Japta 4

?God–Hem I Hu?

1. (a) ?Wanem ol god ya we ol man oli bin wosip long olgeta? (b) Baebol i tokbaot “ol god” mo “God,” ?Be olsem wanem olgeta ya oli no sem mak?

LONG WOL ol man oli stap mekem wosip long plante kaen god. Long skul blong Sinto, Buda, Hindu, mo blong olgeta defren laen blong man, i gat plante milyan god. Long taem blong ol aposol blong Jisas, plante man oli stap wosip long tufala god ya Sus mo Hemis. (Wok 14:11, 12) Baebol tu, i talem we “i gat plante ‘god.’ ” Be bakegen, i se: “Be yumi gat wan God nomo, hemia Papa we olgeta samting oli kamaot long hem.” (1 Korin 8:5, 6) Sipos oli askem long yu se, ‘?Hu God ya?’ ?Bambae yu talem wanem?

2. ?Samfala man oli ting wanem long God?

² Plante oli ansa se: ‘Hem i Masta.’ No oli talem se: ‘Hem i Speret Man long heven.’ Deksonari i kolem God: “Hem ya we i Hae Moa.” Taem oli askem long ol man se: ‘?Wanem nem blong God?’ samfala oli ansa se ‘Jisas.’ Sam narafala man oli no ting se God i wan speret man, be oli ting se hem i olsem wan bigfala paoa we i stap olbaot nomo. Samfala man oli no ting se God i stap. ?Olsem wanem yumi save talem se God i tru i stap?

GOD I STAP

3. ?Ol haos oli kam long wea?

³ Taem yu lukluk wan gudfala haos, ating samtaem yu yu wantem save nem blong man ya we i wokem. Sipos wan man i talem long yu se i no gat man i wokem, be haos ya i wokem hem wan nomo, ?bambae yu yu bilivim man ya? !No gat! Baebol i talem se: “Evri haos i gat man blong wokem.” Ol man oli save long samting ya. Oraet, i stret nomo we yumi bilivim Baebol taem i talem se: “God i wokem olgeta samting we i stap.”—Hibrus 3:4.

4. ?Olgeta plante bilyan sta oli kam long wea?

⁴ Tingbaot olgeta plante plante bilyan sta. Olgeta evriwan oli gat rod blong olgeta. Oli no stap ron olbaot nomo, be i gat loa blong olgeta. Wan kwestin blong bifo longtaem, i askem se: “Hu i wokem olgeta samting ya?” Ansa blong hem i stret nomo, i se: “Hem ya we i wokem olgeta oli plante olsem wan ami, hem i putum namba blong olgeta, mo hem i givim nem long olgeta evriwan.” (Aesea 40:26) !I krangke nomo blong ting se olgeta plante plante bilyan sta ya oli wokem olgeta nomo, nao olgeta nomo oli stap mekem olgeta oli ron long prapa rod blong olgeta!—Sam 14:1.

5. (a) ?Yu ting se ol pis blong enjin blong katkatem mit oli save joejoenem olgeta nomo? (b) ?Samting ya i soemaot we olgeta sta long heven, mo ol narafala samting we oli stap, oli kam long wea?

⁵ Olgeta sta ya long heven, oli plante tumas, mo olgeta oli stap long stret ples blong olgeta. Oli no save wokem olgeta ya. I mas gat wan Man we i gat hed, mo we i gat bigfala paoa, hem ya nomo i naf blong wokem olgeta ya. (Sam 19:1, 2) Wan man i bin askem long wan tredaman blong wanem hem i bilif long God. Nao tredaman ya i ansa, i se: “Long woksap blong mi, mifala i stap wokem ol smol enjin blong katkatem mit. Enjin ya i gat 17 pis blong hem, nao ol gel oli stap joejoenem. Ol nyufala gel oli tekem tu dei blong lanem wok ya blong joejoenem olgeta 17 pis ya. Enjin ya we mifala i stap wokem, i olsem wan isi samting nomo. Nao mi mi save talem stret long yu, se sipos oli putum 17 pis ya long enjin blong was, nao oli mekem enjin blong was ya i wok blong 17 bilyan yia, blong meksem gud, neva bambae fasin olsem i save joejoenem olgeta pis ya blong oli kam enjin blong katkatem mit.” Olgeta sta long heven, mo olgeta laef samting long wol ya, oli strong tumas blong wokem, oli no olsem smol enjin ya blong katkatem mit. Be blong wokem enjin olsem, i mas gat man we i gat hed. Taswe, yumi save se blong wokem olgeta samting we oli stap, i mas gat God we i gat olgeta paoa. Yumi mas tangkyu tumas long hem, from ol samting we hem i mekem.—Revelesen 4:11; Wok 14:15-17; 17:24-26.

