Japta 12

!Agensem Paoa Blong Ol Rabis Speret!

1. ?Jisas i mekem wanem taem hem i fesem ol rabis speret?

JES afta we Jisas Kraes i baptaes, hem i go long drae ples long Judia, blong prea mo blong tingting dip. Long ples ya, Devel Setan i traehad blong pulum hem blong brekem loa blong God. Be, Jisas i no lesin long Setan, mo hem i no foldaon long trap blong hem. Jisas i fesem sam narafala rabis speret tu, taem hem i stap prij long wol. Be, oltaem, hem i tok strong long olgeta mo agensem olgeta.—Luk 4:1-13; 8:26-34; 9:37-43.

2. ?Bambae yumi tokbaot wanem kwestin?

² Ol store long Baebol long saed ya, oli mas mekem yumi luksave se ol rabis speret oli stap. Oli stap traem blong lidim ol man oli go krangke. Be yumi save agensem olgeta. ?Ol rabis speret ya, oli kam long weples? ?From wanem oli traem blong trikim ol man? ?Mo wanem ol rod we oli stap yusum blong mekem samting ya? Sipos yumi faenem ansa long ol kwestin ya, samting ya i save halpem yumi blong agensem paoa blong ol rabis speret.

OL RABIS SPERET—OLSEM WANEM OLI STAT MO PLAN BLONG OLGETA

3. ?Olsem wanem Devel Setan i stat?

³ Longtaem bifo we Jeova God i mekem man, hem i mekem plante speret man. (Job 38:4, 7) Olsem Japta 6 long buk ya i eksplenem, wan long olgeta enjel ya i wokem wan tingting we hem i wantem se ol man oli wosip long hem, oli no wosip long Jeova. Blong mekem samting ya, rabis enjel ya i agensem Man ya we i Wokem olgeta samting, mo hem i gyaman blong spolem gudnem blong hem. Hem i talem long faswan woman tu se God i gyaman long hem. Taswe, i stret nomo we speret man ya we i agensem God, i kasem nem ya Devel (man blong gyaman blong spolem nem blong narafala) Setan (man blong agens).—Jenesis 3:1-5; Job 1:6.

4. ?Olsem wanem sam enjel oli mekem sin long taem blong Noa?

⁴ Biaen, sam narafala enjel oli tekem saed blong Devel Setan. Taem man ya we i mekem stret fasin, Noa, i laef, sam long ol enjel ya oli livim wok blong olgeta long heven, oli kamdaon long wol, mo oli tekem ol bodi olsem ol man. Oli wantem folem nogud tingting we oli gat blong slip wetem ol woman long wol. I klia se Setan nao i pulum ol enjel ya, blong oli no moa obei long God. Fasin ya i mekem se oli gat ol pikinini we oli hafhaf man mo enjel, nem blong olgeta Nefilim. Oli kam ol stronghed man blong kilim man. Taem Jeova i mekem Bigfala Ren i foldaon, wora ya i draonem ol man nogud, wetem ol narakaen pikinini ya blong ol enjel we oli no obei long God. Ol stronghed enjel ya, oli no ded. Oli jenisim bodi blong olgeta i kam speret bakegen, ale, oli gobak long ples blong ol speret man. Be God i daonem ol rabis enjel ya. Hem i sakem olgeta oli go long tudak long saed blong speret. (Jenesis 6:1-7, 17; Jud 6) Nating se i olsem, Setan, ‘jif blong ol rabis enjel,’ wetem ol rabis enjel blong hem, oli gohed blong agensem God. (Luk 11:15) ?Wanem plan blong olgeta?

5. ?Setan mo ol rabis enjel blong hem oli gat wanem plan, mo oli yusum wanem samting blong mekem man i foldaon long trap blong olgeta?

⁵ Rabis plan blong Setan mo ol enjel blong hem, i blong pulum ol man blong oli agensem Jeova God. Taswe, long ol yia we oli pas, ol rabis enjel ya oli stap lidim ol man oli go krangke, mekem ol man oli fraet, mo oli stap faetem ol man tu. (Revelesen 12:9) Plante eksampel long taem blong yumi, oli pruvum se ol fasin agens blong ol rabis enjel, oli moa nogud naoia bitim ol taem bifo. Blong mekem ol man oli foldaon long trap blong olgeta, ol rabis enjel oli yusum ol defren rod blong pulum ol man blong joen long ol wok blong olgeta. ?Olsem wanem oli yusum ol rod ya? ?Olsem wanem yu save faetem olgeta?

