Wok Blong Prentem Ol Buk Blong Presem God
Fulap man oli save gud ol Wetnes blong Jeova from ol buk mo magasin blong olgeta. Long 1920, Watchtower Sosaete i stat blong yusum ol man we oli wok fri nomo, mo we oli haf long kampani blong ol Wetnes, blong wokem ol buk mo magasin blong seremaot long ol man. Samting ya i blong mekem se olgeta oli save prentem naf magasin mo buk oltaem, mo praes blong olgeta i smol nomo.
Long ol 60 yia we oli pas finis, Sosaete i prentem fulap buk long saed blong Baebol. Fastaem oli mekem wok ya long Bruklin nomo. Biaen oli mekem long plante narafala kantri tu. Oltaem oli nidim moa man blong mekem wok ya. Be olgeta oli no kasem pei from.
Biaen long 1970, olfala wei we oli yusum blong prentem i jenis. Nao oli stat blong yusum kompyuta, foto, mo wan fasin blong prentem we oli kolem ‘ofset.’ Wan samting nomo: Oli save pem ol mesin we oli mekem olsem, be ol mesin ya oli no naf blong prentem evri lanwis. Sosaete i prentem finis ol buk long 160 lanwis, be nao oli nidim moa.
Taswe, olgeta oli singaot ol man we oli gat gudhan long wok ya, mo oli rere blong wok fri, blong traem wokem wan rod blong prentem plante lanwis wantaem. Olgeta oli wok gud. Oli wokem wan rod we oli kolem MEPS. Hem i save wok long 200 lanwis, mo sipos oli wantem, oli save ademap moa lanwis long hem.
Naoia, MEPS, we ol Wetnes blong Jeova nomo oli wokem, i stap wok long 25 kantri, mo oli gat plan blong go moa. Olgeta oli trenem finis ol man we oli wok fri blong wokem ol mesin ya mo fiksimap olgeta. Naoia, Sosaete i stap prentem ol magasin long bitim 100 lanwis long 36 kantri. Long 5 kantri, oli stap wokem ol Baebol mo buk tu.
Blong mekem wok ya, olgeta oli stap yusum fulap man blong raetem fastaem, blong tanem long ol defren lanwis, blong jekem bakegen, blong prentem, blong wokem ol buk, mo blong sanemaot olgeta. Sam narafala man oli mekem wok blong raetem ol leta i go long ol kongregesen. Samfala oli kukum kakae, klinim haos, wasem klos, mo sam samting bakegen. Olgeta we oli mekem ol wok ya long ol defren kantri, oli wok fri nomo, mo oli glad blong givim taem blong olgeta blong mekem wok ya. Long ful wol long 1985, 8,438 man oli wok fri long ol ofis, faktri, haos mo plantesen.
?Hu ya olgeta man ya? Sam man, sam woman, sam mared, sam no mared, sam yangfala, sam olfala, be olgeta oli Wetnes blong Jeova we oli givim laef blong olgeta long God. Samfala oli mekem wok ya 40, 50, no 60 yia finis. Olgeta oli givim samwe long 44 haoa evri wik long wok blong olgeta, samtaem moa. Oli yusum sapa mo wiken blong go prij mo blong joen wetem kongregesen long ol wok blong hem.
Long evri ples blong wol, Sosaete i givim rum mo kakae long olgeta we oli mekem wok ya, long ol haos blong Sosaete we oli kolem ol Betel Haos. Mo tu, oli givim smol mane blong pem kos blong olgeta blong wokbaot from minista wok, mo blong pem ol smolsmol samting we olgeta oli nidim.
Long 1920 kam kasem naoia, ol man ya oli wokem bitim 9 taosen milyan Baebol, buk, magasin mo traket long 200 lanwis, blong seremaot long olgeta ples long wol. From wok ya, gud nyus i save kasem ol man long olgeta nesen, laen, mo lanwis.—Revelesen 14:6,7.
• ?Watchtower Sosaete i stap yusum wanem rod blong prentem ol buk mo magasin? ?From wanem?
• ?Hu ya olgeta man we oli mekem wok ya, mo olsem wanem long laef blong olgeta?
[Tok Blong Pija Long Pej 24]
Olgeta ya oli wok fri blong prentem ol buk mo ol magasin, long faktri, ofis, mo plantesen, long Bruklin mo Wolkil, Nyu Yok, Yunaeted Stet.
[Tok Blong Pija Long Pej 25]
Olgeta ya oli wok fri blong mekem ol defren wok we i joen wetem bigfala wok blong prentem ol buk mo magasin long saed blong Baebol.
Spen
Jemani
Finlan
Kanada
Denmak
Swiden
Saot Afrika
Brasil
Neselan
Ostrelya