?GOD I PRAPA SPERET MAN?

6. ?Blong wanem yumi save talem we God hem i wan tru speret man?

⁶ Kolosap olgeta man oli bilif long God, be plante man oli no ting se hem i prapa speret man. ?Be olsem wanem? ?Hem i speret man, no no gat? Oraet, yumi save finis se olgeta save oli kamaot long maen. Olsem, samtaem yumi talem se, ‘Mi mi no save mekemap maen blong mi.’ Mo yumi save se sipos i gat maen i mas gat brim tu. Brim ya i stap long wan bodi. Olsem ya nao, bigfala maen ya we i wokem olgeta samting, hemia i blong wan bigfala Man, hem ya God ya we i gat olgeta paoa. Bodi blong hem i no olsem bodi blong yumi, be hem i gat wan speret bodi. ?Speret man i gat bodi? Yes, i gat ya. Baebol i talem se: “Yes, i gat bodi we i blong wol ya, mo i gat bodi we i blong speret.”—1 Korin 15:44; Jon 4:24.

7. (a) ?Olsem wanem yumi save se God i gat ples blong stap long hem? (b) ?Olsem wanem yumi save se God i gat wan bodi?

⁷ From we God hem i speret man wetem wan speret bodi, hem i mas gat ples blong hem tu. Baebol i talem we “heven i ples ya we God i stap long hem.” (1 King 8:43) Mo Baebol i talem se: “Kraes . . . i go insaed long heven stret, mo naoia hem i stap stanap long fes blong God blong halpem yumi.” (Hibrus 9:24) Samfala man bambae oli kasem laef long heven wetem God, mo bambae oli kasem bodi blong speret. Olgeta ya bambae oli save luk God, mo bambae oli kam olsem hem. (1 Jon 3:2) Tok ya i soemaot we God hem i tru i stap, hem i speret man, mo hem i gat wan bodi.

8, 9. (a) ?Eksampel ya blong enjin blong lektrik, i soemaot we paoa blong God i save kasem weples? (b) ?Wanem tabu speret ya blong God? ?Tabu speret ya i save mekem wanem?

⁸ Be maet wan man i askem se: ‘Sipos God i wan speret man, mo hem i stap long ples blong hem long heven, ?olsem wanem hem i save lukluk ol samting long olgeta ples? ?Mo olsem wanem paoa blong hem i save wok long olgeta ples? (2 Kronikel 16:9) From we God i olsem wan speret man, samting ya i no minim se paoa blong hem i no save bigwan. Mo from samting ya, yumi no mas letem respek ya we yumi gat long Hem, i kam smol. (1 Kronikel 29:11-13) Blong halpem yumi blong savegud long ol samting ya, tingbaot bigfala enjin blong lektrik.

⁹ Bigfala enjin blong lektrik i stap kolosap long taon. Be lektrik blong hem i kasem evri ples insaed mo raonabaot long taon ya. Sem mak long God. Hem i stap long heven. (Aesea 57:15; Sam 123:1) Be tabu speret blong hem, olsem paoa blong hem, i kasem evri ples, long heven mo long wol. Long tabu speret ya blong hem, God i bin mekem heven, mo wol, mo olgeta samting we oli gat laef. (Sam 33:6; Jenesis 1:2; Sam 104:30) Blong mekem olgeta samting ya, God i sanem tabu speret blong hem, olsem paoa blong hem. God i stap longwe nomo, be tabu speret ya i stap wokem ol samting. !Hem ya i nambawan God ya!—Jeremaea 10:12; Daniel 4:35.

