Japta 30
Wanem Yu Mas Mekem Blong Kasem Itenel Laef
1. (a) ?Wanem tufala rod ya we yu save wokbaot long hem? (b) ?Olsem wanem yu yu save jusum stret rod?
GOD JEOVA i wantem givim wan gudfala samting long yu—itenel laef long wan nyufala stret fasin we bambae hem i mekem i kamaot long wol. (2 Pita 3:13) Be blong kasem samting ya, fastaem yu yu mas mekem ol samting we God i stap wantem naoia. Rabis wol ya blong naoia, wetem olgeta we oli stap long saed blong hem, bambae i finis olgeta, “be man we i stap mekem ol samting we God i wantem, hem bambae i stap foreva.” (1 Jon 2:17) Olsem ya nao, yu mas jusum wan long tufala rod. Wan i go long ded, narawan i go long itenel laef. (Dutronome 30:19, 20) ?Bambae yu yu jusum weswan?
2. (a) ?Sipos bilif blong yu i tru, yu mas bilif wanem? (b) ?Sipos yu yu trastem God, olsem we wan pikinini i stap trastem gudfala papa blong hem, samting ya nao i save halpem yu olsem wanem long wok blong God?
2 ?Olsem wanem yu yu save soemaot we yu stap jusum itenel laef? Fastaem yu mas gat bilif long Jeova mo long ol promes blong hem. ?Yu yu rili bilif we God i stap, “mo we hem bambae i givim pei long olgeta we oli stap traehad blong faenem hem”? (Hibrus 11:6) Yu yu mas trastem God, olsem we wan boe no gel i stap trastem papa blong hem we i gat lav, mo we i kaengud. (Sam 103:13, 14; Proveb 3:11, 12) Sipos yu yu gat bilif we i olsem, bambae tingting blong yu i no seksek, be bambae yu save we ol advaes blong God oli waes, mo we olgeta rod blong hem oli stret, nating sipos samtaem yu no savegud long mining blong samfala bisnes.
3. (a) ?Yu mas gat bilif, mo wanem narafala samting bakegen? (b) ?Wanem ol wok ya we yu mas mekem blong soemaot we yu yu stap jusum laef?
3 Be bilif i no naf. I mas gat wok tu blong soemaot ol tingting we yu yu gat long God. (Jemes 2:20, 26) ?Sipos bifo yu yu mekem samfala samting we i no stret, oraet, yu nao yu mas mekem wanem blong soemaot we yu yu sore from? ?Yu yu tanem tingting blong yu finis? ?Yu yu mekem we naoia fasin blong yu i laenap wetem wil blong God? ?Yu yu sakem finis enikaen fasin nogud we yu bin folem, nao yu stap mekem ol samting we God i wantem? (Wok 3:19; 17:30) Olgeta wok ya nao i save soemaot we yu yu stap jusum laef.
GIVIM LAEF I GO LONG GOD MO BAPTAES
4. (a) ?Wanem samting i mas pulum yu blong mekem wil blong God? (b) ?Taem yu yu mekem disisin finis se yu yu wantem mekem wok blong God, wanem nao i stret samting blong mekem?
4 ?Wanem samting i mas pulum yu blong mekem wil blong God, blong kasem laef? From we yu yu tangkyu tumas long God. Tingbaot hemia: !Jeova i mekem we bambae yu yu save fri long olgeta sik, mo long olgeta samting we oli save mekem yu yu harem nogud nating, mo long ded tu! Jeova i givim pikinini blong hem, blong openem rod long yu blong kasem itenel laef, long paradaes long wol. (1 Korin 6:19, 20; 7:23; Jon 3:16) ?Taem lav blong Jeova i mekem we yu yu stap lavem hem, bambae yu yu mas mekem wanem? (1 Jon 4:9, 10; 5:2, 3) Yu yu mas prea long God long nem blong Jisas, nao yu mas talem long hem we yu nao yu wantem mekem ol wok blong hem mo yu yu man blong hem. Long fasin ya nao yu yu save givim laef blong yu i go long God. Hemia i bisnes blong yu wan nomo. I no gat narafala man we i save mekem blong yu.
5. (a) ?Taem yu yu givim laef blong yu i go finis long God, hem nao i wantem we yu bambae yu mekem wanem? (b) ?Hu ya i save givhan long yu bambae?
5 Taem yu yu givim laef finis i go long God, hem i wantem we bambae yu yu fulumap promes ya blong yu. Soemaot we yu yu no man blong gyaman. Be long olgeta laef blong yu, yu mas mekem disisin ya blong yu i stanap. (Sam 50:14) Sipos yu yu stap kolosap long ogenaesesen ya we God i gat long wol, bambae i gat plante Kristin we oli glad blong enkarajem mo sapotem yu.—1 Tesalonaeka 5:11.
6. (a) ?Taem yu givim laef i go finis long God, Hem nao i wantem we bambae yu mekem wanem? (b) ?Wanem mining blong baptaes?
