Japta 14
Bigfala Jea Blong Jeova Long Heven i Naes Tumas
Stampa tok: Ol bigfala samting we oli hapen long fored blong jea blong God we i sidaon long hem blong jajem ol man
Taem we i kamtru: Vison ya i tokbaot ol samting we oli mas kamaot i stat long 1914 go kasem en blong Wan Taosen Yia Rul blong Jisas mo biaen. Long taem ya, olgeta samting long heven mo long wol bambae i presem Jeova.—Revelesen 5:13
1. ?From wanem yumi mas glad blong harem ol vison we Jon i talemaot long yumi?
NAO Jon i talemaot sam moa vison we yumi save sek from. Paoa blong tabu speret i holem Jon, nao i olsem we hem i stap long dei blong Masta finis. Taswe ol samting we Jon i tokbaot i gat bigfala mining long yumi tede, we yumi stap laef long dei blong Masta stret. Yumi no save luk ol samting long heven long ae blong yumi. Be from ol vison ya, Jeova i mekem se yumi save luk ol samting ya. Ol jajmen blong God we bambae oli kamtru long wol ya, yumi save luk olgeta olsem God i luk olgeta. Nating we bambae yumi laef long heven no long wol nomo, ol vison ya oli givhan long yumi blong luksave prapa ples blong yumi long plan blong Jeova. From samting ya, oltaem yumi evriwan i mas harem tok ya blong Jon: “Man we i ridim tok ya we God i givim, hem i save harem gud. Mo olgeta we oli harem, nao oli holem tok ya long tingting blong olgeta, olgeta ya tu oli save harem gud.”—Revelesen 1:3.
2. ?Wanem i hapen long Jon nao?
2 !Nao Jon i luk samting we i moa gud i bitim ol video long taem blong yumi naoia! Hem i raetemdaon, i se: “Biaen long ol samting ya, mi luk, nao i gat wan doa i open long heven. Mo faswan voes we mi harem i olsem pupu. Nao hem i toktok long mi, i se: ‘Yu kam antap long ples ya, nao bambae mi soemaot long yu ol samting we oli mas kamtru.’ ” (Revelesen 4:1, “NW”) Long vison ya, Jon i luk wan ples long heven we yumi no save luk, hemia ples we Jeova i stap long hem. Hem i antap we i antap, i bitim ples we ol man oli sutum ol roket long hem, mo i bitim ol sta mo planet long heven tu. I olsem we Jon i pastru long wan doa we i open fored long hem. Nao wan man i singaot hem blong lukluk ol nambawan samting long ples blong ol speret man long heven, long ples we Jeova hem wan i sidaon long bigfala jea blong hem. (Ol Sam 11:4; Aesea 66:1) !Wan nambawan blesing ya!
3. ?Voes ya we “i olsem pupu” i mekem yumi tingbaot wanem? ?I klia se hu nao i Stampa blong voes ya?
3 ?“Faswan voes” ya i blong hu? Baebol i no talem. Bifo finis, Jon i harem bigfala voes blong Jisas, we i singaot bigfala olsem wan pupu. Nao voes ya i kolosap sem mak. (Revelesen 1:10, 11) Yumi save tingbaot samting we i hapen long bigfala Hil ya Sinae bifo, taem pupu i singaot bigfala blong talemaot se Jeova i stap long ples ya. (Eksodas 19:18-20) I klia se Jeova nomo hem i Stampa blong voes ya we i olsem wan pupu. (Revelesen 1:1) Long vison ya, hem i openem doa, blong Jon i save kam insaed long ples we i tabu moa i winim ol narafala ples we Jeova i rul long olgeta.
Ples We Jeova i Stap Long Hem i Saenaot Bigwan
4. (a) ?Vison blong Jon i gat wanem mining long ol Kristin we tabu speret i makemaot olgeta? (b) ?Vison ya i gat wanem mining long olgeta we oli wantem laef blong olwe long wol?