FASIN BLONG GOD

10. ?Wanem wan rod blong faenemaot ol fasin blong God?

¹⁰ ?Sipos yumi savegud long God, yu ting se bambae yumi laekem hem? Ating yes. ‘?Be olsem wanem yumi save faenemaot ol fasin blong hem, from yumi no save luk hem?’ (Jon 1:18) Baebol i soemaot rod blong samting ya, i se: “Yumi no save luk ol fasin ya blong hem stret long ae blong yumi. Hem i God we i blong stap oltaem, mo paoa blong hem i no save finis. Be i stat long taem ya we God i mekem wol ya fastaem, i kam kasem naoia, hem i bin mekem ol fasin ya blong hem oli klia, blong yumi luk. Yumi save faenemaot long ol samting blong wol ya, we hem i bin mekem.” (Rom 1:20, NTB) Ol samting we God i bin mekem, oli save halpem yumi blong faenemaot ol fasin blong hem. Be yumi mas lukluk mo tingting gud long ol samting ya.

11. ?Ol samting we God i bin wokem, oli halpem yumi blong faenemaot wanem long God?

¹¹ !Taem yumi lukluk olgeta sta long heven, yumi luksave we God i hae tumas, mo paoa blong hem i nambawan! (Sam 8:3, 4; Aesea 40:26) Mo tingbaot wol ya. God i putum wol ya long medel blong ol sta long heven, be i putum long ples we i stret nomo. From san, wol ya i no kol tumas, mo i gat gud laet i saen long hem. Mo tu, i gat ren blong wasem wol. Ren ya i fulumap olgeta reva, nao wora blong olgeta ya i ron i godaon long solwora. San i saen long solwora ya, nao i leftemap samfala wora ya blong hem olsem smok, i go antap long skae blong mekem klaod i wokem ren bakegen. (Eklesiastis 1:7) !Mo God i bin mekem plante samting blong givim kakae, mo blong wokem haos, mo blong halpem ol man mo anamol long ol samting we oli nidim! ?Ol gudfala samting ya oli soemaot God i wanem kaen God? Hem i wan God we i waes tumas, mo hem i wantem tumas blong givhan mo lukaot long olgeta evriwan.—Proveb 3:19, 20; Sam 104:13-15, 24, 25.

12. ?Bodi blong yumi i tijim yumi we God i wanem kaen God?

¹² Tingbaot bodi blong yumi. Hem i save mekem plante samting, i no blong stap nomo. God i mekem yumi olsem we yumi save wokem plante gudfala samting we oli blong mekem laef blong yumi i glad. (Sam 139:14) Ae blong yumi i save lukluk olgeta defren kala, i no blak no waet nomo. Wol ya i fulap long plante kaen kala, we oli naes tumas long ae blong yumi. Yumi save smelem mo testem ol defren kaen samting. Taswe taem yumi stap kakae, smel mo tes blong hem i mekem yumi i harem gud. Sipos yumi no save lukluk ol kala, mo yumi no save smelem mo testem ol gudfala samting, bambae yumi save laef yet ya. Be ol samting ya oli olsem ol gudfala presen we God i givim long yumi, from we hem i lavem yumi tumas, mo oltaem hem i stap tingbaot ol samting we oli gud long yumi.—Jenesis 2:9; 1 Jon 4:8.

13. ?Wanem fasin ya we God i soemaot long ol man?