?OLSEM WANEM OL RABIS SPERET OLI TRAEM LIDIM YU YU GO KRANGKE?

6. ?Wanem ya fasin blong joen long wok blong ol rabis speret, mo wanem sam rod blong mekem olsem?

⁶ ?Wanem ya fasin blong joen long wok blong ol rabis speret? Hemia fasin blong joen wetem ol rabis enjel, no rabis speret, stret, no tru long wan kleva. Ol rabis speret oli yusum fasin ya, olsem ol man blong kasem ol wael anamol oli yusum bet: Blong pulum ol man oli foldaon long trap. Wan man blong kasem ol wael anamol i yusum plante defren kaen bet blong pulum ol anamol oli kam long trap blong hem. Sem mak nao, ol rabis speret oli yusum ol defren kaen wok blong olgeta, blong pulum ol man oli kam aninit long paoa blong olgeta. (Ridim Ol Sam 119:110.) Sam long ol wok ya: fasin blong talemaot ol samting we bambae oli kamtru, mekem majik, lukaot wan mining long ol samting olsem ol drim, mekem posen, wokem nakaemas, go luk kleva, traem toktok wetem ol dedman.

7. ?Ol wok blong ol rabis speret i bigwan olsem wanem, mo from wanem i kamaot plante long ol kantri we ol man oli talem se oli Kristin?

⁷ Bet ya i wokgud, from we ol wok ya blong ol rabis speret, oli pulum plante man long olgeta ples long wol. Olgeta we oli stap long ol velej long bus, oli go luk ol kleva. Ol man we oli wok long ol ofis long taon, oli go luk ol man blong talemaot fyuja from ol sta. Ol wok blong ol rabis speret, oli bigwan tu long ol kantri we ol man blong olgeta oli talem se oli Kristin. Wan stadi i soem se long Yunaeted Stet nomo, samwe long 30 defren kaen magasin, we oli stap salem bitim 10 milyan blong evri namba blong olgeta, oli tokbaot ol wok blong ol rabis speret. Ol man Brasil oli spenem bitim 50 bilyan vatu evri yia, long ol samting we oli yusum blong joen long wok blong ol rabis speret. Be, 80 pesen blong ol man Brasil ya we oli stap go long ol ples blong wosip long ol rabis speret, oli baptaes finis long jyos Katolik, mo oli stap go long Lames tu. From we sam lida blong ol skul oli joen long wok blong ol rabis speret, plante man blong skul oli ting se God i agri long ol wok ya. ?Be samting ya i tru?

?FROM WANEM BAEBOL I TOK AGENSEM OL WOK BLONG OL RABIS SPERET?

8. ?Baebol i talem wanem long saed blong ol wok blong ol rabis speret?

⁸ Sipos samfala oli bin tijim yu se ol wok blong ol rabis speret, oli ol rod blong toktok wetem ol gudfala speret, maet yu sapraes blong faenemaot tingting blong Baebol long saed ya. Ol man blong Jeova oli kasem woning ya: “Yufala i no mas go luk ol kleva, mo yufala i no mas go luk ol man we oli mekem bisnes blong talemaot fyuja. Olsemia nao, bambae oli no mekem yufala i kam doti long ae blong God.” (Levitikas 19:31; 20:6, 27) Buk blong Revelesen long Baebol, i givim woning se “ol man blong mekem posen mo kleva,” bambae oli go long ‘bigfala hol blong faea, we i fulap long faea mo salfa, we hemia i olsem seken ded ya [ded blong olwe].’ (Revelesen 21:8; 22:15) Jeova God i no agri nating long olgeta wok blong ol rabis speret. (Dutronome 18:10-12) ?From wanem i olsem?

9. ?From wanem yumi save bilif se, ol mesej tede we oli kamaot long ples blong ol speret, oli no kamaot long Jeova?

