?Yu Yu Tingbaot Ded Blong Jisas Olsem Wanem?

WAN MAN blong raetem buk, nem blong hem James A. Francis, i tokbaot Jisas Kraes olsem: “Olgeta ami we oli mekem faet, olgeta bigfala sip we man i wokem, olgeta palemen we oli holem miting mo olgeta king we oli rul, sipos paoa blong olgeta evriwan i save kam wanples, be olgeta ya oli no gat paoa long laef blong ol man olsem we man ya nomo i gat.”

Nating se ol man long wol oli gat defdefren tingting long saed blong Jisas, be Baebol i talem klia se Jisas i hu. Hem i Pikinini blong God mo hem i laekem tumas ol man. Taswe hem i mekem sakrafaes long laef blong hem blong sevem olgeta. Jisas hem wan i talemaot fasin blong hem blong laekem ol man. Hem i talem se: “Mi mi Pikinini blong Man, be mi mi no kam blong bambae ol man oli mekem wok blong mi. Mi mi kam blong mekem wok blong olgeta, mo blong givim laef blong mi blong pem rod [ransom, NW] blong plante man oli gofri.”​—Matyu 20:28.

?Be wanem ‘ransom’ ya we Jisas i mas pem? ?From wanem yumi nidim we hem i pemaot yumi? ?Fasin ya i letem hu i gofri? ?Yes, olsem wanem long yu? ?Yu stap tingbaot ded blong Jisas olsem wanem?

?Ransom Ya i Olsem Wanem?

Wan ransom i wan fasin blong pem rod blong mekem wan samting i kamfri. Samtaem sam man i givim wan ransom blong wan man, no oli pemaot man ya. Samting ya i min se oli mekem hem i fri from fasin blong kalabus. No oli pem wan praes blong ol man we oli holemtaet man ya oli no mekem trabol long hem. Long saed blong speret, fasin blong “pemaot” ol man i min se letem olgeta i kam fri from sin mo ded. From samting ya nao, Jisas i ded blong pemaot yumi. Aposol Pol i talem se: “Pei we ol man bambae oli kasem, from we oli stap mekem sin, hemia we bambae oli ded from. Be presen we God i stap givim i go nomo long ol man, hemia laef ya we i no save finis, from we oli joen long Jisas Kraes, Masta blong yumi.”​—Rom 6:23.

Baebol i mekem i klia se i mas gat wan ransom blong pemaot ol man. Long Ol Sam 49:​6-9, (NW), Baebol i talem se: “Ol man ya oli trastem plante samting we oli gat mo oli stap tok flas from plante sas samting ya blong olgeta. Be i no gat wan long olgeta i save pemaot laef blong wan brata, no i save givim wan ransom long God from hem. (Praes blong pemaot sol blong olgeta i bigwan tumas, hem i finis blong olwe.) Taswe oli no save mekem hem i stap laef blong olwe, blong i no go long beregraon.” Yes, God nomo i save givim wan ransom blong pemaot ol man. I no gat wan sinman nating i save mekem olsem.

?From Wanem Yumi Nidim Wan Ransom?

Yumi nidim ransom from we faswan papa blong ol man, Adam, hem i mekem sin. From we hem i mekem olsem, hem i lusum laef we i no save finis mo i stret gud. God i panisim hem se hem i mas ded from, mo panis ya i stret nomo. Nao Adam i ded. (Jenesis 2:​15-17; 3:​1-7, 17-19; 5:5) From we yumi pikinini blong hem, yumi tu yumi gat sin mo yumi mas ded. Baebol i talem se: “Bifo, fastaem olgeta, wan man nomo i statem fasin blong sin long wol ya. Mo from we hem i mekem sin, hem i ded. Be frut blong samting ya, hemia we ol man oli stap ded, from we olgeta oli mekem sin.” (Rom 5:12) Yes, “olgeta man we oli joen long Adam oli save ded.” (1 Korin 15:22) Deved i tok stret nomo taem hem i se: “Mi mi man nogud, i stat long taem we mi mi bon. Fasin blong mi i nogud, i stat long taem we mi stap yet long bel blong mama blong mi.”​—Ol Sam 51:5.

