Japta 27

Olsem Wanem Prea i Save Halpem Yu

1. ?Wanem samting ya blong God we yumi nidim, mo olsem wanem yumi save kasem samting ya?

BLONG OL RABIS fasin blong wol i no save pulum olgeta, ol Kristin oli nidim prea blong givhan long olgeta. Jisas i talem se: “Be Papa we i stap long heven [bambae i] givim tabu speret long olgeta we oli askem long hem.” (Luk 11:13) Yumi nidim tabu speret blong God, olsem paoa ya blong hem we i stap wokem ol samting. Mo yumi mas stadi long Tok blong hem, mo yumi mas joen wetem ogenaesesen blong hem. Be blong kasem tabu speret ya, yumi mas prea from.

2. (a) ?Prea i olsem wanem? (b) ?Wanem ol defren kaen prea? (c) ?Blong wanem prea i impoten?

² Prea i olsem toktok long God, be toktok ya i mas gat respek. Maet prea ya i blong askem wan samting, olsem yu askem long God blong givim samfala samting long yu. Be prea i save talem tangkyu long God tu, no i save presem God. (1 Kronikel 29:​10-13) Blong yumi save fren gud wetem Papa blong yumi long heven, yumi mas stap toktok long hem long prea. (Rom 12:12; Efesas 6:18) Paoa ya blong God, yumi save kasem sipos yumi askem. Paoa ya i save mekem yumi strong, blong bambae yumi naf blong mekem wil blong God, nating sipos Setan no wol blong hem i stap mekem ol trabol long yumi, no i traem pulum yumi.​—1 Korin 10:13; Efesas 3:20.

3. (a) ?Wanem paoa ya we yumi save kasem long God? (b) ?Yumi save frengud wetem Jeova long wanem rod nomo?

³ Maet yu yu stap mekem samfala fasin we i nogud long ae blong God, be i strong tumas blong sakem. Sipos i olsem, yu mas askem givhan long Jeova. Yu mas prea long hem. Aposol Pol tu i mekem olsem, i talem se: “Mi mi naf blong mekem evri samting long paoa blong hem we i stap mekem mi mi strong.” (Filipae 4:13; Sam 55:22; 121:​1, 2) Wan woman we i sakem wan fasin nogud blong hem, i talem se: “Hem nomo i gat paoa blong halpem yu blong sakem nogud fasin olsem. Yu mas fren gud wetem Jeova, mo rod blong samting ya, hemia nao, prea.”

4. ?Olsem wanem wan man ya i kasem paoa blong sakem fasin blong smok?

⁴ Be maet wan man i talem se: ‘Blong plante taem finis mi prea long God blong hem i halpem mi, be mi stap mekem ol nogud samting yet.’ Samfala man we oli stap smok, oli talem sem mak. Nao fren blong wan man olsem, i askem i se: “?Yu yu prea long wanem taem?” Nao hem i ansa, i se: “Long tudak ya, bifo we mi mi go slip. Mo long moning, taem mi mi girap. Mo taem mi smok finis, mi talem long Jeova we mi mi sore tumas from nogud samting ya we mi mi mekem.” Nao fren blong hem, i talem long hem, i se: “Be stret taem blong askem givhan long God, hemia nao taem ya we yu wantem smok. ?I stret no? Hemia nao i stret taem blong prea long Jeova, blong hem i givim paoa long yu.” Nao taem man ya i mekem olsem, Jeova i bin halpem hem blong sakem rabis fasin ya blong smok.

5. (a) ?Blong mekem wok blong God, yu mas mekem wanem? (b) ?Olsem wanem yumi save we man i save harem nogud taem i stap sakem fasin blong sin?