6 Yu yu mas talemaot long Jeova we yu wantem kam man blong hem. Be antap long samting ya, long fes blong ol narafala man, yu mas soemaot we yu yu givim laef blong yu finis blong mekem wok blong God. ?Olsem wanem yu yu save soemaot samting ya? Long baptaes long wora. Baptaes olsem, i blong soemaot long olgeta man we man ya i givim laef blong hem i go finis long Jeova, nao hem i rere blong mekem ol samting we hem i wantem.
7. (a) ?Wanem eksampel ya we Jisas i soemaot long ol Kristin? (b) ?Blong wanem baptaes ya we Jisas i wantem oli mekem, i no blong ol bebi?
7 Eksampel blong Jisas i soemaot we baptaes long wora i wan impoten samting blong mekem. Jisas i no jes talem nomo long Papa blong hem, se hem i kam blong mekem wil blong hem. No gat. (Hibrus 10:7) Taem hem i rere blong statem wok blong prij, blong talemaot Kingdom blong God, Jisas i kam i putum hem wan i stap aninit long han blong Jeova, nao hem i baptaes long wora. (Matyu 3:13-17) Jisas i soemaot fasin blong folem, nao taswe olgeta we tede oli givim laef blong olgeta blong mekem wil blong Jeova, oli mas baptaes tu. (1 Pita 2:21; 3:21) Jisas i givim oda long ol man blong hem, se oli mas go long ol man long olgeta ples long wol, blong pulum oli kam man blong hem. Mo oli mas baptaesem ol nyufala man ya. Hemia i no wan baptaes blong ol bebi. Hemia i wan baptaes blong ol man we oli bilif finis. Oli mekemap tingting blong olgeta finis, se naoia oli wantem mekem ol wok blong Jeova.—Matyu 28:19; Wok 8:12.
8. ?Sipos yu yu wantem baptaes, yu yu mas talemaot long hu long kongregesen? ?Blong wanem?
8 Sipos yu yu mekemap tingting blong yu finis blong mekem wok blong Jeova, mo yu yu wantem baptaes, oraet, ?yu mas mekem wanem naoia? Yu yu mas talemaot samting ya long presiden elda we i stap lukaot long kongregesen blong Ol Wetnes blong Jeova, long ples blong yu. Hem nao, tugeta wetem sam narafala elda long kongregesen, bambae oli glad blong toktok wetem yu long ol samting ya we yu yu mas save long hem, blong bambae yu save mekem ol wok blong God long fasin we i stret. Afta, oli save rerem baptaes blong yu.
WANEM GOD I WANTEM YU YU MEKEM TEDE
9. ?Bifo long bigfala ren, Noa i mekem wanem we naoia tu God i wantem we yu yu mekem?
9 Bifo long bigfala ren, Jeova i yusum Noa, we hem i wan “man blong talemaot stret fasin,” blong givim woning long ol man, se wol bambae i lus. Mo i talemaot long ol man we bigfala sip ya nomo bambae i sef ples. (Matyu 24:37-39; 2 Pita 2:5; Hibrus 11:7) God i wantem we naoia yu tu yu mekem semkaen wok blong prij. Jisas i talemaot taem blong yumi, i se: “Nao bambae oli stap talemaot gud nyus ya blong Kingdom long olgeta ples long wol, blong oli wetnes blong hem, long fes blong olgeta laen blong man, nao biaen bambae en i save kam.” (Matyu 24:14) Blong bambae oli no save lus wantaem wetem en blong fasin ya blong naoia, mo blong bambae oli save laef foreva, ol narafala man oli mas save long ol samting ya we yu yu lanem finis long saed blong God. (Jon 17:3) ?Olsem wanem long hat blong yu? ?Yu wantem joen long wok ya blong talemaot save ya we i blong halpem man blong kasem laef?
10. (a) ?Sipos yumi lavem ol man, yumi mas wantem folem wanem eksampel blong Jisas? (b) ?Wanem stampa fasin blong wok ya blong prij?
10 Folem eksampel blong Kraes. Hem i no wet blong ol man oli kam long hem. Be hem i go blong faenem olgeta man we oli wantem lesin long mesej blong Kingdom. Mo hem i talem we olgeta man blong hem, oli mas mekem sem mak. (Matyu 28:19; Wok 4:13; Rom 10:10-15) Ol Kristin blong bifo, oli folem oda mo eksampel blong Kraes, nao oli stap go long ol man long haos blong olgeta. Oli stap go “long ol haos” wetem mesej blong Kingdom. (Luk 10:1-6; Wok 20:20) Ol tru Kristin blong tede, oli stap folem sem stampa fasin ya yet.
11. (a) ?Blong wanem yumi mas gat strong tingting blong mekem wok ya? ?Be blong wanem i no nid blong yumi fraet? (b) ?Jeova i tingting wanem long wok ya blong yumi?
