Japta Naen

!Ol Famle We Papa No Mama Hem Wan i Lukaot Long Olgeta, Oli Save Stanap Strong!

1-3. ?Wanem i mekem se namba blong ol famle we papa no mama hem wan i lukaot long olgeta, i kam antap? ?Wanem filing blong ol memba blong ol famle ya?

LONG Yunaeted Stet, “kaen famle we namba blong olgeta i stap kam antap kwik moa i bitim ol narafala famle,” hemia famle we papa no mama hem wan i lukaot long olgeta. Samting ya i stap hapen long plante narafala kantri tu. Namba blong ol divos, ol hasban mo waef we oli seraot, mo ol pikinini blong rod, i bigwan tumas. Samting ya i mekem wan bigfala problem blong plante milyan papa, mama mo pikinini.

² Wan mama we i no gat hasban, i raetem se: “Mi mi wan wido, mi gat 28 yia, mo mi gat tu pikinini. Mi mi harem nogud tumas blong lukaot long ol pikinini blong mi, mi wan, we i no gat wan papa i stap. Mi harem olsem se i no gat wan narafala we i tingbaot mi. Plante taem, tufala pikinini blong mi oli luk we mi stap krae. Mo samting ya i mekem tufala i harem nogud tu.” Plante papa no mama we oli no gat waef no hasban, oli mas faet agensem ol filing olsem kros, filing ya se olgeta nao oli stampa blong trabol ya, mo filing se oli no gat fren. Antap long hemia, bighaf blong olgeta oli mas traehad blong mekem tufala wok wantaem, hemia wok blong kasem mane mo wok insaed long famle. Wan mama i talem se: “Taem yu wan nomo yu stap lukaot long famle, i olsem we yu stap plei jagla.a Afta we yu tren blong sikis manis, yu save plei wetem fo bol wantaem. !Be taem yu jes lan blong plei wetem fo bol, wan man i sakem wan narafala bol i kam long yu!”

³ Ol yangfala long ol famle we papa no mama hem wan i lukaot long olgeta, oli gat ol prapa traem blong olgeta. Maet oli mas faetem strong filing blong harem nogud from we papa no mama blong olgeta i lego famle, no i ded. Plante yangfala, oli harem nogud tumas taem papa no mama i no stap wetem olgeta.

4. ?Olsem wanem yumi save se Jeova i tingbaot ol famle we papa no mama hem wan i stap lukaot long olgeta?

⁴ Long taem blong Baebol, i gat sam famle we papa no mama hem wan i lukaot long olgeta. Plante taem, Baebol i tokbaot “pikinini we i no gat papa” mo “wido.” (Eksodas 22:22; Dutronome 24:19-21; Job 31:16-22) Jeova God i no ting nating long trabol blong olgeta. Man blong raetem Ol Sam i kolem God se, ‘papa blong ol pikinini we oli no gat papa, mo jaj blong ol wido.’ (Ol Sam 68:5) !Tru ya, tede tu, Jeova i stap tingbaot ol famle we papa no mama hem wan i stap lukaot long olgeta! Yes, Tok blong hem i talem ol rul blong givhan long olgeta blong stanap strong.

OL WOK LONG FAMLE

5. ?Wanem faswan problem blong ol papa no mama we olgeta nomo oli lukaot long famle blong olgeta?

⁵ Tingbaot wok blong lukaot long wan famle. Wan woman we i divos i talem se: “Plante taem yu harem se yu nidim wan hasban, olsem taem i gat wan narakaen noes long enjin blong trak, mo yu no save wanem blong mekem.” Ol man tu we oli divos no we waef blong olgeta i ded i no longtaem, tingting blong olgeta i save fasfas, from we oli gat plante tumas wok blong mekem long haos. Taem ol samting long haos i olbaot, tingting blong ol pikinini i no save stap kwaet, mo oli no harem se oli stap sef.

6, 7. (a) ?“Gudfala waef” we Proveb i tokbaot, i gat wanem nambawan fasin? (b) ?Olsem wanem fasin blong papa no mama ya blong wok strong i save givhan long famle?

