Wan Sikret We Yumi Glad Blong Save

?Wan man i talemaot wan sikret long yu finis?—a Baebol i tokbaot wan spesel sikret se hem i wan “tok haed” we i kamaot long God. Hem i wan sikret from we ol man oli no save long hem. Ol enjel tu oli wantem tumas blong save sikret ya. ?Yu tu yu wantem save sikret ya?—

Longlongtaem bifo, God i wokem fas man mo fas woman. Nem blong tufala Adam mo Iv. God i putum tufala long wan naesfala ples we nem blong hem, garen blong Iden. Sipos Adam mo Iv tufala i obei long God, bambae tufala mo ol pikinini blong tufala oli save mekem olgeta ples long wol i kam wan paradaes, olsem garen ya. Mo olgeta evriwan oli save laef olwe long Paradaes ya. ?Be yu yu tingbaot samting we Adam mo Iv tufala i mekem?—

Adam mo Iv tufala i no obei long God. From samting ya, yumi no laef long wan paradaes tede. Be God i talem se bambae hem i mekem olgeta ples long wol i kam naes, mo evri man bambae oli laef olwe mo oli glad. ?Bambae hem i mekem samting ya olsem wanem? Longtaem i kam, ol man oli no save. Hem i wan sikret.

Jisas i talem se sikret ya hem i Kingdom blong God. Hem i talem long ol man se oli mas prea blong Kingdom ya i kam. Kingdom ya bambae i mekem wol ya i kam wan naesfala paradaes.

?Yu yu glad blong save sikret ya?— Yu mas rimemba se olgeta nomo we oli obei long Jehova, bambae oli laef long Paradaes. Baebol i talem plante stori blong ol man mo ol woman we oli obei long Jehova. ?Yu yu wantem save ol man ya?— I gud yumi luk stori blong sam long olgeta, mo olsem wanem yumi save folem fasin blong olgeta.