¹³ God hem i laekem olgeta fasin we oli stret nomo. Long ae blong hem, olgeta laen blong man oli sem mak nomo. (Wok 10:34, 35) Hem i sore long ol man, mo hem i kaen gud. God i bin tekemaot ol man Isrel long Ijip blong mekem olgeta oli fri bakegen. Nao Baebol i tokbaot fasin blong God, we hem i soemaot long ol man Isrel, i se: “Hem i sore tumas long olgeta; . . . mo oltaem hem i stap tingbaot we olgeta oli man nomo.” Be plante taem ol man Isrel oli no wantem harem God. Nao God i harem nogud from. Baebol i talem se: “Olgeta oli mekem hem i harem nogud . . . mo oli mekem tingting blong Tabu God blong Isrel i harem i soa.” (Sam 78:38-41; 103:8, 13, 14) Be taem ol man blong hem oli bin harem ol loa blong hem, God i glad tumas. (Proveb 27:11) Mo taem ol enemi oli mekem nogud long ol man blong hem, God tu i harem nogud. Hem i talem se: “Hem ya we i tajem yufala, i stap tajem ae blong mi.” (Sekaraea 2:8) ?Yu yu lavem God ya we i kaen tumas long olgeta laen blong man blong evri ples? !Ating yes!—Aesea 40:22; Jon 3:16.

?GOD HEM I JISAS, NO WAN TRINITI?

14. ?Triniti i tijim wanem?

¹⁴ ?Hu ya gudfala God ya? Sam man oli talem se nem blong hem, Jisas. Sam narafala man oli talem se hem i wan Triniti, be wod ya “triniti” i no stap long Baebol. Tijing blong Triniti ya i talem we i gat tri man insaed long wan God, olsem i gat “wan God, Papa, Pikinini mo Tabu Speret.” Plante skul oli stap tijim samting ya, nating oli agri se triniti ya i olsem wan “tok haed.” ?I tru we God i olsem wan triniti?

15. ?Olsem wanem Baebol i soemaot we God mo Jisas tufala i no sem man, mo paoa blong tufala i no sem mak?

¹⁵ ?Jisas i bin talem se hem i God? No gat. Neva hem i tok olsem. Baebol i kolem hem “Pikinini blong God.” Mo Jisas i bin talem se: “Papa hem i hae moa long mi.” (Jon 10:34-36; 14:28) Mo tu, Jisas i eksplenem we hem, mo olgeta enjel, oli no save long samfala samting, be God nomo i save. (Mak 13:32) Mo Jisas i prea long God, i se: “Be yu no mekem olsem we mi mi wantem, yu mekem olsem we yu nomo yu wantem.” (Luk 22:42) Sipos Jisas i God, hem bambae i no prea long hem wan. ?I tru no? Biaen long ded blong Jisas, Baebol i talem se: “God i mekem Jisas ya i laef bakegen finis long ded.” (Wok 2:32) God ya we i gat olgeta paoa, mo Jisas, tufala i no sem mak. Samting ya i klia gud. Taem Jisas i stanap i laef bakegen long ded, nao afta hem i bin go antap long heven, hem i no hae olsem Papa blong hem.—1 Korin 11:3; 15:28.

16. ?Olsem wanem yumi save we Jisas hem i no God ya we i gat olgeta paoa?

¹⁶ Be maet samfala man i askem se: ‘?Ating long Baebol oli kolem Jisas god, no no gat?’ Tok ya i tru ya. Be oli kolem Setan god tu. (2 Korin 4:4) Jon 1:1 i yusum nem ya “Tok,” blong talemaot Jisas. Samfala translesen blong Baebol oli raetem se: “Long fastaem, taem olgeta samting oli no stap yet, Tok i stap, mo Tok ya i stap wetem God, mo Tok ya hem nao i God.” Be lukluk gud long vas 2. Hemia i talem se Tok ya “i stap wetem God long fastaem, taem ol samting oli no stap yet.” Plante man oli bin lukluk Jisas, be vas 18 i talem se: “I no gat man we i luk God samtaem.” (Authorized no King James Version) Taswe samfala translesen oli tanem gud vas 1 ya, blong mining blong hem i stret nomo long lanwis ya we oli raetem Baebol long hem long fastaem. Oli raetem se: “Tok ya i stap wetem God, mo Tok ya i tabu,” no hem i “wan god.” Hemia i minim se Tok ya i gat bigfala paoa, olsem wan god. (An American Translation) I klia nomo blong luksave se Jisas i no God ya we i gat olgeta paoa. Jisas i bin tokbaot Papa blong hem i se “God blong mi,” mo “yu nomo yu God tru.”—Jon 20:17; 17:3.