⁶ ?Wanem i save givhan? Makemgud fasin blong “gudfala waef” we Proveb 31:10-31 i tokbaot. Yumi sapraes long fulap wok we hem i mekem—pem mo salem ol samting, somap, kukum kakae, pem wan graon no haos, wokem garen, mo wokem wan bisnes blong hem wan. ?Olsem wanem hem i save mekem olgeta samting ya? Hem i wok strong. Hem i girap eli long moning blong statem wok blong hem, mo hem i wok kasem let long naet. Mo hem i wok folem wan gudfala plan. Hem i givim sam wok long ol narafala long famle, mo hem i yusum prapa han blong hem blong mekem sam wok. !Yumi luksave from wanem famle i presem hem!

⁷ Sipos yu yu wan papa no mama we yu wan yu lukaot long famle, traem mekemgud ol wok blong yu. Haremgud long wok ya, from we samting ya bambae i givhan bigwan blong mekem ol pikinini blong yu oli haremgud. Fasin blong tingrere mo wok folem wan gudfala plan oli impoten tumas. Baebol i talem se: “Ol plan blong man we i wok strong bambae oli karem frut.” (Proveb 21:5) Wan papa we i no gat woman blong hem, i talem se: “Taem hanggri i kam, long taem ya nao mi jes tingbaot blong kukum kakae.” Be, i gud blong mekem plan blong ol kakae we bambae yu kukum. Olsem nao, kakae ya bambae i tes moagud, mo bambae i givhan moa long bodi blong yufala, i bitim ol kakae we yu mekem hareap. Mo tu, maet yu mas lanem blong mekem ol samting we yu neva mekem bifo. Sam mama we oli no gat man blong olgeta, oli save mekem ol wok olsem pentem ol samting, joenem ol paep blong wora, mo fiksimap ol smosmol trabol long trak. Hemia from we oli askem advaes long ol fren we oli gat save long wok ya, oli ridim sam buk we oli eksplenem olsem wanem blong mekem wok ya, mo oli askem sam man we hemia prapa wok blong olgeta.

8. ?Olsem wanem ol pikinini blong papa no mama we i no gat waef no hasban, oli save givhan long haos?

⁸ ?Olsem wanem? ?I stret blong askem ol pikinini blong givhan? Wan mama we i no gat hasban, i talem se: “Mi traem mekem i isi long ol pikinini, from we mi no wantem se oli harem nogud we papa blong olgeta i no stap.” Yumi kasem save long filing blong mama ya. Be maet fasin ya i no givhan long ol pikinini. Long taem blong Baebol, ol papa mama oli givim sam wok long ol yangfala blong olgeta we oli onagud long God. (Jenesis 37:2; Sing blong Solomon 1:6) Taswe, i waes blong askem ol pikinini blong mekem sam wok, olsem wasem plet mo klinim rum blong olgeta. Be yu no mas givim plante tumas wok long olgeta. I gud we yu joen wetem ol pikinini blong mekem ol wok. Fasin ya i save givim bigfala glad long yufala.

I NO ISI BLONG KASEM NAF MANE

9. ?From wanem plante mama we oli no gat hasban oli fesem hadtaem long saed blong mane?

⁹ Plante papa no mama we oli stap lukaot long famle, olgeta nomo, oli faenem i hadwok blong winim mane we famle i nidim. Ol yangfala mama we oli no gat hasban, oli faenem i hadwok moa.b Sipos oli stap long ol kantri we gavman i givim smol mane long olgeta, maet i waes we oli yusum plan ya gogo oli faenem wan wok. Baebol i givim raet long ol Kristin blong kasem help olsem, taem oli nidim. (Rom 13:1, 6) Ol wido mo ol woman we oli divos, oli fesem traem ya tu. Plante long olgeta, oli bin wok nomo long haos blong olgeta long ol yia we oli pas, be naoia oli mas faenem wan wok afsaed long famle. Maet oli faenem wok we i givim smol pei nomo long olgeta. Samfala, oli folem wan program we i trenem olgeta long wan wok no oli tekem wan kos. Olsem nao, oli save faenem wan gudfala wok.

10. ?Olsem wanem wan mama we i no gat hasban i save eksplenem long ol pikinini blong hem from wanem hem i mas faenem wan wok?

