Japta 17

?Bambae Mi Mi Lego Skul?

JACK i wok long wan skul blong ol pikinini blong 25 yia. Hem i jekemap ol pikinini we oli stap mestem skul. Jack i harem finis evri eskius blong ol pikinini we oli mestem plante dei long skul. Hem i talem se: “Ol pikinini oli talem enikaen eskius nomo olsem: ‘Mi bin ting se bambae mi sik tede.’ . . . ‘Bubu man blong mi i ded long Alaska.’” Eskius we Jack i “laekem” bitim ol narawan, hemia blong tri boe we oli bin talem long hem se: “Mitrifala i no save faenem skul haos ya, from we i gat tumas smok blong moning.”

Ol giaman eskius ya oli soemaot gud olsem wanem plante yangfala oli no laekem skul. Sam long olgeta oli no kea (“!Skul i oraet nomo!”). Be, samfala oli agensem skul fulwan (“Skul i rabis. Mi mi no laekem nating”). Tingbaot Gary. Evri moning, taem hem i mas go long skul, wantaem nomo, bel blong hem i soa. Hem i talem se: “Taem mi mi kam klosap long skul, mi mi swet we mi swet, mo mi fraet tumas . . . Mi harem se mi mas tanraon mo gobak long haos.” Plante yangfala oli harem i sem mak olsem Gary, oli no laekem nating blong go long skul. Ol dokta oli talem se ol yangfala olsem oli gat wan sik long tingting blong olgeta we oli fraet bitim mak blong go long skul. Plante long ol yangfala ya oli fraet from we sam narafala yangfala long skul oli stap kilim olgeta, jikim olgeta, no from we wan bigman i stap fosem olgeta blong kasem ol hae mak. Maet ol yangfala ya oli go long skul (from we papa mama blong olgeta oli strong long olgeta), be tingting blong olgeta i trabol oltaem, mo oli harem nogud long bodi tu.

!From samting ya, yumi no sapraes we plante tumas yangfala oli no moa wantem go long skul! !Long Yunaeted Stet nomo, evri dei, i gat samwe tu milian haf yangfala we oli mestem praemari skul mo haeskul! Niuspepa ya The New York Times i talem se long ol haeskul long New York, fulap yangfala (olsem wan long evri tri yangfala) oli “stap mestem skul oltaem,” mekem se, “klosap ol tija oli no moa save lanem olgeta long wan samting.”

Sam narafala yangfala oli go moa. Yangfala Walter i talem se: “Mi mi les long skul, oli mekem i strong tumas long mifala.” Hem i ronwe long haeskul. Wan gel, nem blong hem Antonia, i mekem i sem mak. Hem i faenem se skul wok i strong tumas. Hem i talem se: “?Olsem wanem mi save mekem wok ya taem mi no kasem save long wanem we mi stap ridim? Mi mi stap sidaon nomo we hed blong mi i sat gud. Taswe, mi mi lego skul.”

I tru se, long olgeta ples long wol, i gat ol bigbigfala trabol long ol skul. ?Be, hemia i mas mekem se yu yu no moa wantem skul mo yu lego? ?Sipos yu yu mekem olsem, wanem i save kamaot long laef blong yu biaen? ?I gud blong gohed blong skul gogo yu kasem stefeket blong yu?

I Impoten Blong Skulgud

Michael i girap, i gobak long haeskul bakegen blong pasem ol eksam blong hem. Taem oli askem long hem from wanem hem i mekem olsem, hem i se: “Mi mi luksave se mi nidim blong skulgud.” ?Be, i minim wanem se yu “skulgud”? ?I minim se yu yu gat bigfala save we i mekem ol narafala oli sek? No gat. Tingbaot, sipos yu yu gat wan bigfala hip brikis, be hemia i no minim se yu gat wan haos.

