Japta 38

!Presem Ja From Ol Jajmen Blong Hem!

1. ?Jon i harem wanem toktok “we i olsem we plante man tumas oli stap long heven, oli stap singaot bigfala”?

!BIGFALA Babilon i no moa stap! Hemia i rili gudfala nyus. !Yumi no sapraes we Jon i harem ol hapi voes oli singaot blong presem God long heven! “Biaen long samting ya, mi harem wan noes we i olsem we plante man tumas oli stap long heven, oli stap singaot bigfala, oli talem se ‘[!Haleluia!]a God blong yumi, hem i sevem yumi finis, nem blong hem i hae we i hae, mo olgeta paoa i blong hem nomo. Fasin blong hem blong jajem man i tru, mo i stret olgeta. Woman ya blong rod we i nogud we i nogud, we i stap mekem wol i kam nogud long ol rabis fasin blong hem, God i jajem hem finis, i givim panis long hem finis. God i givimbak long hem finis, from ol man blong hem, from we woman ya i kilim olgeta oli ded.’ Nao olgeta oli singaot bakegen, oli talem se ‘[!Haleluia!]* smok blong faea ya we i stap bonem bigfala taon ya, hem i stap go antap oltaem, we bambae i no save finis samtaem.’ ”—Revelesen 19:1-3.

2. (a) ?Wod ya “Haleluia” i minim wanem? ?From we Jon i harem tok ya tu taem long ples ya long Revelesen, hemia i soemaot wanem? (b) ?Bambae yumi presem hu from we hem i spolem Bigfala Babilon? Eksplenem.

² !Yes, Haleluia! Wod ya i minim “Yufala i presem Ja” (NW). Nem blong God, Jeova, oli sotem hem i kam “Ja.” Samting ya i pulum yumi blong tingbaot tok blong man we i raetem Ol Sam, i se: “Olgeta samting we i gat laef—oli mas presem Ja. !Yufala i presem Ja!” (Ol Sam 150:6, NW) Long ples ya long Revelesen, Jon i harem ol hapi voes long heven oli singaot “Haleluia” tu taem. Samting ya i soemaot se God i stap gohed blong givim mining blong ol trutok blong hem long ol man blong hem. God ya i God blong Grik haf blong Baebol, mo hem i God blong Hibru haf blong Baebol tu. Jeova, hem i nem blong God ya. God ya we i mekem Babilon blong bifo i foldaon, naoia hem i jajem mo i spolem Bigfala Babilon tu. !Yumi mas presem hem fulwan from samting ya! Paoa we i mekem Bigfala Babilon i foldaon i blong Jeova nomo, i no blong ol nesen we Jeova i yusum olgeta olsem ol tul nomo blong spolem Babilon. Taswe yumi mas presem Jeova from hem nomo i sevem yumi.—Aesea 12:2; Revelesen 4:11; 7:10, 12.

3. ?From wanem i stret we rabis woman blong rod ya i kasem jajmen olsem?

³ ?From wanem i stret nomo we rabis woman blong rod ya i kasem jajmen olsem? Loa we Jeova i givim long Noa, mo Noa i givim long ol man, hem i talem se sipos wan man i kilim narafala man i ded, man ya tu i mas ded. God i talem loa ya bakegen long ol man Isrel. (Jenesis 9:6; Namba 35:20, 21) Mo tu, Loa blong Moses i talem se sipos man i mekem rabis fasin long saed blong seks no long saed blong speret, hem tu i mas ded. (Levitikas 20:10; Dutronome 13:1-5) Long plante taosen yia we oli pas finis, Bigfala Babilon i stap kilim fulap man i ded, mo hem i stap mekem rabis fasin tu olsem woman blong rod. Eksampel, wan rul blong Katolik Jyos i blokem ol pris se oli no save mared. Samting ya i pulum fulap pris blong mekem rabis fasin long saed blong seks, mo naoia plante oli gat sik ya AIDS. (1 Korin 6:9, 10; 1 Timote 4:1-3) Ol bigfala sin blong hem we oli “stap hivap i go kasem heven,” hemia ol rabis fasin blong hem long saed blong speret. Hem i mekem ol rabis fasin ya taem hem i stap tijim ol gyaman tijing mo i stap joen wetem ol rabis fasin blong ol man blong politik. (Revelesen 18:5) Naoia hem i kasem panis from ol sin ya blong hem, taswe ol voes long heven oli talemaot Haleluia namba tu taem.

4. ?Taem we smok blong Bigfala Babilon “i stap go antap oltaem, we bambae i no save finis samtaem,” hemia i saen long wanem?