⁹ Bifo we ol man oli finisim wok ya blong raetem Baebol, Jeova i sanem ol gudfala speret, no ol enjel we oli stretgud, blong oli toktok wetem sam man. Afta we oli finisim Baebol, Tok blong God nao i givim ol save we ol man oli nidim blong lidim olgeta, blong mekem wok blong Jeova long fasin we hem i glad long hem. (2 Timote 3:16, 17; Hibrus 1:1, 2) Hem i no stap yusum ol man blong givim mesej, olsem we hem i sakemaot tabu Tok blong hem, Baebol. No gat. Ol mesej tede we ol man oli kasem long ples blong ol speret, oli kamaot long ol rabis speret. Fasin blong joen long wok blong ol rabis speret, i save lidim man blong kasem trabol oltaem from olgeta, no maet oli kam bos long laef blong hem fulwan. From samting ya, God we i laekem yumi tumas, i givim woning long yumi blong no joen nating long eni wok blong ol rabis speret. (Dutronome 18:14; Galesia 5:19-21) Mo tu, sipos yumi gohed blong joen long wok blong olgeta afta we yumi save tingting blong Jeova, yumi tekem saed blong ol stronghed rabis speret ya, mo bambae yumi kam enemi blong God.—1 Samuel 15:23; 1 Kronikel 10:13, 14; Ol Sam 5:4.

10. ?Wanem ya fasin blong talemaot ol samting we bambae oli kamtru, mo from wanem yumi mas stap longwe long fasin ya?

¹⁰ Wan wok blong ol rabis speret we plante man oli joen long hem, hemia fasin blong faenemaot ol samting we bambae oli kamtru—olsem we ol rabis speret oli halpem olgeta blong faenemaot fyuja no ol samting we oli haed. Sam rod we oli yusum blong mekem olsem: talemaot fyuja from ol sta, lukluk long wan glas bol, putum wan mining long ol drim, lukluk ol laen long han blong man, mo yusum ol spesel kad blong talemaot fyuja. Plante man oli tingbaot ol fasin ya olsem ol pleplei nomo. Be, Baebol i soem se ol man blong talemaot fyuja mo ol rabis speret oli wok wanples. Wan eksampel: Ol Wok 16:16-19 i tokbaot ‘wan rabis speret’ we i mekem se wan gel i stap talemaot “ol samting we bambae i save kamtru.” Be, taem paoa blong God i ronemaot rabis speret ya, hem i no moa save talemaot fyuja. I klia se, fasin ya blong talemaot ol samting we bambae oli kamtru, i olsem wan bet we ol rabis speret oli yusum blong pulum ol man blong foldaon long trap blong olgeta.

11. ?Olsem wanem fasin blong traem toktok wetem ol dedman, i save lidim man blong foldaon long wan trap?

¹¹ Sipos yu stap harem nogud from wan memba blong famle no wan gudfala fren i ded, maet wan narafala bet i save pulum yu. Maet wan kleva i talem sam spesel save long yu, no maet hem i toktok long wan voes, we i olsem voes blong hemia we i ded. !Lukaot! Fasin blong traem toktok wetem ol dedman, i save lidim yu long wan trap. ?From wanem? From we ol dedman oli no save toktok. Ating yu rimemba we, Tok blong God i talem klia se taem wan man i ded, hem i ‘gobak long graon. Long sem dei ya, ol tingting blong hem oli finis.’ Ol dedman “oli no save wan samting nating.” (Ol Sam 146:4; Eklesiastis 9:5, 10) Mo tu, hem i rili ol rabis enjel we oli stilim voes blong man we i ded, mo we oli givim save long wan kleva long saed blong hemia we i ded. (1 Samuel 28:3-19) Taswe, “man we i wantem toktok wetem ol dedman,” i stap foldaon long trap blong ol rabis speret, mo i mekem samting we Jeova God i no wantem.—Dutronome 18:11, 12; Aesea 8:19.

OLI PULUM MAN MO OLI AGENSEM MAN TU

12, 13. ?Wanem ol pruf blong soem se ol rabis enjel oli gohed blong traem pulum mo mekem trabol long ol man?

¹² Taem yu folem advaes blong Baebol blong no joen long ol wok blong ol rabis speret, yu tanem baksaed long bet blong olgeta. (Ridim Ol Sam 141:9, 10; Rom 12:9.) ?Samting ya i min se bambae oli no moa traem blong winim yu? !Si, bambae oli traem bakegen! Afta we Setan i traem Jisas tri taem, hem i “gowe long Jisas blong kambak long hem long sam narafala taem we i stret blong hem.” (Luk 4:13) Sem mak nao, ol stronghed rabis speret oli no jes pulum man, be oli agensem man tu.

