Japta 28
?Olsem Wanem Blong Fogetem Hemia We Mi Stap Drim Long Hem?
WAN buk we i tokbaot ol yangfala, i talem se: “Klosap olgeta yangfala we oli gat 13 kasem 19 yia, oli stap drim long wan man no woman we oli laekem.” Ating samting ya i kamaot long evri yangfala, mo klosap olgeta evriwan ya oli winim. Taem oli kam olfala moa, oli save laf long samting we i bin kamaot, mo oli no moa sem tumas from. Be taem yu stap drim long wan man no woman, yu harem se hemia i no wan samting blong laf from. Wan yangfala i talem se: “Mi mi harem i kros, from we mi no save mekem wan samting. Mi save se woman ya i olfala moa long mi, be mi laekem hem. Samting ya i stap spolem gud mi.”
Fasin Ya Blong Drim
I no rong blong laekem wan man no woman, sipos evri samting i stret mo i klin (i no stret blong laekem wan we i mared finis). (Ol Proveb 5:15-18) Be taem yu yu yangfala, “krangke fasin blong ol yangfala” i save lidim yu, mo i save gat paoa long tingting blong yu. (2 Timoti 2:22) Wan yangfala i stap lan yet blong bos long ol niufala filing we oli kam antap, taem ol jenis oli stap kamaot long bodi blong hem. Long taem ya, ol filing blong lav oli save kam antap bigwan, mo hem i save harem nogud se hem i no gat wan fren we hem i save soemaot ol filing ya long hem.
Mo tu, “ol gel oli gruap kwik moa long ol boe, mo oli faenem i isi moa blong storian wetem ol narafala.” From samting ya, “plante taem, oli no laekem ol yangfala long klas blong olgeta, oli ting se ol boe ya oli pikinini nomo. Oli ting se ol yangfala ya oli no save mekem olgeta oli harem gud olsem we ol tija blong olgeta oli save mekem,” no olsem sam narafala we oli olfala moa. (Buk ya Seventeen) Taswe, wan gel i save ting se wan tija blong hem, no wan man blong singsing, no wan fren we i olfala moa, i “nambawan.” Ol boe tu oli save drim olsem long saed blong wan woman. Be, kaen lav ya, hem i no trufala lav, hem i wan drim nomo.
Ol Drim—?From Wanem Oli Save Spolem Yu?
Nating se ol drim ya oli stap smoltaem nomo, be oli save spolem ol yangfala. ?From wanem? Wan samting se, plante man mo woman we ol yangfala oli laekem, oli no gat gudfala fasin. Wan waes man i talem se: “Oltaem oli stap putumap ol man we oli no gat hed blong oli holem ol nambawan wok.” (Prija 10:6) Taswe, maet yangfala i laekem tumas wan man blong singsing from se hem i gat wan gudfala voes mo hem i naes. ?Be, ol fasin blong hem oli gud no nogat? ?Man ya i wan man blong “Masta blong yumi,” wan Kristin we i givim laef blong hem i go long God finis?—1 Korin 7:39.
Baebol i givim woning se: “Taem yufala i wantem tumas ol fasin blong wol, be semtaem nomo yufala i kam enemi blong God.” (Jemes 4:4) Taswe, sipos yu laekem wan man be hem i mekem fasin we God i agensem, bambae yu save spolem fasin fren blong yu wetem God. Baebol i talem tu se: “Yufala i mas lukaot gud blong yufala i no go mekem wosip long ol giaman god.” (1 Jon 5:21) Sipos wan boe no gel i flasem rum blong hem wetem ol pija blong wan man blong singsing, samting ya i olsem “wosip long ol giaman god.” ?Fasin ya i save mekem God i glad? No gat.
Sam yangfala oli drim gogo oli kam krangke long wan man no woman. Wan gel i talem se: “Evritaem mi askem long hem sipos hem i laekem mi, hem i talem, no gat. Be mi save se hem i giaman. Ol fasin we hem i stap mekem long mi, mo fasin blong hem blong lukluk mi, oli soem se hem i laekem mi.” Yangfala man ya i traem blong talem long kaen fasin se hem i no laekem gel ya, be gel ya i no wantem bilivim.
Wan narafala gel we i stap drim long wan man blong singsing, i talem se: ‘!Mi mi wantem se hem i kam boefren blong mi, mo mi prea se samting ya bambae i kamtru! Fastaem, mi stap slip wetem kaset blong hem, jes blong stap klosap long hem. Naoia, mi harem se, sipos hem i no kam boefren blong mi, bambae mi kilim mi wan i ded.’ ?Krangke tingting olsem i save mekem God i glad? No gat. Hem i talem long yumi blong mekem wok blong hem wetem ‘tingting we i stret gud.’—Rom 12:3.