⁴ Long taem bifo, taem ol ami oli winim wan taon long faet, oli bonem hem. Taswe i olsem we faea i bonem Bigfala Babilon. Smok blong Bigfala Babilon “i stap go antap oltaem, we bambae i no save finis samtaem.” Taem ol ami oli winim wan taon bifo, nao oli bonem hem, smok blong faea ya i stap go antap gogo ol ases blong hem oli no moa hot. Sipos wan man i traem bildim taon ya bakegen taem smok i stap go antap yet, bambae hem i bonem hem wan, from we ol ases blong hem oli hot yet. Smok blong Bigfala Babilon bambae i go antap oltaem gogo “i no save finis samtaem,” blong soemaot se jajmen blong hem i blong olwe. Taswe i no gat man we bambae i save bildim rabis taon ya bakegen. Ol gyaman skul bambae oli lus blong olwe. !Yes, Haleluia!—Ridim Aesea 34:5, 9, 10.

5. (a) ?Ol 24 elda mo ol fo anamol oli mekem mo talem wanem? (b) ?Olsem wanem singsing ya blong talem Haleluia i moa gud i bitim ol singsing long ol skul blong Krisendom we oli talem Haleluia?

⁵ Long wan vison we Jon i luk finis, i gat fo anamol oli stap raon long bigfala jea blong God wetem ol 24 elda we oli pija blong ol rula long Kingdom we oli stap long ples blong olgeta long heven. (Revelesen 4:8-11) Nao Jon i luk olgeta bakegen, oli singaot bigfala blong talem Haleluia namba tri taem from Bigfala Babilon i lus. Jon i se: “Nao ol twantefo elda ya wetem ol fo anamol ya oli foldaon, oli presem God we i stap sidaon long bigfala jea blong hem, oli talem se ‘!Amen! [!Haleluia!]’ ”b (Revelesen 19:4) Bifo, olgeta oli sing long wan “nyufala sing” blong presem Smol Sipsip ya. Nao oli joenem narafala bigfala singsing ya blong talem Haleluia. (Revelesen 5:8, 9) Naoia oli stap singsing blong talem se God i win, oli presem Hae God mo Masta Jeova from we hem i winim rabis woman blong rod ya, Bigfala Babilon. Ol singsing ya blong talem Haleluia oli moa gud i bitim ol singsing long ol skul blong Krisendom we oli talem Haleluia. Ol skul ya oli no stap ona nating long Jeova no Ja, oli daonem nem blong hem. !Taswe ol gyaman singsing blong olgeta we oli mekem sem long nem blong Jeova oli stop naoia, blong olwe!

6. ?“Tok” i kamaot long maot blong hu? ?Hem i talem wanem? ?Hu olgeta we oli obei long tok ya?

⁶ Long 1918, Jeova i stat blong givim pei long “olgeta we oli haeman, wetem olgeta we oli no gat nem.” Fastaem, hem i givim pei long ol Kristin we tabu speret i makemaot olgeta, mo oli stap tru long hem gogo oli ded. Hem i mekem olgeta oli laef bakegen, nao hem i givim ples long olgeta long heven olsem ol 24 elda. (Revelesen 11:18) I gat sam narafala we oli singsing ol Haleluia tu, Jon i talem se: “Nao mi harem wan tok we i kamaot long bigfala jea blong God, we i talem se ‘Olgeta man blong wok blong God, wetem olgeta we oli stap mekem wosip long hem, olgeta we oli haeman wetem olgeta we oli no gat nem, yufala i mas presem God blong yumi.’ ” (Revelesen 19:5) “Tok” ya i kamaot long man blong talemaot tok blong Jeova, hemia stret Pikinini blong hem, Jisas Kraes, we hem i stap stanap “long medel blong bigfala jea blong God.” (Revelesen 5:6) I no long heven nomo, be long wol ya tu, “olgeta man blong wok blong God” oli joen long singsing ya. Ol tabu man long grup olsem Jon tede oli lidim singsing ya long wol. Olgeta evriwan oli glad blong joen tugeta blong obei long oda ya: “!Yufala i mas presem God blong yumi.”

7. ?Taem Bigfala Babilon i lus finis, hu bambae oli presem Jeova?

⁷ Yes, olgeta long bigfala kampani tu oli man blong wok blong God. I stat long 1935, olgeta ya oli stap kamaot long Bigfala Babilon. Promes ya blong God i stap kamtru long olgeta se: “Hem bambae i blesem yumi evriwan we yumi stap ona long hem. Ol haeman, wetem ol man we oli no gat nem, be hem bambae i mekem i sem mak nomo long yumi evriwan.” (Ol Sam 115:13) Taem Babilon we i olsem woman blong rod bambae i lus, plante milyan man long bigfala kampani ya bambae oli “presem God blong yumi.” Bambae oli joen wetem grup olsem Jon mo olgeta enjel long heven blong mekem olsem. Biaen, olgeta we oli laef bakegen long wol, nating se fastaem oli haeman no oli no gat nem, bambae oli singsing bakegen blong talemaot sam moa Haleluia, taem oli lanem se Bigfala Babilon i no moa stap, i lus blong olwe. (Revelesen 20:12, 15) !Yes, olgeta ya bambae oli presem Jeova bigwan from we hem i winim olfala rabis woman blong rod ya!

