Stadi 1

?Olsem Wanem Yu Save Faenemaot Samting We God i Wantem Yu Blong Mekem?

?Wanem impoten save i stap insaed long Baebol? (1)

?Baebol i kamaot long hu? (2)

?From wanem yu mas stadi long Baebol? (3)

1. Baebol i wan sas presen we God i givim. Hem i olsem leta we wan papa i sanem i go long ol pikinini blong hem, we hem i laekem olgeta tumas. Baebol i talemaot trutok long yumi long saed blong God​—⁠se hem i hu mo wanem ol tingting blong hem. Hem i talem olsem wanem yumi save winim ol trabol mo faenem trufala glad. Baebol nomo i talem long yumi wanem we yumi mas mekem blong God i glad long yumi.​—⁠Ol Sam 1:​1-3; Aesea 48:​17, 18.

2. I gat 40 man we oli bin raetem Baebol. Stat long 1513 B.K.T.,a oli tekem 1,600 yia blong mekem wok ya. Insaed long Baebol, i gat 66 smol buk. Paoa blong God i pusum ol man ya blong raetem Baebol. Oli raetemdaon ol tingting blong Hem, i no tingting blong olgeta. Taswe, Baebol i no kamaot long wan man long wol ya, be i kamaot long God nomo we i stap long heven.​—⁠2 Timote 3:​16, 17; 2 Pita 1:​20, 21.

3. God i lukaotgud se ol man oli mekem ol stret kopi blong Baebol, mo se hem i stapgud kam kasem taem blong yumi. Oli bin prentem moa Baebol i bitim ol narafala buk long wol. Bambae samfala oli no glad blong luk we yu yu stadi Baebol. Be yu no mas letem samting ya i stopem yu. Blong gat laef we i no save finis long fyuja, yu mas kasem save long saed blong God mo mekem ol samting we hem i wantem, nating se samfala oli agensem yu.​—⁠Matyu 5:​10-12; Jon 17:⁠3.

[Futnot]