“Yufala i Mas Tingbaot Ol Man Ya We Oli Stap Lidim Yufala”

NARAFALA rod blong tanem tok blong aposol Pol long Hibru 13:7, hemia: “Yufala i mas tingbaot ol man ya we oli olsem hed long yufala.” Stat long lafet blong Pentekos long yia 33, ol gudfala aposol blong Masta Jisas Kraes oli wok olsem hed kampani, blong lidim Kristin kongregesen we i jes stanap. (Wok 6:2-4) Samwe long yia 49, hed kampani ya i kam bigwan moa. Taem hed kampani i mekem desisen long sakomsaes, i no ol aposol blong Jisas nomo we oli stap long hem, be i gat ‘ol aposol mo ol elda long Jerusalem’ tu. (Wok 15:1, 2) Wok blong olgeta i blong lukluk long evri samting we i save mekem laef blong ol Kristin long evri ples i kamgud moa. Oli sanem ol leta mo ol desisen i goaot long ol kongregesen. Samting ya i mekem se ol kongregesen oli kam strong, mo tu ol disaepol oli gat wan tingting nomo, mo wan plan blong wok. Ol kongregesen oli folem toktok blong hed kampani, mo from samting ya, Jehova i blesem olgeta mo oli gohed gud.—Wok 8:1, 14, 15; 15:22-31; 16:4, 5; Hib. 13:17.

² Afta long ded blong ol aposol, plante man blong apostasi oli kam. (2 Tes. 2:3-12) Jisas i talemaot samting ya finis long parabol blong ol gudfala sid mo rabis gras. Long parabol ya, wan man i planem gudfala sid long garen (ol tabu Kristin), be biaen wan narafala man i kam planem rabis gras long garen ya (ol giaman Kristin). Plante handred yia, ol sid ya oli gru wanples gogo kasem taem blong havest, “hemia lashaf blong sistem blong wol ya.” (Mat. 13:24-30, 36-43) Long ol yia ya, Jisas i glad long ol wanwan tabu Kristin we oli stap olbaot long wol. Be i no gat wan hed kampani yet we Jisas i yusum blong lidim ol man blong hem long wol. (Mat. 28:20) Be hem i talem se samting ya bambae i jenis long taem blong tekemaot kakae long garen.

³ “?Hu ya gudfala slef we i waes?” Jisas Kraes i askem kwestin ya bifo we hem i talem wan parabol. Parabol ya i haf blong “saen” ya we i soemaot “lashaf blong sistem blong wol ya.” (Mat. 24:3, 42-47) Jisas i soemaot se slef ya bambae i bisi blong givimaot save we i olsem kakae, long ol man blong God “long stret taem.” Long taem blong ol fas Kristin, Jisas i no yusum wan man nomo blong lidim ol disaepol blong hem, be hem i yusum wan grup blong man. Long sem fasin, long lashaf blong sistem blong wol ya, hem i no yusum wan man nomo olsem gudfala slef we i waes, be hem i yusum wan grup blong man.

?HU YA “GUDFALA SLEF WE I WAES”?

⁴ ?Jisas i putumap hu blong i givim kakae long ol man blong hem? I stret nomo we hem i yusum ol tabu Kristin long wol ya. Baebol i talem se olgeta ya oli “wan grup blong ol king we oli pris.” Oli stap “‘talemaot ol gudgudfala fasin’ blong God we i singaot [olgeta] i aot long tudak, [oli] kam long nambawan laet blong hem.” (1 Pita 2:9; Mal. 2:7; Rev. 12:17) ?Olsem wanem? ?Gudfala slef we i waes i minim olgeta tabu man long wol? Nogat. Taem Jisas i mekem merikel blong givim kakae long 5,000 man, wetem ol woman mo ol pikinini, hem i givim kakae ya long ol disaepol blong hem fastaem, nao olgeta ya oli givimaot long ol man. (Mat. 14:19) Hem i yusum sam man nomo blong oli givim kakae long plante man. Tede, hem i givimaot save blong God long sem fasin.

⁵ Taswe “gudfala bos we i waes,” i minim wan smol grup blong ol tabu brata blong Kraes. Olgeta ya oli rerem gud mo givimaot ol save blong God olsem kakae, long taem ya we Kraes i stap bakegen. (Luk 12:42) Long ol las dei ya, ol tabu brata we oli olsem “gudfala slef we i waes,” oli wok wanples long hedkwota blong ol Witnes blong Jehova. Ol tabu brata ya nao oli Hed Kampani blong ol Witnes tede.

