Japta 16

!Fo Man Long Ol Hos Oli Resis i Go!

Revelesen 6:1 kasem 17

Stampa tok: Fo man oli resis long ol hos, ol wetnes we oli kilim olgeta oli ded from Jisas oli stap aninit long olta, mo bigfala dei blong kros blong God

Taem we i kamtru: I stat long 1914 go kasem en blong rabis fasin blong wol ya

1. ?Olsem wanem Jeova i soemaot long Jon ol save we i haed long buk we Jisas i openem?

TAEM blong yumi i trabol tumas. ?Olsem wanem nao? ?Yumi intres long “ol samting we bambae i no longtaem, oli kamtru”? !Yes, ol samting ya bambae oli gat paoa long laef blong yumi! Taswe naoia yumi mas stap wetem Jon, from we Jisas bambae i openem wan buk we plante save i haed insaed long hem. Be Jon i no nidim blong ridim buk ya. ?From wanem? From we bambae hem i luk sam smol store, olsem we oli rili stap hapen long fored blong hem. Ol store ya oli olsem “ol saen” blong soemaot we ol tok blong buk ya oli olsem wanem.—Revelesen 1:1, 10, NW.

2. (a) ?Jon i luk mo i harem wanem? ?From we jerubim i luk olsem wan laeon, samting ya i soemaot wanem long Jon? (b) ?Faswan jerubim i givim oda long hu? ?From wanem yu talem olsem?

² Nao lesin long Jon, taem Jisas i brekemaot faswan lok long buk: “Nao mi luk we Smol Sipsip ya, hem i brekemaot wan long ol seven lok blong buk ya. Nao mi harem wan long ol fo anamol ya i singaot bigfala, we voes blong hem i olsem tanda. Hem i talem se ‘Yu kam.’ ” (Revelesen 6:1) Hemia voes blong faswan jerubim. Hem i luk olsem wan laeon. Samting ya i soemaot long Jon se ogenaesesen blong Jeova i no fraet blong mekem ol stret jajmen blong Jeova i kamtru. ?Oda ya se “Yu kam,” i go long hu? Hem i no go long Jon, from we bifo finis wan voes i singaot Jon blong kam lukluk ol samting ya. (Revelesen 4:1) ‘Voes ya we i olsem tanda’ i stap singaot sam narafala blong oli joen long faswan blong ol fo samting olsem pleplei.

Waet Hos Mo Haeman We i Ron Long Hem

3. (a) ?Jon i talemaot wanem nao? (b) ?Stret long saen we Baebol i yusum, waet hos hem i minim wanem?

³ !Jon i stap luk wan pleplei we i pas kwiktaem long fored blong hem! Mo olgeta tede we oli olsem Jon wetem ol fren blong olgeta, olgeta tu oli stap lukluk pleplei ya. Jon i talem se: “Nao mi luk wan waet hos i kamtru. Man we i stap sidaon long hem i holem bonara blong hem, mo i putum gudfala hat blong flasem hem, olsem hat blong [king, “NW”]. Hem i raed long hos i go, olsem man we i win long faet finis, nao i go blong faet bakegen, blong bambae i win bakegen [i win olgeta, “NW”].” (Revelesen 6:2) Saye, waet hos ya i kamtru. Hem i ansa long voes we i olsem tanda we i talem se “Yu kam.” Long Baebol, plante taem hos i minim faet. (Ol Sam 20:7; Proveb 21:31; Aesea 31:1) Ating hos ya i wan naes man hos. Hem i waetgud we skin blong hem i saen. Samting ya i minim tabu fasin, we i no gat doti long hem. (Skelem wetem Revelesen 1:14; 4:4; 7:9; 20:11.) Mining ya i stret nomo, from we hem i olsem wan saen blong, faet we i klin mo i stret long tabu ae blong Jeova.—Lukluk long Revelesen 19:11, 14.

4. ?Hu ya i ron long waet hos ya? Eksplenem.

⁴ ?Hu ya i ron long hos ya? Hem i holem bonara. Hemia i tul blong faet. Be hem i kasem flas hat blong king tu. Ol stret man we oli putum flas hat blong king long dei blong Masta, hemia Jisas wetem olgeta we oli olsem ol 24 elda nomo. (Daniel 7:13, 14, 27; Luk 1:31-33; Revelesen 4:4, 10; 14:14)a Be man ya we i sidaon long hos i no wan long ol 24 elda ya. From we taem wan long olgeta i kasem flas hat blong king, be i no from ol gudfala samting we hem wan nomo i mekem. Taswe man ya we i ron hem wan long hos, hemia Jisas Kraes nomo. Jon i luk hem olsem we hem i stap long heven finis long 1914. Hemia nao taem ya we Jeova i talem se: “Mi mi putumap king blong mi.” Nao hem i talemaot long Jisas from wanem hem i mekem samting ya, i se: “Ol narafala [nesen] ya, . . . bambae mi givim olgeta long yu, oli blong yu.” (Ol Sam 2:6-8)b Taswe, taem Jisas i brekemaot faswan lok blong buk ya, hem i soemaot olsem wanem hem wan bambae i faetem ol enemi blong hem. Hemia taem hem i jes kam King nomo, long stret taem we God i makemaot.

5. ?Olsem wanem tok blong man we i raetem Ol Sam long saed blong Man we i Ron long hos ya i kolosap sem mak long Revelesen 6:2?

⁵ Pleplei ya we Jon i luk i joengud wetem Ol Sam 45:4-7. Ol tok long ol vas ya oli go stret long King ya we Jeova i putumap hem, i se: “Yu raed long hos blong yu, yu go long paoa blong yu blong yu win. Yu faet from trutok mo stret fasin. !Paoa blong yu bambae i mekem yu yu win we yu win bigwan! Ol ara blong yu oli sap, bambae oli stikim bodi blong ol enemi blong yu, go kasem hat blong olgeta. Ol man blong narafala kantri bambae oli foldaon long leg blong yu blong ona long yu. Paoa we God i givim long yu blong yu yu king, bambae i stap oltaem nomo, i no save finis. Yu yu stap rulum ol man blong yu long stret fasin. Yu yu laekem ol samting we i stret, be yu no laekem ol samting we i nogud, yu agens long olgeta. Nao from samting ya, God, we i God blong yu, hem i jusumaot yu finis, mo i mekem yu yu glad moa, i winim we i mekem long ol narafala king.” Jon i save profet tok ya, mo hem i mas save se tok ya i stret nomo long wok blong Jisas, taem hem i kam King.—Skelem wetem Hibrus 1:1, 2, 8, 9, NW.