8. ?Ol singsing blong presem God we Jon i luk long heven, oli mas pusum yumi blong mekem wanem naoia, bifo we Bigfala Babilon i lus?

⁸ !Olgeta samting ya i pusum yumi blong joen fulwan long wok blong God tede! Ol man blong wok blong Ja oli mas wok wetem olgeta hat mo sol naoia, blong talemaot ol jajmen blong God mo gudfala hop blong Kingdom, bifo we Bigfala Babilon i foldaon mo i lus olgeta.—Aesea 61:1-3; 1 Korin 15:58.

‘!Haleluia—Jeova i King!’

9. ?From wanem laswan Haleluia i bigfala moa?

⁹ I gat sam moa risen blong haremgud, olsem Jon i gohed blong talem long yumi se: “Nao mi harem wan noes we i olsem we plante man oli stap singaot bigfala, i olsem noes blong bigfala solwora we i stap brok long rif, i olsem noes blong bigfala tanda. Mi harem olgeta oli stap talem se ‘[Haleluia,]c Hae God ya we i Masta blong yumi mo i gat olgeta paoa, . . . hem nomo i [stat rul olsem king, “NW”].’ ” (Revelesen 19:6) Laswan Haleluia i mekem mesej we i kamaot i fulwan, i olsem wan bokis we i gat fo saed blong hem, i no gat tri nomo. Hem i wan bigfala noes we i kamaot long heven, i bigfala moa i bitim singsing blong ol grup blong singsing tede, i bitim bigfala solwora we i stap brok long rif, mo i bitim noes blong bigfala tanda. Ol taosen voes ya long heven oli stap singaot bigfala from we “Hae God ya [Jeova, NW] we i Masta blong yumi mo i gat olgeta paoa, . . . hem nomo i [stat rul olsem king, NW].”

10. ?Olsem wanem Jeova i stat rul olsem king taem bambae Bigfala Babilon i lus?

¹⁰ ?Be olsem wanem Jeova i stat rul olsem king? Plante taosen yia finis man blong raetem Ol Sam i talem se: “God, yu yu stap king blong mifala, i stat bifo olgeta.” (Ol Sam 74:12) Taem man ya i raetemdaon Sam ya, Jeova i stap king longtaem finis. ?Olsem wanem olgeta we oli stap singsing oli save talem se ‘Jeova . . . i stat rul olsem king’? (NW) Hem i olsem from we taem Bigfala Babilon i lus, bambae i no moa gat rabis enemi blong Jeova we i agensem hem oltaem, blong pulum ol man oli no obei long Hae Rul blong hem. I no moa gat ol gyaman skul blong pulum ol rula blong wol oli agensem hem. Taem Babilon blong bifo i foldaon, i no moa gat paoa, Saeon i harem ol voes oli singaot bigfala se: “!God blong yufala i kam king!” (Aesea 52:7) Taem Kingdom i stanap long 1914, ol 24 elda oli talem se: “Hae God, [Jeova, NW], . . . Mifala i talem tangkyu long yu, from we yu yu tekem bigfala paoa blong yu finis, yu yu kam king finis.” (Revelesen 11:17) Nao taem Bigfala Babilon i lus, ol voes bambae oli singaot bigfala bakegen se: ‘Jeova . . . i stat rul olsem king.’ (NW) !Bambae i no moa gat ol god we ol man nomo oli wokem, blong agensem hae rul blong trufala God, Jeova!

!Mared Blong Smol Sipsip i Kolosap!

11, 12. (a) ?Long taem bifo, Jerusalem i talem wanem long Babilon? ?Hem i pija long wanem samting we Nyufala Jerusalem i save talem long Bigfala Babilon? (b) ?Taem Bigfala Babilon i lus, ol enjel long heven oli singsing mo talemaot wanem?

¹¹ !“Woman, yu yu enemi blong mi”! Jerusalem, we tempel blong wosip long Jeova i stap long hem, hem i talem tok ya long Babilon we i stap wosip long ol aedol. (Maeka 7:8) Sem mak nao, “bigfala taon ya we i tabu, we hemia nyufala Jerusalem ya,” hemia ol 144,000 memba we oli olsem woman blong Kraes, oli gat gudfala risen blong talem tok ya long Bigfala Babilon from we hem i enemi blong olgeta. (Revelesen 21:2) Be rabis woman blong rod ya i kasem panis blong hem, hem i harem nogud tumas, hem i kasem ol samting blong spolem hem. Ol fasin blong hem blong wokem posen mo go luk ol kleva, mo ol man blong talemaot fyuja from ol sta, oli no save sevem hem. (Ridim Aesea 47:1, 11-13.) !Tru ya, trufala wosip i win bigwan!