17. Tabu speret i kafsaed long ol man blong Jisas, ?nao blong wanem samting ya i soemaot we hemia i no wan man?

¹⁷ ?Be weswe long “Tabu Speret”? Hemia i no namba tri man long Triniti, from we yumi luksave finis se hemia i no wan man, be hemia i olsem paoa blong God we i stap mekem olgeta wok blong hem. Jon Baptaes i bin talem we Jisas bambae i baptaesem ol man long tabu speret, olsem we Jon i bin baptaesem olgeta long wora. Wora i no wan man, nao i sem mak long tabu speret, hemia tu i no wan man. (Matyu 3:11) Tok profet ya blong Jon i bin kamtru biaen long taem ya we Jisas i ded, mo hem i stanap i laef bakegen. Ol man blong Jisas oli stap wan ples long Jerusalem, nao “tabu speret i kam fulap long olgeta.” (Wok 2:4) ?Yu ting se oli fulap long wan man? No gat. Be oli fulap long paoa blong God. Ol samting ya oli soemaot i klia gud, se Triniti i no wan tijing blong Baebol. Longtaem bifo we Jisas i kam long wol, ol man long Ijip mo Babilon oli bin mekem wosip long olgeta god we oli triniti god—olsem ol god we oli olsem 3 man, no trifala haf.

NEM BLONG GOD

18. (a) ?“God” i nem blong God ya we i gat olgeta paoa? (b) ?Wanem prapa nem blong hem?

¹⁸ Ol man oli gat nem. God tu i gat nem blong hem, blong makem hem i narakaen long olgeta narafala god. Sam man oli talem se: “Nem blong hem i ‘God’ nomo.” Be tok ya i no stret. Wod ya “God” i olsem wan tok blong soemaot hem i olsem wanem. Hemia i sem mak long ol tok ya “Presiden” no “King” no “Jaj.” Oli blong soemaot ol man ya oli olsem wanem. Baebol i talemaot nem blong God kolosap 7,000 taem. Long King James Version, long Sam 83:18, oli raetem se: “Blong ol man bambae oli savegud yu, we nem blong yu nomo JEOVA, se yu yu hae moa long olgeta wol.” Mo long plante Baebol, long Revelesen 19:1-6, nem blong God i stap long tufala tok ya Alleluia no Hallelujah. Tok ya i minim se “presem Jah,” we hemia i wan sotfala nem blong Jehovah (Englis).

19. (a) ?Blong wanem sam oli sapraes blong faenem nem blong God long Baebol blong olgeta? (b) ?Nem ya i stap long weples long King James Version?

¹⁹ Samfala man oli sapraes tumas taem oli ridim nem blong God long Baebol blong olgeta. ?Blong wanem? From we Baebol blong olgeta kolosap i no yusum nem ya blong God. King James Version i yusum nem ya Jeova long Eksodas 6:3, Sam 83:18 mo Aesea 12:2 mo 26:4. Be taem Baebol ya i tanem nem blong God i kam “Masta” no “God,” oltaem hem i raetem long bigfala leta, olsem MASTA mo GOD. Hemia i blong soemaot we mining blong hem i no sem mak long “Masta” mo “God.” Long Sam 110:1 yumi save faenem fasin ya.

20. (a) ?Blong wanem plante taem ol man oli no bin yusum nem blong God? (b) ?Oli mas yusum?

²⁰ Be maet yu askem se: ‘?Blong wanem oli no yusum nem blong God long ol vas ya we prapa Baebol blong bifo i raetem? ?Blong wanem tufala wod ya, MASTA mo GOD, i tekem ples blong prapa nem blong God?’ Long fas tok blong American Standard Version, oli eksplenem blong wanem Baebol ya i yusum nem blong God, Jeova, mo blong wanem oli no yusum bifo. “Olgeta we oli wokem nyufala American Standard Version ya, oli bin tingtinggud long ol bisnes blong Tabu Nem ya. Nao olgeta evriwan oli agri, se kastom blong man Jyu we i mekem olgeta oli no moa talemaot Nem ya, from we oli ting se Nem ya i tabu tumas, hemia i no stret kastom blong folem long Englis, no long enikaen narafala translesen . . . Nem ya [blong God], we hem i impoten tumas, oli putum bakegen insaed long tabu raeting ya, from we nem ya i gat raet long samting ya.” Yes, olgeta man we oli bin wokem Englis translesen ya, oli no agri long risen ya blong tekemaot nem blong God. Taswe oli putum bakegen long Baebol, long ol stret ples blong hem.

