Japta 25

Man We i Pleplei Wetem Seks Blong Hem—?Hem i Rili Mekem Nogud?

“?Mi mi wantem save sipos i rong long ae blong God blong pleplei wetem seks blong mi? ?Fasin ya i save spolem bodi mo tingting blong mi long fiuja no sipos mi mi mared samtaem?”—Melissa, we i gat fiftin yia.

PLANTE yangfala oli tingbaot ol kwestin ya. ?From wanem? From we fulap man tumas oli stap pleplei wetem seks blong olgeta. Ripot i soemaot se klosap olgeta man (97%) mo woman (bitim 90%) oli mekem fasin ya bifo we oli kasem 21 yia. Mo tu, samfala oli talem se fasin ya i save givim ol kaen sik, olsem strong skin i kamaot long sam ples long bodi, skin blong ae i kam red, sik blong faol, mo sik long tingting.

Ol dokta blong naoia, oli no moa talem olsem. Tede, oli bilif se man we i pleplei wetem seks blong hem bambae i no save kasem wan sik. William Masters mo Virginia Johnson, we tufala i stadi long saed ya, tufala i talem se, “oli no faenemaot se man we i pleplei wetem seks blong hem bambae i sik long tingting blong hem, nating se hem i mekem samting ya oltaem no sam samtaem nomo.” !Be, i gat sam narafala nogud samting we oli save kamaot! Mo i stret we ol yangfala Kristin oli wari long fasin ya. Wan yangfala i raetem se: “Taem mi foldaon long fasin ya [blong pleplei wetem seks blong mi], mi harem se mi stap mekem i nogud long Jeova God. Sam samtaem tingting blong mi i foldaon olgeta.”

?Wanem ya, pleplei wetem seks? ?Fasin ya i nogud olsem wanem? ?From wanem plante yangfala oli faenem i had blong winim fasin ya?

Plante Yangfala Oli Foldaon Long Fasin Ya

Pleplei wetem seks, i min se man i stap tajtajem tabu ples long bodi blong hem blong wekemap filing blong seks. Long ol yangfala, filing blong wantem seks i strong. Sam samting long blad oli gat paoa long ol haf blong bodi we oli blong mekem pikinini. Taswe, maet yangfala i luksave se ol haf ya blong bodi oli save givim wan filing we i mekem hem i haremgud. Samtaem, filing blong yangfala blong wantem seks i save kam antap, nating se hem i no tingbaot samting ya.

Maet wan boe i stap wari, fraet, no harem nogud long wan samting, nao trabol ya i save mekem ol neva blong bodi oli wekemap filing blong hem. Maet hem i stap slip, nao wota blong man i kam plante, ale taem hem i wekap, filing blong wantem seks i kam strong long hem. No ating long naet hem i luk wan drim long saed blong seks nao wota blong man i ron. Sem mak long ol gel, oli save harem ol filing ya tu, nating se oli no tingbaot. Plante long olgeta, filing ya i kam strong long olgeta jes bifo no afta we oli kasem sikmun blong olgeta.

Taswe, sipos yu harem filing ya, hemia i no rong. Olgeta yangfala oli stap kasem filing ya. Nating se filing ya i kam strong, be hemia i no sem mak long fasin blong pleplei wetem seks blong yu. Ol filing oli kamaot olgeta nomo, i no se yu yu mekem olgeta oli kamaot. Taem yu stap kam olfala moa, bambae ol filing olsem oli godaon.

Be, sam yangfala oli wantem save moa long ol niufala filing ya, taswe oli stat blong tajem, no pleplei wetem seks blong olgeta.

‘Samting We Yu Tingting Long Hem’

Baebol i tokbaot wan boe we i mitim wan woman blong rod. Woman ya i kisim hem mo i talem long hem se: “!Ale, yu kam! . . . !Bambae yumitufala i stap glad blong pleplei long naet ya!” ?Nao, wanem i hapen biaen? “Wantaem nomo, hem i go wetem woman ya, olsem wan buluk we i stap wokbaot i go blong oli kilim hem i ded, be hem i no save.” (Ol Proveb 7:7-22) I klia se, filing blong yangfala ya i kam antap, i no from ol samting long blad blong hem, be from samting we hem i luk mo i harem.

Wan boe i talem sem samting, i se: ‘Stamba blong trabol blong mi, hemia samting we mi stap tingting long hem. Mi mi lukluk ol stori long televisin we oli soem ol rabis fasin olsem slip olbaot, mo oli soem ol neked woman tu. Ol pija olsem oli stap longtaem long tingting blong mi, from we oli defren. Oltaem mi stap tingting bakegen long olgeta, mo oli pulum mi blong pleplei wetem seks blong mi.’

Yes, plante taem ol samting we yumi ridim, yumi lukluk, yumi lesin long hem, yumi tokbaot no yumi tingting dip long hem, hemia nao ol samting we oli save pulum yumi blong mekem nogud fasin ya. Wan woman we i gat 25 yia, i talem se: “Mi mi no save stopem doti fasin ya. Oltaem mi stap ridim ol stori blong lav, mo samting ya tu i mekem trabol ya i kam antap moa.”