Taem yu yu skulgud, samting ya i mas mekem yu yu rere from laef blong yu biaen. Allen Austill, wan tija long haeskul blong 18 yia, i tokbaot man we i skulgud, i se: “Skul i mas lanem hem blong tingtinggud, winim trabol, luksave wanem i stret mo wanem i no stret, skelem ol samting wetem klia tingting, kasem plante save, mo luksave olsem wanem ol smosmol save oli joen blong mekem wan bigfala save. Hem i mas kam naf blong jusumaot mo makemaot ol defdefren samting ya. Hem i mas kasem save olsem wanem blong kasem save.”

?Be olsem wanem skul i save givhan long yangfala blong mekem ol samting ya? Plante handred yia finis, King Solomon i raetem ol Proveb ‘blong openem tingting blong man we i no save samting yet, mo blong mekem ol yang man oli waes gud, mo oli gat gudfala tingting.’ (Ol Proveb 1:1-4) Tru ya, ol yangfala oli no save plante samting yet. Be skul i save halpem yu blong yusum tingting blong yu. Hemia i no minim se bambae yu kasem fulap save nomo. Yu yu save kam naf blong tingtinggud long ol save ya tu, mo blong yusum save ya blong givhan long laef blong yu. Plante man oli toktok smol long saed blong rod we sam skul oli yusum blong tijim ol pikinini. Nating se i olsem wanem, be skul i save fosem yu blong yusum tingting blong yu. I tru, ademap ol namba mo lanem baehat ol yia we ol samting oli bin hapen, maet oli no impoten tumas long laef blong yu naoia. Be Barbara Mayer i talem long buk blong hem The High School Survival Guide, se: “Ol pikinini bambae oli no holemtaet evri smosmol save we ol tija oli putum long ol tes blong olgeta long skul. Be, oli lanem olsem wanem blong stadi mo blong plan gud. Ol samting ya nao, oli no save fogetem.”

Tri tija blong yunivesiti oli stadi long laef blong ol man we oli skulgud. Trifala ya i talem se: “Ol man we oli skulgud oli gat moa save, i no long ol samting we oli lanem from ol buk nomo, be long saed blong wol blong yumi tu. Oli stap lukaot moa save oltaem, mo oli save rod blong faenem save ya. . . . Taem oli kam olfala, oli no lusum ol fasin ya, nating se oli no moa skul longtaem finis.”—The Enduring Effects of Education.

Samting we i impoten tumas se, skul i save mekem yu yu naf long ol Kristin wok blong yu. Sipos yu bin lanem blong stadi mo rid gud, bambae i isi long yu blong stadi Baebol. (Ol Sam 1:2) Sipos yu bin lanem blong toktokgud long skul, bambae i moa isi long yu blong tijim narafala long trutok blong Baebol. Ol save long saed blong histri, sayens, jiografi, mo matematik, oli save givhan long yu blong toktok long ol man blong ol narafala ples, narafala bilif, mo ol man we oli gat ol defdefren save.

Skul Mo Wok

Skul i save givhan long yu taem yu wantem faenem wan wok tu. ?Olsem wanem?

Waes King Solomon i tokbaot man we wok blong hem i gud, i se: “Bambae yu luksave we hem i wan man we i gud moa, i winim plante narafala man, mo we hem i naf blong kam man blong wok blong king.” (Ol Proveb 22:29) Tok ya i tru yet tede. Ernest Green, we i wok long Leba Dipatmen long Yunaeted Stet, i talem se: “Sipos yu no gat save long wan wok, bambae yu yu mestem plante janis long laef.”

Taswe, i had long olgeta we oli lego skul blong oli faenem wok. Walter (we yumi tokbaot fastaem finis) i kasem trabol ya. Hem i talem se: “Plante taem, mi mi putum nem blong mi blong kasem wan wok. Be, oli no wantem mi from we mi mi no gat stefeket.” Hem i gohed se: “Mi harem mi sem, taem man i yusum sam tok we mi mi no kasem save long olgeta.”