21. ?Katolik Douay Version i talem wanem long nem ya Jeova?

²¹ Samfala man oli talem se wod ya “Jeova,” i no rili nem blong God, nao i nogud ol man oli yusum. Baebol blong skul Katolik, Douay Version, i no yusum nem blong God, be long futnot blong Eksodas 6:3 oli raetem se: “Samfala man long taem blong yumi, oli raetem nem ya, Jeova . . . Be from we nem [blong God] i kamaot long lanwis blong Hibru, nao blong longtaem oli no yusum nem ya, taswe naoia yumi no moa save stret wei blong talemaot, be ol man blong bifo nomo oli save.”

22. (a) ?Olsem wanem oli raetem nem blong God long lanwis blong Hibru? (b) ?Blong wanem yumi no moa savegud long stret fasin blong talemaot nem blong God?

²² Olsem we Katolik Baebol i talem, nem blong God i stap long ol Hibru raeting blong Baebol. Oli bin raetem fas 39 buk blong Baebol long lanwis ya. Nao taem oli raetem, oli yusum fo Hibru leta ya, YHWH. Bifo longtaem, lanwis blong Hibru ya i no gat ol vowel (olsem a, e, i, o, u) long raeting blong hem. Ol vowel oli halpem yumi blong savegud long stret fasin blong talemaot ol wod. Nao from samting ya, yumi no moa save gud se wanem ol vowel ya we ol man Hibru oli bin putum insaed long ol consonant ya YHWH, taem oli tok.

23. ?Olsem wanem fasin blong raetem tok ya i kam “wksp,” i save halpem yumi long trabol ya blong nem blong God?

²³ Blong halpem yumi blong save long samting ya, tingbaot wod ya “woksap.” Sipos ol man oli stat blong raetem “wksp” nomo, mo ol man oli no moa talemaot wod ya. Nao sipos 1,000 yia i pas, mo insaed long taem ya neva wan man i harem wod ya. Mo tu, i no gat man we i save wanem ol vowel ya we bifo oli stap long wod ya. ?Yu ting se bambae i gat man we i save talemaot wod ya “wksp,” taem hem i stap ridim long buk? Bambae hem i no save ya. Oraet, i sem mak long nem blong God. I no gat wan man we i save talemaot stret. Samfala man we oli stadi gud long samting ya, oli ting se “Yahweh” i stret. Be blong plante handred yia finis, plante man oli bin kolem nem ya, Jeova.

24. (a) ?Blong wanem i stret blong yusum nem blong God? (b) ?Blong wanem hem i impoten blong yusum nem blong God, olsem ol Wok 15:14 i soemaot?

²⁴ ?From we yumi no savegud olsem wanem blong talemaot nem blong God, yu ting se i gud we yumi stap yusum nem ya? I gat plante narafala nem long Baebol we yumi no stap talemaot long prapa wei, be yumi stap yusum ol nem ya yet. Nem blong Jisas long Hibru lanwis, i olsem “Yesh’ua.” Olsem ya nao, i stret nomo blong yusum nem ya blong God we Baebol i soemaot long yumi. Sipos yumi kolem nem ya “Yahweh,” no “Jeova,” no yumi talemaot defren bakegen long lanwis blong yumi, be i gud nomo. Be i nogud sipos yumi no yusum nem ya. ?Blong wanem? From we ol man we oli no yusum nem ya, oli no save joen wetem olgeta ya we Jeova i wantem we oli olsem wan “kampani blong holem nem blong hem.” (Wok 15:14) Yumi mas savegud long nem blong God, mo yumi mas presem nem ya long fes blong ol man, olsem Jisas tu i bin mekem taem hem i stap long wol ya.—Matyu 6:9; Jon 17:6, 26.