Hem i Ron Long Hos i Go Blong Win Long Faet

6. (a) ?From wanem Man we i Ron long hos ya i mas go blong win long faet? (b) ?Wanem ol yia we hem i stap ron i go blong win long faet blong hem?

⁶ ?Be from wanem King ya we i jes tekem rul blong hem i mas ron i go blong faet? From we hem i gat plante enemi. Devel Setan, we hem i nambawan enemi blong Jeova, hem i no wantem se King ya i rul. Mo ol man long wol we oli folem Setan, nating we oli luksave no oli no luksave samting ya, be olgeta tu oli agensem Jisas. Taswe taem Kingdom i stanap, i mas gat wan bigfala faet long heven. Long faet ya, Jisas i tekem nem ya Maekel (we i minim “?Hu Ya i Olsem God?”) Ale Jisas i winim Setan mo ol rabis enjel blong hem, nao hem i sakemaot olgeta oli aot long heven oli kamdaon long wol. (Revelesen 12:7-12) Afta, Jisas i gohed, i stap ron blong win long faet blong hem gogo plante yia blong dei blong Masta i pas. Long semtaem, hem i jajem ol nesen mo ol man long wol, mo ol man we oli olsem sipsip oli hivap long saed blong King ya blong oli kasem laef. Tru, ful wol i stap yet “long paoa blong Setan.” Nating we i olsemia, be Jisas i gohed blong lukaot long ol brata blong hem we tabu speret i makemaot olgeta, wetem ol fren blong olgeta tu, from we hem i laekem olgeta tumas. Hem i givhan long olgeta wanwan blong win long faet ya blong holemtaet bilif blong olgeta.—1 Jon 5:19; Matyu 25:31-33.

7. ?Long ol faswan yia blong dei blong Masta, Jisas i win long wanem faet long wol? ?Mo yumi mas gat strong tingting blong mekem wanem?

⁷ ?Long ol 70 yia we oli pas finis long dei blong Masta, wanem sam narafala faet we Jisas i winim olgeta? Ol man blong Jeova long olgeta ples long wol, oli bin kasem plante traem mo trabol mo hadtaem. Samtaem wanwan Kristin nomo i kasem traem olsem, samtaem ful kongregesen i kasem. Ol traem ya oli kolosap sem mak long ol traem we aposol Pol i kasem, we i pruvum se hem i wan minista. (2 Korin 11:23-28) Ol Wetnes blong Jeova oli nidim ‘paoa ya we i bigfala tumas i blong God, i no blong olgeta,’ blong stanap strong long ol trabol ya. Samting ya i tru moa taem i gat faet mo raf fasin i kamaot. (2 Korin 4:7) Mo long ol bigfala traem, ol Wetnes we oli holemstrong bilif blong olgeta oli save talem olsem Pol, se: “Be Masta blong yumi, hem i stap wetem mi, mo hem i givim paoa long mi blong mi talemaot gud olgeta tok blong hem long fes blong ol hiten man, blong oli harem.” (2 Timote 4:17) Yes, Jisas i win long faet blong hem blong givhan long olgeta Wetnes ya. Mo bambae i gohed blong ron i go blong win bakegen, blong givhan long yumi. Sipos yumi gat strong tingting blong finisim faet blong yumi long saed blong bilif, gogo yumi win olgeta, bambae hem i gohed blong givhan long yumi.—1 Jon 5:4.

8, 9. (a) ?Bigfala kongregesen blong ol Wetnes blong Jeova long wol i joen long wanem faet? (b) ?Wanem ol ples long wol we namba blong ol Wetnes blong Jeova i kam antap moa?

⁸ King ya we hem i ron long hos blong win long faet, hem i stap lidim bigfala kongregesen blong ol Wetnes blong Jeova long olgeta ples long wol. From samting ya oli win wetem hem. Long 1918 hem i protektem ol Baebol Studen, blong oli no lus. Long taem ya, politik ogenaesesen blong Setan i ‘winim’ olgeta blong smoltaem. Be long 1919, King ya i letem olgeta oli gofri, olsem we hem i brekem lok blong doa blong presin blong olgeta. Afta, hem i givim paoa long olgeta blong oli talemaot gud nyus gogo oli “finisim olgeta ples long wol.”—Revelesen 13:7; Ol Wok 1:8.

⁹ Bifo long Namba Tu Bigfala Faet Blong Wol, mo taem faet ya i gohed, sam bigfala paoa blong wol oli traem spolem ol Wetnes blong Jeova long plante kantri. Ol lida blong ol skul oli sapotem ol strong man we oli rul long ol kantri ya. Samting ya i tru moa long ol lida blong Katolik skul. Taem faet ya i stat long 1939, i gat 71,509 Wetnes we oli stap prij. Long en blong faet long 1945, i gat 141,606. Namba ya i kam antap bigwan, nating we 10,000 blong olgeta oli stap plante yia long kalabus mo long ol rabis presin, mo plante taosen moa oli ded. Naoia namba blong ol Wetnes long olgeta ples long wol i kam antap kasem bitim fo milyan. Long ol Katolik kantri mo ol kantri we trabol i bigwan moa, olsem Jemani, Itali, mo Japan, namba i kam antap moa. Naoia, long trifala kantri ya wanwan, oli gat ova long 100,000 man blong prij.—Aesea 54:17; Jeremaea 1:17-19.

10. ?Olsem wanem King ya i givhan long ol man blong hem blong win long faet taem oli mas pas long kot blong ‘blokem ol enemi blong Kraes mo blong wetnes long gud nyus’?

