No Bitim Taem, Longfala Blong Evri Haf Blong Tok i Mas Stret

BIGFALA samting we yu mas tingbaot, hemia blong tijim gud ol man. Nating se i olsem, i impoten tu we yu no bitim taem. I gat wan stret taem blong ol miting blong yumi oli stat mo oli finis. Evriwan we oli gat wan tok, oli mas givhan blong mekem se miting i finis long stret taem.

Laef blong ol man long Baebol i no sem mak long laef blong ol man long plante ples tede. Plante taem, ol man bifo oli no talem stret taem we samting i hapen. Maet oli talem nomo se i hapen taem “san i stap godaon” no long “medel dei.” (Jen. 24:11; 43:16; 1 King 18:26) Ol man ya oli no hareap blong mekem ol samting long wan stret taem evri dei. Tede, long sam ples blong wol, ol man oli gat fasin ya yet.

Nating se fasin blong ol manples blong yu, no tingting blong ol man wanwan, i no blong mekem ol samting long wan stret taem, be i gud yu lanem blong tinghevi long stret taem we yu mas mekem wan samting. Fasin ya i save givhan bigwan long yu. Sipos i gat plante tok long miting, olgeta wanwan we oli gat ol tok ya oli mas tingbaot stret taem we oli mas finisim tok blong olgeta. Baebol i talem se, ‘yumi mas mekem olgeta samting long fasin we i stret gud, mo we ol man oli glad long hem.’ Rul ya i stret tu long fasin blong finisim ol tok blong yumi long miting long stret taem.—1 Kor. 14:40.

?Yu Mekem Olsem Wanem Blong Yu No Bitim Taem? Bigfala samting se yu mas rere gud. Klosap oltaem, olgeta we oli bitim taem oli no rere gud. Maet oli ting se oli no nid blong rere gud from we oli mekem plante tok finis. Sipos no, maet oli mekemrere tok blong olgeta long las minit nomo. Fas samting we i save givhan long yu blong yu no bitim taem, se yu mas tinghae long tok we yu mekem, mo yu mas wantem blong rere gud long hem.

?Olsem wanem? ?Bambae yu rid long fored blong kongregesen? Fastaem i gud yu ridim Poen 4 kasem Poen 7 long buk ya, hemia: toktok i ron gud, spel smol long ples we i stret, talem strong ol tok we i stret blong talem strong, mo talem strong ol bigfala tingting. Nao taem yu rid long bigfala voes, yu folem ol advaes long ol poen ya. Yu mas makem taem blong yu. ?Olsem wanem? ?Yu luk se yu mas rid kwik moa blong finis long stret taem? Ating yu save hareap moa long sam haf we oli no impoten tumas, be yu mas gohed blong spel smol mo slodaon blong mekem ol bigfala tingting oli kamaot klia. Yu ridim bakegen mo bakegen. Taem yu kam gud moa long poen ya se toktok blong yu i rongud, bambae i isi moa blong mekem riding blong yu i finis long stret taem.

?Olsem wanem? ?Bambae yu mekem tok folem ol samting we yu raetem finis long wan pepa? Sipos yu wantem finis long stret taem, i no nid blong raetem plante samting long pepa, olsem we yu raetem evri wod blong tok blong yu. Taem yu wok long Poen 25, yu lanem wan rod we i moa gud. Yu save tingbaot faef advaes ya: (1) Yu rerem ol gudfala save, be i no plante tumas. (2) Ol bigfala poen oli mas stap klia long tingting blong yu, be yu no lanem ol tok baehat. (3) Yu raetem long pepa blong yu, hamas minit we bambae yu yusum long evri haf blong tok blong yu. Sipos no, long wanwan ples long pepa ya, yu raetem se yu yusum hamas minit finis. (4) Taem yu rerem tok blong yu, i gud yu tingbaot ol smosmol poen we yu save tekemaot sipos yu luk se taem i sot. (5) Yu lanem tok blong yu.

I impoten blong lanem tok blong yu. Taem yu stap lanem, yu save makem hamas minit yu yusum long evri haf blong tok ya. Yu lanem tok blong yu bakegen mo bakegen gogo yu finisim long stret taem. Yu no traem putum tumas save long tok ya, we bambae i mekem se yu bitim taem blong yu. Taem yu stap lanem tok blong yu, i gud yu no yusum evri minit blong yu. Hemia from we taem yu toktok long fored blong ol man, plante taem yu tekem longfala taem moa bitim wanem we yu yusum taem yu lanem tok ya yu wan.

Yu Makemaot Taem Blong Evri Haf Blong Tok. Sipos yu no wantem bitim taem, yu mas makemaot hamas minit bambae yu yusum long evri haf blong tok. Yu yusum bighaf blong taem blong yu long bodi blong tok. Bodi, hemia haf we i gat ol bigfala poen long hem blong tijim ol man. Longfala blong fastok i mas naf blong mekem trifala samting we Poen 38 i tokbaot. Mo olsem ol advaes long Poen 39 i talem, yu no mas mekem bodi blong tok i longfala tumas, nao yu no moa gat naf taem blong mekem gud lastok blong yu.

Sipos yu traehad blong finisim tok blong yu long stret taem, bambae tok ya i moa gud, mo bambae yu soemaot se yu gat respek long ol narafala we oli gat wan tok long miting, mo yu gat respek long evriwan long kongregesen.