4 ?Jon i luk wanem? Lesingud nao. Jon bambae i eksplenem long yumi bigfala samting we i kamaot long hem, i se: “Wantaem nomo, Tabu Speret i kam long mi we paoa blong hem i holem mi, nao mi luk wan bigfala jea olsem jea blong king i stap long heven, mo i gat wan man i stap sidaon long hem.” (Revelesen 4:2) Wantaem nomo, bigfala paoa blong God i holem Jon, i tekem Jon long saed blong speret i go stret long bigfala jea blong Jeova. !Jon i mas haremgud tumas long ekspiryens ya! Long ples ya, hem i save luk heven we bambae hem mo ol narafala Kristin we tabu speret i makemaot olgeta oli go long hem. Long ples ya, God i stap lukaotgud long ‘ol gudfala samting we oli blong olgeta, we oli no save kam nogud, oli no save kam rotin, oli no save lus.’ (1 Pita 1:3-5; Filipae 3:20) Vison blong Jon i gat bigfala mining long olgeta we oli wantem laef blong olwe long wol tu. Vison ya i givhan long olgeta blong kasem save long bigfala paoa blong Jeova. Oli save luksave plan blong Jeova long heven blong rul mo blong jajem ol nesen, mo blong rul long ol man blong wol biaen. !Tru ya, Jeova i nambawan God blong oda!
5. ?Led blong bokis blong kontrak i pija blong wanem prapa samting we Jon i lukluk?
5 Plante samting we Jon i luk long heven i kolosap sem mak long sam samting long haos tapolen blong God long drae ples. Oli bildim haos tapolen ya 1,600 yia bifo, taem oli stap wokbaot long drae ples. Haos tapolen ya, ol man Isrel oli yusum blong wosip long God tru. Wan rum blong haos tapolen ya, nem blong hem Tabu Ples we i Tabu Tumas, i gat bokis blong kontrak i stap long hem. Oli kavremap bokis ya wetem gol, mo voes blong Jeova i kamaot stret antap long led blong bokis ya. (Eksodas 25:17-22; Hibrus 9:5) Taswe led blong bokis ya we oli wokem long gol i olsem pija blong bigfala jea blong Jeova. Nao Jon i stap luk prapa samting ya we led blong bokis i pija blong hem: !Haefala Masta Jeova hem wan i stap sidaon long bigfala jea blong hem long heven, mo hem i saen we i naes tumas!
6. ?Jon i talem se hem i luk we Jeova i olsem wanem? ?From wanem tok blong hem i stret nomo?
6 Bifo long taem ya, sam profet oli luk jea blong Jeova long vison, mo oli raetemdaon ol smosmol samting long saed blong Tabu Man ya we i sidaon long jea ya. Be Jon i no mekem olsem. (Esikel 1:26, 27; Daniel 7:9, 10) Jon i talemaot ol filing blong hem wan, taem hem i luk Man ya we i sidaon long jea ya, i se: “Man ya we i stap sidaon, mi luk hem olsem laet we i stap saenaot long tu gudfala ston ya jaspa mo kanilyan we tufala i red. Mo i gat wan renbo i goraon long jea ya, mo laet blong hem i saen olsem gudfala ston ya emral, we i grin.” (Revelesen 4:3) !Samting ya i naes tumas! Jon i luk wan samting we i kwaet mo i saen i naes tumas, olsem ol sas ston we oli naes, oli saengud. !Samting ya i stret nomo long tok we disaepol Jemes i talem, se Jeova i “Papa blong olgeta laet long skae”! (Jemes 1:17, NW) Smoltaem biaen we Jon i raetemdaon Revelesen, hem i talem se: “God hem i olsem delaet, i no gat tudak nating i stap long hem.” (1 Jon 1:5) !Glori blong Jeova i nambawan tumas!
7. ?Yumi save lanem wanem long renbo we i stap raon long jea blong Jeova?
7 Makem we Jon i luk wan renbo we i grin i goraon long jea ya. Grik wod ya we oli tanem i kam renbo (irʹis) i minim wan samting we i raon nomo. Taem blong Noa, hemia fastaem we Baebol i tokbaot renbo. Taem Bigfala Wora i finis, Jeova i mekem wan renbo i kamaot long klaod. Nao hem i eksplenem mining blong renbo ya, i se: “Bambae mi putum renbo blong mi i stap long klaod. Renbo ya i saen blong promes ya blong mi, we mi mekem wetem yufala. Bambae mi mi save tingbaot promes ya blong mi, we mi mekem wetem yufala. Bambae mi no moa save spolem laef blong yufala bakegen samtaem long bigfala wora olsem.” (Jenesis 9:13, 15) ?Oraet, vison ya blong Jon we hem i luk heven, i mas mekem hem i tingbaot wanem? Renbo ya i mas mekem hem i tingbaot we man i nidim blong frengud wetem Jeova long pis. Ol man tede we oli olsem Jon bifo oli mekem olsem. Mo tu, Jon i mas tingbaot se ples blong Jeova i gat pis mo i kwaet. Long nyufala wol, taem Jeova i pulum haos tapolen blong hem antap long ol man, pis ya bambae i kasem olgeta man we oli obei long hem.—Ol Sam 119:165; Filipae 4:7; Revelesen 21:1-4, NW.