¹² Oraet, rabis woman blong rod ya, Bigfala Babilon, i no moa stap blong olwe. !Nao yumi save luklukgud long woman blong Smol Sipsip ya, we hem i klin mo tabu! Taswe ol enjel long heven oli singsing bigwan blong presem Jeova se: “ ‘Yumi harem gud tumas, yumi sing from glad blong yumi, mo yumi leftemap nem blong God i go antap, from we taem i kam finis blong Smol Sipsip blong hem i mared. Mo woman ya we i olsem promes blong hem, hem i rere finis. Woman ya, God i givim ol gudfala klos long hem blong i werem, we oli klin gud, oli saen.’ Ol gudfala klos ya blong hem, hemia ol gudfala fasin ya we ol man blong God oli mekem finis.”—Revelesen 19:7, 8.

13. ?Long ol handred yia we oli pas finis, olsem wanem Smol Sipsip ya i stap mekemrere ol samting blong mared blong hem?

¹³ Long ol handred yia we oli pas finis, long fasin lav, Jisas i stap mekemrere ol samting blong mared blong hem long heven. (Matyu 28:20; 2 Korin 11:2) Hem i stap mekem ol 144,000 man Isrel long saed blong speret, oli kam klin. Olsem nao, hem i save tekem kongregesen ya we i “olsem wan gel we i klin gud, i no gat samting we i spolem hem, mo i no gat samting long hem we i no stret. Hem i stret gud olgeta.” (Efesas 5:25-27) Blong kasem ‘praes ya, we God i singaot olgeta blong oli joen long Jisas Kraes,’ ol tabu Kristin ya wanwan oli mas tekemaot olfala laef blong olgeta wetem ol fasin blong hem, mo oli mas putum nyufala laef wetem ol Kristin fasin blong hem. Mo oli mas mekem ol gudfala wok “wetem olgeta sol blong olgeta, olsem we oli stanap stret long fes blong Jeova.”—Filipae 3:8, 13, 14; Kolosi 3:9, 10, 23, NW.

14. ?Olsem wanem Setan i bin traehad blong spolem ol man we oli olsem woman blong Smol Sipsip?

¹⁴ I stat long Pentekos long 33 K.T., Setan i yusum Bigfala Babilon olsem wan tul blong hem blong traem spolem ol man we bambae oli mared wetem Smol Sipsip ya. Long en blong faswan handred yia, hem i planem finis ol sid blong ol gyaman skul insaed long kongregesen. (1 Korin 15:12; 2 Timote 2:18; Revelesen 2:6, 14, 20) Aposol Pol i tokbaot olgeta we oli stap tanem tingting blong ol man blong oli agensem trufala bilif. Hem i se: “Ol man ya oli no tru aposol ya, oli gyaman aposol nomo. Oli stap gyaman blong talem ol wok blong olgeta, mo oli stap tanem ol fasin blong olgeta, blong mekem ol man oli luk olgeta, olsem we oli prapa aposol nomo blong Kraes. Be yumi no sapraes long samting ya. Setan, be hem i save tanem fasin blong hem, blong mekem ol man oli luk hem olsem we hem i wan enjel blong laet.” (2 Korin 11:13, 14) Long ol yia we oli ron biaen long taem ya, Krisendom we i lego trufala bilif, wetem ol narafala haf blong Bigfala Babilon tu, oli werem klos blong ol rijman mo ol haeman, ‘klos we i red we i blu lelebet, mo we i red olsem blad. Oli flasem olgeta long ol samting we oli wokem long gol mo long ol gudfala ston mo long ol perel.’ (Revelesen 17:4) Ol pris mo pop oli kampani wetem ol haeman we oli laekem blong mekem blad i ron, olsem Constantine mo Charlemagne. Neva Krisendom i mekem “ol gudfala fasin ya we ol man blong God oli mekem.” Hem i gyaman se hem i woman blong Kraes, be no gat, hem i wan gyaman trik blong Setan nomo. !Be naoia, hem i lus blong olwe!

Woman Blong Smol Sipsip i Rere

15. ?Olsem wanem God i putum mak blong hem long ol tabu Kristin man? ?Mo olgeta wanwan oli mas mekem wanem?