Olgeta pikinini blong Adam we oli wantem laef blong olwe, fastaem oli mas kam fri from panis blong sin mo ded. Be ol sinman oli no save givim ransom ya we olgeta man oli nidim. From samting ya, Jeova hem wan i pemaot praes ya tru long Jisas Kraes. ?Be, praes blong ransom i pembak wanem? Taem we Adam i mekem sin, hem i lusum laef ya we i no save finis mo i stret gud. Ale, hem i lusum olgeta raet mo olgeta promes we God i givim long hem fastaem. Taswe sakrafaes we Jisas i mekem i pemaot ol samting ya we Adam i lusum bifo.

Ol Samting We Ransom i Givim

Ol man oli stap ded from we oli mekem sin. Panis ya i stret nomo. Be ransom we God i givim blong sevem ol man i soemaot bakegen se hem i gat sore mo hem i kaengud long olgeta. Taem we hem i ded, Jisas i lego stret laef blong hem long wol. Hem i livim olgeta raet mo olgeta nambawan promes we hem i save kasem long wol. Mo neva biaen hem i tekembak laef ya we hem i gat raet blong kasem long wol. Biaen long ded blong hem, taem hem i girap bakegen long ded, hem i no moa wan man we bodi blong hem i gat mit mo blad long hem, no gat. Hem i kam wan speret we i no save ded samtaem. (1 Korin 15:50; 1 Pita 3:18) Taswe, stret laef we Jisas Kraes i mekem sakrafaes long hem i save sevem ol man yet. Hem i wan ransom we i naf blong pemaot yumi.

Taem Jisas i stap long wol, hem i no gat sin nating. Hem i sem mak nomo long Adam taem we hem i no sin yet. From we Jisas i obei long God gogo hem i ded, God i putumap hem olsem Hae Pris. Ale hem i go long heven wetem praes blong sakrafaes blong bodi blong hem we i stret olgeta. (Hibrus 9:​24-26) God i agri long praes ya blong pemaot ol man. Ale Jisas i save pemaot ol pikinini blong Adam we oli bilif long hem, blong oli kam fri from sin mo ded. Hem i mekem we sakrafaes blong hem i kavremap ol sin blong olgeta. (1 Korin 6:20; 7:23; 1 Jon 2:​1, 2) Long fasin ya nao, Jisas i kam olsem “prapa man blong sevem man, hem i save sevem olgeta we oli obei long hem, i save holemgud olgeta, gogo i no save finis.” (Hibrus 5:​8, 9) Ol man ya oli kam olsem stret man long fes blong God from we Pikinini blong hem i givhan long olgeta.

?Hem i Pemaot Hu?

?Be ransom ya i sevem hu? Hem i sevem ol man we oli bilif long rod ya we God i stanemap mo oli letem God i lidim olgeta long laef. Sipos oli fasgud long hem mo oli mekem wok blong hem nomo, bambae oli save kam fri from sin mo ded we i panis blong sin. Mo bambae oli save kasem laef we i no save finis.​—Jon 17:3.

Faswan man i gat jus blong obei no blong brekem loa blong God. Be hem i jusum blong brekem loa blong God. ‘Ol gyaman tok oli no trikim Adam.’ Hem wan i wantem mekem sin, mo hem i gohed olsem gogo hem i ded. (1 Timote 2:​14, NW) ?Olsem wanem nao? ?Ol pikinini blong hem oli mas mekem wanem? Olgeta tu oli mas jusum rod blong olgeta. Maet oli mekem wok blong God, nating se oli sinman yet. No maet oli no obei long God we i wokem olgeta.​—Josua 24:15.

Jisas i kam long wol “blong givim laef blong [hem], blong pem rod blong plante man oli gofri.” (Mak 10:45) ?Be hu nao “plante man” we Jisas i stap tokbaot long ples ya? Jisas i no pem rod blong Adam i gofri, from we hem i stret olgeta, be hem i jusum blong brekem loa blong God. Mo tu, hem i no wantem tanem tingting blong hem go kasem we hem i ded. ?Be olsem wanem long bigfala famle blong hem, we i gat plante taosen milyan man long hem? Jisas Kraes i tekemaot panis we i mas kasem bigfala famle ya blong Adam. ?Olsem wanem hem i mekem? Hem i pemaot wan praes we i sem mak long praes we Adam i lusum. (Ridim 1 Timote 2:​5, 6.) Jisas i yusum laef ya we hem i givim, nao hem i sevem “plante man,” hemia olgeta we oli bilif long hem.