“Meresin Blong Mekem Tingting i Kwaet”

Tok blong woman ya i soemaot samting we i mekem i hadwok tumas blong winim fasin ya. Hem i gohed moa i se: “Mi mi pleplei wetem seks blong mi taem mi harem nogud, taem mi kasem trabol no mi wari. Hemia i mekem mi mi haremgud blong smoltaem, olsem wan dring we alkolik i tekem blong fogetem ol trabol blong hem.”

Suzanne mo Irving Sarnoff, we tufala i stadi long bisnes ya, tufala i raetem se: “Samfala oli tekem fasin ya blong pleplei wetem seks blong olgeta, taem oli harem se ol narafala oli no wantem olgeta, no taem oli fraet long wan samting. Oli yusum fasin ya blong harem gud bakegen. Be, sam narafala oli mekem fasin ya sam samtaem nomo, taem oli harem nogud bitim mak.” Sem mak long samfala we oli letem fasin ya i winim olgeta taem oli harem nogud long wan samting, taem tingting blong olgeta i foldaon, taem oli harem se oli no gat fren, no taem oli wari tumas. Fasin ya i kam olsem wan “meresin blong mekem tingting i kwaet,” blong oli save fogetem ol trabol blong olgeta.

?Baebol i Talem Wanem?

Wan yangfala i askem se: “?Man we i pleplei wetem seks blong hem, i mekem wan sin we God i no save fogivim?” Baebol i no tokbaot fasin ya nating.b Long taem we oli raetem Baebol, fasin ya i bigwan long ol ples we ol man oli toktok lanwis blong Gris. I gat sam Grik tok blong eksplenem fasin ya. Be i no gat wan long ol tok ya long Baebol.

?Sipos i no gat wan loa long Baebol se man i no mas pleplei wetem seks blong hem, hemia i min se fasin ya i oraet nomo? !No gat! I tru se Baebol i no joenem fasin ya wetem ol bigfala sin olsem slip olbaot. Be man we i pleplei wetem seks blong hem i mekem doti fasin. (Efesas 4:19) Ol rul blong Baebol oli soemaot se sipos yu yu strong blong blokem doti fasin ya, bambae yu ‘givhan long yu’ wan bakegen.—Aesea 48:17.

‘Wantem Man No Woman Tumas’

Baebol i talem se: “Yufala i mas kilimaot ol fasin ya blong yufala, we oli blong wol ya nomo. Hemia ol fasin olsem . . . Ol man oli stap wantem woman tumas, ol woman oli stap wantem man tumas.” (Kolosi 3:5) ‘Wantem man no woman tumas,’ i no minim stret filing blong man mo woman blong wantem slip tugeta, be i stap tokbaot man no woman we i no save bos long filing ya. Samting ya i save lidim man no woman blong mekem ol bigfala sin, olsem Pol i tokbaot long Rom 1:26, 27.

?Be sipos man i pleplei wetem seks blong hem, hemia bambae i givhan long hem blong “kilimaot” filing blong wantem woman tumas? No gat, i defren olgeta, olsem we wan yangfala i talem: “Taem yu pleplei wetem seks blong yu, yu putum tingting blong yu i stap long ol samting we yu wantem we oli no stret, mo i mekem se yu wantem moa ol samting ya.” Plante man, taem oli stap mekem doti fasin ya, oli drim long wan samting long saed blong seks, blong mekem se oli harem gud moa long hem. (Matiu 5:27, 28) From samting ya, sipos wan traem i kasem olgeta, i isi nomo blong oli foldaon long rabis fasin. Samting ya i hapen long wan yangfala, we i talem se: “Bifo, mi mi ting se sipos mi pleplei wetem seks blong mi, bambae fasin ya i save givhan blong daonem ol filing blong mi nao mi no save wantem blong slip wetem woman. Be no gat, mi mi wantem moa blong slip wetem woman.” Ale, hem i slip wetem wan gel. Taswe, yumi no sapraes long samting we ol man blong stadi oli faenemaot long wan kantri. Oli faenem se bighaf blong ol yangfala we oli pleplei wetem seks blong olgeta, oli stap slip olbaot tu. !Olgeta ya oli plante moa (50% antap) long olgeta we oli no slip wetem man no woman yet, be oli mekem doti fasin ya!

Spolem Tingting Mo Filing

Mo tu, man we i pleplei wetem seks blong hem, i tekem sam fasin mo tingting we oli spolem hed blong hem. (Skelem wetem 2 Korin 11:3.) Taem boe no gel i mekem fasin ya, hem i stap tingbaot we hem nomo i mas harem gud, yes, hem i tingbaot hem wan nomo. Long tingting blong hem, seks i no moa joen wetem lav, be i jes wan samting blong mekem hem i harem gud. Be plan blong God fastaem, hemia se taem man i wantem woman mo woman i wantem man, tufala i mas slip tugeta blong harem gud. Hemia nao rod blong soemaot lav insaed long mared.—Ol Proveb 5:15-19.