⁵ Be hemia i no min se prea long God, mo stadi long Baebol, mo fasin blong joen wetem ogenaesesen blong God, bambae oli mekem i isi long yu blong mekem ol samting we i stret nomo. Yu mas traehad yet, yes, yu mas mekem wan strong faet, mo long faet ya maet bambae yu harem nogud tumas. (1 Korin 9:27) Ol rabis fasin we man i stap mekem, i save mekem we hem i wantem tumas ol nogud samting. Taswe taem man i no moa wantem mekem ol fasin blong sin, bambae hem i save harem nogud tumas from. ?Yu yu wantem harem nogud, blong bambae yu save mekem ol stret samting?​—1 Pita 2:​20, 21.

OL PREA WE GOD I HAREM

6. (a) ?Blong wanem i strong long plante man blong mekem prea? (b) ?Yumi nidim wanem blong God bambae i save harem prea blong yumi?

⁶ I strong long plante man blong mekem prea. Wan yang woman i talem se: “I no isi nating long mi blong mekem prea long [God] we mi no save luk hem.” From we i no gat man we i luk God samtaem, yumi mas gat bilif blong prea long God, mo blong bambae hem i save harem yumi. Yumi mas bilif se Jeova i tru i stap, mo hem i save mekem samting ya we yumi askem. (Hibrus 11:6) Sipos bilif blong yumi i olsem mo sipos hat blong yumi i stret, bambae God i save halpem yumi. (Mak 9:23) Konilyas, we hem i kapten long ami blong Rom bifo, hem i no stap long ogenaesesen blong God. Be taem hem i prea, God i harem hem, from we hat blong Konilyas i stret.​—Wok 10:​30-33.

7. (a) ?God i laekem wanem kaen prea? (b) ?God i no lesin long wanem kaen prea?

⁷ Samfala man oli no save toktok gud. Be samting ya i no mas blokem olgeta blong prea long God. Hem i save ol samting we yumi nidim, mo hem i save wanem samting ya we yumi wantem talem long hem. (Matyu 6:8) Tingbaot hemia: ?Weswan toktok ya blong pikinini yu yu laekem moa​—hemia we i blong hem i talem tangkyu tumas long yu, no hemia we i no blong hem be i olgeta spesel toktok nomo we wan narafala i talem long hem fastaem? Papa blong yumi long heven hem i laekem ol toktok we i no strong, we i kamaot long hat blong yumi. (Jemes 4:6; Luk 18:​9-14) I no gat nid blong yusum ol spesel toktok, no ol spesel toktok blong jyos. God i no wantem lesin long olgeta ya we oli stap prea long toktok we i narakaen, no we i flas tumas, blong leftemap olgeta long ae blong ol narafala man. Mo tu, hem i no lesin long olgeta ya we oltaem oli stap talem sem samting nomo, long fasin we i no kamaot long hat.​—Matyu 6:​5, 7.

8. (a) ?Wanem i soemaot we God i save harem ol prea we yumi mekem long tingting nomo? (b) ?Baebol i talem we yumi mas stap long spesel ples, no yumi mas gat wan spesel fasin blong mekem prea?

⁸ Nating sipos yu prea long tingting blong yu nomo, be God i save harem. Taem Nehemaea i mekem olsem, God i ansa long prea blong hem. Mo i mekem sem mak long Hana. (Nehemaea 2:​4-8; 1 Samuel 1:​11-13, 19, 20) Mo tu, taem yu stap prea i nating sipos yu stap stanap, no sidaon, no yu stap olsem wanem. Hemia i no impoten ya. Mo yu save prea long enitaem, mo long eniples. Be Baebol i soemaot we i gud blong mekem long fasin we i mekem tingting i stap daon, olsem benem hed no nildaon. (1 King 8:54; Nehemaea 8:6; Daniel 6:10; Mak 11:25; Jon 11:41) Mo Jisas i soemaot se i gud blong mekem prea blong yumi wanwan long ples we i kwaet, we i no gat man blong lukluk.​—Matyu 6:6.

9. (a) ?Yumi mas mekem ol prea blong yumi oli go long hu? ?Blong wanem? (b) ?Blong God i save glad long ol prea blong yumi, yumi mas prea long nem blong hu?