¹⁵ Long ol 2,000 yia we oli pas finis, ol 144,000 memba blong woman blong Kraes oli mekemrere olgeta blong oli mared long hem. ?Be long wanem taem ‘woman blong Smol Sipsip ya i rere’? I stat long Pentekos long 33 K.T., sloslou, ‘God i putum mak blong hem long ol tabu man blong bilif, se oli man blong hem, from we hem i givim Tabu Speret long olgeta, olsem we hem i promes finis.’ Hemia ‘i olsem wan saen we God bambae i mekem olgeta oli fri olgeta.’ Olsem aposol Pol i talem, God “nomo i putum mak blong hem long yumi, se yumi blong hem. Mo hem nomo i putum Tabu Speret ya long tingting blong yumi, we hem i olsem saen blong soemaot we ol promes blong God bambae oli kamtru long yumi.” (Efesas 1:13; 4:30; 2 Korin 1:22) Ol tabu Kristin ya wanwan, ‘hem i singaot olgeta, hem i jusumaot olgeta,’ mo olgeta wanwan “oli stap holem tok blong hem.”—Revelesen 17:14.

16. (a) ?Wetaem aposol Pol i kasem mak blong God fulwan? ?Olsem wanem yumi save samting ya? (b) ?Wetaem bambae woman blong Smol Sipsip ya i “rere finis”?

¹⁶ Pol i winim ol traem long plante yia, taswe hem i save talem se: “Mi mi faet strong finis long gudfala faet ya we yumi stap faet long hem. Mi mi kamtru finis long en blong resis ya, mo mi stap holem yet fasin blong bilif. Nao praes blong ol man we oli win, hem i stap wet blong mi go tekem. Praes ya we Masta blong yumi bambae i givim long mi blong ona long mi, hemia we hem i talem se mi mi wan stret man. Masta ya blong yumi, hem i wan stret jaj. Nao long dei ya we hem bambae i jajem olgeta man, hem bambae i givim praes ya long mi. Mo i no long mi nomo. Bambae hem i givim praes olsem long olgeta man we oli laekem hem tumas, nao oli stap wet blong hem bambae i kamtru bakegen.” (2 Timote 4:7, 8) I luk olsem se God i putum mak blong hem long aposol ya fulwan long taem ya, nating se hem i stap yet olsem man long wol ya, mo bambae hem i mas ded from bilif blong hem. Sem mak long olgeta memba blong 144,000 we oli stap yet long wol, bambae stret taem i kam we God i putum mak blong hem fulwan long olgeta wanwan, se oli blong Jeova nomo. (2 Timote 2:19) Hemia nao taem we woman blong Smol Sipsip ya i rere finis. Long taem ya, bighaf blong 144,000 man ya oli kasem praes blong olgeta finis long heven. Mo olgeta we oli stap yet long wol, God i putum mak blong hem long olgeta blong olwe se hem i glad long olgeta mo oli blong hem from we oli stap tru long hem.

17. ?Wetaem bambae Smol Sipsip ya i mared?

¹⁷ Taem ya we hem i putum mak blong hem fulwan long ol 144,000 man, hem i stret taem long plan blong Jeova blong ol enjel oli lego ol fo win blong mekem bigfala trabol i kamtru long wol. (Revelesen 7:1-3) Fastaem, jajmen bambae i kamtru long rabis woman blong rod ya, Bigfala Babilon. Kwiktaem biaen, Kraes we i win finis, bambae i faet long Amageden blong spolem ol narafala haf blong ogenaesesen blong Setan long wol. Mo laswan samting, bambae hem i sakem Setan mo ol rabis enjel blong hem oli go long bigfala hol we i godaon we i godaon. (Revelesen 19:11 kasem 20:3) I klia se ol tabu man we oli stap laef yet long wol long taem ya, kwiktaem nomo bambae oli kasem praes blong olgeta long heven blong joen wetem ol narafala memba blong grup ya we i olsem woman blong Kraes. !Long taem ya nao, we i gat pis long heven mo long wol, Smol Sipsip ya bambae i mared!

18. ?Olsem wanem Ol Sam 45 i pruvum se ol samting long saed blong mared blong Smol Sipsip ya bambae oli folem stret oda we yumi tokbaot finis?

¹⁸ Profet tok long Ol Sam 45 i pruvum tu se ol samting ya bambae oli kamaot stret long plan ya. Fastaem, King we i rul finis i faetem mo winim ol enemi blong hem. (Vas 1-7) Afta, hem i mared wetem woman blong hem long heven, mo ol fren blong woman ya long wol, hemia bigfala kampani, oli joen blong haremgud long mared ya, olsem ol gel we oli folem woman we i mared. (Vas 8-15) Biaen, i olsem we bambae mared ya i karem pikinini, taem ol man we oli laef bakegen bambae oli kam stret olgeta aninit long han blong ol ‘pikinini blong king’ we bambae oli rul long olgeta ples long wol. (Vas 16, 17) !Traem tingbaot ol nambawan blesing ya we oli kamaot from mared blong Smol Sipsip ya!