Plante yangfala we oli gat 16 kasem 24 yia, oli no save faenem wan wok from we oli no bin finisim haeskul. Namba blong olgeta “i tu taem antap long ol narafala yangfala we oli finisim haeskul be oli no gat wok, mo i tri taem antap long ol narafala man we oli no gat wok.” (The New York Times) Philip Rice i talem long buk blong hem, The Adolescent se: “Olgeta we oli no skulgud, oli stap satem doa long fiuja blong olgeta.” Yangfala we i lego skul, ating i no lanem yet ol stamba samting we hem i nidim blong save, jes blong mekem wan isi wok nomo.

Paul Copperman, i raetem long buk blong hem, The Literacy Hoax se: “Wan stadi we oli mekem i no longtaem, i soemaot se man i mas skul kasem fom wan, blong hem i naf blong mekem wok blong kuk, kasem fom tu blong mekem wok blong mekanik, kasem fom tri no fo blong wok long wan ofis.” Hem i gohed se: “From samting ya, i stret blong talem se yangfala we i wantem kam wan tija, nes, akaonten, no enjinia, i mas skul moa gud yet.”

I klia se ol yangfala we oli traehad blong lanemgud ol stamba samting, olsem fasin blong rid, bambae oli gat moa janis blong faenem wan wok. Be skul i save halpem laef blong yu long wan narafala rod tu. ?Wanem rod ya?

Yu Yu Kam Wan Man We i Moa Gud

Rod ya hemia se, yu yu luksave ol samting we yu yu naf blong mekem, mo ol slak fasin blong yu. Michelle i jes faenem wan wok long kompiuta, nao hem i talem se: “Skul i lanem mi blong wok strong mo kwik, i lanem mi olsem wanem blong tekem wan eksam, mo olsem wanem blong talemaot tingting blong mi.”

Wan narafala yangfala i talem se: “Skul i lanem mi blong gat stret tingting long saed blong ol mastik blong mi.” Bifo, taem yangfala ya i mestem, oltaem hem i talem se narafala i mekem hem i mestem, hem i no luksave se hem nomo. Sam yangfala oli luk se fasin blong folem wan program long skul, i givhan long olgeta long ol yia biaen. Plante man oli tok agensem ol skul from strong program we oli folem, se samting ya i stap blokem ol yangfala tumas. Be Solomon i pulum ol yangfala blong kam ‘waes, blong oli save folem ol gudfala advaes.’ (Ol Proveb 1:2) Yes, ol skul we oli folem ol strong rul, oli tijimgud plante yangfala finis blong oli rere oltaem blong lesin long gudfala advaes blong narafala, be blong oli yusum prapa tingting blong olgeta tu.

Taswe, yu yu waes sipos yu tekem janis we yu yu gat naoia blong skul gud. ?Olsem wanem blong mekem olsem? Bambae yumi tokbaot ol skulwok blong yu fastaem.

Ol Kwestin Blong Tokbaot

◻ ?From wanem plante yangfala oli no laekem skul? ?Wanem tingting blong yu long saed ya?

◻ ?Olsem wanem skul i save halpem yu blong kam naf blong tingtinggud?

◻ ?Sipos yu yu lego skul, olsem wanem samting ya i save mekem i had blong faenem wan wok? ?From wanem i olsem?

◻ ?Sipos yu yu gohed blong skul, bambae samting ya i halpem yu long wanem narafala rod tu?

[Tok blong pija long pej 135]

“Mi mi stap sidaon nomo we hed blong mi i sat gud. Taswe, mi mi lego skul”

[Tok blong pija long pej 136]

Strong program we yu mas folem long skul, bambae i save givhan long yu long ful laef blong yu

[Tok blong pija long pej 137]

I had long yangfala blong faenem wan wok sipos hem i no gat ol stamba save we skul i tijim

[Tok blong pija long pej 138]

“Wan stadi we oli mekem i no longtaem, i soemaot se man i mas skul kasem fom wan blong hem i naf blong mekem wok blong kuk, kasem fom tu blong mekem wok blong mekanik, kasem fom tri no fo blong wok long wan ofis”