Ol Proveb 13:12 i talem se: “Taem man i putum tingting blong hem i stap strong long wan samting, be samting ya i no kamtru, tingting blong hem i save foldaon.” Taswe, sipos wan boe no gel i stap tingting tumas long wan narafala, be i no gat rod blong tufala i save fren samtaem, ale samting ya i save spolem hem. Ol dokta oli talem se lav we i olsem wan drim nomo i save mekem “tingting blong man i foldaon, hem i wari mo i harem nogud . . . Hem i no moa slipgud, i les, jes blong hem i soa, mo i sotwin.” (Skelem wetem 2 Samuel 13:1, 2.) Wan gel we i stap drim long wan man i talem se: “Mi mi no wantem kakae. . . . Mi no moa wantem stadi. Mi mi . . . ded long hem. . . . Mi harem nogud tumas.”
Tingbaot trabol we yu save kasem taem yu letem ol drim oli lidim laef blong yu. Dokta Lawrence Bauman i talem se wan long ol faswan samting we i soemaot se wan boe no gel i stap drim long narafala, hemia se “i no moa traehad long skul.” Wan narafala samting se, hem i no moa joen tumas wetem ol fren mo famle blong hem. Hem i save sem tu. Gil Schwartz, we i man blong raetem buk, i talem se: “Mi mi sem blong talemaot samting ya, be fasin blong mi i krangke nomo long taem ya we mi mi stap drim long Judy.” Longtaem afta we yu fogetem hemia we yu stap drim long hem, bambae yu tingbaot yet ol krangke samting we yu bin mekem. Bambae yu tingbaot we yu bin stap biaenem man no woman ya oltaem, yu bin soem yu long fored blong ol man, mo yu bin mekem sam narafala samting blong sem.
Luksave Samting We i Tru
King Solomon, man ya we i waes moa long ol narafala man, i laekem tumas wan gel, be gel ya i no laekem hem. Solomon i raetem ol naesfala tok we neva wan man i bin raetem bifo. Hem i talem long gel ya se “hem i naes we i naes, mo fes blong hem i saen we i saen, olsem san mo mun.” !Nating se Solomon i mekem olsem, be gel ya i no wantem hem!—Sing blong Solomon 6:10.
Sloslou, Solomon i no moa traehad blong pulum gel ya. ?Olsem wanem long yu? ?Olsem wanem yu save blokem samting we yu yu wantem mo winim ol filing blong yu? Baebol i talem se: “Man we oltaem i stap folem tingting blong hem nomo, hem i krangke we i bitim mak.” (Ol Proveb 28:26) Samting ya i tru tumas taem yu stap drim long wan man no woman. “I moa gud yu stap folem tok blong ol waes man, we oli stap tijim yu long hem.” Hemia i min se yumi mas luksave samting we i tru long saed blong bisnes ya.
Dokta Howard Halpern i askem kwestin ya se: “?Olsem wanem blong luksave sipos samting we yumi wantem, i save kamtru no i wan drim nomo? Yumi mas blokem ol filing blong yumi, mo skelemgud ol trufala samting.” Traem tingbaot: ?Bambae mi gat janis samtaem blong fren wetem man no woman ya mo mared wetem hem? !Sipos hem i wan bigfala man blong singsing, ating bambae yu neva gat janis blong toktok long hem! Sem mak taem yu laekem wan man we i olfala moa long yu, olsem wan tija.
?Mo tu, man no woman ya we yu drim long hem, hem i bin soem se hem i laekem yu? ?I gat wan trufala samting we i soem se bambae hem i laekem yu long fiuja? no ?Yu nomo yu stap ting se hem i laekem yu? Long plante kantri, ol man nao oli faswan blong askem woman blong fren wetem olgeta. From samting ya, wan gel i save sem bigwan sipos hem i stap biaen long wan man we i no laekem hem.
Mo tingbaot: ?Sipos man no woman ya i soem se hem i laekem yu, bambae yu mekem wanem? ?Yu yu rere blong mekem ol bigfala wok insaed long mared? Sipos no, ale, ‘i nogud yu letem wan samting i mekem yu yu tingting tumas,’ no drim. I gat wan stret “taem blong man i laekem narafala,” mo maet samting ya i kamaot plante yia long fiuja, taem yu yu olfala moa.—Prija 3:8; 11:10.