Olgeta We God i Singaot Olgeta Oli Save Haremgud

19. ?Wanem namba fo taem long ol seven taem long Revelesen we Jon i talem se man i save haremgud? ?Mo hu ya i joen long hapi taem ya?

¹⁹ Naoia, namba fo taem long ol seven taem long Revelesen, Jon i talemaot se man i save haremgud. Hem i se: “Nao enjel [we i stap soemaot ol samting ya long Jon] i talem long mi, i se ‘Yu raetem tok ya, se “Olgeta we God i singaot olgeta blong kam sidaon long kakae blong mared blong Smol Sipsip ya, oli save harem gud.” ’ Mo enjel i talem bakegen, i se ‘Ol tok ya oli tok blong God tru.’ ” (Revelesen 19:9)d Olgeta we God i singaot olgeta blong kam “sidaon long kakae blong mared blong Smol Sipsip ya,” hemia ol memba blong grup we oli olsem woman blong Kraes. (Ridim Matyu 22:1-14.) Olgeta long kampani blong woman blong Kraes we tabu speret i makemaot olgeta oli save haremgud from we God i singaot olgeta. Bighaf blong olgeta oli go finis long heven, long ples we bambae oli mekem kakae blong mared. Smolhaf we oli stap long wol yet oli save haremgud tu, from we God i singaot olgeta oli kam sidaon long kakae blong mared ya. Hem i makemaot ples blong olgeta finis blong oli save joen long kakae blong mared. (Jon 14:1-3; 1 Pita 1:3-9) Taem oli laef bakegen, oli go long heven, ful grup we i olsem woman blong Kraes, olgeta evriwan, bambae oli joen wetem Smol Sipsip ya long mared ya we i hapi tumas.

20. (a) ?Wanem mining blong tok ya se: “Ol tok ya oli tok blong God tru”? (b) ?Taem tok blong enjel i tajem hat blong Jon bigwan, Jon i mekem wanem? ?Enjel i talem wanem long hem?

²⁰ Enjel ya i joenem tok ya: “Ol tok ya oli tok blong God tru.” Tok ya “tru” i kamaot long Grik tok a·le·thi·nosʹ we i minim “no gyaman” no “yumi save trastem.” Ol tok ya oli rili kamaot long Jeova, taswe oli tru mo yumi save trastem olgeta. (Ridim 1 Jon 4:1-3; Revelesen 21:5; 22:6.) Jon, we God i singaot hem tu blong go long mared blong Smol Sipsip ya, hem i glad blong harem samting ya mo blong tingbaot ol blesing we grup olsem woman blong Kraes bambae oli kasem long fyuja. Samting ya i tajem hat blong hem bigwan, be enjel i mas stretem hem smol, olsem Jon i talem: “Nao mi mi foldaon long fes blong enjel ya blong presem hem, be hem i blokem mi, i se ‘No, yu no mekem olsem. Yumitufala i man blong wok nomo, wetem ol brata blong yu, olgeta ya we oli stap holem trutok we Jisas i wetnes long hem se i tru. Yu mas presem God nomo.’ ”—Revelesen 19:10a.

21. (a) ?Revelesen i soemaot wanem long saed blong ol enjel? (b) ?Ol Kristin man oli mas tingting olsem wanem long ol enjel?

²¹ Olgeta haf long Revelesen oli soemaot klia olsem wanem ol enjel oli stap wok strong mo oli stap folemgud ol tok blong God. Olgeta tu oli haf long rod ya we God i yusum blong soemaot trutok long ol man blong hem. (Revelesen 1:1) Olgeta oli stap wok wetem ol man blong God long wol blong talemaot gud nyus mo blong kafsaedem ol besin we oli fulap long kros blong God. (Revelesen 14:6, 7; 16:1) Olgeta oli bin givhan long Jisas blong faetem Setan wetem ol enjel blong hem long heven, mo blong aotem olgeta. Mo bambae oli sapotem Jisas long faet blong hem long Amageden. (Revelesen 12:7; 19:11-14) Olgeta oli save go kolosap long Jeova hem wan. (Matyu 18:10; Revelesen 15:6) Nating we oli mekem ol impoten wok ya mo oli kasem ol bigfala blesing ya, be oli man blong wok blong God nomo we tingting blong olgeta i stap daon. Insaed long trufala wosip i no gat fasin blong mekem wosip long ol enjel no blong givim smol ona long olgeta, olsem we man i mekem wosip long God tru long ol “tabu man” no enjel. (Kolosi 2:18) Ol Kristin man oli mekem wosip long Jeova nomo. Mo oli prea long hem tru long nem blong Jisas.—Jon 14:12, 13.