?Hu Ya Ol 24 Elda?
8. ?Jon i luk hu raonabaot long bigfala jea? ?Olgeta oli minim hu?
8 Jon i save se bifo, God i putumap sam pris blong mekem wok long olfala haos tapolen. Taswe maet hem i sapraes long nekiswan samting we hem i luk: “Mo raonabaot long bigfala jea ya blong king, i gat twantefo narafala jea, oli stap, we oli bigfala tu, nao long ol jea ya i gat twantefo elda oli stap sidaon long olgeta. Olgeta ya, klos blong olgeta i waet, mo oli putum hat olsem hat blong king we oli wokem long gol.” (Revelesen 4:4) Yes, i no gat pris. Be i gat 24 elda we oli sidaon long jea blong king mo oli putum hat olsem king. ?Hu ya ol elda ya? Hemia olgeta long Kristin kongregesen we tabu speret i makemaot olgeta. Oli laef bakegen long ded, nao oli tekem ples long heven we Jeova i promes finis long olgeta. ?Olsem wanem yumi save samting ya?
9, 10. ?Olsem wanem yumi save se ol 24 elda oli minim ol man blong Kristin kongregesen we tabu speret i makemaot olgeta, we oli tekem ples blong olgeta finis long heven?
9 Faswan samting: Oli putum flas hat. Baebol i talem se ol Kristin we tabu speret i makemaot olgeta bambae oli kasem ‘praes [flas hat, NW] we i no save lus samtaem,’ oli gat laef we i no save finis samtaem. (1 Korin 9:25; 15:53, 54) Be long Revelesen, ol 24 elda ya oli stap sidaon long jea blong king. Taswe ol hat we oli wokem long gol we oli olsem hat blong king, long ples ya oli minim paoa mo raet blong rul olsem king. (Skelem wetem Revelesen 6:2; 14:14.) Samting ya i soemaotgud we ol 24 elda ya oli minim ol man blong Jisas we tabu speret i makemaot olgeta, we oli tekem ples blong olgeta finis long heven. Hemia i klia nomo, from we Jisas i mekem kontrak wetem olgeta blong oli sidaon long ol jea blong king long Kingdom blong hem. (Luk 22:28-30) Vison ya i talem se Jisas wetem ol 24 elda ya nomo oli stap rul long heven long fes blong Jeova. Ol enjel oli no mekem olsem.
10 Samting ya i agri wetem promes we Jisas i mekem long kongregesen blong Laodisia, i se: “Man we i win long faet blong hem, bambae mi mekem hem i sidaon wetem mi long bigfala jea blong king blong mi.” (Revelesen 3:21, NW) Be wok blong ol 24 elda ya long heven i no blong rul long gavman nomo. Long fastok blong buk blong Revelesen, Jon i tokbaot Jisas, i se: “Nao hem i mekem yumi kam wan kingdom, ol pris blong God blong hem we i Papa blong hem tu.” (Revelesen 1:5, 6, NW) Ol elda ya oli king mo oli pris tu. “Olgeta ya bambae oli pris blong God mo blong Kraes, mo bambae oli joen wetem Kraes we hem i king, nao oli rul wetem hem, gogo wan taosen yia i pas.”—Revelesen 20:6.
11. ?From wanem i stret we namba blong ol elda i 24? ?Namba ya i minim wanem?