¹⁰ King ya we i ron long hos blong win long faet blong hem, hem i blesem ol man blong hem we oli stap wok strong. Taem oli mas pas long kot no long fored blong ol haeman blong “blokem ol enemi blong Kraes mo . . . wetnes long gud nyus,” hem i lidim olgeta blong oli win plante taem. (Filipae 1:7; Matyu 10:18; 24:9) Samting ya i bin hapen long plante ples long wol—long Ostrelya, Ajentina, Kanada, Gris, India, Swasilan, Swiselan, Teki, mo plante narafala kantri bakegen. Long Saprim Kot blong Amerika, ol Wetnes blong Jeova oli win 23 taem. Wan long olgeta taem ya, Kot i givim raet long ol Wetnes blong talemaot gud nyus “long fes blong ol man, mo long ol haos” wanwan. Mo hem i givim raet long olgeta blong oli no joen long ol seremoni we oli leftemap kantri blong ol. (Ol Wok 5:42; 20:20; 1 Korin 10:14) From we oli win long kot olsem, rod i stap open blong oli save gohed blong wetnes long olgeta ples long wol.

11. (a) ?Olsem wanem Man we i Ron long hos ya bambae “i win olgeta”? (b) ?Samting we Jon i luk taem Jisas i brekemaot namba tu, namba tri, mo namba fo lok long buk ya, i mas gat wanem paoa long yumi?

¹¹ ?Olsem wanem Jisas “bambae i win bakegen [i win olgeta, NW]”?c Fastaem bambae hem i mekem olsem taem hem i spolem ol gyaman skul. Mo biaen, bambae hem i sakem ol narafala haf blong ogenaesesen blong Setan long wol i go long samting olsem wan “lugun blong faea,” blong hem i lus. (Biaen bambae yumi tokbaot ol samting ya moa.) Samting ya bambae i leftemap hae rul blong Jeova. Naoia, yumi stap wet nomo long dei blong Amageden. !Hemia nao lastaem we “King blong ol king” bambae i winim politik ogenaesesen blong Setan we i stap mekem i strong long ol man! (Revelesen 16:16; 17:14; 19:2, 14-21; Esikel 25:17) Go kasem taem ya, Man ya we i Ron long waet hos we i no gat man i save winim hem, i gohed blong ron. Mo Jeova i gohed blong pulum ol man we oli gat gudfala hat oli kam insaed long stret nesen blong Hem long wol. (Aesea 26:2; 60:22) ?Yu yu stap joen wetem grup ya we oli olsem Jon, blong mekem wok blong Kingdom i go moa? Sipos yes, samting we aposol Jon i luk taem hem i brekemaot nekis trifala lok long buk bambae i pulum yu blong joen moa yet long bigfala wok blong Jeova long taem ya.

!Yu Luk, Hos We i Red Olsem Faea!

12. ?Jisas i talem se wanem samting bambae i makem taem we hem i stap rul olsem King, we man i no save luk hem?

¹² Kolosap long en blong minista wok blong Jisas long wol, taem ol disaepol nomo oli stap wetem hem, oli askem long hem se: “Plis yu talemaot long mifala: ?Wetaem bambae ol samting ya oli kamtru? ?Mo wanem saen bambae i soemaot we yu yu stap finis mo we fasin ya blong wol i kasem en blong hem?” Jisas i ansa long olgeta, nao hem i talemaot ol trabol we bambae oli kamaot, hemia “stat blong ol trabol we i blong mekem man i harem nogud.” Jisas i talem se: “Ol nesen bambae oli girap, oli agens long ol narafala nesen, mo ol kingdom bambae oli agens long ol narafala kingdom. Bambae graon i save seksek bigfala. Mo olbaot long wol ol man bambae oli gat hadtaem blong kasem kakae, mo bambae i gat ol strong sik oli spolem olgeta. Mo long skae, bambae i gat ol samting blong mekem man i fraet, mo ol bigbigfala saen.” (Matyu 24:3, 7, 8, NW; Luk 21:10, 11) Taem Jisas i brekemaot ol lok long buk ya, ol samting we Jon i luk oli laenapgud wetem profet tok ya blong Matyu. !Luklukgud nao, from we Jisas we i gat bigfala paoa i rere blong brekemaot seken lok ya!

13. ?Jon bambae i luk wanem kaen paoa we i defren long paoa we i joen wetem stret fasin?

¹³ “Nao Smol Sipsip ya i brekemaot namba tu lok blong buk ya, mo mi harem namba tu anamol i talem se ‘Yu kam.’ ” (Revelesen 6:3) Seken jerubim we i olsem wan buluk, hem nao i talem se “Yu kam.” Buluk i saen blong paoa, be hemia paoa we oli yusum long fasin we i stret. Be defren nao, Jon i luk wan paoa we i mekem i nogud long ol man, i karem ded nomo i kam long olgeta.

14. ?Nao Jon i luk wanem hos mo man we i ron long hem? ?Vison ya i minim wanem?

¹⁴ ?Wanem ansa long voes blong seken jerubim we i singaot se “Yu kam”? Hemia: “Nao wan narafala hos i kamtru we i red olsem faea. Man we i stap sidaon long hem, [hem i kasem paoa, “NW”] blong mekem pis i finis long wol, bambae faet nomo i gohed, we ol man oli stap kilkilim olgeta oli ded. Mo [hem i kasem, “NW”] wan bigfala naef blong faet.” (Revelesen 6:4) !Tru ya, vison ya i no karem gud nyus! !Mo i klia se hos ya i minim faet! Hem i no minim stret faet we King blong Jeova bambae i win long hem. No gat. Be hem i minim ol rabis faet we man i mekem long olgeta ples long wol, we oli mekem fulap blad i ron mo oli mekem plante man oli harem i soa. !Taswe i stret nomo we man ya i ron long hos we i red olsem faea!

15. ?From wanem yumi no mas wantem joen nating wetem man we i ron long seken hos?

¹⁵ Jon i no wantem joen nating wetem hos ya mo man we i ron long hem, from we profet tok i talem finis long saed blong ol man blong God, se: “Bambae oli no moa lanem fasin blong faet.” (Aesea 2:4) Nating we oli ‘stap long wol ya,’ be Jon mo olgeta we oli olsem Jon tede wetem bigfala kampani, oli “no man blong wol.” Ol man blong wol oli mekem blad blong fulap man i ron. Be yumi faet long saed blong speret nomo. Yumi stap yusum ol tul “blong faet blong God” blong talemaot trutok. Yumi no faet olsem ol man blong wol.—Jon 17:11, 14; 2 Korin 10:3, 4.

16. ?Wetaem mo olsem wanem man we i ron long red hos i kasem “wan bigfala naef blong faet”?