¹⁰ Yu no mas sapraes sipos ol pikinini blong yu oli no glad taem yu stap lukaot wan wok. Be yu no mas harem se yu gat fol from. Eksplenem long olgeta from wanem yu mas wok. Halpem olgeta blong kasem save se, Jeova nao i givim wok ya long yu blong pem ol samting we oli nidim. (1 Timote 5:8) Biaen, bighaf blong ol pikinini oli jenisim tingting blong olgeta. Be traem spenem plante taem wetem olgeta, nating se yu bisi tumas. Taem ya we yu spenem wetem olgeta mo lav we yu soem, i save mekem se oli no harem nogud tumas taem famle i no gat naf mane blong pem plante samting.—Proveb 15:16, 17.

?HU NAO I MAS MEKEM WOK BLONG LUKAOT?

11, 12. ?Papa no mama we hem wan i stap lukaot long famle, i mas lukaotgud blong no givim wanem wok long ol pikinini? ?Mo olsem wanem hem i save blokem fasin ya?

¹¹ Kolosap oltaem, ol papa no mama we oli no gat waef no hasban blong olgeta, oli frengud wetem ol pikinini blong olgeta. Be, oli mas lukaotgud blong no putum wok we God i givim long ol papa mama i go long ol pikinini. Eksampel, trabol i save kamaot sipos mama we i no gat hasban, i mekem boe blong hem i karem wok we hasban i mas mekem. Mo trabol i save kamaot tu sipos hem i tingbaot gel blong hem olsem wan big woman, nao i stap talemaot ol prapa problem blong hem we oli hevi tumas long gel ya. Hemia i no stret, i save mekem pikinini i wari, mo maet tingting blong hem i fasfas.

¹² Talem klia long ol pikinini blong yu se yu nao, olsem mama no papa blong olgeta, bambae yu yu lukaot long olgeta—i no se bambae olgeta oli lukaot long yu. (Skelem wetem 2 Korin 12:14.) Samtaem, maet yu nidim narafala blong givim advaes mo halpem yu. Askem advaes ya long ol Kristin elda no maet ol Kristin woman we oli bigman long saed blong speret, be i no long ol pikinini blong yu.—Taetas 2:3.

STRETEM PIKININI

13. ?Wan mama we i no gat hasban i save fesem wanem problem taem hem i stretem ol pikinini?

¹³ Maet pikinini i lesin taem papa i stretem hem. Be maet i hadwok long mama blong stretem hem. Wan mama we i no gat hasban, i talem se: “Ol boe blong mi oli bigwan finis mo oli gat voes olsem man. From samting ya, i hadwok blong soem se ol disisen blong mi oli klia mo oli no olbaot.” Antap long hemia, maet yu stap harem nogud yet from ded blong hasban no waef blong yu we yu laekem hem tumas. No maet yu stap harem yet se yu kros no yu gat fol from we mared blong yu i brok. Sipos ol pikinini oli stap spenem sam taem wetem yu mo sam taem wetem papa blong olgeta we i lego yu, maet yu yu fraet se bambae oli laekem moa blong stap wetem papa blong olgeta. Ol problem olsem oli save mekem i hadwok blong stretem pikinini long gudfala fasin.

14. ?Olsem wanem wan papa no mama we hem wan i stap lukaot long famle i save gat stret tingting long saed blong fasin blong stretem pikinini?

¹⁴ Baebol i talem se, “boe we oli letem hem i mekem ol samting we hem nomo i wantem, bambae i mekem mama blong hem i sem.” (Proveb 29:15) Bambae Jeova God i givhan long yu blong putumap ol rul long famle, mo mekem ol pikinini oli folem ol rul ya. Taswe, yu no mas harem se yu gat fol, yu no mas kros long yu wan, mo yu no mas fraet. (Proveb 1:8) Yu neva mas sakemaot ol rul blong Baebol. (Proveb 13:24) Traem blong gat fasin we i no strong tumas, mo blong no jenisim ol rul oltaem, mo soem se yu strong blong mekem ol pikinini oli obei. Afta we sam taem i pas, bambae yu luk we kolosap oltaem oli glad blong obei long yu. Be yu mas tingbaot filing blong ol pikinini blong yu tu. Wan papa we i no gat waef, i talem se: “Taem mi stretem ol pikinini blong mi, mi mas soem se mi kasem save long filing we oli gat from we oli bin lusum mama blong olgeta. Mi tekem evri jans blong toktok wetem olgeta. Mifala i makemaot ‘taem blong haremgud tugeta,’ hemia taem mifala i stap mekemrere kakae long sapa. Long taem ya nao, oli talemaot ol wari blong olgeta long mi.”

