Ol Miting Oli Pulum Yumi Blong ‘Lavem Narafala Mo Mekem Ol Gudfala Wok’

LONG ol handred yia we oli pas finis, ol man blong Jehova oli mekem miting oltaem folem wan plan. Long Isrel bifo, evri yia olgeta man oli wokbaot i go long Jerusalem blong mekem tri lafet. (Dut. 16:16) Ol fas Kristin oli joen oltaem wanples blong mekem miting, mo plante taem oli joen long haos blong wan long olgeta nomo. (Flm. 1, 2) Tede tu, yumi mekem ol miting mo asembli. ?From wanem? Bigfala risen, hemia from we oli impoten haf blong wosip blong yumi.—Sam 95:6; Kol. 3:16.

² Mo tu, ol miting oli mekem i gud long ol man. Baebol i talem samting we ol man Isrel oli mas mekem evri seven yia long Lafet blong Wokem ol Wansaed Haos, i se: “Yufala i singaot evriwan oli kam wanples, ol man, ol woman, ol pikinini, mo ol man blong narafala kantri we oli stap insaed long ol taon blong yufala, nao bambae olgeta oli save lesin mo lanem blong save Jehova we i God blong yufala, fraet long hem, mo lukaot blong folemgud olgeta tok we i stap long Loa ya.” (Dut. 31:12) I klia se, wan bigfala risen blong mekem miting, i blong kasem tijing blong Jehova. (Aes. 54:13) Ol miting oli givim janis tu blong yumi savsave yumi, yumi lefleftemap tingting blong yumi, mo yumi kam strong moa taem yumi joen wetem ol Kristin brata mo sista blong yumi.

OL MITING BLONG KONGREGESEN

³ Afta long lafet blong Pentekos long yia 33, ol disaepol oli stap kam wanples blong lesin long ol tijing we ol aposol oli givim long olgeta. “Evri dei, oli stap oltaem long tempol we oli gat wan tingting nomo.” (Wok 2:42, 46) Biaen, taem ol Kristin oli joen wanples blong wosipim God, oli ridimaot tok blong God, wetem ol leta we oli kasem long ol aposol mo ol Kristin disaepol. (1 Kor. 1:1, 2; Kol. 4:16; 1 Tes. 1:1; Jem. 1:1) Mo tu, kongregesen i joen wanples blong prea. (Wok 4:24-29; 20:36) Samtaem, ol misinari oli stori long wok blong olgeta. (Wok 11:5-18; 14:27, 28) Ol fas Kristin oli tokbaot ol tijing blong Baebol mo ol profet tok we oli stap kamtru. Oli kasem tijing long saed blong gudfala fasin blong ol Kristin mo fasin blong onagud long God. Ol miting ya oli pulum olgeta blong oli gat strong tingting blong talemaot gud nius.—Rom 10:9, 10; 1 Kor. 11:23-26; 15:58; Efes. 5:1-33.

⁴ Ol Kristin miting tede oli sem mak long ol miting long taem blong ol aposol. Yumi stap folem tok blong God long Hibru 10:24, 25, we i talem se: “I gud yumi stap tingbaot yumi . . . blong kam wanples long ol miting blong yumi, olsem we samfala oli stap mekem. Oltaem yumi mas toktok gud blong leftemap tingting blong yumi. Mo yufala i mas mekem samting ya moa, taem yufala i luk we dei ya i stap kam klosap.” Yumi stap finis long ol las dei mo laef i had. From samting ya, oltaem yumi nidim ol miting we oli leftemap tingting blong yumi, nao yumi save stap strong long trutok mo holemstrong long God. (Rom 1:11, 12) Yumi ol Kristin, yumi stap laef long medel blong ol man we oli nogud mo oli gat kruked fasin. Yumi lego finis olgeta fasin we oli no stret long fes blong God mo ol tingting blong wol ya. (Fil. 2:15, 16; Taet. 2:12-14) I no gat wan grup blong man long wol we oli olsem ol man blong Jehova, we yumi save kampani gud wetem olgeta. (Sam 84:10) Mo i no gat wan samting we i save givhan moa long yumi, i bitim we yumi stadi long Baebol mo tokbaot. Yu traem tingbaot ol defren miting we oli givhan long yumi.

