LESEN 14

?Olsem Wanem God i Save Glad Long Wosip Blong Yumi?

Printed Fomat

Olsem we yumi tokbaot finis long laswan lesen, God i no glad long olgeta relijen. Nating se i olsem, yumi save wosipim Krieta blong yumi long fasin we hem i glad long hem. ?God i glad long wanem kaen “wosip”? (Jemes 1:27) Makem wanem we Baebol i tijim.

1. ?Wosip blong yumi i mas stanap long wanem?

Wosip blong yumi i mas stanap long Baebol. Jisas i talem long God se: “Tok blong yu i trutok.” (Jon 17:17) Sam jos oli no wantem kasemsave long ol trutok blong God. Oli miksim ol trutok blong Baebol, wetem ol kastom mo ol tijing blong man. Jehova i no glad long ol man we oli “no folem komanmen” blong hem. (Ridim Mak 7:9.) Be taem yumi folem advaes blong hem mo mekem wosip blong yumi i stanap long Baebol, God i glad long yumi.

2. ?Yumi mas wosipim Jehova olsem wanem?

Yumi mas wosipim Jehova nomo, from we hem i Krieta blong yumi. (Revelesen 4:11) Hemia i min se yumi mas lavem hem mo wosipim hem nomo, we yumi no yusum ol aedol, ol pija, mo sam narafala samting.—Ridim Aesea 42:8.

Wosip blong yumi i mas “tabu, mo we God i glad long hem.” (Rom 12:1) Hemia i min se yumi mas obei long ol loa blong hem. Eksampol, olgeta we oli lavem Jehova, oli glad blong folem ol loa blong hem long saed blong mared. Mo oli no wantem mekem ol fasin we i save spolem olgeta, olsem smok tabak, drag, o dring bitim mak.a

3. ?From wanem yumi mas joen tugeta blong wosipim Jehova?

Ol miting evri wik, oli givim janis long yumi blong “presem Jehova . . . long kongregesen.” (Ol Sam 111:1, 2) Yumi mekem olsem taem yumi singsing blong presem God. (Ridim Ol Sam 104:33.) Jehova i askem yumi blong go long ol miting, from we hem i lavem yumi, mo hem i save se ol miting bambae oli halpem yumi blong enjoem laef olwe. Long ol miting ya, yumi evriwan i stap enkarejem yumi.

DIGIM MOA

Lanem from wanem Jehova i no glad we man i yusum ol aedol long wosip. Lanem ol impoten rod we yumi save folem blong presem God.

4. Yumi no mas yusum aedol long wosip blong yumi

?Olsem wanem yumi save se God i no laekem ol aedol? Plei VIDEO, mo tokbaot kwestin ya.

VIDEO: ?God i Glad Long Fasin Blong Yusum Aedol Long Wosip? (3:26)

Ol pija: 1. Ol man Isrel oli wosipim aedol blong wan smol buluk, long fored blong Hil Ya Sinae. 2. Wan man i holem ol bidbid blong prea long fored blong statiu blong Meri.

?Wanem i hapen long ol man blong God bifo, taem oli yusum aedol blong wosipim hem?

Sam man oli yusum ol aedol blong wosipim God, from we oli wantem kam klosap moa long hem. ?Be yu ting se God bambae i kam klosap o i gowe long olgeta? Ridim Eksodas 20:4-6 mo Ol Sam 106:35, 36, mo tokbaot ol kwestin ya:

?Wanem sam pija o sam samting we ol man oli yusum blong wosip?
?Wanem tingting blong Jehova long fasin blong yusum ol pija olsem?
?Wanem tingting blong yu long fasin blong yusum ol pija ya?

5. Sipos yumi wosipim Jehova nomo, bambae yumi fri long ol giaman tijing

Faenemaot olsem wanem yumi fri long ol giaman tijing, taem yumi wosipim Jehova long fasin we hem i agri long hem. Plei VIDEO.

VIDEO: Trutok i Mekem Mi Fri (5:16)

Ridim Ol Sam 91:14, mo tokbaot kwestin ya:

Taem yumi lavem mo wosipim Jehova nomo, ?hem i promes blong mekem wanem?

6. Yumi wosipim God long ol miting blong kongregesen

Yumi presem Jehova mo enkarejem yumi wanwan, taem yumi singsing mo givim ol ansa long ol miting. Ridim Ol Sam 22:22, mo tokbaot ol kwestin ya:

?Yu yu laekem blong harem ol ansa long miting?
?Yu yu wantem rere mo givim ansa?

Ol pija: Wan woman i lanem blong wosipim God long fasin we i stret. 1. Hem i singsing blong presem God long wan miting. 2. Hem i givim ansa long wan miting blong kongregesen. 3. Hem i soem video long wan woman mo dota blong hem.

7. Jehova i glad taem yumi tokbaot ol samting we yumi lanem

I gat plante rod blong tokbaot trutok blong Baebol wetem ol narafala. Ridim Ol Sam 9:1 mo 34:1, mo tokbaot kwestin ya:

?Wanem samting long Baebol, we yu yu wantem tokbaot long ol narafala?

SAM MAN OLI SE: “I had tumas blong mekem God i glad.”

?Wanem tingting blong yu?

SAMARI

Yumi mekem Krieta blong yumi i glad, taem yumi wosipim hem nomo, yumi presem hem long ol miting blong kongregesen, mo yumi tokbaot ol samting we yumi lanem long ol narafala.