Wok Blong Jisas Long Ol Profet Tok

22. ?Enjel ya i talem wanem long Jon? ?Wanem mining blong ol tok ya?

²² Nao enjel i gohed i se: “From we trutok ya we Jisas i wetnes long hem, hemia i stampa blong ol tok blong ol profet.” (Revelesen 19:10b) ?Wanem mining blong tok ya? Hemia i min se ol profet tok we God i givim i stap kamtru from Jisas nomo, mo from wok we hem i mekem long plan blong Jeova. Faswan profet tok long Baebol i mekem promes se wan spesel laen bambae i kamtru. (Jenesis 3:15) Jisas nao i kam olsem Laen ya. Biaen, mining blong plante narafala profet tok i kam klia, mekem se trutok we i stanap long faswan promes ya i gru i kam bigwan. Aposol Pita i talem long Hiten man ya Konilyas we hem i bilif, se: “Olgeta profet tu oli stap tokbaot hem nomo [Jisas].” (Ol Wok 10:43) Samwe long 20 yia biaen, aposol Pol i talem se: “Jisas ya, hem i olsem ansa we i talem se ‘Yes’ long olgeta promes we God i talem finis.” (2 Korin 1:20) Mo 43 yia biaen bakegen, Jon hem wan i talem bakegen long yumi se: “Ol . . . trutok oli kamtru long Jisas Kraes.”—Jon 1:17.

23. ?From wanem haenem mo paoa blong Jisas i no mekem se wosip blong yumi long Jeova i hafhaf?

²³ ?Olsem wanem, samting ya i min se wosip we yumi givim long Jeova i hafhaf? No gat. Tingbaot woning we enjel i givim long Jon se: “Yu mas presem God nomo.” Neva Jisas i traem blong winim Jeova. (Filipae 2:6) Tru, Baebol i talem se ol enjel oli mas “foldaon blong presem [Jisas].” Olgeta long heven mo long wol oli mas luksave haenem blong Jisas, oli mas “foldaon, oli ona long nem blong Jisas.” Be makemgud se hemia i “blong leftemap nem blong God, Papa blong yumi,” mo tu, God nomo i givim oda long yumi blong mekem olsem. (Hibrus 1:6; Filipae 2:9-11) Jeova nomo i givim paoa mo haenem long Jisas. Taswe taem yumi luksave mo givim ona long Jisas from haenem blong hem, yumi stap givim ona long God. Sipos yumi no obei long rul blong Jisas, i olsem we yumi tanem baksaed long Jeova God hem wan.—Ol Sam 2:11, 12.

24. ?Yumi stap tingbaot wanem tufala bigfala samting we oli kolosap nao? ?From samting ya, yumi stap talemaot wanem tok?

²⁴ Taswe yumi save joen long wan voes nomo blong talemaot fastok blong Ol Sam 146 kasem 150: “!Yufala i presem Ja!” (NW) !Tok ya Haleluia, ol man oli mas harem olsem tanda we i faerap, blong talemaot se kolosap nao Jeova bambae i winim olgeta gyaman skul blong wol we oli olsem Babilon! !Mo yumi save glad bigwan from we mared blong Smol Sipsip ya i kolosap!

[Ol Futnot]

[Bokis blong pija long pej 273]

“Leta long Sodom mo Gomora”

Hemia nem blong wan store long nyuspepa long London (Daily Telegraph) long Novemba 12, 1987. Hem i stap tokbaot disisin we kaonsel ya, Jenerol Sinod blong ‘Church of England’ i mas mekem. Kwestin we oli mas tekem disisin long hem se: ?Bambae oli sakemaot long jyos ol “Kristin” man we oli slip wetem man bakegen, mo ol woman we oli slip wetem woman bakegen? Man blong raetem nyuspepa, (Godfrey Barker) i talem se: “Ajbisop blong Kanterberi i harem nogud yestede taem hem i talem se: ‘Yumi save askem se, ?Sipos Tabu Pol i mas raetem wan leta long ‘Church of England,’ bambae leta ya i olsem wanem?’ ” Barker hem wan i ansa, i se: “Ansa long kwestin ya se, wan leta long Sodom mo Gomora nomo.” Hem i gohed i se: “Dokta Runcie [ajbisop] i ting se leta ya bambae i olsem Rom Japta 1.”