⁶ Kraes i yusum grup ya blong givimaot ol save long saed blong ol profet tok blong Baebol we oli stap kamtru, mo blong givim advaes we i halpem yumi blong folem ol rul blong Baebol long laef blong yumi. Oli givimaot save ya we i olsem kakae long ol kongregesen blong ol Witnes blong Jehova. (Aes. 43:10; Gal. 6:16) Long taem bifo, wan slef no man blong wok we masta i trastem, hem i lukaot long olgeta samting long haos blong masta. Long sem fasin, gudfala slef we i waes i lukaot long ol man blong God. Taswe, slef ya i lukaot long mane mo olting blong oganaesesen blong God, wok blong prij, ol program blong asembli, wok blong putumap ol elda long ol defdefren wok long oganaesesen, mo blong printim ol buk mo Baebol. Ol wok ya oli givhan long “ol narafala man” blong masta.—Mat. 24:45.

⁷ ?Hu ya “ol narafala man” blong masta? Hemia olgeta we oli stap kasem kakae. Fastaem ol tabu man nomo oli ol narafala man blong masta. Afta, wan bigfala kampani blong “ol narafala sipsip” i joenem olgeta. (Jon 10:16) Tufala grup ya tugeta i stap kasem ol save ya we slef i givimaot olsem kakae.

⁸ Long taem blong bigfala trabol, taem Jisas i kam blong jajem mo spolem rabis sistem blong wol ya, bambae hem i putumap gudfala slef we i waes blong “i lukaot long olgeta samting blong hem.” (Mat. 24:46, 47) Olgeta we oli stap long grup ya bambae oli kasem praes blong olgeta long heven. Bambae oli joen wetem ol narafala memba blong 144,000 man blong rul wetem Kraes long heven. Long taem ya, bambae i no moa gat gudfala slef we i waes long wol. Bambae Jehova mo Jisas i putumap sam man olsem “ol prins,” blong oli lidim ol man blong God long wol, we oli stap aninit long rul blong Kingdom blong Mesaea.—Sam 45:16.

‘YUMI OBEI LONG OLGETA WE OLI STAP LIDIM YUMI’

⁹ I gat plante gudfala risen blong ‘obei long olgeta we oli stap lidim yumi,’ mo blong trastem olgeta. ?Olsem wanem samting ya i mekem i gud long yumi? Aposol Pol i talem se: “Olgeta oli stap gohed blong lukaot gud long laef blong yufala, mo oli mas talemaot long God se oli holem wok ya olsem wanem. Olsem nao, oli save mekem wok ya wetem glad, be oli no pulum nogud win blong olgeta, from we samting ya i save spolem yufala.” (Hib. 13:17) Yumi mas lesin mo obei long olgeta we oli lidim yumi, from we oli stap lukaotgud long laef blong yumi. Oli protektem yumi mo oli givhan long yumi blong yumi strong.

¹⁰ Long 1 Korin 16:14, Pol i talem se: “Long olgeta samting we yufala i mekem, yufala i mas mekem wetem lav.” Ol man we oli lidim yumi oli lavem yumi, mo ol desisen blong olgeta i soemaot samting ya. Fas Korin 13:4-8 i talem se: “Man we i gat lav, hem i gat longfala tingting mo i kaen. Man we i gat lav, hem i no jalus. Hem i no tok flas mo tingting blong hem i no go antap. Man we i gat lav, hem i no mekem ol samting we i no stret, hem i no tingbaot hem wan nomo, mo hem i no kros kwik. Hem i no tingbaot rong we ol narafala oli mekem long hem. Hem i no glad long ol fasin we i no stret, be hem i glad long ol fasin we i tru. Hem i no letem wan samting i daonem tingting blong hem, mo hem i bilif long olgeta samting, hem i gat hop long olgeta samting, mo hem i stanap strong long olgeta samting. Lav i no save finis samtaem.” Ol man we oli lidim yumi oli soemaot se oli lavem yumi taem oli mekem ol desisen we oli givhan long yumi. From samting ya, yumi harem se yumi stap sef. Fasin ya blong olgeta i soemaot tu se Jehova i lavem yumi.