15. ?Wan papa no mama we i divos i mas blokem wanem fasin taem hem i stap tokbaot woman no man ya we i lego hem finis?

¹⁵ Maet yu yu divos finis. Ale, bambae i no givhan long famle sipos yu traem spolem respek we ol pikinini oli gat long papa no mama blong olgeta we i lego yu. Ol pikinini oli harem nogud tumas taem oli luk papa mo mama blong olgeta i rao. Mo samting ya bambae i mekem se oli no moa gat respek long yutufala evriwan. Taswe, yu no mas talem ol tok we i mekem olgeta oli harem nogud, olsem: “!Yu yu olsem papa blong yu stret!” Nating sipos hasban no waef blong yu we i lego yu finis i mekem yu yu harem nogud bitim mak, be hem i stap yet olsem papa no mama blong ol pikinini blong yu. Mo ol pikinini oli nidim yutufala evriwan blong soem lav mo kea long olgeta, mo blong stretem olgeta.c

16. ?Long famle we papa no mama hem wan i lukaot long olgeta, wanem ol samting long saed blong wosip we oli mas stap olsem wan haf blong fasin stretem?

¹⁶ Olsem yumi tokbaot long ol japta bifo, fasin blong stretem pikinini i minim trenem mo tijim hem, i no minim givim panis nomo. Wan gudfala program blong trenem pikinini long saed blong wosip i save blokem plante problem. (Filipae 3:16) Fasin blong go oltaem long ol Kristin miting i impoten tumas. (Hibrus 10:24, 25) I sem mak long famle stadi blong Baebol, i impoten tumas blong mekem samting ya evri wik. I tru se i no isi blong gohed oltaem blong mekem stadi ya. Wan mama we i traehad blong mekemgud wok blong hem, i talem se: “Taem mi finis wok long aftenun, mi wantem spel nomo. Be mi mas tingrere long stadi we bambae mi mekem wetem gel blong mi. Mi save se hemia wan samting we i impoten tumas. !Hem i laekem tumas famle stadi blong mitufala!”

17. ?Yumi save lanem wanem long nambawan tijing we fren blong Pol, Timote i kasem, taem hem i pikinini?

¹⁷ Timote we i wok wetem Pol, i kasem tijing long ol rul blong Baebol long mama mo bubu woman blong hem—i no long papa blong hem. !Mo Timote i kam wan nambawan Kristin! (Ol Wok 16:1, 2; 2 Timote 1:5; 3:14, 15) Yu tu yu save kasem gudfala frut sipos yu traehad blong ‘trenem tingting mo stretem ol pikinini blong yu olsem we Jeova i wantem.’—Efesas 6:4.

WINIM FILING YA SE YU NO GAT FREN

18, 19. (a) ?Olsem wanem papa no mama we hem wan i lukaot long famle i save harem nogud from se hem i no gat fren? (b) ?Yumi kasem wanem advaes we i givhan blong bos long ol filing blong seks?

¹⁸ Wan we i stap lukaot long famle hem wan nomo, i talem se: “Taem mi kambak long haos mo i no gat man i stap blong storeyan wetem mi, antap moa, afta we ol pikinini oli slip long naet, mi harem nogud tumas blong stap mi wan.” Yes, problem we i bigwan moa blong ol papa no mama we oli stap lukaot long famle olgeta nomo, hemia filing ya blong harem nogud from oli stap olgeta nomo. I stret nomo we oli harem se oli wantem wan fren, mo lav ya tu we i joen wetem mared. Be i nogud blong mekem samting we i no stret blong traem winim problem ya. Long taem blong aposol Pol, sam yangfala wido oli letem “tingting blong mared i kam strong moa long olgeta, i winim tingting blong olgeta long Kraes.” (1 Timote 5:11, 12) Sipos yumi letem ol filing long saed blong bodi oli winim tok blong God long laef blong yumi, bambae yumi kasem trabol.—1 Timote 5:6.

