen oli reregud blong prij long saed blong gud nyus ya. Weples oli wokbaot, ol disaepol oli talemaot Kingdom blong God.—Matyu 4:17, 23; 10:1-16;28:19, 20; Luc 4:43, 44; 8:1; 10:1-9; Ol Wok 1:8; 4:31; 5:42; 8:12; 19:8; 28:23, 30, 31; Rom 10:9, 10, 14.
Long profet tok blong Jisas long saed blong en blong wol, hem i talem se : “Mo gud nyus ya blong Kingdom, bambae oli mas talemaot long olgeta ples long wol, blong oli wetnes long olgeta man blong wol. Nao biaen, bambae en blong wol i save kam.” Nao tede, Kristin kongregesen i mas mekem wok ya blong prij.—Matyu 24:14; Mak 13:10.
Long olgeta ples long wol, ol kongregesen blong ol Wetnes blong Jeova, oli reregud blong mekem wok blong prij long saed blong gud nyus blong Kingdom. Fasin blong olgeta i no olbaot, be olgeta oli kavremap evri ples wanwan long eria blong olgeta. Watchtower Sosaete long evri kantri i katem teritori blong kantri ya long plante haf, mo hem i givim wan haf long evri kongregesen wanwan. Afta, kongregesen i seraotem teritori blong hem long ol smol haf bakegen. Taem we samfala oli go prij, oli tekem wan smol haf mo olgeta oli gohed long hem gogo oli prij long olgeta man we oli stap long smol ples ya.—1 Korin 14:33, 40.
Ol Wetnes oli go long evri haos wanwan, from we hemia i wan gudfala rod blong faenem ol man. Long ol miting blong kongregesen, ol Wetnes blong Jeova oli lanem olsem wanem blong yusum Baebol blong storeyan wetem ol man long saed blong Kingdom. Ol Wetnes oli karem sam buk, sam magasin, mo traket blong seremaot long ol man we oli wantem kasem moa save long Tok blong God.
Blong ol man oli gat jans blong harem impoten mesej blong Kingdom, ol Wetnes oli raetemdaon sam samting long wan smol pepa, taem oli stap go long evri haos. Oli raetemdaon ol haos we oli no gat man, mo ol haos we wan samting i bin blokem olgeta blong storeyan gud. Bambae oli gobak bakegen. Sipos wan man i intres long trutok, oli raetemdaon nem blong hem, mo oli gobak blong storeyan long Baebol bakegen. Sipos wan man i wantem, oli glad blong mekem Baebol stadi wetem hem. Olgeta oli no kasem pei from ol wok ya.
Ol Wetnes blong Jeova, oli seremaot ol magasin long ol man we oli stap wokbaot long rod tu. Long ples ya, olgeta oli faenem plante man we maet oli no faenem long ol haos. Oli traehad blong faenem olgeta man we oli wantem harem trutok.—Ol Wok 17: 17; Revelesen 14:6, 7; 22:17.
?From wanem ol Wetnes blong Jeova oli stap go plante taem long haos blong ol man, nating we bighaf blong olgeta i no intres long trutok? Laef blong ol man i save jenis. Sipos samting ya i hapen, maet wan man i glad blong storeyan wetem ol Wetnes nao. No maet ol Wetnes oli faenem wan narafala man long haos ya, we i save intres long trutok.
Jisas i bin talem long ol disaepol blong hem se: “Be yufala i mas putum ol tingting blong yufala oli go long kingdom blong hem [fastaem], mo long ol stret fasin we hem i wantem.” Wok blong prij i wan bigfala haf blong fasin blong putum Kingdom i stap fasples long laef, mo ol Wetnes blong Jeova, oli traehad blong kasem mak ya long laef blong olgeta.—Matyu 6:33; 2 Timote 4:2.
• ?Profet tok i talem se yumi gat wanem wok blong mekem tede, we hem i sem mak long wok blong Jisas mo ol Kristin bifo?
• ?Olsem wanem ol Wetnes blong Jeova oli reregud blong mekem wok blong prij?
• ?From wanem ol Wetnes oli stap gobaklong ol man, nating we bighaf blong olgetaoli no intres?
[Tok Blong Pija Long Pej 16, 17]
Ol Wetnes blong Jeova oli talemaot
Kingdom blong God long ol defren kantri
Taelan
Meksiko
Neselan
Koria
Kurasao
Gana
Britin
Ostrelya