¹⁶ Bifo long 1914, taem Man we i Ron long waet hos i no kasem hat blong king yet, i gat plante faet i kamaot finis. Be nao man we i ron long red hos i kasem “wan bigfala naef blong faet.” ?Hemia i minim wanem? Long Faswan Bigfala Faet Blong Wol, ol man oli faet long fasin we i moa nogud, oli kilim moa man, mo spolem plante moa samting, bitim bifo. Taem oli faet long 1914 kasem 1918, oli yusum ol posen gas, ol plen, ol sip we oli save haed aninit long solwora, ol tank, mo ol bigfala masket we man i sut wetem (cannon), mo ol otomatik masket. Hemia fastaem we oli bin yusum ol tul olsem, mo fastaem we oli mekem wan bigfala faet olsem. Twante eit nesen oli joen long faet ya. Be i no ol soldia nomo we oli faet, oli pulum ol man olbaot tu blong joen long faet ya. Namba blong ol man we oli ded mo oli kasem kil i bitim mak. Moa long naen milyan soldia oli ded. Mo fulap long ol narafala man tu oli ded mo oli kasem kil. Taem faet ya i finis, pis i no moa stap long wol. Bitim 50 yia biaen long faet ya, wan haeman blong gavman blong Jemani, (Konrad Adenauer) i talem se: “I stat long 1914, seftaem mo kwaet taem i lus long laef blong ol man.” !Tru ya, man we i ron long hos we i red olsem faea i kasem paoa blong tekemaot pis long wol ya!

17. ?Afta Faswan Bigfala Faet Blong Wol, olsem wanem “bigfala naef blong faet” i tekem laef blong plante moa man?

¹⁷ Nao i olsem we man we i ron long red hos i wantem mekem plante moa blad i ron. Taswe hem i resis i go long Namba Tu Bigfala Faet Blong Wol. Long faet ya, oli yusum ol tul blong faet we oli moa nogud bakegen. Namba blong ol man we oli ded mo oli kasem kil long faet ya i fo taem antap long namba blong Faswan Bigfala Faet Blong Wol. Long 1945, i gat tu nyuklia bom i bosta long Japan. Wantaem nomo, oli spolem laef blong plante taosen man. Long Namba Tu Bigfala Faet Blong Wol, man we i ron long red hos i spolem laef blong 55 milyan man. Be long tingting blong hem i no naf yet. Ol tru ripot oli talem se i gat bitim 19 milyan man we “bigfala naef blong faet” i kilim olgeta, i stat long Namba Tu Bigfala Faet Blong Wol, i kam kasem naoia.

18, 19. (a) Ol man we oli ded long ol faet biaen long Namba Tu Bigfala Faet Blong Wol oli no pruvum se teknik blong ol ami i gud. ?Be oli pruvum wanem? (b) ?Wanem denja i stap fored long ol man tede? ?Man we i Ron long waet hos bambae i mekem wanem blong blokem?

¹⁸ ?Yumi save talem se ol faet ya oli pruvum bigfala waes blong teknik blong ol ami? No gat. Oli pruvum nomo se red hos ya we i no gat sore nating, hem i stap resis. ?Mo hem i stap resis i go wea? Sam man blong save oli talem se i mas gat wan mastik samtaem long ol 25 yia we oli kam, nao bambae wan nyuklia faet i kamaot from. Antap long samting ya, ol man oli naf blong mekem plan blong statem wan nyuklia faet tu. Yumi glad we Man we i Ron long waet hos, blong win long faet, hem i gat narakaen tingting.

¹⁹ Stampa blong ol faet ya, se ol man oli tinghae tumas long kantri blong olgeta mo oli no laekem nating ol man blong narafala kantri. From samting ya, i olsem we olgeta man long wol oli sidaon long wan nyuklia bom, we i rere blong faerap. Sipos ol nesen oli finis blong wokem ol nyuklia bom, be hemia i no naf, from we oli save yet olsem wanem blong wokem. Oli save wokem bakegen ol rabis nyuklia bom blong kilim ol man oli ded. Sipos oli mekem wan faet wetem ol narafala tul blong faet, kwiktaem nomo i save kam wan nyuklia faet. Fasin flas mo fasin blong no laekem nating ol man blong narafala kantri i fulap long ol nesen tede. Samting ya i save pulum olgeta blong spolem olgeta laef long wol. Man we i Ron long waet hos, hem nomo i naf blong blokem red hos we i resis i go. Yumi save bilif se Kraes we hem i King, bambae hem i ron long hos blong mekem tu samting: blong winim wol ya we i stap aninit long paoa blong Setan, mo blong stanemap wan nyufala fasin blong laef long wol, we i stanap long lav nomo. Stampa fasin blong nyufala wol ya, se lav blong God mo lav blong ol man raonabaot long yumi. Samting ya nao i save mekem pis i kam long wol. Be ol nesen oli no mekem olsem. Oli wokem plante nyuklia bom blong bambae narafala nesen i fraet long olgeta, i no kam mekem faet long olgeta. Fasin olsem long krangke taem blong yumi i no save putum pis nating.—Ol Sam 37:9-11; Mak 12:29-31; Revelesen 21:1-5.

Blak Hos i Kamtru

20. ?Olsem wanem yumi save se Man we i Ron long waet hos hem i naf blong winim enikaen trabol?

²⁰ !Nao Jisas i brekemaot namba tri lok! ?Jon, yu yu luk wanem? Jon i se: “Nao Smol Sipsip ya i brekemaot namba tri lok blong buk ya, mo mi harem namba tri anamol i talem se ‘Yu kam.’ ” (Revelesen 6:5a) Yumi glad we fes blong namba tri jerubim “i olsem fes blong man.” Hemia i saen blong fasin lav. Bambae nyufala wol blong God i fulap long lav we i stanap long ol stret rul blong hem. Fasin ya i fulap long ogenaesesen blong Jeova tede tu. (Revelesen 4:7; 1 Jon 4:16) Man we i Ron long waet hos “i mas stap king fastaem, gogo God i winim olgeta enemi blong Kraes, i putum olgeta oli stap daon, aninit long leg blong Kraes.” Yumi save se Kraes ya we i gat bigfala lav, bambae i finisim ol trabol long wol. Mo nekiswan trabol we Jon i luk tu, bambae Jisas i finisim.—1 Korin 15:25.