MITING BLONG WIKEN

⁵ Pablik tok i fas haf blong miting long wiken. Hem i wan tok we i stanap long Baebol. Hem i stret long eni man blong kam lesin, mo sam long olgeta maet hem i fas taem blong kam long miting. Pablik tok i givhan gud long ol niuwan mo ol narafala long kongregesen tu, blong oli kasem ol save blong God we i olsem gudfala kakae.—Wok 18:4; 19:9, 10.

⁶ Tede ol man blong Jehova long kongregesen oli harem gud long pablik tok, ol tok olsem oli sem mak long ol tok we Jisas Kraes, ol aposol, mo ol narafala we oli wok wetem olgeta oli stap mekem bifo. Jisas i nambawan man blong tij. Samfala oli talem se: “Neva wan man i toktok olsem man ya.” (Jon 7:46) Tok blong Jisas i gat paoa, mo ol man oli sapraes long hem. (Mat. 7:28, 29) Ol tok blong hem oli givhan gud long ol man we oli obei. (Mat. 13:16, 17) Ol aposol oli folem fasin blong Jisas. Long Ol Wok 2:14-36, yumi ridim tok blong Pita long dei blong Pentekos long yia 33, we i pulum plante taosen man blong oli mekem samting. Pol tu i mekem wan pablik tok long Atens, we i pulum plante man blong oli bilif.—Wok 17:22-34.

⁷ Long taem blong yumi, plante milian man oli stap lanem plante samting long ol pablik tok long kongregesen evri wik, wetem ol pablik tok mo ol narafala tok long ol asembli tu. Ol tok ya oli givhan long yumi evriwan blong yumi tingting oltaem long ol tijing we ol Kristin oli mas folem, mo oli pulum yumi blong holemstrong long wok blong Kingdom. Sipos yumi singaot olgeta we oli intres long trutok mo ol narafala man tu blong oli kam long miting, hemia i save givhan long olgeta blong oli kasem ol stamba tijing blong Baebol.

⁸ Ol pablik tok oli tokbaot plante defren samting, olsem ol tijing blong Baebol, ol profet tok, ol rul mo advaes blong Baebol long ol samting olsem famle, mared, ol trabol we ol yangfala oli fesem, mo ol gudfala Kristin fasin. Sam pablik tok oli pulum yumi blong tingbaot ol nambawan samting we Jehova i wokem raonabaot long yumi. Sam narafala tok oli tokbaot ol man long Baebol we oli gat strong bilif, oli no fraet, mo oli holemstrong long Jehova. Mo ol tok ya oli soemaot olsem wanem yumi save folem fasin blong olgeta tede.

⁹ Sipos yumi wantem lanem plante samting long ol pablik tok, yumi mas lesingud, faenem ol vas long Baebol, mo folem ol vas ya taem brata i ridim mo i eksplenem. (Luk 8:18) Olsem nao, bambae yumi pruvum se ol tok we yumi harem i stanap long Baebol. Nao bambae yumi wantem holemtaet tok ya mo mekem i wok long laef blong yumi.—1 Tes. 5:21.

¹⁰ Sipos i gat plante brata we oli naf blong mekem ol tok, bambae i gat pablik tok evri wik. Plante taem, wan brata blong narafala kongregesen i save kam mekem pablik tok. Sipos i no gat naf brata blong mekem pablik tok evri wik, bambae oli mekem bes blong olgeta nomo.

¹¹ Seken haf blong miting long wiken, hemia Wajtaoa Stadi. Hemia wan haf blong kwestin mo ansa. Jehova i yusum Wajtaoa blong givim save long yumi, we i olsem kakae long stret taem blong hem.