¹³ Rimemba, yumi tokbaot finis olsem wanem Setan i agensem man blong God, Job. Setan i mekem se ol anamol blong hem oli lus. Hem i kilim i ded bighaf blong ol man blong wok blong Job, wetem ol pikinini blong hem tu. Afta, hem i kilim Job wetem wan bigfala sik we i mekem hem i harem nogud tumas. Be Job i holemstrong long God, mo i kasem bigfala blesing from. (Job 1:7-19; 2:7, 8; 42:12) Afta long taem ya, ol rabis speret oli mekem se sam man oli no save toktok mo lukluk, mo oli haremgud taem oli luk we ol man oli safa. (Matyu 9:32, 33; 12:22; Mak 5:2-5) Tede, ol ripot oli soemaot se ol rabis speret oli mekem nogud long sam man long saed blong seks, mo oli mekem sam narafala man oli kam krangke. Oli pusum samfala blong kilim i ded narafala man no blong kilim i ded olgeta bakegen. Ol fasin ya oli olsem sin agensem God. (Dutronome 5:17; 1 Jon 3:15) Nating se i olsem, plante taosen man we fastaem oli stap aninit long paoa blong ol rabis speret, oli kam fri. ?Olsem wanem oli mekem olsem? Oli mekem sam impoten samting.

?OLSEM WANEM BLONG AGENSEM OL RABIS SPERET?

14. Folem eksampel blong ol Kristin long Efesas long faswan handred yia, ?olsem wanem yu save agensem ol rabis speret?

¹⁴ ?Wanem wan rod blong agensem ol rabis speret mo blong blokem yu wan mo famle blong yu, blong yufala i no foldaon long trap blong olgeta? Long faswan handred yia, ol Kristin long Efesas we oli bin joen long wok blong ol rabis speret bifo we oli kasem trufala bilif, oli mekem sam samting. Yumi ridim se, “plante man we bifo oli stap mekem ol bisnes blong posen mo kleva oli tekem ol buk blong olgeta, nao oli bonem long fes blong ol man.” (Ol Wok 19:19) Nating sipos yu no bin joen long wok blong ol rabis speret, be yu mas sakem eni samting we i joen wetem wok ya no we i save pulum yu long rod ya. Hemia ol buk, magasin, video kaset, pija, kaset blong myusek, mo olting we oli joen wetem wok blong ol rabis speret. Mo tu, ol aedol, ol jen no ston blong givim laki, mo ol presen we yu bin kasem long man we i joen long wok blong ol rabis speret. (Dutronome 7:25, 26; 1 Korin 10:21) Wan eksampel: Long plante yia, ol rabis speret oli mekem trabol long wan man mo waef blong hem long Taelan. Ale, tufala i sakem ol samting we oli joen wetem wok blong ol rabis speret. ?Wanem i kamaot from? Ol rabis speret oli no moa mekem trabol long tufala, mo biaen, tufala i gohedgud long saed blong speret.

15. ?Wanem wan narafala samting we yu mas mekem blong agensem ol rabis speret?

¹⁵ Wan narafala impoten samting blong agensem ol rabis speret, hemia: Folem advaes blong aposol Pol blong putum ol klos blong faet long saed blong speret, we God i save givim. (Efesas 6:11-17) Ol Kristin oli mas kasem strong paoa blong faetem ol rabis speret. ?Olsem wanem oli save mekem olsem? Pol i talem se: “Oltaem yufala i mas bilif strong long God. Fasin ya i olsem stik blong blokem ara, we yufala i save yusum blong blokem ol ara ya blong Setan, we faea i laet long hem.” Tru ya, sipos bilif blong yu i strong gud, bambae yu gat moa paoa blong agensem ol rabis speret.—Matyu 17:14-20.

16. ?Olsem wanem yu save mekem bilif blong yu i kam strong moa?

¹⁶ ?Olsem wanem yu save mekem bilif blong yu i strong? Yu mas gohed blong stadi Baebol mo folem ol advaes blong hem long laef blong yu. Paoa blong bilif blong yumi i dipen bigwan long strong faondesen blong hem—save blong God. ?Yu yu agri se stret save we yu kasem mo tingting dip long hem taem yu stadi long Baebol, i givim moa bilif long yu? (Rom 10:10, 17) Taswe, taem yu gohed long stadi ya mo go oltaem long ol miting blong ol Wetnes blong Jeova, bambae bilif blong yu i kam strong moa yet. (Rom 1:11, 12; Kolosi 2:6, 7) Bambae samting ya i blokemgud yu, taem ol rabis enjel oli agensem yu.—1 Jon 5:5.

17. ?Wanem sam narafala samting we maet yu nidim blong mekem blong agensem ol rabis speret?