21. (a) ?Blak hos mo man we i ron long hem oli pija blong wanem? (b) ?Wanem i soemaot se blak hos ya i stap resis i go yet?

²¹ ?Jon i luk wanem nao, we i olsem ansa long namba tri voes we i singaot se ‘Yu kam’? “Nao mi luk wan blak hos i kamtru, mo man we i stap sidaon long hem, hem i holem wan skel long han blong hem.” (Revelesen 6:5b) !Bigfala hanggri! Hemia nao mining blong profet tok ya. Hem i tokbaot samting we i kamaot long stat blong dei blong Masta. Long taem ya kakae i sot, mo oli skelem kakae blong ol man wanwan. I stat long 1914, hanggri i wan bigfala trabol long plante ples long wol. Ol faet oli mekem hanggri i kamaot. Long taem blong faet, oli no moa yusum mane blong pem kakae blong ol man, oli yusum nomo blong pem ol tul blong faet. Ol man oli no moa save wokem garen, from we oli fosem olgeta blong joen long ami. Mo tu ol faet oli spolem graon, nao kakae i no save gru gud. Mo tu samtaem olgeta nomo oli spolem plante kakae blong olgeta, blong ol enemi oli no save tekem. !Samting ya i tru long Faswan Bigfala Faet Blong Wol! !Long taem ya, plante milyan man oli ded from hanggri! Mo tu, taem faet ya i finis, man we i ron long blak hos i no stop. Hanggri i gohed nomo. Long ol yia biaen long 1930, kakae i sot long kantri ya Yukren. Faef milyan man i ded from. Namba Tu Bigfala Faet Blong Wol i mekem se kakae i sot moa. Blak hos ya i stap resis i go yet. Kampani we i lukaot long ol kakae long wol hem i talem se long 1987, 512 milyan man oli hanggri. Mo evri dei, i gat 40,000 pikinini oli ded from ol sik we oli kamaot from hanggri.

22. (a) ?Jon i harem wan voes we i talem wanem? ?Tok ya i minim se ol man oli mas lukaot long wanem? (b) ?Praes blong wan lita wit mo tri lita bale i minim wanem?

²² Jon i go moa i se: “Nao mi harem olsem wan voes long medel blong ol fo anamol i tok, i talem se ‘Wan lita wit, praes blong hem wan denarias. Tri lita bale, praes blong hem wan denarias. Be yu no mas spolem oel blong frut blong oliftri mo waen.’ ” (Revelesen 6:6, “NW”) Ol fo jerubim oli joen long wan voes blong talemaot se ol man oli mas lukaotgud long ol kakae. I sem mak long taem bifo we ol ami oli spolem Jerusalem long 607 B.K.T. Ol man long taem ya “oli mas skelem fastaem hamas bred oli gat raet blong kakae, mo oli wari tumas.” (Esikel 4:16) Long taem blong Jon, oli makemaot wan lita wit olsem kakae blong wan soldia blong wan dei. ?Wanem praes blong kakae ya? Wan denarias. !Hemia i olsem pei blong wan man blong wan dei! (Matyu 20:2)d ?Olsem wanem sipos man ya i gat pikinini? Hem i save pem tri lita bale we oli no klinimgud. Be hemia i naf long wan smol famle nomo. Mo tu, bale i no wan gudfala kakae olsem wit.

23. ?Tok ya “Yu no mas spolem oel blong frut blong oliftri mo waen” i minim wanem?

²³ ?Wanem mining blong tok ya “Yu no mas spolem oel blong frut blong oliftri mo waen”? Samfala oli ting se mining blong tok ya i olsem: Nating se kakae i sot mo plante man oli hanggri, be ol gudfala kakae blong ol rijman bambae i stap olsem nomo. Be long Medel Is, oel mo waen tufala i no rili gudfala kakae blong rijman. Taem oli raetem Baebol, bred, oel, mo waen oli kakae blong olgeta man. (Skelem wetem Jenesis 14:18; Ol Sam 104:14, 15.) Long plante ples, wora i nogud, taswe oli dring waen. Mo samtaem oli yusum waen olsem wan kaen meresin. (1 Timote 5:23) Long saed blong oel, yumi save tingbaot wido blong Sarefat long taem blong Elaeja. Nating we hem i pua, be hem i gat sam oel i stap, we hem i yusum blong kukum laswan flaoa blong hem. (1 King 17:12) Taswe i luk olsem we oda ya blong “no spolem oel blong frut blong oliftri mo waen,” i olsem advaes blong yusumgud ol kakae blong olgeta, oli no mas westem. Sipos no, bambae oli ‘spolem’ kakae ya, hemia i min se bambae oli sot long kakae bifo we hadtaem ya i finis.

24. ?From wanem yumi save se i no longtaem, blak hos ya bambae i no moa resis i go?

²⁴ !Yumi glad we i no longtaem Man we i Ron long waet hos bambae i blokem blak hos ya we i stap resis i go! Baebol i talem se from lav blong Hem, long nyufala wol bambae i mekem olsem: “Long ol dei blong hem, ol stret man bambae oli gru oli kam plante, mo bambae i gat plante pis gogo mun i no moa stap. . . . Bambae i gat fulap kakae olsem wit long wol. Antap long ol hil bambae i gat fulap tumas, gogo i ova.”—Ol Sam 72:7, 16, NW; mo lukluk Aesea 25:6-8.

Hos We i Lusum Prapa Kala Blong Hem Mo Man We i Ron Long Hem

25. ?Taem Jisas i brekemaot namba fo lok, Jon i harem voes blong hu? ?Samting ya i soemaot wanem?

²⁵ Store ya i no finis yet. !Jisas i brekemaot namba fo lok, nao Jon i talem wanem i hapen! “Nao Smol Sipsip ya i brekemaot namba fo lok blong buk ya, mo mi harem namba fo anamol i talem se ‘Yu kam.’ ” (Revelesen 6:7) Hemia voes blong namba fo jerubim, we i olsem wan igel we i stap flae. Hemia i minim fasin waes we i lukluk i go longwe long fyuja. Tru ya, taem yumi tingbaot mining blong samting ya, Jon, mo grup ya we i olsem Jon wetem ol narafala man blong God tede long wol, oli nidim waes wetem fasin luksave. Olsem nao, yumi save blokem plante trabol mo sik we oli kasem ol flas man tede we oli waes long ol tingting blong wol nomo, mo oli mekem ol rabis fasin.—1 Korin 1:20, 21.