Jisas i pemaot plante man, i gat sam man Jyu mo sam hiten man, yes, sam man blong ol nesen. Pol i talem se: “Mo bakegen, sin ya we wan man nomo i mekem, hem i mekem we God i jajem ol man se oli mekem i no stret, oli mas panis. Mo long sem fasin, stret samting ya we wan man nomo i mekem, hem i mekem we God i talem se ol man oli save gofri, oli save laef.” (Rom 5:18) Taem we hem i ded long pos, ‘Kraes i pemaot ol man Jyu, i tekemaot olgeta long promes ya blong lus we i stap long Loa, from we hem i kam olsem we i man blong lus, from olgeta. Hemia i olsem we Baebol i talem, i se “Olgeta we oli hang long [pos], oli man blong lus.”’ (Galesia 3:13; Dutronome 21:23) Long saed blong ol hiten man nao, Baebol i tokbaot olgeta long Rom 4:11. Long ples ya, Baebol i makem gud se nating we Ebraham, bubu blong ol man Jyu, hem i no sakomsaes yet, be “Ebraham i olsem stampa blong olgeta we oli no sakomsaes, be oli bilif long God.” Taswe sakrafaes blong Jisas i save sevem ol man Jyu mo ol hiten man we oli bilif long hem.

Yes, fasin blong ol man wanwan bambae i soemaot sipos wan man bambae i save harem gud long sakrafaes blong Jisas, no no gat. Sem mak long Adam, ol man we oli strong blong mekem i nogud oltaem bambae oli no save harem gud from ransom blong Jisas mo oli no save kasem laef we i no save finis. Kraes i talem se: “Man we i bilif long Pikinini ya blong God, hem i gat laef ya we i no save finis. Be man we i no save obei long Pikinini ya, hem bambae i no save luk laef ya samtaem. Kros blong God i stap finis long man olsem.” (Jon 3:36) From ransom we Jisas i pemaot, ol man we oli ded finis, God i stap tingbaot olgeta mo bambae hem i mekem olgeta oli girap bakegen long ded. (Jon 5:​28, 29) Nao sipos oli obei mo oli gat tangkyu, bambae Jisas i yusum ransom blong givim laef we i no save finis long olgeta. Be long saed blong ol man we oli stap laef tede, long ol “las dei,” olgeta oli gat jans blong kasem laef we i no save finis, be oli no mas ded fastaem.​—2 Timote 3:​1-5; Matyu 24:​3-14, 21, 34; Jon 11:​25, 26.

Yumi Mas Talem Tangkyu From Ol Samting Ya

Sipos wan man i wantem we ransom blong Jisas i sevem hem, hem i mas gat bigfala tangkyu long God. Yes, i stret nomo we yumi talem tangkyu from rod ya blong sevem yumi. ?Yu ting se God mo Kraes tufala i rili soemaot bigfala lav long yumi taem tufala i pemaot yumi?

Yes, Jeova God i soemaot bigfala lav long yumi taem we hem i givim Pikinini blong hem blong pemaot yumi. Jisas i talem se: “God i laekem tumas ol man long wol, nao hem i givim mi, mi stret Pikinini blong hem, mi wan nomo we hem i gat, blong olgeta man we oli bilif long mi bambae oli no save lus, oli gat laef we i no save finis. God i no sanem mi, mi Pikinini blong hem, mi kam long wol ya blong mi jajem ol man blong wol. Hem i sanem mi blong mi wok blong hem blong mekem rod blong sevem olgeta.” (Jon 3:​16, 17) ?Olsem wanem long yu? ?Yu stap talem tangkyu long God from bigfala lav we hem i soemaot long ol man?