¹⁷ ?Wanem narafala samting we wan man i save mekem blong agensem ol rabis speret? Ol Kristin long Efesas bifo, oli nidim samting blong blokem olgeta, from we taon ya i fulap long wok blong ol rabis speret. Taswe, Pol i talem long olgeta se: ‘Oltaem nomo yufala i mas stap prea long paoa blong tabu speret.’ (Efesas 6:18) Yumi stap long wan wol we i fulap long ol rabis speret. Taswe, blong agensem olgeta, yumi nidim blong mekem dip prea oltaem, blong askem God blong i blokemgud yumi. (Matyu 6:13) Samting we i save givhan long yumi long saed ya, hemia help long saed blong speret mo prea blong ol elda long Kristin kongregesena.—Jemes 5:13-15.

GOHED BLONG FAET AGENSEM OL RABIS SPERET

18, 19. ?Wanem samting i save givhan sipos ol rabis enjel oli kambak bakegen blong mekem trabol long wan man?

¹⁸ Be samfala, nating se oli mekem ol stampa samting ya, oli kasem trabol yet from ol rabis speret. Wan eksampel: Wan man long Côte d’Ivoire i stadi Baebol wetem ol Wetnes blong Jeova, nao hem i sakem ol bidbid mo ston blong laki. Biaen, hem i gohedgud, ale hem i givim laef blong hem long Jeova, mo i tekem baptaes. Be, wan wik biaen long baptaes blong hem, ol rabis speret oli mekem trabol long hem bakegen, mo sam voes oli talem long hem blong sakem nyufala bilif blong hem. Sipos samting ya i hapen long yu, ?bambae yu ting se Jeova i no moa stap lukaot long yu? Ating i no minim olsem.

¹⁹ God i stap lukaotgud long stret man ya, Jisas Kraes. Be yet, Jisas i harem voes blong rabis speret man ya, Devel Setan. Jisas i soem wanem we yumi mas mekem taem samting ya i hapen. Hem i talem long Setan se: “Yu goaot yu, Setan.” (Matyu 4:3-10) Long sem fasin, yu no mas lesin nating long eni voes we i kamaot long ples blong ol speret. Blong agensem ol rabis speret ya, singaot Jeova blong givhan long yu. Yes, prea wetem bigfala voes mo yusum nem blong God. Proveb 18:10 i talem se: “Nem blong Jeova i olsem wan strong haos. Ol stret man oli resis blong go haed long hem.” Kristin man ya long Côte d’Ivoire i mekem samting ya, ale ol rabis speret oli no moa mekem trabol long hem.—Ol Sam 124:8; 145:18.

20. Blong ademap ol poen ya, ?yu save mekem wanem blong agensem ol rabis speret?

²⁰ Jeova i letem ol rabis speret oli stap yet. Be hem i stap soemaot paoa blong hem, antap moa blong givhan long ol man blong hem. Mo nyus blong paoa blong hem i stap kavremap olgeta ples blong wol. (Eksodas 9:16) Sipos yu yu stap kolosap long God, yu no nidim blong fraet long ol rabis speret. (Namba 23:21, 23; Jemes 4:7, 8; 2 Pita 2:9) Paoa blong olgeta i gat mak blong hem. Oli kasem panis long taem blong Noa. Jisas i sakemaot olgeta long heven, i no longtaem i pas. Mo naoia, oli stap wet blong kasem laswan jajmen. (Jud 6; Revelesen 12:9; 20:1-3, 7-10, 14) Tru ya, oli fraet tumas long panis ya blong lus. (Jemes 2:19) Taswe, nating se ol rabis speret oli traem yusum sam kaen bet blong pulum yu, no oli faet agens long yu long wan rod, yu yu save agensem olgeta. (2 Korin 2:11) Sakemaot enikaen wok blong ol rabis speret. Folem advaes long Tok blong God. Mo traehad blong mekem Jeova i glad. !Mekem ol samting ya kwiktaem, from we laef blong yu i dipen long fasin blong agensem paoa blong ol rabis speret!

[Futnot]

JEKEM SAVE BLONG YU

?Olsem wanem ol rabis speret oli traem blong lidim ol man oli go krangke?

?From wanem Baebol i tok agensem wok blong ol rabis speret?

?Olsem wanem wan man i save kam fri long paoa blong ol rabis speret?

?From wanem yu mas gohed blong agensem ol rabis speret?

[Tok Blong Pija Long Pej 110]

?Wanem tingting blong yu long ol wok blong ol rabis speret?