Mo tu, man we i stap pleplei wetem seks blong hem i save tingbaot woman olsem samting blong yusum nomo, hem i slip wetem woman jes blong mekem filing blong hem wan i harem gud. Taswe, fasin ya i spolem “tingting” blong hem, i mekem i kam doti. !Samfala we oli folem doti fasin ya, oli kasem trabol afta we oli mared tu! Baebol i waes taem i talem se: “Ol fren, . . . yumi mas mekem yumi klin. Olgeta samting long bodi blong yumi mo long tingting blong yumi we oli stap mekem yumi doti long fes blong God, yumi mas sakemaot olgeta evriwan.”—2 Korin 7:1.

Stret Tingting Long Rong Ya

Nating se plante yangfala oli winim nogud fasin ya, samfala oli foldaon bakegen. I gud tumas we God i gat sore. Man blong raetem Ol Sam i talem long God se: “Yu yu gud tumas long mifala, yu stap fogivim mifala, yu stap tekemaot ol sin blong mifala.” (Ol Sam 86:5) Plante Kristin we oli foldaon bakegen, tingting blong olgeta i jajem olgeta, nao oli sem tumas. Be, Baebol i talem se: “God i hae moa long tingting blong yumi, mo hem i save evri samting.” (1 Jon 3:20) God i no jes lukluk ol sin blong yumi nomo. Hem i save evri samting, taswe hem i save lesin taem yumi askem hem wetem fulhat blong yumi blong fogivim yumi, mo hem i save sore long yumi. Wan yangfala woman i raetem se: “Mi mi harem mi sem long doti fasin ya, be mi save se Jeova God i gat lav, hem i save wanem i stap long hat blong mi, mo hem i save ol samting we mi mi wantem mo olsem wanem mi stap traehad. Samting ya i mekem se tingting blong mi i no foldaon olgeta, taem mi mestem bakegen.” Sipos yumi faet agensem tingting ya blong wantem pleplei wetem seks blong yumi, ating bambae yumi no save mekem nogud wetem gel no boe.

Wajtaoa blong Septemba 1, 1959, (Inglis) no Eprel 15, 1960 (Franis), i talem se: “Plante taem, yu [save] foldaon bakegen long wan nogud fasin blong laef blong yu bifo. Ating fasin ya i hadwok moa blong winim, i bitim we yu bin tingbaot fastaem. . . . Be yu no mas kam slak. Yu no mas ting se yu yu mekem wan sin we God i no save fogivim. Setan i wantem se yu yu tingting olsemia. Sipos yu harem nogud mo yu kros long yu wan from, hemia i soem se God i save fogivim yu yet. Yu no mas kam taed blong prea long God wetem tingting daon, mo askem hem wetem olgeta hat blong yu blong i fogivim yu, mekem yu yu klin, mo blong i givhan long yu. Nomata hamas taem yu yu foldaon long nogud fasin ya, kam klosap long Jeova olsem wan pikinini we i kam long papa blong hem taem hem i kasem trabol. Jeova bambae i glad blong halpem yu from we hem i kaen tumas. Mo, sipos yu yu no stap giaman, bambae hem i mekem we yu yu gat klin tingting long fes blong hem, tingting we i no moa jajem yu.”

?Olsem wanem blong gat “klin tingting long fes blong hem, tingting we i no moa jajem” yu?

[Ol Futnot]

Ol Kwestin Blong Tokbaot

◻ ?Pleplei wetem seks blong yumi i minim wanem? ?Wanem sam rong tingting long saed ya?

◻ ?From wanem filing blong seks i strong long ol yangfala? ?Yu ting se samting ya i nogud?

◻ ?Wanem ol samting we oli save pulum man blong pleplei wetem seks blong hem?

◻ ?Fasin ya i save mekem i nogud long yangfala?

◻ ?Sin ya blong pleplei wetem seks blong yumi i bigwan olsem wanem? ?Wanem tingting blong Jeova long yangfala we i stap faet agensem fasin ya, nating se i hadwok long hem blong winim?

[Tok blong pija long pej 198]

Man we i pleplei wetem seks blong hem i save sem from. Be, sipos hem i prea wetem olgeta hat blong hem blong askem God blong fogivim hem, mo i traehad blong winim fasin ya, hem i save gat wan tingting we i no jajem hem long fes blong God

[Tok blong pija long pej 200]

Samfala oli pleplei wetem seks blong olgeta taem oli kasem trabol, oli wari, oli harem se oli no gat fren, no tingting blong olgeta i foldaon

[Tok blong pija long pej 202]

‘Stamba blong trabol blong mi, hemia samting we mi stap tingting long hem’

[Tok blong pija long pej 203]

Ol sinema, buk mo stori blong lav long televisin, oli pulum plante yangfala blong pleplei wetem seks blong olgeta

[Tok blong pija long pej 204]

“Taem mi foldaon long fasin ya [blong pleplei wetem seks blong mi], mi harem se mi stap mekem i nogud long Jeova God”