Man we i raetem store ya long nyuspepa i talem tok blong Pol long Rom 1:26-32 se: “From ol samting ya, God i lego finis long olgeta. Hem i letem olgeta oli gohed oli folem ol rabis tingting blong olgeta we i blong sem nomo. . . . Ol man oli stap mekem ol fasin ya wetem ol narafala man, we i blong sem nomo. . . . Olgeta oli save finis we God i save jajem man we i mekem ol fasin ya, se hem i mas ded from. Be oli stap gohed blong mekem ol fasin ya nomo. Mo antap bakegen, oli glad blong givhan long ol narafala man tu, we oli stap mekem olsem.” Nao man ya i ademap tok blong hem i se: “Tabu Pol i stap wari long ol memba blong skul nomo. Be Dokta Runcie i gat trabol wetem ol lida blong skul.”

?From wanem ajbisop i gat wan bigfala trabol olsem? Bigfala store long nyuspepa long London (Daily Mail) long Oktoba 22, 1987, i se: “ ‘Long evri tri pris, i gat wan long olgeta we i stap slip wetem man bakegen’ . . . Kampen blong ronemaot ol man blong slip wetem man ‘bambae i mekem se ‘Church of England’ i mas finis.’ ” Ol ripot oli talemaot tok blong “reveren” we hem i sekretari blong Kristin Grup blong ol man blong slip wetem man mo ol woman blong slip wetem woman. Hem i se: “Sipos oli vot blong sakemaot ol pris, bambae Jyos i foldaon, mo Ajbisop blong Kanterberi i save samting ya. Mifala i ting se samwe long 30% no 40% long ol lida blong ‘Church of England’ oli man blong slip wetem man bakegen. Mo olgeta ya oli wok strong moa long wok blong Jyos i bitim ol narafala man.” Namba blong ol man we oli stap go long ol skul olsem i stap godaon. Samting ya i soemaot se ol man ya oli no glad nating long rabis fasin blong ol lida blong ol skul ya.

?Kaonsel blong jyos i mekem wanem disisin? 388 memba (95%) blong ol lida blong jyos oli agri long wan disisin we i no strong tumas. Long saed ya, nyuspepa (The Economist) long Novemba 14, 1987, i talem se: “ ‘Church of England’ i agensem fasin blong man i slip wetem man bakegen. Be i no agensem hem tumas. Kaonsel blong Jyos ya, we i olsem parlamen blong Jyos, oli tingbaot ol lida we oli stap mekem fasin ya, taem oli tekem disisin long saed blong ol fasin olsem long wik ya. Oli talem se fasin blong man i slip wetem man i no wan sin olsem fasin blong mekem nogud wetem woman no fasin blong stilim woman blong narafala man. Man we i slip wetem man ‘i jes mestem mak smol nomo.’ Hem i no kasem mak ya we ‘taem tufala i slip tugeta i olsem we tufala i promes fulwan blong stap tru long tufala nomo. Samting ya i mas stap insaed long mared we i stap blong olwe.’ ” Nyuspepa (The Economist) i tokbaot olsem wanem tingting blong Ajbisop blong Kanterberi i narakaen long stret tok blong aposol Pol long Rom 1:26, 27. Long nyuspepa ya, oli raetem ol tok blong Pol, nao daon long pej oli raetem se: “Tabu Pol i save tingting blong hem.”

Jisas Kraes tu i save tingting blong hem mo hem i talemaot i klia nomo. Hem i talem se panis blong ol man blong skul we oli no harem mesej blong hem bambae i strong moa, “i winim panis we ol man ya bifo blong Sodom bambae oli kasem.” (Matyu 11:23, 24) Jisas i tok olsem blong makem strong se ol lida blong ol skul we oli no wantem Pikinini blong God mo ol tijing blong hem, bambae God i jajem olgeta i strong moa i bitim jajmen long ol man Sodom. Jud 7 i talem se ol man Sodom “oli kasem panis long faea we i no save ded samtaem,” hemia i min se oli lus blong olwe. (Matyu 25:41, 46) !Oraet, traem tingbaot strong jajmen blong ol lida ya we oli stap talem se oli Kristin, be oli blaen, mo oli stap lidim ol sipsip blong olgeta we oli blaen tu, oli go longwe long ol gudfala klin rul blong Kingdom blong God, oli laekem moa blong joen long ol rabis fasin blong wol ya we oli olbaot nomo! (Matyu 15:14) Long saed blong ol gyaman skul no Bigfala Babilon, voes i singaot strong long heven i se: “Ol man blong mi, yufala i kam. Yufala i kamaot long hem. I nogud yufala i stap joen wetem hem long ol sin ya we hem i stap mekem, mo i nogud we bambae yufala i joen wetem hem blong panis wetem hem.”—Revelesen 18:2, 4.

[Tok Blong Pija Long Pej 275]

Ol voes oli singaot bigfala long heven blong talem Haleluia fo taem bakegen, oli presem Ja from we hem i winim Bigfala Babilon laswan