¹² Plante taem, Wajtaoa Stadi i tokbaot ol rul blong Baebol, mo olsem wanem blong mekem olgeta oli wok long laef blong yumi. Ol stadi ya oli pulum ol Kristin blong oli stanap strong agensem “spirit blong wol” mo ol doti fasin. (1 Kor. 2:12) Wajtaoa i givim moa save long yumi long ol tijing blong Baebol mo ol profet tok. Olsem nao, yumi kasem ol niufala trutok we oli kamaot, nao yumi save gohed blong folem rod blong stret man. (Sam 97:11; Prov. 4:18) Sipos yumi kam long Wajtaoa Stadi mo yumi givim ansa, hemia i save mekem se oltaem yumi putum tingting blong yumi i stap strong long niufala wol, mo yumi harem gud from. (Rom 12:12; 2 Pita 3:13) Wajtaoa Stadi i givhan long yumi blong yumi gat ol frut blong tabu spirit, mo yumi wantem wok strong moa long wok blong Jehova. (Gal. 5:22, 23) Yumi kasem paoa blong stanap strong long taem blong trabol, mo blong putum ‘wan gudfala fandesen blong laef blong yumi long fiuja, nao bambae yumi save holemtaet laef ya we i prapa wan.’—1 Tim. 6:19; 1 Pita 1:6, 7.

¹³ ?Yumi save mekem wanem blong ol nambawan kakae ya i givhan gud long yumi? Yumi mas reregud Wajtaoa Stadi, maet yumi wanwan o long famle. Yumi jekem ol vas blong Baebol we oli no raetem fulwan long paragraf, mo yumi givim ansa long miting long prapa tok blong yumi. Hemia i save mekem trutok i kasem hat blong yumi. Taem yumi givim ansa we i soemaot bilif blong yumi, hem i givhan long ol narafala. Sipos yumi lesin gud long ansa blong ol narafala, bambae yumi kasem ol gudfala samting long stadi blong Wajtaoa evri wik.

MITING BLONG MEDEL WIK

¹⁴ Evri wik, kongregesen i joen long Haos Kingdom blong mekem wan miting we nem blong hem Kristin Wok Mo Laef. Miting ya i gat tri haf blong hem we oli blong mekem se yumi ‘naf blong mekem wok’ blong God. (2 Kor. 3:5, 6) Program blong miting ya mo ol samting we yumi tokbaot bambae i stap long wan smol buk we yumi kasem evri manis, we nem blong hem Kristin Wok Mo Laef—Miting Wokbuk. Mo tu, long smol buk ya, i gat sam fastok we yumi save yusum long wok blong prij.

¹⁵ Fas haf blong miting ya, nem blong hem, Ol Gudgudfala Samting Long Baebol. Bambae yumi lukluk gud long sam stori long Baebol, ol samting we i hapen mo wetaem i hapen, mo ol narafala samting we i joen wetem stori ya. Mo tu, bambae yumi tokbaot olsem wanem blong folem samting we yumi lanem long ol stori ya. Antap long hemia, i gat wan tok, wan Baebol riding, mo sam kwestin mo ansa long Baebol riding blong wik. Long Kristin Wok Mo Laef—Miting Wokbuk, bambae i gat sam pija mo sam spes we yumi save raetem samting. Hemia i blong givhan long yumi blong yumi kasem save gud. Taem yumi stadi dip long Baebol olsem, samting ya i givhan long laef blong yumi wanwan, mo long wok blong tijim narafala. Yumi ‘naf blong mekem wok, mo yumi gat evri samting we yumi nidim blong mekem evri gudfala wok.’—2 Tim. 3:16, 17.