Skelem Ol Filing Blong Yu
Dokta Charles Zastrow i talem se: “Ol drim oli kamaot taem boe no gel i ting se man no woman we hem i laekem, ‘i stretgud olgeta.’ Hem i ting se man no woman ya i gat evri fasin we hem i wantem se hasban no waef blong hem i mas gat.” Be, i no gat wan man we “i stretgud olgeta.” Baebol i talem se: “Olgeta evriwan oli mekem nogud finis, mo oli stap afsaed olgeta long ol gudgudfala fasin blong God.”—Rom 3:23.
Taswe, i gud blong ansa long kwestin ya: ?Mi mi savegud man ya we mi stap drim long hem? ?Mi mi laekem hem tru, no hemia wan krangke tingting blong mi nomo? ?Mi mi stap satem ae blong mi long ol mastik blong hem? !Sipos yu luklukgud ol fasin blong hem, maet bambae yu no moa drim long hem! I gud tu blong skelem wanem kaen lav yu yu gat long hem. Kathy McCoy, wan woman blong raetem buk, i talem se: “Lav blong ol yangfala i save kam strong wantaem nomo mo lus wantaem nomo . . . Oli stap tingbaot olgeta nomo, oli wantem nomo blong harem filing ya blong lav . . . Lav blong ol yangfala i mekem se oli wantem stap oltaem wetem man ya, oli no wantem se hem i joen wetem ol narafala man, mo oli jalus. . . . Lav blong ol yangfala i mekem se oli wantem we ol samting oli stretgud olgeta.”—Lukluk tingting we i defren long 1 Korin 13:4, 5.
Fogetem Hem
I tru, nating se yu mekem olsem wanem, bambae yu no save karemaot olgeta filing blong yu. Be yu save mekem se trabol ya i no kam bigwan moa. Bambae yu harem nogud moa blong stap yu wan, sipos yu ridim ol stori buk blong lav, lukluk ol stori blong lav long televisin, no yu lesin long miusik we i pulum ol filing blong lav. Taswe, i nogud blong tingting tumas long ol samting ya. Baebol i talem se: “Sipos i no moa gat faeawud, bambae faea i ded.”—Ol Proveb 26:20.
Bitim we yu drim long wan man no woman, i moagud blong tingbaot olgeta we oli rili laekem yu mo kea long yu. Yu no mas ‘stap yu wan.’ (Ol Proveb 18:1, NW) Ating papa mama blong yu tufala i save halpem yu. Nating se yu yu traehad olsem wanem blong haedem ol filing blong yu, ating tufala i luksave finis se wan samting i rong. I gud yu toktok wetem tufala mo talemaot olgeta samting we i stap long hat blong yu. (Skelem wetem Ol Proveb 23:26.) Mo tu, ating wan Kristin we i winim plante trabol finis long laef blong hem, bambae i glad blong lesin long yu.
Esther Davidowitz, wan woman we i stap raetem ol buk blong ol yangfala, i givim advaes ya se: “Yu mas stap bisi oltaem.” Traem faenem wan samting we yu laekem blong mekem mo wok long hem, maet yu mekem spot, lanem wan niufala lanwis, stadi dip long wan samting long Baebol. Sipos yu stap bisi long ol gudfala wok, samting ya i save halpem yu blong winim ol filing blong yu.
I tru se, i hadwok blong fogetem wan we yu stap drim long hem. Be, afta we smoltaem i pas, bambae yu no moa harem nogud tumas. !Bambae yu kasem save long plante moa samting long saed blong yu wan mo ol filing blong yu, mo bambae yu rere moa from trufala lav we i save kamaot long fiuja! ?Be olsem wanem bambae yu luksave ‘trufala lav’?
Ol Kwestin Blong Tokbaot
◻ ?From wanem plante yangfala oli drim long wan man no woman?
◻ ?Plante taem ol yangfala oli stap drim long hu, mo from wanem?
◻ ?Olsem wanem ol drim ya oli save spolem yu?
◻ ?Wanem sam samting we wan yangfala i save mekem blong fogetem wan drim olsem?
◻ ?Olsem wanem yangfala i save mekem blong blokem drim ya i no kam bigwan moa?
[Tok blong pija long pej 220]
Plante taem ol gel mo boe oli drim long wan man no woman we i olfala moa long olgeta
[Tok blong pija long pej 221]
Sipos yu luklukgud ol fasin blong hem, maet bambae yu no moa drim long hem
[Tok blong pija long pej 223]
‘Mi mi no wantem kakae. Mi no moa wantem stadi. Mi mi ded long hem. Mi harem nogud tumas’