¹⁹ Wan Kristin man i talem se: “Ol filing blong seks oli strong, be yumi save bos long olgeta. Taem tingting long saed blong seks i kasem yumi, yumi no mas gohed blong tingbaot. Yumi mas sakemaot tingting ya kwiktaem. Mo sipos yumi tingbaot ol pikinini blong yumi, samting ya tu bambae i givhan long yumi.” Tok blong God i givim advaes ya se: ‘Yufala i mas kilimaot fasin ya we yufala i stap wantem tumas ol samting long saed blong seks.’ (Kolosi 3:5) Blong kilimaot wan filing blong wantem kakae oltaem, ?bambae yu mekem wanem? ?Bambae yu ridim ol buk we oli soem ol pija blong ol gudfala kakae? ?Bambae yu joen wetem ol man we oli tokbaot kakae oltaem? !No gat! Semfala samting i tru long saed blong ol filing blong seks.

20. (a) ?Olgeta we oli fren wetem man no woman we i no bilif mo oli tingting blong mared long hem, oli stap long wanem denja? (b) Long faswan handred yia mo tede tu, ?olsem wanem ol man mo woman we oli no mared oli winim filing ya blong harem nogud from oli stap olgeta nomo?

²⁰ Sam Kristin oli fren wetem wan man no woman we i no gat bilif, mo oli tingting blong mared long hem. (1 Korin 7:39) ?Olsem wanem? ?Samting ya bambae i winim problem blong olgeta? No gat. Wan Kristin woman we i divos, i givim woning se: “I gat wan samting we i moa nogud, i bitim we yu stap yu wan. !Hemia se, yu mared wetem wan man we i no stret long yu!” Yes, i sua se sam Kristin wido long faswan handred yia tu oli harem nogud blong stap olgeta nomo. Be olgeta we oli waes oli stap bisi long wok blong ‘tekem ol strenja oli kam long haos blong olgeta, wasem leg blong ol man blong God, mo givhan long olgeta we oli trabol.’ (1 Timote 5:10) I sem mak tede, ol Kristin we oli stap tru long God, mo we oli wet plante yia blong faenem wan waef no hasban we i onagud long God, olgeta tu oli stap bisi. Wan Kristin wido we i gat 68 yia, i visitim ol narafala wido taem hem i harem nogud blong stap hem wan. Hem i talem se: “Mi faenem se taem mi mekem ol visit olsem, mekem ol wok blong mi long haos, mo mekem ol samting blong stap strong long bilif, mi no gat taem blong harem nogud from we mi stap mi wan nomo.” Wok blong tijim ol narafala long Kingdom blong God i save givhan bigwan long saed ya.—Matyu 28:19, 20.

21. ?Olsem wanem prea mo fasin blong joen wetem ol gudfala fren oli save givhan blong winim filing ya blong harem nogud blong stap yu wan?

²¹ I tru, bambae i no gat wan merikel blong tekemaot filing ya we yu harem nogud blong stap yu wan nomo. Be Jeova i save givim paoa long yu blong faet agensem filing ya. Wan Kristin i save kasem paoa ya taem hem i ‘stap prea dip long God long dei mo long naet, blong i givhan long hem.’ (1 Timote 5:5) Prea dip i minim se yu askem God wetem fulhat blong yu, yes, yu plis long hem blong givhan long yu, maet yu krae bigfala, we wora i ron long ae blong yu. (Skelem wetem Hibrus 5:7.) Taem yu talemaot long Jeova olgeta trabol long hat blong yu, long “dei mo long naet,” samting ya i save givhan bigwan long yu. Mo tu, sipos yu kampani wetem ol gudfala fren, filing ya blong harem nogud from we yu stap yu wan i save lus. Taem wan man i joen wetem ol stret man, hem i save kasem ol “gudfala tok” we Proveb 12:25 i tokbaot, blong leftemap tingting blong hem.

22. ?Wanem samting we i save givhan taem filing ya we yu harem nogud blong stap yu wan, i kam antap?