11 Tingting blong yu i mas strong blong mekem wok ya. Setan mo wol blong hem bambae oli traem blokem yu, olsem we hem i traem blokem ol man blong Kraes bifo, taem oli stap prij. (Wok 4:17-21; 5:27-29, 40-42) Be i no nid blong yu yu fraet. Jeova i bin halpem mo givim paoa, long ol Kristin blong bifo. Mo hem bambae i mekem sem mak long yu tede. (2 Timote 4:17) !Yu no mas fraet! I gud blong yu yu joen long wok ya blong prij mo tij. Wok ya i save sevem man, mo i soemaot we yu yu rili lavem Jeova, mo ol narafala man tu. (1 Korin 9:16; 1 Timote 4:16) Jeova bambae i no save foget long wok ya blong yu, be hem bambae i givim ol gudfala blesing long yu from.
12. Eksampel ya blong woman blong Lot, i save tijim wanem long yumi?
12 Olfala fasin blong wol ya, i no gat wan gudfala samting blong givim long yu. Olsem ya nao, taem yu yu tanem baksaed long hem, yu no mas sore from. Jisas i talem we yumi mas “tingbaot woman blong Lot”. (Luk 17:32) Taem hem, wetem famle blong hem, oli ronwe long Sodom, woman ya i lukraon long ol samting we oli livim biaen. God i lukluk wanem hat blong hem i stap wantem, nao woman ya i kam wan pos blong sol nomo. (Jenesis 19:26) !I Nogud yu yu olsem woman blong Lot! Yu yu mas lukluk ol samting we oli stap long fored blong yu nomo, hemia nao “laef ya we i prapa wan,” long nyufala stret fasin we God bambae i mekem i kamaot long wol.—1 Timote 6:19.
JUSUM ITENEL LAEF LONG PARADAES LONG WOL
13. ?Jisas i talem we yumi evriwan i mas jus long wanem samting?
13 I gat tufala samting nomo blong jus long hem. Kraes i bin soemaot we yumi save jusumaot wan blong tufala rod nomo. Hem i talem we wan rod “i bigfala mo . . . i isi nomo.” Olgeta we oli stap pas long hem, oli save mekem olsem oli wantem nomo. Be narafala rod ya, hemia i “strong”. Olgeta we oli stap pas long hem, oli mas obei long ol oda mo loa blong God. Jisas i talem we kolosap olgeta man oli stap yusum bigfala rod, be smol man nomo oli stap pas long smol rod ya we i strong. ?Bambae yu yu jusumaot weswan? Bifo we yu yu mekemap maen blong yu, i gud blong tingbaot hemia: !Bigfala rod, hem i gat en blong hem—hem i blong go lus! Be narafala rod ya we i smol, hemia i blong go kasem nyufala fasin blong God. Long ples ya nao, bambae yu yu save givhan blong mekem wol i kam wan gudfala paradaes, wan ples we yu save hapi long hem foreva.—Matyu 7:13, 14.
14. ?Blong kasem laef long nyufala fasin blong God, fastaem yu yu mas stap long wanem samting?
14 Yu yu no mas ting se i gat ol defren rod, no wei, we yu save folem blong kasem laef long nyufala fasin blong God. I gat wan rod nomo. Long taem blong Noa, taem wora i ron bigfala, i gat wan sip nomo we i no lus, i no gat sam narafala sip bakegen. Sem mak bakegen, long taem blong “bigfala trabol tumas” we kolosap i kam, bambae i gat wan ogenaesesen nomo—ogenaesesen ya we God i gat long wol—we bambae i no save lus. Olgeta skul oli no stap lidim ol man oli go wanples nomo. (Matyu 7:21-23; 24:21) Blong kasem laef we i no save finis, yu yu mas stap long ogenaesesen blong Jeova, yu yu mas stap mekem ol samting we God i wantem.—Sam 133:1-3.
15. (a) ?Yumi mas mekem wanem long evri dei? (b) ?Wanem hop ya we i no wan drim nomo?
15 Olsem ya nao, i gud blong oltaem yu yu holem pija blong nyufala fasin ya we God i promes long hem, i stap kliagud long maen mo hat blong yu. Long evri dei yu yu mas tingbaot bigfala presen ya we God Jeova i wantem givim long yu—hemia nao itenel laef long paradaes long wol. Samting ya i no wan drim. !I wan tru samting ya! Promes ya blong Baebol bambae i mas kamtru, se: “Bambae wol i blong ol stret man, mo bambae oli stap long hem foreva. . . . Taem ol rabis man bambae oli lus, yu bambae yu stap lukluk.”—Sam 37:29, 34.
[Tok blong pija long pej 251]
Givim laef blong yu i go long Jeova . . . mo baptaes
[Tok blong pija long pej 253]
“Tingbaot woman blong Lot”
[Tok blong pija long pej 254]
Pija blong nyufala fasin blong God i mas stap i kliagud long maen mo hat blong yu