¹¹ Tede, Jehova i yusum ol sinman nomo blong oli lidim ol man blong hem, olsem hem i mekem long taem blong ol fas Kristin. Bifo long taem ya tu, Jehova i yusum ol sinman blong oli mekem wok blong hem. Noa i bildim wan bigfala sip mo i talemaot long ol man se God bambae i spolem olgeta. (Jen. 6:13, 14, 22; 2 Pita 2:5) Jehova i putumap Moses blong i lidim ol man blong hem oli aot long Ijip. (Eks. 3:10) God i givim tabu spirit long ol man we oli no stret gud olgeta blong oli raetem Baebol. (2 Tim. 3:16; 2 Pita 1:21) Taem yumi luk we Jehova i stap yusum ol man we oli no stret gud olgeta blong lidim wok blong prij mo mekem disaepol, yumi strong blong trastem oganaesesen blong hem. Be yumi kam strong moa, from we yumi save se sipos Jehova i no givhan, bambae oganaesesen ya i no naf blong mekem bigfala wok we hem i stap mekem. Long olgeta yia we oli pas finis, ol desisen we gudfala slef we i waes i mekem long gudtaem mo hadtaem tu, oli soemaot se tabu spirit i stap lidim hem. Tede, Jehova i stap blesem bigwan oganaesesen blong hem long wol. From samting ya, yumi sapotem fulwan oganaesesen ya mo yumi trastem hem.

YUMI TRASTEM JEHOVA MO PLAN WE HEM I PUTUMAP

¹² Olgeta we oli gat wok insaed long kongregesen, oli soemaot se oli trastem Jehova mo plan we hem i putumap, taem oli glad blong mekem wok blong olgeta. Mo tu, oli holemstrong long wok ya, mo oli mekemgud wok ya. (Wok 20:28) Yumi ol man blong talemaot Kingdom, yumi wok strong. Yumi prij, yumi visitim ol man bakegen, mo yumi mekem ol Baebol stadi. (Mat. 24:14; 28:19, 20) Yumi rerem ol miting, mo go long olgeta Kristin miting mo asembli. Olsem nao, yumi kasem plante nambawan save we gudfala slef we i waes i givimaot olsem kakae. Long ol Kristin miting mo asembli, yumi harem gud tumas blong joen mo storian wetem ol narafala Kristin. Hemia i leftemap tingting blong yumi evriwan.—Hib. 10:24, 25.

¹³ Taem yumi givim presen mane blong sapotem oganaesesen, yumi soemaot se yumi trastem hem. (Prov. 3:9, 10) Sipos sam Kristin brata mo sista oli sot long sam samting, yumi hareap blong givhan long olgeta. (Gal. 6:10; 1 Tim. 6:18) Yumi mekem olsem from we yumi lavem olgeta. Oltaem yumi lukaot rod blong talem tangkiu long Jehova mo oganaesesen blong hem, from ol gudfala samting we yumi kasem.—Jon 13:35.

¹⁴ Wan narafala rod blong soemaot se yumi trastem oganaesesen blong God, i blong obei long ol desisen blong hem. Hemia i min se yumi obei long olgeta we oli lukaot long yumi, olsem ol eria elda mo ol elda long kongregesen. Olgeta ya ‘oli stap lidim yumi,’ mo yumi mas ona mo obei long olgeta. (Hib. 13:7, 17) Samtaem yumi no kasem save fulwan long sam desisen. Be yumi save se sipos yumi obei long ol desisen ya, gudfala frut bambae i kamaot. Biaen, Jehova bambae i blesem yumi from we yumi obei long Tok blong hem mo oganaesesen blong hem. Long fasin ya, yumi soemaot se yumi obei long Masta blong yumi, Jisas Kraes.

¹⁵ I gat plante gudfala risen blong trastem gudfala slef ya we i waes. Setan we i god blong wol ya, i stap mekem evri samting we hem i save mekem blong sakem doti long nem blong Jehova mo oganaesesen blong hem. (2 Kor. 4:4) !Yu no mas foldaon long ol rabis trik blong Setan! (2 Kor. 2:11) Hem i save se ‘i gat smol taem nomo i stap,’ nao bambae hem i go kalabus long bigfala hol we i godaon olgeta. Taswe hem i stap traehad blong pulumaot plante man blong Jehova. (Rev. 12:12) Taem Setan i traehad moa blong pulumaot yumi, yumi mas kam klosap moa long Jehova. Yumi mas trastem Jehova mo rod we hem i stap yusum blong lidim ol man blong hem tede. Taem yumi mekem olsem, kampani blong ol Kristin brata mo sista long fulwol i joen gud.