²² Sipos filing ya i kasem yu we yu harem nogud blong stap yu wan—mo ating samtaem bambae i hapen olsem—tingbaot se, i no gat wan man long wol we i no gat problem long laef blong hem. Yes, “long evri ples long wol, ol brata blong yumi” oli stap kasem ol defren kaen trabol. (1 Pita 5:9) Yu no mas tingting tumas long ol yia we oli pas finis. (Eklesiastis 7:10) Traem tingbaot ol gudfala samting long laef blong yu naoia. Impoten moa, holem strong tingting blong stap tru long Jeova mo mekem hat blong Hem i glad.—Proveb 27:11.

OL NARAFALA OLI SAVE GIVHAN

23. ?Ol Kristin oli kasem oda blong mekem wanem long ol papa no mama long kongregesen we oli no gat waef no hasban?

²³ Sapot mo help blong ol Kristin brata mo sista i impoten tumas. Jemes 1:27 i talem se: “Prapa fasin blong ona long God ya we i Papa blong yumi, we hem i luk se i klin gud mo i stret gud, hemia. Man i mas goraon long ol pikinini we oli no gat papa blong olgeta, mo long ol widowoman, blong givhan long olgeta long ol trabol we i kasem olgeta.” Yes, ol Kristin oli mas givhan long ol famle we papa no mama hem wan i lukaot long olgeta. ?Wanem sam gudfala rod blong givhan?

24. ?Long wanem rod yumi save givhan long ol famle we papa no mama i no gat waef no hasban?

²⁴ Yumi save givim sam samting we oli nidim. Baebol i talem se: “?Sipos wan man we i rijman i luk brata blong hem we i trabol, be i satem tingting blong hem, i no wantem givhan long brata blong hem, olsem wanem hem i save talem se hem i laekem God? Fasin blong laekem God i no stap nating long hem.” (1 Jon 3:17) Grik wod we oli tanem i kam “luk” i no minim se yu lukluk kwik nomo, be i minim se yu luklukgud. Samting ya i soemaot se maet wan Kristin i traem save long laef blong wan famle fastaem, mo long ol samting we oli nidim. Maet oli nidim mane. Maet oli nidim help blong fiksimap sam samting long haos. Maet oli glad nomo sipos yumi singaot olgeta blong kam kakae long haos no blong joen wanples wetem yumi blong haremgud.

25. ?Olsem wanem ol Kristin brata mo sista oli save soem sore long ol papa no mama we oli no gat waef no hasban?

²⁵ Mo tu, 1 Pita 3:8 i talem se: “Yufala evriwan i mas gat wan tingting nomo, mo yufala i mas gat sore long yufala. Yufala i mas laeklaekem yufala olsem we yufala i wan brata nomo, mo yufala i mas mekem i gud long yufala.” Wan mama we i gat sikis pikinini be i no gat hasban, i talem se: “I hadwok, mo sam samtaem, mi harem se ol samting oli hevi tumas. Be, wanwan taem i gat wan brata no sista we i kam talem long mi, se: ‘Joan, yu stap mekem wan gudfala wok. Bambae yu kasem gudfala frut from.’ Taem yu save se ol narafala oli tingbaot yu mo oli intres long yu, samting ya i save givhan bigwan.” Ol olfala Kristin woman oli save givhan gud long ol yangfala mama we oli no gat hasban. Oli save lesingud long ol problem we maet ol yangfala woman ya oli no save tokbaot wetem wan man.

26. ?Olsem wanem ol Kristin man we oli bigman long ol Kristin fasin oli save givhan long ol pikinini we oli no gat papa?

²⁶ Ol Kristin man oli save givhan long sam narafala rod. Stret man ya Job i talem se: “Mi givhan long . . . ol boe we oli no gat papa mo evriwan we oli no gat man blong halpem olgeta.” (Job 29:12) Tede tu, sam Kristin man oli intres long ol pikinini we oli no gat papa. Oli soem trufala ‘lav we i kamaot long wan klin hat.’ I no gat wan nogud tingting we i pusum olgeta. (1 Timote 1:5) Antap long wok blong lukaot long prapa famle blong olgeta, oli mekem plan blong go long Kristin wok blong prij wetem ol yangfala ya, mo maet oli askem olgeta tu blong joen long famle stadi no joen wetem famle blong olgeta blong spel mo pleplei. Kaengud fasin olsem i save givhan long pikinini we i no gat papa, blong i no lego stret rod.

