Japta 3
Ol Samting We Oli Mas Kamtru, i No Longtaem
1. ?Olsem wanem yu yu save stap sef long taem we God bambae i jajem wol ya?
YU YU mas tingting dip long ol samting we oli stap kamaot long wol tede. ?From wanem? From we wol ya i no save ronwe long jajmen blong God. Be yu yu save stap sef long taem ya. Yu yu save mekem olsem sipos yu “no man blong wol” from we wol ya bambae i lus. Samting ya i no min se yu mas go haed samples yu wan. Yu yu save gat wan gudfala laef we i gat mining. Be long semtaem, yu mas stap longwe long ol rabis fasin blong politik, ol griri bigfala bisnes blong wol, mo ol gyaman skul we oli no ona long God. Mo yu no mas joen long ol raf fasin mo ol rabis fasin. Mo tu, yu mas folem ol gudfala fasin we God i glad long olgeta, mo yu mas traehad blong mekem wok blong hem. (Jon 17:14-16; Sefanaea 2:2, 3; Revelesen 21:8) Buk blong Revelesen long Baebol i soemaot se i impoten tumas we yu yu mekem laef blong yu i laenap wetem ol samting ya, mo yu jenisim ol samting we oli no stret long laef blong yu.
2. ?Olsem wanem aposol Jon i statem bigfala profet tok blong Revelesen? ?God i givim hevi mesej ya long hu?
2 Aposol Jon i statem bigfala profet tok blong Revelesen olsem: “Long buk ya, mi Jon mi raetem ol samting we Jisas Kraes i soemaot long mi. Hemia ol samting we God i givim long hem blong hem i soemaot long ol [slef, “NW”] blong hem, ol samting we bambae i no longtaem, oli kamtru.” (Revelesen 1:1a) Ale, God i givim hevi mesej ya long Jisas Kraes we hem i laef bakegen long ded. Vas ya i no tokbaot Jisas olsem we hem i haf long Triniti, we mining blong hem i stap haed. No gat. Jisas i stap aninit long han blong Papa blong hem. Long sem fasin, “ol slef blong hem,” hemia ol man blong hem long Kristin kongregesen, oli stap aninit long han blong Jisas Kraes. Taswe ‘oli biaen long hem long evri ples we hem i pas long hem.’ (Revelesen 14:4; Efesas 5:24) ?Be tede hu ya ol trufala “slef” blong God? ?Mo olsem wanem Revelesen i save givhan long olgeta ya?
3. (a) ?Hu ya ol “slef” we oli stap aninit long han blong Jisas Kraes? (b) ?Ol enjel oli stap lidim ol “slef” ya long wanem wok?
3 Aposol Jon i raetemdaon Revelesen, mo hem i tokbaot hem wan olsem wan slef. Ol narafala aposol oli ded finis. Be aposol Jon i stap yet. Mo hem i wan long olgeta “slef” we tabu speret i makemaot olgeta blong oli laef blong olwe long heven. Tede, i gat sam taosen nomo blong olgeta we oli stap yet long wol. God i gat plante narafala man blong hem tu. Hem i gat wan bigfala kampani blong ol man, ol woman, mo ol pikinini. Naoia namba blong olgeta i kasem sam milyan. Ol enjel oli lidim olgeta. Nao olgeta oli kam joen wetem ol “slef” we God i makemaot olgeta, blong talemaot gud nyus we i blong oltaem nomo, long olgeta man long wol. !Ol “slef” ya oli hadwok blong givhan long ol man we oli gat tingting daon, blong oli save kasem laef blong olwe long wol! (Matyu 24:14; Revelesen 7:9, 14; 14:6) Gud nyus ya i save mekem man i hapi. Revelesen i soemaot wanem we yu yu mas mekem blong kasem blesing from gud nyus ya.
4. (a) ?From we Jon i raetemdaon Revelesen kolosap 1,900 yia finis, olsem wanem hem i save tokbaot “ol samting we bambae i no longtaem, oli kamtru”? (b) ?Ol samting we oli stap kamaot long wol naoia oli pruvum wanem long saed blong ol profet tok?