11 Jon i luk 24 elda raon long jea blong king. ?Olsem wanem namba ya 24 i spesel? Long plante fasin, ol gudfala pris blong Isrel bifo oli pija blong ol 24 elda ya. Aposol Pita i raetem leta blong hem i go long ol Kristin we tabu speret i makemaot olgeta, i se: “Be yufala, God i bin jusumaot yufala blong yufala bambae i laen blong hem. Yufala i olsem ol pris blong King. Yufala i olsem ol man blong wan ples nomo, we yufala i tabu man blong God. Yufala i olsem ol man we God i tekem yufala i blong hem nomo.” (1 Pita 2:9) Ol pris long Isrel bifo oli seraot long 24 grup. Oli makemaot ol wik long yia we olgeta grup ya wanwan oli mas mekem wok long fored blong Jeova. Olsem nao, tabu wok ya i stap gohed oltaem nomo, i no stop. (1 Kronikel 24:5-19) Taswe i stret nomo we long vison ya blong Jon i gat 24 elda we oli mekem wok blong pris long heven. Olsem nao, ol pris ya oli mekem wok blong Jeova oltaem, oli no stop. Taem bambae ol 24 grup ya oli kasem fulnamba blong olgeta, oli mas gat 6,000 man we oli win long faet blong olgeta i stap long ol grup ya wanwan. Revelesen 14:1-4 i tokbaot 144,000 (24 x 6,000) man we “God i pemaot olgeta oli fri long wol.” Oli stanap long bigfala Hil ya Saeon long heven, wetem Smol Sipsip blong God, Jisas Kraes. Namba ya 12 i minim se ogenaesesen ya i kamaot long God, mo olgeta haf blong hem oli joengud tugeta. Sipos yumi dabolem 12 yumi kasem 24, mo hemia i minim se God i mekem plan ya i strong moa.
Laetning, Ol Voes, Mo Tanda
12. Wanem nekiswan samting we Jon i luk mo i harem? ?“Ol laetning mo ol voes mo ol tanda” oli pulum yumi blong tingbaot wanem?
12 ?Wanem nekiswan samting we Jon i luk mo i harem? “Mo i gat ol laetning mo ol voes mo ol tanda, oli stap kamaot long jea blong king.” (Revelesen 4:5a, “NW”) !Samting ya i pulum yumi blong tingbaot bifo, we plante taem Jeova i soemaot bigfala paoa blong hem, nao ol man oli sek from! Wan eksampel: Taem Jeova i “kamdaon” long bigfala Hil ya Sinae, Moses i talem se: “Nao long namba tri dei ya, long moning, ol man oli luk bigfala laetning i laet, mo tanda i faerap, mo bigfala klaod i kam kavremap hil ya, mo oli harem bigfala noes blong pupu tu. . . . Nao noes blong pupu ya i stap kam bigfala moa oltaem. Moses i tok, nao Hae God [Jeova, NW] i ansa long hem long bigfala tanda we i faerap.”—Eksodas 19:16-19.
13. ?Ol laetning we oli kamaot long bigfala jea blong Jeova oli pija blong wanem?
13 Long dei blong Masta, Jeova i soemaot se hem i stap mo i soem paoa blong hem long wan bigfala fasin. Hem i no yusum prapa laetning. Ol samting we Jon i luk olsem laetning oli pija nomo. ?Ol laetning ya oli pija blong wanem? Taem laetning i saenaot, hem i save mekem se ples i olsem delaet nomo. Be hem i save kilim man i ded tu. Ol laetning we i kamaot long bigfala jea blong Jeova oli stret pija blong laet long saed blong speret we hem i givim oltaem long ol man blong hem. Mo samting we i moa impoten, oli pija blong ol strong mesej blong jajmen blong hem we oli olsem faea.—Skelem wetem Ol Sam 18:14; 144:5, 6; Matyu 4:14-17; 24:27.
14. ?Olsem wanem ol voes ya oli singaot tede?
14 ?Wanem ol voes ya? Taem Jeova i kamdaon long Hil ya Sinae bifo, wan voes i tok long Moses. (Eksodas 19:19) Sam voes we oli kamaot long heven oli talem plante loa mo plante toktok we i stap long buk blong Revelesen. (Revelesen 4:1; 10:4, 8; 11:12; 12:10; 14:13; 16:1, 17; 18:4; 19:5; 21:3) Mo tu, tede Jeova i talem sam oda mo toktok long ol man blong hem blong mekem ol profet tok mo ol rul blong Baebol i kam moa klia long tingting blong olgeta. Plante taem save ya we i givim moa laet i kamaot long ol intenasnal asembli. Afta, ol man oli talemaot ol nyufala trutok ya blong Baebol long ol ples long wol. Aposol Pol i tokbaot ol gudfala man blong talemaot gud nyus, i se: “Tok blong olgeta i goaot finis, i go long olgeta ples long wol. Tok ya we oli talemaot, i kasem ol las ples blong wol finis.”—Rom 10:18.
15. ?Long haf blong dei blong Masta we yumi stap long hem naoia, wanem noes we i olsem tanda i kamaot long jea blong king?