26. (a) ?Hu ya man we i ron long namba fo hos? ?From wanem kala blong hos ya i stret nomo? (b) ?Hu i biaen long man ya we i ron long namba fo hos? ?Ol man we namba fo hos i kasem olgeta, oli go wea?

²⁶ ?Wanem ol rabis samting we oli kamaot long wol, taem namba fo man we i ron long hos i kamtru? Jon i talem se: “Nao mi luk wan narafala hos i kamtru, we i lusum prapa kala blong hem, olsem we i ded finis. Man we i stap sidaon long hem, nem blong hem, Ded, mo i gat wan narafala man we i biaen long hem, we nem blong hem, Ples blong ol Dedman [Hades, “NW”].” (Revelesen 6:8a) Nem blong man we i ron long laswan hos ya: Ded. Long ol fo man we oli ron long ol hos long Apokalips, hem nomo oli talemaot klia wanem nem blong hem. I stret nomo we Ded i ron long wan hos we i lusum prapa kala blong hem, from we tok ya long olfala lanwis Grik (khlo·rosʹ ) oli yusum blong tokbaot fes blong man we i lusum kala, olsem we hem i sik. Mo tu, profet tok i no talem olsem wanem Hades (gref) i stap folem Ded, be i talem nomo se Hades i biaen long Ded. I stret nomo we i olsem, from we bighaf blong olgeta we namba fo man long hos i kilim olgeta, oli go long Hades. Yumi glad we olgeta ya bambae oli laef bakegen long ded, taem “ded wetem Hades tufala i givimbak ol dedman we oli stap long tufala.” (Revelesen 20:13, NW) ?Be olsem wanem Ded i kasem ol man ya?

27. (a) ?Olsem wanem man we i ron long hos ya, nem blong hem Ded, i kasem plante man? (b) ?Profet tok i minim wanem taem hem i talem se Ded bambae i gat paoa long ‘wan long evri fo man long wol’?

²⁷ Vison ya i gohed blong talemaot olsem wanem Ded i kasem sam man, i se: “[Tufala i kasem paoa, “NW”] blong tufala i kilim smol haf blong ol man long wol oli ded. Taem tufala i kaontem fo man, tufala i mas kilim wan i ded, tri nomo i stap laef, gogo tufala i pasraon long olgeta man long wol. Tufala i save kilim olgeta oli ded [wetem longfala naef blong faet, “NW”] mo long hadtaem we i no gat kakae, mo long sik, mo long ol wael anamol blong wol.” (Revelesen 6:8b) Ating profet tok ya i no minim se long evri fo man long wol wan bambae i ded gogo i finisim olgeta man long wol. Be hem i minim se man we i ron long namba fo hos i gat paoa long bighaf blong wol, long ol ples we fulap man oli stap mo long ol ples we smol man nomo i stap. Man ya we i ron long hos ya i kasem ol man we man long seken hos i kilim olgeta oli ded wetem bigfala naef blong faet. Mo hem i kasem ol man we man long namba tri hos i kilim i ded wetem hanggri. Mo hem i kasem ol man we hem wan i kilim i ded long sik, mo ol man we oli ded taem graon i seksek bigwan, olsem Luk 21:10, 11 i talem.

28. (a) ?Olsem wanem profet tok long saed blong ol “sik” i kamtru? (b) ?Wanem samting i blokem ol man blong Jeova tede blong oli no kasem samfala sik?

²⁸ Wan bigfala samting we i kamaot long taem blong yumi, se “sik.” Biaen long Faswan Bigfala Faet Blong Wol, sik ya ‘Spanis flu’ i kilim 20 milyan man i ded long sam manis nomo long 1918 kasem 1919. I gat wan ples nomo long wol we sik ya i no kasem, hemia wan smol aelan, nem blong hem Sent Helena. Long plante ples we kolosap olgeta man oli ded, oli hivimap ol dedbodi, mo oli bonem olgeta. Mo tede sik blong hat mo kansa i go antap tumas. Tufala sik ya i kasem plante man from we oli smok sigaret. Samfala oli kolem ol yia we i stat long 1980 go kasem 1990 se “ten yia we i nogud tumas.” Long ol yia ya, fasin blong laef blong ol man i soemaot se oli no wantem obei long ol loa blong Baebol. Taswe naoia bigfala sik ya AIDS i joen long ol narafala “sik.” Taem we mifala i raetem buk ya, oli no faenem meresin blong winim sik ya. Oli talem se long Not Amerika nomo long 1990 samwe long wan milyan man oli kasem sik ya AIDS. Long Afrika i luk olsem we plante milyan man bambae oli kasem. Ol man blong Jeova oli talem tangkyu tumas long hem from we waes advaes long Tok blong hem i blokem olgeta oli no mekem rabis fasin long saed blong seks mo oli no tekem blad. Tufala rod ya nao i mekem plante sik i kasem fulap man tede.—Ol Wok 15:28, 29; skelem wetem 1 Korin 6:9-11.

29, 30. (a) ?Wanem mining tede blong ‘fo samting blong spolem man’ we Esikel 14:21 i tokbaot? (b) ?Wanem ol “wael anamol” blong Revelesen 6:8? (c) ?I luk olsem we profet tok ya i gat wanem bigfala mining?

²⁹ Vison blong Jon i talem se namba fo risen from wanem plante man oli ded, hemia ol wael anamol blong wol. Taem Jisas i brekemaot namba fo lok long buk ya, i gat fo samting i kamaot: faet, kakae i sot, sik, mo ol wael anamol we oli kilim plante man i ded. Long taem bifo, ol fo samting ya oli bigfala risen from wanem ol man oli ded. Taswe oli pija blong ol samting we oli kilim ol man oli ded tede. I sem mak long woning we Jeova i givim long ol man Isrel, i se: “Bambae i olsem taem mi jajem ol man, bambae mi yusum fo samting blong spolem olgeta: naef blong faet, hanggri, ol wael anamol, mo sik. Bambae mi sanem fofala samting ya oli kam long Jerusalem blong kilim i ded ol man blong graon mo ol anamol blong olgeta.”—Esikel 14:21.