GOD I GAT PLAN BLONG HEM

25. (a) ?Wanem samting ya blong God we tingting blong yumi i no naf blong save long hem? (b) ?Blong wanem Jeova i wantem wokem ol speret man?

²⁵ Jeova i no bin stat samtaem, mo neva bambae i save lus. Hem i “King we i no save finis.” Tingting blong yumi i no naf blong save long samting ya. (Sam 90:2; 1 Timote 1:17) Bifo we hem i wokem ol samting, Jeova i stap hem wan nomo. Be tingting blong hem i no hevi from samting ya, from we hem i gud olgeta, hem i no sot long wan samting. Hem i gat lav, taswe hem i wantem givim laef long ol narafala man, blong oli save glad. Fastaem hem i wokem ol speret man, olsem hem. Hem i wokem oli kam plante, olsem wan bigfala kampani blong hem. Long taem ya, wol i no stap yet. Jeova i wantem we ol speret pikinini ya blong hem oli glad long laef blong olgeta, mo blong oli hapi long ol wok ya we hem i givim long olgeta.—Job 38:4, 7.

26. ?Blong wanem wil blong God i mas kamtru long wol?

²⁶ Taem Jeova i wokem wol finis, hem i putum Adam mo Iv long haf blong wol ya we i olsem wan paradaes. Hem i wantem we tufala i tekem pikinini, we oli harem mo wosip long hem, mo we oli wok blong mekem paradaes ya i kam bigwan i kasem evri ples long wol. (Jenesis 1:27, 28) Be yumi lanem finis we samting i blokem plan ya blong God. Adam mo Iv, tufala i no wantem harem God, nao taswe wil blong God i no kamtru yet. Be bambae wil blong hem i mas kamtru ya. !Neva Jeova i save letem sam narafala man i winim hem! Hem i talem, i se: “Ol samting we mi mi glad long hem, bambae mi mekem . . . Mi mi talemaot finis, nao bambae mi mi mekem ol samting ya oli kamtru.”—Aesea 46:10, 11.

27. (a) ?From wanem bambae God i skelem yumi long kot blong hem? (b) ?Wanem kwestin ya we yumi mas tingtinggud long hem?

²⁷ ?Yu yu stap wea long plan blong God? I nogud yu yu mekem ol samting we yu nomo yu wantem, be yu no tingbaot wil blong God. Setan mo Adam mo Iv, trifala i mekem olsem. Oli savegud long wil blong God, be oli no mekem. Olsem ya nao, God i skelem olgeta long kot. ?Yumi tu, yumi mas pas long kot blong God? Yes, from we God hem i stampa blong laef blong yumi. Laef blong yumi i stap long han blong hem nomo. (Sam 36:9; Matyu 5:45) ?Olsem wanem ol fasin blong laef blong yumi, oli laenap wetem ol plan ya we God i wantem mekem oli kamtru long yumi? Yumi mas tingtinggud long samting ya, from we itenel laef blong yumi i dipen long hem.

OLSEM WANEM BLONG MEKEM WOSIP LONG JEOVA

28. ?Samfala man oli stap yusum wanem taem oli wosip long God?

²⁸ Fasin blong wosip long Jeova, hemia i impoten tumas. Yumi mas wosip long hem long fasin we hem i talem, nating sipos fasin ya i defren long wei we oli bin tijim yumi long hem. Samfala man oli stap yusum ol tabu ston, no pija blong wan samting we oli katem long wud, long wosip blong olgeta. Oli mekem from kastom. Be maet oli talem we oli no rili wosip long ston no wud ya, be samting ya i halpem olgeta nomo blong mekem wosip long God. ?Be yu ting se God i wantem we yumi stap wosip long hem long ol tabu ston no wud ya?

29. ?Olsem wanem Baebol i soemaot we i no stret blong yusum ol pija blong enikaen samting we ol man oli katem, blong mekem wosip long God?