15 Kolosap evritaem we laetning i saenaot, biaen, tanda i faerap. Deved i talem se prapa tanda i olsem “voes blong Jeova.” (Ol Sam 29:3, 4, NW) Taem Jeova i givim paoa long Deved blong faet agens long ol enemi blong hem, Baebol i talem se tanda i kamaot long God. (2 Samuel 22:14; Ol Sam 18:13) Elaehu i talem long Job se voes blong Jeova i faerap olsem tanda, from we hem i mekem “plante bigfala samting we yumi no naf blong kasem save long ol.” (Job 37:4, 5) Long haf blong dei blong Masta we yumi stap long hem naoia, voes blong Jeova i olsem “tanda.” Hem i givim woning long ol bigfala samting we bambae i mekem agens long ol enemi blong hem. Ol woning ya we oli olsem noes blong tanda oli go long olgeta ples long wol, i no wan taem nomo, be plante taem bakegen. !Sipos yu yu lesin finis long ol woning ya we oli olsem tanda, yu yu save haremgud! !Mo yu save haremgud moa sipos yu yusum tang blong yu long waes fasin blong talemaot moa ol woning ya!—Aesea 50:4, 5; 61:1, 2.
Ol Bigfala Laet Mo Solwora We i Olsem Glas
16. ?‘Seven bigfala laet we oli stap laet’ oli minim wanem?
16 ?Jon i luk wanem narafala samting bakegen? Hemia: “Long fran blong bigfala jea ya blong king, i gat seven bigfala laet oli stap laet. Hemia ol seven speret blong God ya. Mo bakegen long fran blong bigfala jea ya blong king, i gat samting olsem wan solwora i stap, we i olsem glas, we i saen we i saen.” (Revelesen 4:5b, 6a) Jon hem wan i talemaot mining blong seven laet ya, i se: “Hemia ol seven speret blong God ya.” Namba ya seven i minim fulwan long tingting blong God. Taswe ol seven bigfala laet ya i mas minim paoa blong tabu speret we i save mekem laet long saed blong speret i saen fulwan, i klia olgeta. Tede, grup ya we i olsem Jon bifo oli talem tangkyu tumas we God i givim laet ya long olgeta, blong oli kasem save. Mo oli glad we hem i givim wok ya long olgeta blong seremaot save ya i go long ol man long wol we oli hanggri long saed blong speret. !Yumi glad tumas we evri yia bitim 350 milyan kopi blong magasin ya Wajtaoa oli mekem laet ya i saenaot moa long bitim 100 lanwis!—Ol Sam 43:3.
17. ?‘Samting we i olsem solwora we i saen olsem glas’ i minim wanem?
17 Mo tu, Jon i luk “samting olsem wan solwora i stap, we i olsem glas, we i saen we i saen.” ?Hemia i pija blong wanem? ?Hem i minim wanem long olgeta we Jeova i singaot olgeta oli kam long haos blong hem long heven? Pol i tokbaot olsem wanem Jisas i mekem kongregesen i kam tabu, i se: “Kraes i mekem jyos ya i klin, i olsem we hem i wasem jyos ya long wora, mo long tok blong hem.” (Efesas 5:26) Bifo we Jisas i ded, hem i talem long ol disaepol blong hem, se: “Yufala i klin finis from ol tok ya we mi mi talem long yufala.” (Jon 15:3) Taswe samting we i olsem solwora we i saen olsem glas i minim Tok blong God, Baebol, we i save klinim man. Olgeta we bambae oli mekem wok blong ol pris long heven long fes blong Jeova, fastaem oli mas klin olgeta from Tok blong hem.
!Yu Luk—“Fo Anamol”!
18. ?Jon i luk wanem samting long medel blong ol samting ya, raonabaot long jea blong king?
18 Nao Jon i luk wan narafala samting. Hem i talem se: “Long medel blong ol samting ya, raonabaot long bigfala jea ya blong king, long ol fo saed blong hem, i gat fo anamol oli stap stanap. Ol anamol ya oli gat plante ae blong olgeta, i kavremap fes blong olgeta mo bak blong olgeta tu.”—Revelesen 4:6b.
19. ?Ol fo anamol oli pija blong wanem? ?Olsem wanem yumi save samting ya?