³⁰ Long taem blong yumi, ol wael anamol oli no kilim plante man i ded. Samtaem nomo long ol hot kantri wael anamol i kilim wanwan man. Long fyuja, maet oli kilim moa man sipos faet i spolem graon long plante ples, i kam olsem drae ples nomo. No sipos plante man oli bunbun tumas from hanggri, ating oli no moa gat paoa blong blokem ol hanggri anamol. Mo tu, i gat plante man tede, we oli gat fasin olsem wael anamol nomo. Oli no tingtinggud, oli soemaot ol wael fasin we oli narakaen long ol fasin long Aesea 11:6-9. Ol man ya oli stampa blong ol fasin blong brekem loa we oli go antap tumas long wol ya. Olgeta oli fosem woman, kilim man i ded, oli raf tumas, mo oli sakem bom. (Skelem wetem Esikel 21:31; Rom 1:28-31; 2 Pita 2:12.) Man we i ron long namba fo hos i kasem ol man we oli ded from ol samting ya tu. Yes, i luk olsem we bigfala poen blong profet tok ya, se man we i raed long hos we i lusum prapa kala blong hem, i yusum plante rod blong kilim ol man oli ded taem oli no olfala tumas.

31. ?Nating we ol man we oli ron long red mo blak hos mo hos we i lusum prapa kala blong hem oli stap mekem plante trabol long wol, be from wanem tingting blong yumi i save stap strong?

³¹ Save we i kamaot taem Jisas i brekemaot ol faswan fo lok long buk ya i mekem tingting blong yumi i strong. ?Olsem wanem? Hem i tijim yumi se yumi no mas letem tingting blong yumi i kam hevi from ol samting we oli kamaot tede blong kilim man i ded, olsem faet, hanggri, mo sik. Mo yumi no mas letem tingting blong yumi i kam slak from we ol lida blong wol oli no save faenem rod blong winim ol trabol ya. Ol samting we oli stap kamaot long wol oli soemaot klia se ol man we oli ron long red mo blak hos, mo hos we i lusum prapa kala blong hem, oli stap resis i go. Be yumi no mas fogetem se Man we i Ron long waet hos i resis fastaem long olgeta. Jisas i kam King finis. Mo hem i win finis long wan faet: hem i sakemaot Setan long heven. Hem i gohed blong win from we hem i hivimap ol laswan blong ol pikinini blong Isrel long saed blong speret mo wan bigfala kampani we oli kamaot long ol nesen, we namba blong olgeta i kasem plante milyan, blong oli laef tru long taem blong bigfala trabol long wol. (Revelesen 7:4, 9, 14) Hem i mas gohed long resis blong hem gogo hem i win olgeta.

32. ?Taem Jisas i brekemaot ol faswan fo lok long buk ya, wanem i kamaot biaen?

³² Evri taem Jisas i brekemaot wan long ol lok ya, wan voes i singaot se: “Yu kam.” Mo evri taem, wan hos mo wan man we i ron long hem i kamtru. Taem hem i brekemaot namba faef lok long buk ya, yumi no moa harem voes ya we i singaot se “Yu kam.” Be ol man oli ron yet long ol hos ya, mo oli mas gohed blong resis gogo olfala fasin blong wol ya i finis. (Skelem wetem Matyu 28:20.) ?Taem Jisas i brekemaot ol las tri long ol lok long buk ya, wanem sam moa bigfala samting we oli kamaot? Sam samting we oli hapen, ol man oli no save luk. Sam narafala samting, ol man oli save luk, be long fyuja nomo. Nating se i olsem wanem, be olgeta profet tok ya bambae i kamtru. Yumi luk nao long mining blong olgeta.

[Ol Futnot]

[Bokis blong pija long pej 92]

King Ya i Resis Long Hos Blong Win Long Faet

Long ol yia biaen long 1930 mo 1940, ol enemi blong ol Wetnes blong Jeova oli traehad blong pulum ol man blong oli bilif se ol Wetnes oli no gat raet blong mekem minista wok blong ol, oli agensem loa blong kantri mo oli traem sakemaot gavman. (Ol Sam 94:20) Long yia 1936 nomo, polis long Amerika oli holem 1,149 Wetnes. Plante taem ol Wetnes oli pas long kot blong Amerika gogo oli kasem Saprim Kot. Mo plante taem oli win long kot ya. Hemia sam eksampel:

Long Mei 3, 1943, Murdock i agensem Pensylvanya long Saprim Kot. Kot i tekem disisen se ol Wetnes oli no nidim laesens blong kasem smol vatu from ol buk mo magasin we oli stap seremaot. Long sem dei, Martin i agensem Taon blong Strates long kot. Kot ya i talem se ol Wetnes oli no brekem loa taem oli visitim evri haos wanwan blong givimaot ol traket mo ol narafala pepa blong olgeta.

Long Jun 14, 1943, Taylor i agensem Misisipi long Saprim Kot. Kot i talem disisen ya se ol Wetnes oli no stap pulum ol man blong agensem gavman taem oli prij. Long sem dei, Wes Vijinia Ministri blong Edukesen i agensem Barnette. Kot i talem se skul i no gat raet blong sakemaot ol pikinini blong ol Wetnes blong Jeova we oli no salut long flag. Long nekis dei nomo, ful Hae Kot blong Ostrelya i tekemaot wan loa we i blokem wok blong ol Wetnes blong Jeova. Oli talem se loa ya i “stanap long tingting blong sam man nomo, i olbaot, mo i hevi tumas.”

[Bokis blong pija long pej 94]

Hem i Kasem Paoa Blong Mekem Pis i Finis Long Wol’

?Ol waes mo teknik blong man oli pulum hem long wanem rod? Wan nyuspepa long Toronto, Kanada (The Globe and Mail) Janewari 22, 1987, i talemaot toktok blong presiden blong International Development Research Centre, nem blong hem Ivan L. Head. Hem i se:

“Long evri fo sayentis mo man we i waes long ol nyufala teknik, we oli stadi dip blong traem faenem rod blong mekem wol i kam moa gud, wan i stap wok long ol tul blong faet. . . . Long 1986, oli spenem bitim 1.5 milyan dola evri menet long ol tul blong faet. . . . ?From ol save mo teknik we oli faenemaot, ol man oli moa sef? Ol nyuklia bom we ol bigfala nesen blong wol oli holem oli gat moa paoa i bitim olgeta tul blong faet blong Namba Tu Bigfala Faet Blong Wol evriwan, mo 6,000 taem moa antap bakegen. Hemia i min se i olsem we oli save mekem 6,000 faet bakegen olsem Namba Tu Bigfala Faet Blong Wol. Long ol yia we oli pas i stat long 1945, i gat seven wik nomo, no ating i no kasem seven wik, we wol i gat pis long evri ples. Long ol yia ya i gat 150 faet we plante nesen mo man oli joen long olgeta, nating we Yunaeted Nesen i stanap. Samwe long 19.3 milyan man oli ded long ol faet ya. Bighaf blong olgeta oli ded from we ol nyufala teknik mo save oli wokem ol tul blong faet we oli strong moa blong kilim plante man i ded.”