²⁹ Hem i no wantem ya. From sem risen ya, Moses i bin talem long ol man Isrel we neva God hem i soemaot hem wan long fes blong olgeta, long rod blong tabu ston no samting olsem. (Dutronome 4:15-19) Wan blong Ten Komanmen, i talem se: “Yu no mas katem wan tabu wud, no mekem wan pija blong enikaen samting . . . yu no mas bodaon long olgeta, no mekem wok blong olgeta.” (Eksodas 20:4, 5, Jerusalem Bible blong Katolik) Yumi mas mekem wosip long Jeova nomo. Plante taem Baebol i soemaot we i nogud nating blong wokem wan pija long enikaen samting, no blong foldaon long fes blong samting ya, no blong mekem wosip long enikaen man, no long enikaen samting. Be yumi mas mekem long Jeova nomo.—Aesea 44:14-20; 46:6, 7; Sam 115:4-8.

30. (a) ?Jisas, mo samfala aposol blong hem, oli talem wanem blong soemaot we ol tabu ston no wud, oli nogud? (b) ?Dutronome 7:25 i talem we yumi mas mekem wanem wetem ol pija ya we ol man nomo oli katem?

³⁰ Neva Jisas i bin yusum ol tabu ston no wud, long wosip blong hem. Hem i talem se: “God, hem i speret, mo olgeta we oli stap mekem wosip long hem, oli mas mekem long speret mo long fasin we i tru.” (Jon 4:24) Ol man blong Jisas, oli bin harem tok ya blong hem. Neva oli yusum pija blong enikaen samting, blong halpem olgeta long mekem wosip. Aposol Pol, i raetem se: “Fasin blong laef blong mifala i stap stanap long bilif blong mifala, i no stanap long ol samting we mifala i stap luk.” (2 Korin 5:7) Mo aposol Jon i tok blong wekemap yumi, i se: “Yufala i mas lukaotgud long yufala, blong ol gyaman god ya we ol man oli mekem, bambae oli no save pulum yufala.” (1 Jon 5:21) ?Yu yu stap harem tok ya? I gud sipos yu yu lukraon long haos blong yu, blong faenemaot.—Dutronome 7:25.

31. (a) Maet yumi no save long risen blong samfala loa, ?be blong wanem yumi wantem harem olgeta yet? (b) ?Yumi mas hadwok long wanem?

³¹ Sipos yumi mekem wosip long Jeova long fasin ya we hem i talemaot, bambae yumi save glad tumas. (Jeremaea 14:22) Baebol i soemaot we ol loa we God i givim long yumi oli blong lukaot long yumi, mo oli halpem yumi blong bambae yumi save kasem gudfala laef we i no save finis. Samtaem yumi no save blong wanem samfala loa ya oli impoten, no olsem wanem ol loa ya oli save halpem yumi. Be yumi mas bilif se save blong God i winim save blong yumi, nao taswe yumi mas glad blong harem hem long ol samting. (Sam 19:7-11) Yumi mas hadwok blong lanem gud ol samting long saed blong Jeova. Baebol i talem se: “Yumi kam, yumi mekem wosip, mo yumi foldaon long fes blong Jeova, we Hem i bin wokem yumi. Hem i God blong yumi, mo yumi olgeta i stap kasem kakae long hem, mo yumi olsem ol sipsip we oli stap long han blong hem.” (Sam 95:6, 7) !I gud we yumi tu i mekem olsem!

[Tok blong pija long pej 34, 35]

Sipos man i wokem haos, . . . ol sta tu oli mas gat Man we i mekem olgeta

[Tok blong pija long pej 39]

From we Jisas i askem long God blong mekem ol samting we Hem nomo i wantem, i no mekem olsem we Jisas i wantem, taswe yumi save se tufala i no sem mak

[Tok blong pija long pej 41]

?Sipos tabu speret hem i wan man, olsem wanem hem i save fulap long kolosap 120 man blong Jisas long wantaem nomo?

[Tok blong pija long pej 45]

?I stret blong yusum ol pija we man nomo i katem, blong mekem wosip?