Japta 38

?Jon i Sot Long Bilif?

Wan yia finis, Jon Baptaes i stap kalabus. Nao hem i harem nyus se Jisas i go long wan taon, nem blong hem Naen. Jisas i mekem pikinini blong wan wido long taon ya i laef bakegen. Be Jon i wantem se Jisas nomo i talem stret long hem bigfala mining blong ol samting we hem i stap mekem. Ale, hem i sanem tu disaepol blong hem, blong tufala i go askem long Jisas se: “?Olsem wanem? ?Yu yu man ya we bifo oli bin talem se ‘Wan man bambae i kam,’ no mifala i mas stap wet long wan narafala man bakegen?”

Maet yumi ting se: ‘?From wanem Jon i askem wan kwestin olsem? Tu yia bifo, taem hem i baptaesem Jisas, hem i luk we tabu speret blong God i kamdaon long Jisas mo hem i harem voes blong God, we i talem se hem i laekem tumas pikinini blong hem.’ Maet samfala oli ting se kwestin blong Jon i soemaot se bilif blong hem i stap foldaon. Be samting ya i no tru nating. Yumi save se Jisas i tinghae long Jon Baptaes from ol gudfala toktok we hem i talem long saed blong Jon. Hem i no save tok gud olsemia sipos bilif blong Jon i slak. ?Oraet, be from wanem Jon i askem kwestin ya?

Jon i stap long presin, mo hem i stap harem nogud. Maet hem i wantem se Jisas hem wan i talem se hem nao hem i Mesaea. Toktok olsemia i save leftemap tingting blong hem mo givim moa paoa long hem. Be i luk olsem we kwestin blong Jon i gat wan narafala mining tu. Hem i wantem save sipos i gat wan narafala man bakegen we i mas kam. Maet hem i ting se i gat wan narafala we i mas mekem las haf blong ol profet tok long saed blong Mesaea i kamtru.

Ol profet tok blong Baebol we Jon i save long olgeta, oli talemaot se man we God i makemaot hem wetem tabu speret blong hem, bambae i kam olsem wan king, wan man blong sevem man. Nating we Jisas i tekem baptaes plante manis finis, be hem i no mekem Jon i fri yet. Jon Baptaes i stap kalabus yet. Taswe i olsem we Jon i stap askem long Jisas se: ‘?Yu nao yu man ya we bambae i mekem paoa blong Kingdom blong God i kamaot long wol ya? ?No i gat wan narafala we mifala i mas wet long hem, we bambae i tekem ples blong yu, mo bambae i mekem ol profet tok long saed blong paoa blong Mesaea i kamtru moa?’

Jisas i no talem stret long ol disaepol blong Jon se: ‘!Yes. Mi nao, mi Mesaea ya!’ No gat. Stret long taem ya we tufala disaepol blong Jon i kamtru, plante man we i gat olkaen sik oli stap, mo Jisas i stap mekem olgeta oli gud bakegen. Nao Jisas i ansa long tufala ya, i se: “Yutufala i gobak long Jon, yutufala i talemaot long hem ol samting ya we yutufala i luk finis mo we yutufala i harem finis. Ol blaenman, nao oli save lukluk. Ol man we leg blong olgeta i nogud, naoia oli save wokbaot gud. Ol man we oli gat leprosi, naoia bodi blong olgeta i klin. Ol man we sora blong olgeta i fas, naoia sora blong olgeta i open. Ol dedman, naoia oli laef bakegen. Mo ol puaman, naoia i gat man i stap talemaot gud nyus long olgeta.”

Maet Jon i bin askem kwestin ya long Jisas from we hem i ting se Jisas bambae i mekem moa merikel antap bakegen, nao maet hem i mekem wan samting blong Jon i save kam friman. Be Jisas i ansa long Jon se hem i no mas ting se bambae i gat plante moa merikel we oli bigwan moa antap bakegen.

Taem tufala ya we i karem tok blong Jon, tufala i gobak bakegen, Jisas i stat toktok long ol man long saed blong Jon. Hem i talem se “man we i karem toktok” blong Jeova long profet tok blong Malakae 3:1, hemia nao Jon Baptaes. Mo tu, Jon Baptaes i olsem Elaeja we profet tok long Malakae 4:5, 6 i tokbaot. Ale, hem i stap talem se Jon i sem mak long ol profet we oli laef long taem bifo. Hem i se: “Tru mi talem long yufala, long olgeta man we i bon long wan woman, i no gat wan i kamaot we i hae moa, i winim Jon Baptaes. Be long olgeta man long Kingdom blong heven, man we i daon moa long olgeta ya hem i hae moa long Jon. Be i stat long taem blong Jon Baptaes kam kasem tede, ol man oli stap traehad blong kasem Kingdom blong heven.” (NW)

Tok ya blong Jisas i soemaot se Jon bambae i no go insaed long Kingdom blong heven, from we long olgeta we oli stap rul long Kingdom blong God long heven, man we i daon moa long olgeta ya hem i hae moa long Jon. Jon i mekem rod blong Jisas. Taem Jon i ded, Kraes i no mekem kontrak wetem ol disaepol blong hem yet, blong bambae oli rul wetem hem long Kingdom blong hem long heven. Taswe Jisas i talem se Jon i no save go insaed long Kingdom blong heven. Bambae Jon i stap long wol ya nomo, aninit long rul blong Kingdom blong God. Luk 7:18-30; Matyu 11:2-15.

▪ ?From wanem Jon i askem long Jisas se: ‘?Yu yu man ya we bifo oli talem se bambae i kam, no mifala i mas stap wet long wan narafala man bakegen?’

▪ ?Jisas i talem wanem profet tok blong bifo we i makem Jon?

▪ ?From wanem Jon Baptaes i no save go long heven blong stap wetem Jisas?