⁹ Prea i olsem haf blong wosip blong yumi. Taswe yumi mas mekem ol prea blong yumi i go long Hem we i mekem yumi, God Jeova. Yumi no save mekem i go long narafala. (Matyu 4:10) Mo Baebol i soemaot we ol Kristin oli mas prea long God tru long Jisas, we hem i givim laef blong hem blong tekemaot ol sin blong yumi. Hemia i min se yumi mas mekem ol prea blong yumi, long nem blong Jisas.​—Jon 14:​6, 14; 16:23; Efesas 5:20; 1 Jon 2:​1, 2.

10. (a) ?God i no laekem ol prea blong hu? (b) ?Blong God i save lesin long ol prea blong yumi, fastaem yumi mas mekem wanem?

¹⁰ ?Be yu ting se olgeta kaen prea oli save mekem God i glad? Baebol i talem se: “Man we i no wantem lesin long loa​—be prea blong hem i rabis nomo.” (Proveb 28:9; 15:29; Aesea 1:15) Blong God i save lesin long ol prea blong yumi, fastaem yumi mas mekem ol samting we hem i wantem, yumi mas obei long ol loa blong hem. Sipos yumi no mekem olsem, bambae God i no save lesin long yumi. Hemia i sem mak long wan stret man we i no wantem lesin long samfala rabis toktok long radyo. Baebol i talem se: “Nao sipos yumi askem sam samting long hem, bambae yumi save kasem, from we yumi stap folem ol loa blong hem, mo yumi stap mekem ol fasin, we hem i glad long hem.”​—1 Jon 3:22.

11. ?Olsem wanem yumi save traehad blong mekem ol samting we yumi stap prea from?

¹¹ Ol samting we yumi stap prea from, yumi mas traehad blong mekem. Olsemia: I no stret sipos wan man i askem long God blong i halpem hem blong sakem fasin blong yusum tabak no marijuana, nao afta man ya i go blong pem bakegen. Mo hem i no save askem Jeova blong i givhan long hem blong ronwe long ol fasin nogud, nao afta hem i go ridim ol rabis buk, mo i go lukluk ol rabis sinema, mo i go lukluk ol nogud samting long televison. No sipos wan man i no gat paoa, nao plelake i stap pulum hem, ale i no stret we hem i prea long God blong hem i givhan long hem blong sakem fasin ya, nao afta hem i go visitim bakegen ol ples blong plelake. Blong God i save harem ol prea blong yumi, yumi mas soemaot long fasin blong yumi we yumi wantem tumas blong mekem ol samting ya we yumi stap talem long hem.

12. (a) ?Wanem ol samting ya we yumi save prea from? (b) ?Blong God i save glad long ol prea blong yumi, fastaem yumi mas lanem wanem?

¹² ?Wanem ol samting ya long saed blong yumi, we yumi save askem long ol prea blong yumi long Jeova? Enikaen samting we i save mekem yumi frengud moa long Jeova, i gud blong askem. Yumi save prea from bodi blong yumi, blong i stap gud, i no sik. Mo yumi save askem Jeova blong i halpem yumi blong tijim ol pikinini blong yumi, mo ol narafala samting olsem. (2 King 20:​1-3; Jajes 13:8) Aposol Jon i talem se: “Nomata wanem yumi askem we i stret long wil blong hem, be hem bambae i harem yumi.” (1 Jon 5:14) Impoten samting, hemia nao, we ol samting we yumi stap prea from, oli laenap wetem wil blong God. Hemia i min se fastaem yumi mas lanem wil ya blong hem. (Proveb 3:​5, 6) Taem yumi stap prea, yumi mas tingbaot wil blong God, mo tingbaot risen blong ol samting we hem i stap mekem, nao yumi no tingting long ol samting blong yumi nomo. Oraet, sipos yumi mekem olsem, Jeova bambae i harem ol prea blong yumi. Mo long evri dei i stret blong talem tangkyu long Jeova, from ol gudfala samting we i stap givim.​—Jon 6:​11, 23; Wok 14:​16, 17.