4 ?Be olsem wanem Jon i save talem se hem bambae i soemaot “ol samting we bambae i no longtaem, oli kamtru,” long “ol slef blong hem”? Kolosap 1,900 yia finis Jon i raetemdaon ol tok ya. Be long tingting blong Jeova, wan taosen yia i olsem “yestede we i pas finis.” Ale, 1,900 yia ya i sot nomo, taem yumi tingbaot ol milyan milyan yia we Jeova i yusum blong wokem wol mo blong mekemrere evri samting blong man i save stap long hem. (Ol Sam 90:4) Aposol Pol i tokbaot wan samting nomo we ‘hem i wantem tumas, we hem i stap putum tingting blong hem long hem.’ Yes, long tingting blong Pol, presen we bambae hem i kasem i kolosap nomo. (Filipae 1:20) Be long taem blong yumi naoia, i gat fulap samting blong pruvum se olgeta profet tok bambae i kamaot tru long stret taem blong hem. Naoia, ol man oli gat paoa, oli save spolem laef blong olgeta man long wol. Neva bifo oli gat paoa olsem. !God nomo i save stretem trabol ya!—Aesea 45:21.
Rod Blong Sanem Toktok
5. ?Olsem wanem God i sanem toktok blong Revelesen i go long aposol Jon mo ol kongregesen long taem ya?
5 Revelesen 1:1b, 2 i talem se: “Nao Kraes i sanem enjel blong hem blong i soemaot ol samting ya [Revelesen ya] long mi, [Jon] we mi mi [slef, “NW”] blong wok blong hem. [Mo hem i soemaot ol samting ya long ol saen, “NW”]. Nao mi mi raetemdaon ol samting ya we mi luk. Hemia tok ya we God i talem, mo trutok we Jisas Kraes i wetnes long hem se i tru.” Wan enjel i karem ol toktok we God i givim, i go long Jon. Jon i raetemdaon toktok ya, mo hem i sanem i go long ol kongregesen long taem blong hem. Mo yumi glad we God i lukaot long toktok ya blong i no lus. From samting ya, toktok ya i save leftemap tingting blong bitim 65,000 kongregesen blong ol man blong God tede, we oli joengud long olgeta ples long wol.
6. ?Olsem wanem Jisas i soemaot rod we hem i stap yusum blong givim kakae long saed blong speret long “ol slef blong hem” tede?
6 Long taem blong Jon, God i yusum wan spesel rod blong sanem toktok blong Revelesen i go long ol man. Mo Jon nao hem i rod we God i yusum long wol ya. Sem mak tede, God i yusum wan spesel rod blong givim kakae long saed blong speret long olgeta ‘slef’ blong hem. Jisas i givim wan bigfala profet tok long saed blong en blong rabis fasin blong wol ya. Insaed long profet tok ya, hem i soemaot wanem rod God i stap yusum long wol blong givimaot kakae ya. Hem i tokbaot “slef ya we i stret mo waes, we masta blong hem i putumap hem i bos long ol man blong hem blong givim kakae long olgeta long stret taem blong hem.” (Matyu 24:3, 45-47, NW) Tede hem i stap yusum grup ya we oli olsem Jon blong faenemaot mining blong profet tok ya.
7. (a) ?Ol saen long Revelesen, oli mas gat paoa long yumi olsem wanem? (b) ?Samfala long grup ya we i olsem Jon, hamas yia finis oli bin givhan blong mekem ol vison blong Revelesen oli kamtru?
7 Aposol Jon i talem se Jisas i yusum ‘ol saen’ no pija blong soemaot Revelesen long hem. Ol saen ya oli kliagud, mo yumi haremgud taem yumi stadi long olgeta. Oli soemaot sam wok we i strong. Taem yumi stadi dip long olgeta, oli save pusum yumi blong wok had blong talemaot profet tok ya mo mining blong hem long ol man. Revelesen i soemaot plante samting olsem drim, no vison, we yumi save sek from. Jon i stap insaed long sam vison ya, mo sam vison, Jon i stap lukluk olgeta nomo. Samfala we oli blong grup ya tede we i olsem Jon, oli bin givhan blong mekem ol vison ya oli kamtru long las 70 yia we oli pas. Naoia oli glad we tabu speret blong God i mekem mining blong profet tok ya i kam long klia ples, blong oli save eksplenem long ol narafala.
8. (a) ?Wanem samting we i defren long saed blong ol vison blong Revelesen? (b) ?Olsem wanem profet tok blong Daniel i givhan long yumi blong kasem mining blong ol wael anamol long Revelesen?