¹⁶ Seken haf blong miting ya, hemia Kamgud Moa Long Wok Blong Prij. Haf ya i blong trenem yumi blong kam gud moa long wok blong prij mo tij. Sam studen oli mekem wan tok o wan pleplei, mo i gat sam video blong ol fastok tu, we yumi lukluk mo tokbaot. Haf ya blong miting i givhan long yumi blong yumi “save toktok gud olsem ol man we oli trengud finis” nao yumi “save olsem wanem blong ansa long man we i taed, we [yumi] yusum stret tok.”—Aes. 50:4.

¹⁷ Namba tri haf blong miting ya, hemia Laef Blong Ol Kristin. Yumi tokbaot olsem wanem blong folem ol tok blong Baebol long laef blong yumi. (Sam 119:105) Wan bigfala samting long haf ya, hemia Baebol Stadi blong Kongregesen. Baebol Stadi ya i gat ol kwestin mo ansa, olsem Wajtaoa Stadi.

¹⁸ Evri manis yumi kasem wan niufala Kristin Wok Mo Laef—Miting Wokbuk. Nao kodineta blong ol elda o elda we i givhan long hem, i ridimgud, mo i mekem program blong miting ya. Evri wik, wan elda i jeaman blong miting ya. Hem i mas wan gudfala tija, mo ol elda oli mas agri se hem i mekem wok ya. Jeaman i mas statem mo finisim miting long stret taem, mo i mas talem gudfala toktok mo givim advaes long ol studen we oli mekem tok.

¹⁹ Sipos yumi rere gud, yumi go, mo yumi ansa long Miting Blong Kristin Wok Mo Laef evri wik, bambae yumi kasem plante save blong Baebol, mo yumi kasem save long ol rul blong God. Mo tu, tingting blong yumi bambae i kam strong moa blong talemaot gud nius, mo yumi kam gud moa long wok blong tijim ol man blong oli kam disaepol. Olgeta we oli no baptaes yet be oli kam long miting ya, oltaem oli harem gud long kampani blong ol brata mo sista, mo long ol gudfala save we i mekem se oli save fren gud wetem God. Blong rere gud from miting ya mo ol narafala miting, yumi save yusum laebri blong Haos Kingdom, mo Watchtower Library, JW Laebri^®, mo Wajtaoa LAEBRI LONG INTENET^™ (sipos i gat long lanwis blong yu). Long laebri blong Haos Kingdom, i gat ol buk blong ol Witnes blong Jehova, Watch Tower Publications Index, o Buk Blong Mekem Risej, wetem ol defdefren translesen blong Baebol, konkodens, diksonari, mo sam narafala buk. Eniwan i save ridim ol buk long laebri, bifo mo afta long ol miting.

MITING BLONG PRIJ

²⁰ Long sam dei blong wik mo long wiken, ol pablisa oli joen wanples blong mekem miting blong prij. Oli mekem miting ya long haos blong wan brata o long wan narafala ples we i isi blong grup i kam long hem. Mo oli save mekem miting blong prij long Haos Kingdom tu. Taem i gat ol smosmol grup olsem long plante ples long teritori, i isi moa blong ol pablisa oli go long miting ya mo long teritori blong prij. Brata i save mekem ol plan kwiktaem mo oli aot blong go long ples blong prij. Mo tu, taem grup i smol, elda we i lukaot long hem i save spenem moa taem wetem evriwan long grup. I moagud we ol grup oli mit wanwan, be maet from sam risen, ol grup oli mas joen. Olsem nao, long dei blong wik we i no gat plante pablisa oli kam prij, maet i moagud we evriwan oli mit long Haos Kingdom o long wan narafala ples we i stret. Hemia bambae i mekem se ol pablisa oli gat fren blong prij wetem olgeta. Mo tu, maet i moagud we kongregesen i mit long Haos Kingdom long ol pablik holide. Maet kongregesen i save joen blong mekem miting blong prij afta we Wajtaoa Stadi i finis.