Traem tingtinggud long bigfala lav we Jeova i soemaot taem hem i pemaot yumi. Bifo we Jisas i kam stap long wol mo i ded blong sevem ol man, Pikinini blong God i stap finis long heven. Hem nao i “fasbon blong ol samting we God i wokem,” mo long rod blong hem nao, “God i mekem olgeta narafala samting long heven mo long wol, olgeta samting we yumi save luk mo olgeta samting we yumi no save luk.” (Kolosi 1:​13-16, NW) Jeova i laekem tumas Pikinini blong hem. God i gat plante milyan enjel blong hem. Be hem i no jusum wan enjel nomo blong i kam long wol, no gat. From we Jeova i laekem tumas ol man, hem i sanem prapa Pikinini blong hem, fasbon blong hem, i kam long wol.

Traem tingbaot bigfala lav we Jisas tu i soemaot long saed blong ransom. Taem we hem i stap long heven, hem i olsem speret mo Baebol i talem se hem i olsem “wan man blong wok we i gat gudhan.” ‘Ol samting we Pikinini ya blong God i laekem tumas oli stap wetem ol pikinini blong man.’ (Proveb 8:​22-31) Be nating se hem i laekem ol man olsem, i no isi long hem blong livim heven blong kamdaon long wol. Hem i stap gud wetem Papa blong hem mo olgeta enjel we oli stret. Taem hem i gat hae ples long heven, Pikinini blong God i save luk olgeta trabol we sin mo ded i stap mekem long ol man. Hem i save tu we bambae hem i mas ded blong givim wan ransom. Be nating, Jisas “i kam olsem man blong wok nomo. Hem i bon long wol ya, i kam olsem man. Hem i karem fasin blong man, mo i mekem tingting blong hem i stap daon blong i obei long God, gogo i ded.” From we hem i fasgud long God, God i mekem hem i laef bakegen blong go kasem hae ples long heven. (Filipae 2:​5-11) !Yes, Jisas i rili soemaot bigfala lav long yumi taem we hem i givim bodi blong hem olsem wan ransom! ?Yu yu gat fasin tangkyu from samting ya we hem i mekem?

?Bambae Yu Mekem Wanem?

Wan Engglis pasta blong bifo, nem blong hem Richard of Chichester, (raonabaot 1198-1253) i talem se hem i wantem tumas wan samting. Hem i wantem we ol man mo ol woman oli “traehad blong save gud long Jisas Kraes, blong laekem hem moa mo blong folem gud rod we hem i soemaot long ol man.” Yes, i tru, sakrafaes we Jisas i mekem blong pemaot ol man i mas pusum yumi blong yumi save gud long hem, blong yumi laekem hem tumas mo yumi folem hem.

Sipos Jisas i no pemaot yumi, yumi ol sinman bambae yumi stap ded nomo, be yumi no gat wan hop nating. “From we ded i kasem paoa blong hem blong spolem yumi long sin.” (1 Korin 15:56) ?Be olsem wanem long yu? ?Yu mas mekem wanem blong winim ded, panis blong sin? Yu mas lanem olsem wanem God i wantem sevem ol man long rod blong Jisas Kraes, mo yu mas soemaot se yu gat bilif long ransom blong Jisas. ?Be olsem wanem bambae yu mekem samting ya? Blong mekem olsem, yu mas gat fasin tangkyu, yu mas givim laef blong yu long God mo yu mas talemaot long ol narafala nambawan rod ya we God i stanemap blong sevem ol man.

Sipos yu mekem olsem, bambae yu save joen wetem ‘bigfala kampani’ blong olgeta we i “pastru long bigfala trabol mo . . . oli wasem ol klos blong olgeta finis blong mekem oli waet long blad blong Sipsip ya we i ded,” Jisas Kraes. (Revelesen 7:​9, 14, NW) Ol man ya oli gat hop blong stap laef blong olwe long wan wol we i kam paradaes. (Luk 23:43) Yes, sipos yu yu tinghae long ded blong Jisas, bambae yu tu yu save joen wetem bigfala kampani blong ol man we oli harem gud.

[Tok Blong Pija Long Pej 4]

Jisas i no gat sin nating, taswe hem i sem mak nomo long adam taem hem i no mekem sin yet

[Tok Blong Pija Long Pej 6]

Ded blong Jisas​—?yu yu rili luksave mining blong hem?