27. ?Papa no mama we hem wan i stap lukaot long famle, i save sua se hu bambae i sapotem hem?

²⁷ I tru, papa no mama we hem wan nomo i lukaot long famle blong hem, i mas ‘karem prapa basket’ no wok blong hem. (Galesia 6:5) Be hem i save kasem lav blong ol Kristin brata mo sista, mo blong Jeova God tu. Baebol i tokbaot Jeova, i se: ‘Hem i stap karem ol hevi samting blong ol wido, mo blong ol pikinini we oli no gat papa.’ (Ol Sam 146:9) !Wetem sapot mo lav blong Jeova, ol famle we papa no mama hem wan i lukaot long olgeta, oli save stanap strong!

[Ol Futnot]

?OLSEM WANEM OL RUL YA BLONG BAEBOL OLI SAVE GIVHAN . . . BLONG WINIM OL PROBLEM LONG FAMLE WE PAPA NO MAMA HEM WAN I LUKAOT LONG OLGETA?

Jeova God i ‘papa blong ol pikinini we oli no gat papa, mo jaj blong ol wido.’—Ol Sam 68:5.

Blong famle i rongud, i impoten blong gat wan gudfala plan.—Proveb 21:5.

Jeova i agri se papa no mama ya i gat raet blong stretem pikinini long gudfala fasin.—Proveb 1:8.

Ol Kristin wido we oli waes oli stap bisi long ol gudfala wok, mo oli prea oltaem.—1 Timote 5:5, 10.

Wan haf blong trufala wosip i blong soem intres long “ol pikinini we oli no gat papa blong olgeta, mo long ol widowoman.”—Jemes 1:27.

[Bokis blong pija long pej 112]

SAMTING WE OL YANGFALA OLI SAVE MEKEM

?Papa no mama blong yu i stap lukaot long yufala hem wan? Sipos yes, ?yu save mekem wanem blong givhan long hem? Wan samting, hemia se yu save obei long hem. Nating sipos yu wan boe no wan gel no yu bigwan finis, yu no gat raet ‘blong lego loa blong mama blong yu.’ (Proveb 1:8) Jeova i talem se yu mas obei. Mo sipos yu mekem olsem, bambae yu glad tumas long fyuja.—Proveb 23:22; Efesas 6:1-3.

Yu mas girap mo mekem sam samting blong givhan, mo blong soemaot tangkyu. Tony i talem se: “Mama blong mi i wok long hospital, mo hem i mas aenem yunifom blong hem. Ale, mi nao mi aenem. Mi mekem olsem, from we long rod ya, mi save givhan long mama blong mi.” Wan mama we hem nomo i stap lukaot long ol pikinini blong hem, i talem se: “Plante taem, mi luk se dei we tingting blong mi i foldaon no mi kros from mi gat wan strong dei long wok, hemia nao dei we gel blong mi i mekemrere kakae mo i putum ol plet oli stap rere long tebel.”

Yu no mas fogetem se fasin blong yu blong wokgud wetem papa no mama blong yu i impoten. Afta we hem i bin wok had blong ful dei, maet i strong long hem blong lidim Baebol stadi blong famle. Sipos yu mekem stronghed, bambae ol samting oli kam had moa. Traem blong stap rere long stret taem we stadi i mas stat. Rerem stadi blong yu fastaem. Sipos yu obei, soem tangkyu, mo wokgud wetem papa no mama blong yu, bambae yu mekem hem i glad. Samting we i impoten moa se, bambae yu mekem God i glad.

[Tok Blong Pija Long Pej 107]

Traem spenem plante taem wetem ol pikinini blong yu

[Tok Blong Pija Long Pej 109]

Ol pikinini, wokgud wetem papa no mama blong yu we i stap lukaot long yufala

[Tok Blong Pija Long Pej 110]

Kongregesen i no save fogetem “ol wido” mo ‘ol pikinini we oli no gat papa’