²¹ Sipos kongregesen i seraot long ol grup wanwan blong mekem miting blong prij, elda we i lukaot long grup i lidim miting ya. Wanwan taem, maet elda ya i askem long brata we i givhan long hem o wan narafala brata we i naf, blong i lidim miting ya. Brata ya i mas rere blong tokbaot sam advaes we bambae i givhan long wok blong prij. Afta, hem i seraotem ol pablisa tutu, mo wan brata i mekem prea. Nao grup ya i go stret long teritori blong prij. Ol miting ya oli blong 5 o 7 minit nomo. Be sipos miting ya i stap afta long miting blong kongregesen, hem i mas sot moa. Miting blong prij i mas mekem se ol pablisa oli glad blong prij, mo i mas givim advaes we i wok gud. Brata we i lidim miting ya i save mekem plan se ol niuwan mo ol narafala we maet oli nidim help long wok blong prij, oli go wetem olgeta we oli prij longtaem finis, blong oli kasem trening.

OL MITING BLONG KONGREGESEN WE I NIU O I SMOL

²² Taem i gat plante niufala disaepol, ol niufala kongregesen oli stanap. Plante taem eria elda nao i askem long branj ofis sipos wan niufala kongregesen i save stanap. Be sipos wan grup i smol, maet i moagud hem i joen nomo wetem kongregesen we i klosap moa long hem.

²³ Long sam smol kongregesen, i gat ol sista nomo. Long taem olsem, sista we i mekem prea long kongregesen mo i lidim miting, i mas kavremap hed blong hem, olsem Baebol i talem. (1 Kor. 11:3-16) Plante taem, ol sista ya oli stap sidaon nomo fesem grup ya. Ol sista oli no givim pablik tok. Be oli ridim mo tokbaot ol save we oganaesesen i givim, o oli mekem pleplei long hem. Branj ofis bambae i askem long wan sista blong i raetem ol leta i go long olgeta mo i lukaot long ol miting. Taem i gat wan brata we hem i naf blong mekem wok ya, bambae oli givim wok ya long hem.

WAN DEI ASEMBLI

²⁴ Evri yia, plan i stap se ol kongregesen long wan eria bambae oli joen wanples blong mekem tu asembli, we tufala wanwan i blong wan dei nomo. Hem i wan taem blong glad, mo i givim janis long olgeta Kristin blong oli “openem hat blong [olgeta] moa.” (2 Kor. 6:11-13) Oganaesesen blong Jehova i jusum stamba tok blong asembli mo sam tok long program folem wan vas blong Baebol we i stret long spesel nid blong ol Kristin long olgeta ples long wol. Ol brata oli givimaot save ya long ol tok, ol pleplei, mo samfala oli aktem ol tru stori, maet wan pablisa i toktok hem wan, o maet brata i askem kwestin long samfala. Ol save ya we i kamaot long stret taem, i mekem olgeta evriwan oli strong moa. Long ol asembli ya, ol niufala disaepol oli save baptaes blong soemaot se oli givim laef blong olgeta i go long Jehova.

BIGFALA ASEMBLI

²⁵ Wan taem long wan yia, ol Witnes blong Jehova oli mekem wan bigfala asembli. Plante taem, asembli ya i blong tri dei. Ol kongregesen long sam eria oli joen wanples long asembli ya we oli kolem Bigfala Asembli. Long sam smol kantri, branj ofis i luk se i moagud we olgeta kongregesen long teritori blong branj, evriwan oli joen wanples. Long sam kantri, plan blong asembli ya i defren, folem ol samting we i stap hapen long kantri ya mo advaes we oganaesesen i givim. Sam samtaem i gat ol intenasnal asembli o ol spesel asembli long ol defren ples long wol, we plante taosen Witnes blong ol defdefren kantri oli go long olgeta. Long ol yia we oli pas finis, plante man oli save long gud nius blong Kingdom, taem oli harem ol man oli tokbaot ol bigfala asembli ya blong ol Witnes blong Jehova.