19 ?Ol fo anamol ya oli minim wanem? Vison blong narafala profet Esikel i givhan long yumi blong ansarem kwestin ya. Long vison blong hem, Esikel i luk Jeova i stap sidaon long jea blong king long wan samting olsem wan kat long heven. Kolosap long kat ya i gat ol anamol we oli kolosap sem mak long ol anamol we Jon i luk. (Esikel 1:5-11, 22-28) Biaen, Esikel i luk bakegen kat ya wetem jea blong king i stap antap long hem, mo ol anamol kolosap long hem. Long taem ya hem i talem se ol anamol oli jerubim. (Esikel 10:9-15) Taswe ol fo anamol we Jon i luk oli mas minim ol jerubim blong God, hemia ol enjel we oli gat hae ples long ogenaesesen blong hem long heven. Jon i no save sapraes we ol jerubim oli stap kolosap long Jeova hem wan. From we long haos tapolen long taem bifo, tu jerubim we oli wokem long gol oli stap antap long led blong bokis blong kontrak, we i minim bigfala jea blong Jeova. Taem Jeova i talemaot ol oda mo loa long nesen blong Isrel, voes blong hem i kamaot long ples bitwin long tufala jerubim ya.—Eksodas 25:22; Ol Sam 80:1.
20. ?Olsem wanem ol fo anamol oli stap “long medel blong ol samting ya, raonabaot long jea ya blong king”?
20 Ol fo anamol ya oli stap “long medel blong ol samting ya, raonabaot long bigfala jea ya blong king.” ?Wanem stret mining blong samting ya? Hem i save minim se oli stap raon long bigfala jea blong king long ol fo saed blong hem, wan anamol long medel blong evri saed. Taswe ol man we oli tanem Baebol ya Today’s English Version oli tanem olfala Grik tok long ples ya olsem: “raon long bigfala jea blong king long ol fo saed blong hem.” No maet tok ya i minim se ol fo anamol oli stap long medel blong heven stret, long ples we jea blong king i stap long hem. Ating from samting ya nao, The Jerusalem Bible i tanem vas ya olsem: “long medel, olsem wan grup we oli raon long jea blong king.” Be hemia bigfala poen we yumi mas tingbaot: Ol jerubim oli stap kolosap nomo long jea blong Jeova. Sem mak long ol jerubim we Esikel i luk, oli stap long ol fo kona blong kat we i olsem ogenaesesen blong Jeova. (Esikel 1:15-22) Ol samting ya i agri wetem tok blong Ol Sam 99:1 we i talem se: “!Hae God [Jeova, NW], hem i king! . . . Hem i stap sidaon long ples blong hem antap long [ol] jerubim ya.”
21, 22. (a) ?Jon i talem se ol fo anamol oli olsem wanem? (b) ?Wanem mining blong ol fo anamol ya?
21 Jon i gohed se: “Fas anamol ya, hem i olsem laeon. Seken anamol, hem i olsem pikinini blong buluk. Namba tri anamol, fes blong hem i olsem fes blong man. Mo namba fo, hem i olsem wan igel we i stap flae.” (Revelesen 4:7) ?From wanem ol fo anamol ya oli defdefren? ?From wanem olgeta i no sem mak? I klia se ol anamol ya wanwan oli makem wan fasin blong God. Faswan hem i laeon. Baebol i yusum laeon olsem wan saen blong fasin no fraet. Samting ya i tru moa taem fasin ya i joen wetem stret fasin. (2 Samuel 17:10; Proveb 28:1) Taswe laeon i minim stret fasin we i joen wetem fasin no fraet, hemia wan fasin blong God. (Dutronome 32:4; Ol Sam 89:14) Seken anamol, hem i wan yang buluk. ?Buluk i pulum yumi blong tingbaot wanem fasin? Long taem blong ol man Isrel bifo, buluk i wan sas samting, from we hem i gat bigfala paoa. (Proveb 14:4; mo lukluk long Job 39:9-11.) Olsem nao, yang buluk i minim paoa, bigfala paoa we Jeova i givim.—Ol Sam 62:11; Aesea 40:26.
