Stadi 5
?Wanem Stampa Tingting Blong God Long Saed Blong Wol Ya?
?From wanem Jeova i wokem wol ya? (1, 2)
?From wanem wol ya i no wan paradaes naoia? (3)
?Wanem bambae i hapen long olgeta rabis man? (4)
Long fyuja, ?Jisas bambae i mekem wanem long ol sikman? ?ol olfala? ?ol dedman? (5, 6)
Blong kasem ol blesing long fyuja, ?yu yu mas mekem wanem? (7)
1. Jeova i wokem wol ya blong ol man oli save haremgud blong laef long hem blong olwe. Hem i wantem se wol i fulap blong olwe wetem ol stret man we oli glad. (Ol Sam 115:16; Aesea 45:18) Graon i no save lus samtaem. Bambae hem i stap gogo i no save finis.—Ol Sam 104:5; Eklesiastis 1:4.
2. Bifo we God i mekem man, Hem i jusum wan smol haf blong wol ya, mo hem i mekem i kam wan naesfala paradaes. Hem i kolem ples ya, garen blong Iden. Long ples ya nao, hem i putum faswan man mo woman, Adam mo Iv. Stampa tingting blong God, hemia se tufala i mas karem plante pikinini mo fulumap wol ya. Sloslou, bambae oli mekem ful wol i kam wan paradaes.—Jenesis 1:28; 2:8, 15.
3. Adam mo Iv tufala i sin taem tufala i brekem loa blong God. Taswe, Jeova i putumaot tufala long garen blong Iden. Paradaes i lus. (Jenesis 3:1-6, 23) Be Jeova i no fogetem stampa tingting blong hem long saed blong wol ya. Hem i promes se bambae hem i mekem wol i kam wan paradaes we ol man oli save laef long hem gogo i no save finis. ?Olsem wanem bambae hem i mekem samting ya?—Ol Sam 37:29.
4. Bifo we wol i save kam wan paradaes, ol rabis man oli mas lus. (Ol Sam 37:38) Samting ya bambae i hapen long Amageden, hemia faet blong God blong finisim ol rabis fasin. Afta, bambae Setan i kalabus blong 1,000 yia. Bambae i no moa gat wan rabis man i stap blong spolem wol. Ol man blong God nomo bambae oli stap laef.—Revelesen 16:14, 16; 20:1-3.
5. Long taem ya, bambae Jisas Kraes i rul blong 1,000 yia, olsem King antap long wol ya. (Revelesen 20:6) Sloslou, bambae hem i karemaot sin long tingting mo bodi blong yumi. Bambae yumi kam stretgud olgeta, olsem Adam mo Iv bifo we tufala i sin. Ale, bambae i no moa gat sik, olfala, mo ded. Ol sikman bambae oli kamgud bakegen, mo ol olfala bambae oli kam yangfala bakegen.—Job 33:25; Aesea 33:24; Revelesen 21:3, 4.
6. Long Wan Taosen Yia Rul ya blong Jisas, ol man we oli stap tru long God bambae oli wok blong mekem ful wol i kam wan paradaes. (Luk 23:43) Mo tu, plante milyan dedman bambae oli laef bakegen long wol ya. (Ol Wok 24:15) Sipos oli mekem olgeta samting we God i wantem se oli mekem, bambae oli gohed blong stap long wol ya blong olwe. Sipos no, bambae oli lus blong olwe.—Jon 5:28, 29; Revelesen 20:11-15.
7. Olsem nao, stampa tingting blong God long saed blong wol ya bambae i kamtru. ?Yu yu wantem kasem ol blesing ya long fyuja? Sipos yes, yu mas gohed blong lanem moa long saed blong Jeova, mo obei long ol samting we hem i wantem yu blong mekem. Blong halpem yu long rod ya, kam long ol miting blong ol Wetnes blong Jeova long Haos Kingdom we i stap kolosap long yu.—Aesea 11:9; Hibrus 10:24, 25.
[Tok blong pija long pej 10]
Paradaes i lus
[Tok blong pija long pej 11]
Afta Amageden, wol ya bambae i kam paradaes