²⁶ Ol man blong Jehova oli kasem bigfala glad taem oli joen wanples long ol asembli ya blong mekem wosip long Jehova. Long ol asembli olsem, oli talemaot sam niufala save blong trutok we i olsem laet we i saen moa. Mo oli soemaot ol niufala buk we wanwan Witnes mo ol kongregesen bambae oli stadi long olgeta o oli yusum long wok blong prij. Long ol asembli olsem, i gat baptaes tu. Ol asembli oli impoten tumas from oli givhan long ol man blong Jehova blong oli kam bigman long Kraes. Mo ol bigfala asembli oli soemaot se ol man blong Jehova oli joen gud olsem ol brata nomo long fulwol. Ol Kristin ya we oli givim laef blong olgeta long Jehova finis, oli gat fasin we Kraes i talem se ol tru disaepol blong hem oli mas gat.—Jon 13:35.

²⁷ Taem yumi go long ol miting blong kongregesen mo ol asembli blong ol man blong Jehova, yumi kasem paoa blong mekem samting we Jehova i wantem. Mo tu, oli blokem paoa blong wol ya we i save spolem Kristin bilif blong yumi. Ol miting mo ol asembli ya oli leftemap nem blong Jehova mo oli presem hem. (Sam 35:18; Prov. 14:28) Yumi talem tangkiu long Jehova from ol gudfala taem ya we oli mekem bilif blong yumi i strong, mo oli mekem se yumi harem gud long wok blong Jehova long taem blong en.

KAKAE BLONG MASTA

²⁸ Wan taem long wan yia, long stret dei we Jisas Kraes i ded long hem, ol kongregesen blong ol Witnes blong Jehova long fulwol oli mekem Memoriol blong ded blong Kraes, o Kakae blong Masta. (1 Kor. 11:20, 23, 24) Long tingting blong ol man blong Jehova, miting ya i moa impoten i bitim ol narafala miting. Baebol i talem klia se yumi mas mekem Memoriol.—Luk 22:19.

²⁹ Dei blong Memoriol i laenap wetem dei blong Pasova long Baebol, mo Baebol i soemaot wanem dei we oli bin mekem lafet ya. (Eks. 12:2, 6; Mat. 26:17, 20, 26) Ol man Isrel oli mekem Pasova evri yia blong tingbaot taem ya we oli kamaot long Ijip long yia 1513 bifo Komon Taem. Jehova i talem long olgeta se long namba 14 dei blong fas manis long kalenda we i folem mun, oli mas kakae smol sipsip blong Pasova, nao oli mas aot long kantri ya Ijip we oli stap wok slef long hem. (Eks. 12:1-51) Blong faenem stret dei blong mekem Pasova, ol man Isrel oli wet long taem we ol tri oli putum flaoa. I gat wan dei long taem ya we i seraot stret long tu haf, i min se long dei ya i gat delaet blong 12 aoa mo tudak blong 12 aoa. Fas niu mun we i kamaot klosap long dei ya, i makem stat blong manis Nisan. Taem oli luk niu mun ya long Jerusalem, oli kaontem 13 dei nao oli mekem lafet blong Pasova. Plante taem, Memoriol i foldaon long dei we i gat fulmun.

³⁰ Long Matiu 26:26-28, Jisas i talem olsem wanem blong mekem Memoriol. Hem i no wan kastom nomo we mining blong hem i haed, nogat. Hem i wan kakae blong olgeta we God i singaot olgeta blong oli rul wetem Jisas Kraes long Kingdom blong hem long heven, mo hem i gat bigfala mining. (Luk 22:28-30) I gud ol narafala Kristin we oli baptaes finis wetem ol man we oli intres long trutok, olgeta tu oli kam long Kakae blong Masta. Taem oli mekem olsem, oli talem tangkiu long Jehova God from presen we hem i givim, hemia Pikinini blong hem, Jisas Kraes, we i ded blong pemaot ol man. Bifo long Memoriol, i gat wan spesel pablik tok blong pulum ol man blong oli kam long Memoriol mo blong oli wantem stadi Baebol.