22 Namba tri anamol, fes blong hem i olsem fes blong man. Hemia i mas minim lav we i olsem lav blong God, from we long olgeta samting we God i wokem long wol, hem i wokem man nomo i stret pija blong God, we i gat nambawan fasin ya lav. (Jenesis 1:26-28; Matyu 22:36-40; 1 Jon 4:8, 16) Yumi save se taem ol jerubim oli mekem wok blong olgeta raonabaot long bigfala jea blong Jeova, oli mas soemaot fasin ya. ?Olsem wanem long namba fo anamol? Hem ya i olsem wan igel we i stap flae. Igel i save lukluk i go longwe. Jeova hem wan i tokbaot fasin ya blong igel i se: “Ae blong hem i save lukluk i go farawe.” (Job 39:29) Taswe i stret nomo we igel i saen blong fasin waes we i save lukluk i go longwe long fyuja. Jeova i Stampa blong waes. Mo from we ol jerubim blong hem oli obei long ol loa blong hem, olgeta tu oli stap soemaot waes blong God.—Proveb 2:6; Jemes 3:17.
Oli Singaot Blong Presem Jeova
23. ?Wanem mining blong “fulap ae” blong ol fo anamol ya? ?Ol sikis wing blong ol jerubim (3 + 3) oli makem wanem poen?
23 Jon i storeyan moa long ol samting we hem i luk, i se: “Ol fo anamol ya evriwan oli gat sikis wing blong olgeta, mo oli gat fulap ae blong olgeta, we i kavremap bodi blong olgeta long insaed blong hem mo long afsaed blong hem tu. Nao long dei mo long naet, oli no spel nating, oli stap singsing, se ‘Hae God ya [Jeova, “NW”] we i God blong yumi, we i gat olgeta paoa, hem i tabu we tabu we tabu. Hem i stap fastaem, bifo olgeta, hem i stap naoia, mo hem bambae i kam.’ ” (Revelesen 4:8) Oli gat fulap ae blong olgeta. Samting ya i minim se oli save lukluk klia mo lukluk i go longwe. Ol fo anamol ya oli mekem samting ya oltaem nomo, from we oli no nidim blong slip. Oli folem fasin blong Jeova, from we Baebol i talem se: “Long saed blong Jeova, ae blong hem i lukluk i go long olgeta ples long wol, blong soemaot paoa blong hem taem hem i givhan long olgeta we hat blong olgeta i fulwan long hem.” (2 Kronikel 16:9) Ol jerubim oli gat fulap ae. Taswe oli save lukluk i go long evri ples. Oli luk evri samting we i hapen. Taswe oli nafgud blong givhan long God long jajmen wok blong hem. Long saed blong Jeova, Baebol i talem se: “Ae blong Jeova i stap lukluk i go long evri ples. Hem i stap lukluk ol nogud man mo ol gud man tu.” (Proveb 15:3) Mo ol fo anamol ya, evriwan oli gat sikis wing blong olgeta. Namba ya sikis hem i olsem 3 + 3. Mo Baebol i yusum namba ya tri blong makemgud wan poen. Taswe ol wing ya oli minim se ol jerubim oli save spid olsem laetning, blong talemaot ol jajmen blong Jeova mo blong mekem olgeta oli kamtru.
24. ?Olsem wanem ol jerubim oli presem Jeova? ?Wanem mining blong singsing ya?
24 !Yu lesin! Ol jerubim oli stap singsing long wan sing we i gud tumas, i save tajem hat blong yumi. Oli presem Jeova olsem: “Hae God ya [Jeova, NW] we i God blong yumi, we i gat olgeta paoa, hem i tabu we tabu we tabu. Hem i stap fastaem, bifo olgeta, hem i stap naoia, mo hem bambae i kam.” Bakegen, oli talemaot tabu fasin blong Jeova tri taem, blong makem poen ya. Ol jerubim ya oli talemaot strong tabu fasin blong Jeova God. Jeova i Stampa blong tabu fasin. Mo i no gat narafala man we i save kasem mak blong tabu fasin blong Jeova. Mo tu, hem i “King blong olwe.” Oltaem hem i “Alfa mo Omega, faswan mo laswan, stat mo en.” (1 Timote 1:17, NW; Revelesen 22:13, NW) Ol jerubim oli no spel nating, oli gohed nomo blong talemaot ol nambawan fasin blong Jeova long olgeta man.
25. ?Olsem wanem ol anamol ya mo ol 24 elda oli joen blong ona long Jeova?
