Leta Blong Hed Kampani

Ol Gudfala Pablisa Blong Gud Nius:

!I wan nambawan blesing blong joen blong wosipim tru God ya, Jehova! Yumi stap “joen wetem God blong mekem wok” blong talemaot gud nius mo blong tijim ol man long saed blong Kingdom blong hem we i stanap finis long heven. Hemia wan tabu wok we i save sevem laef blong ol man. (1 Kor. 3:9; Mat. 28:19, 20) Blong yumi joen gud mo gat pis taem yumi mekem wok ya long olgeta ples long wol, yumi mas wok folem plan.—1 Kor. 14:40.

Buk ya bambae i givhan long yu blong yu kasem save olsem wanem Kristin kongregesen i stap wok tede. Hem i tokbaot ol blesing we yu save kasem mo ol wok we yu mas mekem, olsem wan Witnes blong Jehova. Sipos yu tinghae long ol blesing we yu kasem, mo yu mekem gud wok blong yu, bambae yu “kam strong moa” long bilif.—Wok 16:4, 5; Gal. 6:5.

From samting ya, mifala i leftemap tingting blong yu blong yu stadi gud long buk ya. I gud yu folem ol save we yu lanem, long laef blong yu. Olsem nao, sipos yu jes kam wan pablisa we i no baptaes yet, i gud yu tingbaot se: ?Wanem sam samting we mi mas mekem blong mi naf blong baptaes mo kam wan Witnes blong Jehova? Sipos yu yu baptaes finis, i gud yu askem se: ?Mi save mekem wanem blong mi gohed strong long trutok mo mi mekem moa long wok blong Jehova? (1 Tim. 4:15) ?Mi save mekem wanem blong i gat pis long kongregesen? (2 Kor. 13:11) Yu save faenem ansa blong ol kwestin ya long buk ya.

Sipos yu yu wan brata, ?yu save mekem wanem blong yu kam naf blong mekem wok olsem man blong givhan o elda? Plante taosen man mo woman oli stap kam insaed long oganaesesen blong God, taswe i nidim plante brata we oli naf, blong oli mekem ol wok blong lidim kongregesen. Buk ya bambae i givhan long yu blong yu traehad blong kasem ol mak ya.—1 Tim. 3:1.

Mifala i prea se buk ya bambae i halpem yu blong luksave prapa ples blong yu insaed long oganaesesen blong Jehova, mo blong yu tinghae long hem. Mifala i lavem yufala tumas mo mifala i gohed blong prea se bambae yu yu wan long olgeta ya we bambae oli glad olwe, blong wosipim Papa blong yumi long heven, Jehova.—Sam 37:10, 11; Aes. 65:21-25.