[Bokis blong pija long pej 98, 99]

Plan Blong Buk Blong Revelesen

From ol save long Revelesen we yumi storebaot finis, yumi stat blong luk klia plan blong buk ya. Fastok blong hem i wekemap tingting blong yumi (Revelesen 1:1-9), nao biaen i olsem we hem i seraot long 16 vison olsem:

VISON 1 (1:10 kasem 3:22): Paoa blong God i holem Jon, nao hem i luk Jisas long heven wetem olgeta paoa blong hem. Jisas i sanem mesej long ol seven kongregesen blong givim advaes mo leftemap tingting blong olgeta.

VISON 2 (4:1 kasem 5:14): Vison ya blong jea we Jeova God i stap sidaon long hem long heven i naes tumas. Hem i givim wan buk long Smol Sipsip ya.

VISON 3 (6:1-17): Smol Sipsip ya i brekemaot sikis lok blong buk ya. Sloslou hem i soemaot sam samting we oli mas kamaot long dei blong Masta. Ol fo man blong Apokalips we oli ron long ol hos oli kamtru. Ol slef blong God we oli kilim olgeta oli ded oli kasem waet klos. Mo hem i storeyan long bigfala dei blong kros blong God.

VISON 4 (7:1-17): Ol enjel oli blokem ol win we oli save spolem wol gogo mak blong God i stap long ol 144,000 man Isrel long saed blong speret. Bigfala kampani i kamaot long olgeta nesen, mo i presem God mo Kraes from we tufala i sevem olgeta. Oli hivap long bigfala kampani ya blong pastru long taem blong bigfala trabol blong wol.

VISON 5 (8:1 kasem 9:21): Smol Sipsip i brekemaot namba seven lok, nao seven pupu oli krae. Faswan go kasem namba sikis i stap insaed long namba faef vison. Krae blong sikis pupu ya i minim ol mesej blong Jeova blong jajem ol man. Taem namba faef mo sikis pupu oli krae, fas mo seken bigfala trabol i stat.

VISON 6 (10:1 kasem 11:19): Enjel we i gat paoa i givim wan smol buk long Jon. Jon i makemaot haos blong God wetem wan longfala futrul. Mo yumi harem store blong tu wetnes. Namba sikis vison ya i kasem bigfala mak blong hem taem namba seven pupu i krae. Nao namba tri bigfala trabol i kam long ol enemi blong God, hemia Kingdom blong Jeova mo Kraes blong hem we i stap stanap.

VISON 7 (12:1-17): Kingdom i stanap, mo from samting ya Maekel i sakemaot Snek blong bifo, Setan, i kamdaon long wol.

VISON 8 (13:1-18): Wael anamol we i gat bigfala paoa i kamaot long solwora. Wael anamol we i gat tu hon blong hem olsem hon blong smol sipsip i traem fosem ol man blong wosip long faswan wael anamol.

VISON 9 (14:1-20): Nambawan vison blong 144,000 we oli stap antap long Bigfala Hil ya Saeon. Ol enjel oli talemaot ol mesej long olgeta man long wol. Enjel i katemaot ol man we oli olsem frut ya we oli wokem waen long hem, long wol. Mo oli purumbut long olgeta, long ples we kros blong God i kasem man.

VISON 10 (15:1 kasem 16:21): Kwiktaem nomo yumi lukluk insaed long heven bakegen. Ol seven besin we oli fulap long kros blong Jeova, ol enjel oli kafsaedem olgeta oli go long wol. Las haf blong vison ya, hem i wan profet tok long saed blong en blong rabis wol blong Setan.

VISON 11 (17:1-18): Woman blong rod ya, Bigfala Babilon, i stap sidaon long wan wael anamol we i red we i red. Blong smoltaem anamol ya i go long bigfala hol we i godaon we i godaon. Biaen, hem i kamaot long hol ya, nao hem i spolem woman ya.

VISON 12 (18:1 kasem 19:10): Enjel i talemaot se Bigfala Babilon i foldaon mo i lus. Taem hem i lus, samfala oli krae, samfala oli presem Jeova. Nao enjel i talemaot mared blong Smol Sipsip ya.

VISON 13 (19:11-21): Jisas i lidim ol ami blong heven blong mekem ol jajmen blong God oli kamtru long wol blong Setan, mo long ol ami blong hem, mo long ol man we oli sapotem hem. Ol pijin oli kakae dedbodi blong olgeta.

VISON 14 (20:1-10): Oli sakem Devel Setan i go long bigfala hol. Kraes wetem ol narafala we oli kam king oli rul blong Wan Taosen Yia. Laswan traem blong ol man long wol, nao Setan wetem ol rabis enjel blong hem oli lus blong olwe.

VISON 15 (20:11 kasem 21:8): Fulap man oli laef bakegen, mo bigfala Jajmen Dei. Nyufala heven mo nyufala wol i kamtru, mo i givim blesing blong olwe long ol stret man long wol.

VISON 16 (21:9 kasem 22:5): Long en blong Revelesen i gat wan gudfala vison blong Nyu Jerusalem, we i waef blong Smol Sipsip. Taon ya i stampa blong ol samting we God i mekem blong givim laef long ol man mo mekem bodi blong olgeta i gud bakegen.

Long lastok blong Revelesen, Jeova, Jisas, enjel ya, mo Jon hem wan oli toktokgud, oli talem halo mo oli givim sam advaes. Voes i singaot long olgeta man evriwan se “Yu kam.”—Revelesen 22:6-21.