25 !Nao heven we i antap we i antap i fulap long singsing blong presem Jeova! Jon i eksplenem vison blong hem moa, i se: “Nao ol anamol ya oli stap sing blong leftemap nem blong God ya we i laef, mo i no save ded samtaem, we i stap sidaon long bigfala jea blong hem. Mo oli stap ona long hem, oli stap talem tangkyu long hem. Mo evritaem oli mekem olsem, ol twantefo elda ya tu oli foldaon long fes blong hem, oli mekem wosip long hem. Oli tekemaot hat blong olgeta we oli olsem hat blong king, oli sakemdaon long fran blong bigfala jea blong hem. Mo oli talem se ‘ [ Jeova, “NW” ] yu yu Masta blong mifala, yu yu God blong mifala. Yu yu mekem olgeta samting blong wol fastaem, mo from we yu yu wantem olsem, yu holem olgeta samting ya oli stap, mo yu givim laef long olgeta. From samting ya, i stret nomo blong ol man oli leftemap nem blong yu, mo blong oli foldaon, oli ona long yu, mo blong oli stap aninit long paoa blong yu oltaem.’ ” (Revelesen 4:9-11) !I no gat plante haf long Baebol we i givim bigfala ona long God mo Hae Masta blong yumi, Jeova, olsem haf ya i givim!
26. ?From wanem ol 24 elda oli sakemdaon hat blong king blong olgeta long fored blong bigfala jea blong Jeova?
26 Ol 24 elda oli gat sem tingting olsem Jisas. Mo oli tekemaot hat blong olgeta we oli olsem hat blong king, oli sakemdaon long fran blong bigfala jea blong Jeova. Oli no traem leftemap olgeta nating long fored blong God. Oli gat tingting daon, oli luksave se risen from wanem olgeta oli king, i blong ona long Jeova mo leftemap nem blong hem nomo, olsem Jisas i mekem oltaem. (Filipae 2:5, 6, 9-11) Oli gat fasin obei, oli luksave se oli smol nomo. Mo oli talemaot se rul blong olgeta i dipen long hae rul blong Jeova nomo. Long hat blong olgeta, oli glad blong joen wetem ol jerubim mo ol narafala samting we God i wokem, blong presem mo blong leftemap God ya we i wokem olgeta samting.—Ol Sam 150:1-6.
27, 28. (a) ?Ol samting we Jon i eksplenem long vison ya i mas pulum yumi blong mekem wanem? (b) ?Wanem ol kwestin we oli stanap long saed blong nekiswan samting we Jon i luk mo i harem?
27 !Vison ya blong Jon i mas tajem hat blong yumi evriwan! !Hem i nambawan mo i gat bigfala paoa! Be hemia i wan vison nomo. Traem tingbaot olsem wanem ol trufala samting we Jon i luk long vison ya oli mas saengud. Olgeta man we oli gat tangkyu long Jeova, taem oli tingbaot haenem blong hem, oli wantem joen wetem ol fo anamol ya mo ol 24 elda blong presem God. Blong mekem olsem, oli prea, mo oli talemaot nem blong Hem long fes blong olgeta man. Hemia nao God ya we ol Kristin tede oli save wetnes long hem se hem i tru. !Hemia i wan bigfala blesing ya! (Aesea 43:10) Yumi no mas fogetem se vison blong Jon i stret long dei blong Masta, hemia taem blong yumi naoia. “Ol seven speret blong God” oli stap olwe blong lidim mo givim paoa long yumi. (Galesia 5:16-18) Tede yumi gat Tok blong God, Baebol, blong givhan long yumi blong stap tabu long wosip blong tabu God ya. (1 Pita 1:14-16) Tru ya, yumi hapi blong ridim profet tok ya long bigfala voes. (Revelesen 1:3, NW) !Hem i pulum yumi blong stap tru long Jeova, mo blong blokem ol samting blong wol we oli save pulum yumi blong no moa presem hem!—1 Jon 2:15-17.
28 Jon i eksplenem finis wanem we hem i luk taem wan voes i singaot hem blong pastru long doa we i open, blong kam insaed long heven. Bigfala samting we hem i bin tokbaot: Hem i luk Jeova, we i sidaon long bigfala jea blong hem, we haenem mo paoa blong hem oli naes tumas. Raonabaot long hem, i gat wan ogenaesesen we i bigwan moa i bitim ol narafala ogenaesesen. Oli saenaot olsem wan bigfala laet, mo oli obei mo stap tru long God. Kot blong God i rere nao. (Daniel 7:9, 10, 18) Hem i rere blong wan bigfala samting i hapen. ?Wanem ya? ?Olsem wanem samting ya i gat paoa long yumi tede? !Yumi wet long nekiswan samting we Jon i lukluk!