Japta 29

Ol Gudfala Wok Long Sabat Dei

HEMIA yia 31 K.T. Ol tri oli stat blong putum flaoa nao. Sam manis bifo, Jisas i aot long Judia, i wokbaot i go long Galili. Ale long hafrod hem i stap storeyan wetem wan woman long wan wel long Sameria.

Ale, taem hem i kasem Galili, hem i stap tij olbaot long ples ya. Afta, hem i aot long Galili bakegen, i gobak long Judia. Nao hem i stap prij insaed long ol haos blong prea olbaot long Judia. Baebol i talem fulap samting long saed blong ­minista wok blong Jisas long Galili. Be i talem smol nomo long ol wok we Jisas i mekem wan yia bifo, taem hem i stap long Judia biaen long Lafet blong Pasova. Mo Baebol i talem smol nomo long ol wok we hem i stap mekem naoia long Judia bakegen. Long Galili, ol man oli glad long minista wok blong Jisas. Be long Judia, i no olsem.

Nao Jisas i wokbaot i go long bigfala taon long Judia, hemia Jerusalem. Hem i go blong mekem Lafet blong Pasova long yia 31 K.T. Long Jerusalem, i gat wan ples blong swim, we oli kolem Betsata. Ples ya i stap kolosap long doa blong bigfala stonwol blong Jerusalem, we oli kolem Doa blong Sipsip. I gat plante sikman oli stap long ples ya, we sam oli blaen, mo sam, leg blong olgeta i nogud. Olgeta oli bilif se sik blong olgeta bambae i finis sipos oli swim long wora taem i muvmuf.

Hemia Sabat dei. Nao Jisas i luk wan man we i stap slip kolosap long wora ya, we sik blong hem i stap long hem 38 yia finis. Jisas i save we sik blong hem i stap longtaem finis, nao i askem long hem, i se: “?Olsem wanem? ?Yu yu wantem blong yu gud bakegen?”

Sikman ya i ansa long hem, i se: “Masta, mi mi no gat man blong karem mi, mi godaon long wora ya taem i muf. Oltaem, taem we mi mi stap traem blong godaon long step ya yet, be ol narafala man oli godaon, oli bitim mi, oli kasem wora fastaem.”

Nao Jisas i talem long hem, i se: “Ale, yu stanap, yu tekem mat blong yu, yu wokbaot, yu go.” Nao wantaem nomo, man ya i kamgud bakegen, nao hem i tekem mat blong hem, i wokbaot, i go.

Taem ol lida blong ol man Isrel oli luk hem, oli talem se: “Hemia Sabat dei ya, mo i tabu long loa blong yumi blong yu karem mat blong yu olsem.”

Be hem i ansa long olgeta, i se: “No, be man ya we i mekem mi mi gud bakegen, hem i talem long mi se ‘Yu tekem mat blong yu, yu wokbaot, yu go.’ ”

Nao olgeta oli askem long hem se: “?Hu man ya we i talem long yu se ‘Yu tekem mat blong yu, yu wokbaot, yu go’?” Jisas i gowe long olgeta finis, from we i gat plante man long ples ya. Mo man ya we i kamgud bakegen, hem i no save nem blong man we i mekem samting ya long hem, hemia Jisas. Nao i no longtaem, Jisas i mitim man ya insaed long haos blong God. Ale, man ya i lanem se Jisas nao i mekem hem i gud bakegen.

Nao man ya i go afsaed, i faenem ol lida blong ol man Isrel, nao hem i talemaot long olgeta se: ‘Man ya we i mekem mi mi gud bakegen, hemia Jisas ya.’ Taem ol lida blong ol man Isrel oli harem samting ya, oli kam long Jisas. ?From wanem? ?Oli wantem faenemaot hu nao i givim paoa long Jisas blong mekem ol bigbigfala wok blong hem? No gat. Oli wantem faenem poen long Jisas nomo, from we hem i mekem ol gudfala wok ya long Sabat dei. Mo tu, oli stat mekem i nogud long hem. Luk 4:44; Jon 5:1-16.

▪ ?Hamas taem i pas, i stat long laswan trep blong Jisas long Judia kam kasem trep ya?

▪ ?From wanem plante man oli go swim long wora ya we oli kolem Betsata?

▪ ?Jisas i mekem wanem merikel kolosap long wora ya? ?Taem ol lida blong ol man Jyu oli luk samting ya, oli mekem wanem?