8 Ol vison ya long Revelesen oli no folfolem olgeta. Evriwan wanwan i gat taem blong hem. Plante long ol vison ya oli sem mak long sam narafala profet tok long Baebol. Ol narafala profet tok ya oli givhan long yumi blong kasem save long mining blong ol vison blong Revelesen. Wan eksampel: Profet tok blong Daniel i tokbaot fo wael anamol, we ol man oli save fraet from. Hem i eksplenem se ol anamol ya oli minim sam bigfala nesen we oli rulum wol. From samting ya, yumi kasem save se ol wael anamol blong Revelesen oli save minim sam bigfala nesen we oli rulum wol ya bifo mo tede tu.—Daniel 7:1-8, 17; Revelesen 13:2, 11-13; 17:3.
9. (a) ?Grup ya tede we i olsem Jon, oli soemaot wanem fasin we i sem mak long fasin blong Jon? (b) ?Jon i talem se yumi mas mekem wanem blong haremgud?
9 Jon i mekemgud wok ya blong raetemdaon mesej we God i givim long hem tru long Jisas Kraes. Hem i raetemdaon fulap smosmol poen long saed blong ‘ol samting we hem i luk.’ Sem mak tede, grup ya we oli olsem Jon bifo, oli wantem tumas blong God mo Jisas Kraes i halpem olgeta, blong oli save faenemaot olgeta mining blong profet tok ya, mo blong oli save talemaot hem long ol man blong God. Jon i raetemdaon sam tok i go long olgeta we tabu speret i makemaot olgeta. (Mo tu, tok ya i givhan long wan bigfala kampani long wol, we God bambae i lukaot long olgeta long taem blong bigfala trabol.) Jon i talem se: “Man we i ridim tok ya we God i givim, hem i save harem gud. Mo olgeta we oli harem, nao oli holem tok ya long tingting blong olgeta, olgeta ya tu oli save harem gud. From we taem blong ol samting ya i kam kolosap.”—Revelesen 1:3.
10. ?Blong haremgud tumas long Revelesen, yumi mas mekem wanem?
10 Yu yu save haremgud tumas sipos yu ridim Revelesen. Be bambae yu kasem moa blesing sipos yu folem ol tok blong hem. Long wan leta we Jon i raetem, hem i talem se: “Sipos yumi laekem God tumas, hemia i min se yumi stap folem ol loa blong hem. Mo ol loa blong hem oli no strong tumas blong folem, from we yumi evriwan we i bon long God, yumi save winim ol rabis fasin blong wol. Mo rod blong winim wol i olsem. Yumi stap win from we yumi bilif.” (1 Jon 5:3, 4) !Sipos yu wokem bigfala bilif ya, yu yu save haremgud tumas!
11. (a) ?From wanem i impoten tumas we yumi kwik blong folem profet tok ya? (b) ?Yumi stap kolosap tumas long wanem taem?
11 I impoten tumas we yumi kwik blong folem ol profet tok ya, “from we taem blong ol samting ya i kam kolosap.” ?Taem blong wanem? Taem blong ol profet tok ya blong Revelesen oli kamtru. Hemia taem blong God i jajem ol man tu. Kolosap nao, God mo Jisas Kraes bambae tufala i mekem laswan jajmen long wol blong Setan i kamtru. Taem Jisas i stap long wol, hem i talem se Papa blong hem nomo i save “dei blong samting ya, mo taem blong hem.” Jisas i talemaot ol trabol we oli mas kam plante long wol, i stat long taem blong Faswan Bigfala Faet Blong Wol. Nao hem i talem se: “Ol man we oli stap laef [long taem ya], bambae oli no save ded evriwan, gogo olgeta samting ya bambae oli kamtru.” Taswe yumi save se taem blong jajmen blong God i kolosap tumas. (Mak 13:8, 30-32) Habakuk 2:3 i talem se: “Vison ya bambae i kamtru long stret taem blong hem nomo. Bambae hem i hareap blong kasem en blong hem, mo hem i no save gyaman. Nating sipos hem i tektaem, be yu mas rere. From we bambae hem i kamtru. Hem i no save let.” Blong stap sef long taem blong bigfala trabol ya, yumi mas harem mo folem ol profet tok blong God.—Matyu 24:20-22.
[Bokis blong pija long pej 15]
Blong faenemaot mining blong buk blong Revelesen, yumi nidim
● Tabu speret blong Jeova blong givhan long yumi
● Blong luksave wetaem dei blong Masta i stat
● Blong luksave hu ya slef we i stret mo waes tede