13. (a) ?Olsem wanem Jisas i soemaot ol faswan samting we yumi mas talem long prea blong yumi? (b) ?Wanem ol narafala samting ya we yumi mas prea from tu?

¹³ Jisas i givim wan stampa prea long ol man blong hem, blong bambae oli save wanem kaen prea God i save glad long hem. (Matyu 6:​9-13) Prea ya i soemaot we nem blong God, mo we kingdom blong hem, mo we man i harem wil blong hem, oli fastaem. Afta, yumi save prea from ol samting we yumi nidim, olsem kakae long evri dei, mo blong God i fogivim ol sin blong yumi, mo blong hem i no letem ol samting oli kam traem yumi, mo blong hem i blokem Devel Setan i no kam spolem yumi.

OL PREA BLONG HALPEM OL NARAFALA MAN

14. ?Olsem wanem Baebol i soemaot we i impoten blong mekem prea from narafala man?

¹⁴ Eksampel blong Jisas i soemaot we i impoten blong prea from ol narafala man. (Luk 22:32; 23:34; Jon 17:20) Aposol Pol tu i save we ol prea olsem oli gud tumas, mo plante taem i askem sam narafala man blong oli prea from hem. (1 Tesalonaeka 5:25; 2 Tesalonaeka 3:1; Rom 15:30) Taem hem i stap long kalabus, i talem se: “Mi stap tingbaot se bambae God i harem ol prea blong yufala evriwan, nao bambae i tekem mi mi kambak long yufala bakegen.” (Faelimon 22, NTB; Efesas 6:​18-20) I no longtaem, nao Pol i fri long kalabus. Samting ya i soemaot we ol prea ya we ol narafala man oli bin mekem from Pol, oli gud, oli halpem hem.

15. ?Wanem kaen prea ya we yumi save mekem from olgeta ya we yumi lavem tumas?

¹⁵ Mo tu, Pol i bin mekem samfala prea from ol narafala man. “Oltaem mifala i stap prea from yufala . . . blong [God] i mekem yufala i naf blong folem ol fasin we hem i singaot yufala from.” (2 Tesalonaeka 1:​11, NTB) Mo hem i eksplenem long wan narafala kongregesen, i se: “Mifala i stap prea long God, blong yufala i no mekem samting we i no stret . . . be blong yufala i stap mekem ol samting we i gud.” (2 Korin 13:7) I gud blong folem eksampel ya blong Pol, we i stap mekem ol spesel prea from ol man ya we hem i lavem olgeta. “Taem we stret man i prea strong, prea blong hem i save karem plante frut.”​—Jemes 5:​13-16, NTB.

16. (a) ?Yumi mas prea long wanem taem, blong God i givhan long yumi? (b) ?Blong wanem prea i wan samting we i gud tumas long yumi?

¹⁶ Wan minista we i stap mekem Baebol stadi wetem ol narafala man, i askem long olgeta, i se: “?Yu yu stap prea nomo long taem blong mekem Baebol stadi long wan taem wan wik? ?No yu stap prea long sam narafala taem tu?” Blong Hem i givhan long yumi, yumi mas toktok long God. Yumi mas prea plante taem ya. (1 Tesalonaeka 5:17; Luk 18:​1-8) Taem yu stap prea long God, tingting blong yu i mas stap daon, olsem we yu stap toktok wetem wan gudfala fren we yu lavem hem tumas. !I gud tumas blong yu save prea long nambawan Rula blong olgeta yunivas, Hem ya we i stap harem prea, mo blong save we hem i stap lesin long yu!​—Sam 65:2.

[Tok blong pija long pej 227]

?Yu mas mekem wanem taem sigaret i stap traem yu​—prea long God, no smok nomo?

[Tok blong pija long pej 229]

?Yu yu prea blong God i givhan long yu, be afta yu go joen long ol samting we oli save pulum yu blong mekem nogud?

[Tok blong pija long pej 230]

?Yu yu prea taem yu stap yu wan nomo, no taem yu stap wetem sam narafala man nomo?