Amageden—?Wetaem?

“YUMI no longwe nating long Amageden mo yumi mekem faet blong Masta.” Presiden blong Amerika blong bifo, Theodore Roosevelt, hem nao i talemaot ol tok ya. Hem i bin yusum tok ya Amageden blong tokbaot wan faet long saed blong politik we hem wan i joen long hem. ?Olsem wanem nao? ?Blong save long Amageden, bambae yumi go luk olgeta we oli mekem politik?

Sam yia i pas, wan nyuspepa blong Kanada (Business Life) i mekem wan haf se “Wan Amageden Blong Ekonomi.” Wan smol stampa tok i putum kwestin ya: “?Sipos ol kantri we oli pua oli no pem ol kaon we oli mekem long yumi, olsem wanem long ekonomi blong yumi? ?Bambae hem i save foldaon from?” ?Olsem wanem? ?Amageden i wan bigfala trabol long saed blong ekonomi?

Newsweek magasin i talem se long ol kampen we ol man Amerika oli mekem blong jusumaot presiden blong olgeta long 1984, oli bin intres bigwan long en blong wol. Nao oli askem long Ronald Reagan “sipos hem i bilif se wol blong yumi bambae i finis long wan ‘nyuklea Amageden.’ Haeman ya i talem stret long olgeta se i tru, plante taem, hem i storeyan long ol saen we Baebol i bin talem long saed blong ol las dei mo hem i luksave se ol samting ya oli stap kamtru tede. Be hem i talem long olgeta bakegen se neva hem i talem we ‘yumi mas rere long saed blong Amageden.’” ?Olsem wanem long Amageden nao? ?Amageden i wan fasin blong mekem faet we ol ami oli joen long hem, wan samting we i save lidim ol man long wan nyuklia faet we bambae evri man oli lus long hem?

Plante man we oli bilif long God oli talem se Amageden i wan faet. Be long stat blong ol yia 1800, wan man we i stadi long Baebol, Adam Clarke i raetem ol tok ya se: “!Man, ol man oli gat tumas krangke tingting long saed blong bisnes ya! Sipos yumi folem tingting blong ol man we oli lukaot long fyuja, mo tingting blong ol man ya we oli talem se oli profet blong God, be sore tumas, faet ya i kamaot long plante ples finis. !Fastaem, oli talem se faet ya i kamaot long Ostelis, afta oli talem se long Moskou, afta bakegen long Lepsig, mo naoia long Watalu! Yes, oli bin mekem mastik nomo kam kasem tede, mo bambae oli gohed nomo blong mekem ol mastik bakegen mo blong letem ol man oli gyaman long olgeta.”

Sipos yumi wantem save long Amageden, yumi mas ansa long ol bigfala kwestin ya. ?Wanem ya Amageden? ?Sipos Amageden i wan faet, hu bambae i joen long faet ya? ?Faet ya i bigwan olsem wanem? ?Weples bambae hem i stap? ?Mo wetaem bambae hem i hapen?

?Wanem Ya Amageden?

Tok ya “Amageden” i kamaot long wan tok we i stap long buk blong Revelesen, wan buk we i gat plante pija tok long hem. Long buk ya aposol Jon i raetem ol tok ya: “Nao mi luk, mo i gat tri rabis devel oli stap, we trifala i olsem frog. Trifala ya, wan i kamaot long maot blong bigfala algita ya, mo wan i kamaot long maot blong anamol ya mo wan i kamaot long maot blong gyaman profet. Trifala devel ya, trifala i nogud tumas, mo trifala i gat paoa blong mekem ol saen blong soemaot paoa blong trifala. Nao trifala i go luk ol king blong evri ples long wol blong tekem olgeta oli kam wanples, blong oli mekem faet long bigfala Dei blong God ya we i gat olgeta paoa. . . . Nao trifala devel ya, trifala i tekem ol king oli kam wanples long ples ya we long lanwis blong ol man Isrel oli talem se ‘Amageden’ we i min se ‘Bigfala Hil long Megido.’”​—Revelesen 16:​13-16.

Tok ya Amageden (no Ha-Mageden) oli raetem long Baebol long lanwis blong ol man Gris. Be Amageden i kamaot long Hibru tok Har Meghid·dohnʹ we i min se “Hil blong Megido,” no “Hil blong Hivimap ol Man blong Faet.” Amageden i laenap gud wetem “faet long bigfala Dei blong God ya we i gat olgeta paoa.” Taswe, Amageden i no wan rao long saed blong politik, no wan bigfala trabol long saed blong ekonomi. Hem i no wan nyuklea faet no wan faet we ol man nomo oli mekem. Amageden hem i faet ya we God bambae i mekem.

?Hu Bambae i Joen Blong Mekem Faet Ya?

Trifala devel we oli olsem frog oli kamaot long maot blong bigfala algita (Devel Setan), long wael anamol ya (ogenaesesen blong Setan we i mekem politik long wol) mo long gyaman profet (gavman blong Engglan mo Amerika). Ol tok ya we ol devel oli talem, hemia ol rabis enjel blong Setan, oli hivimap ol king no ol lida blong wol long Amageden.​—Ridim japta 32 blong Revelation​—Its Grand Climax At Hand! we Watchtower Bible and Tract Society of New York, i prentem.

Long faet blong Amageden, bambae wan bigfala ami blong ol enjel we King Jisas Kraes i lidim i stanap long saed blong Jeova blong mekem faet. Aposol Jon i talem se: “Nao mi luk we heven i open, mo i gat wan waet hos i stap stanap. Nao man we i stap sidaon long hem, nem blong hem, “Man we yu save bilif strong long hem, we hem i tru.” Taem hem [Jisas] i jajem man, mo taem hem i mekem faet, be hem i stap mekem long fasin we i stret nomo. . . . Ol kampani blong ol soldia blong heven oli biaen long hem. . . . Man ya i gat wan naef blong faet we i sap gud i stap long maot blong hem, we bambae hem i yusum blong kilim ol man blong evri kantri. Hem bambae i bos long ol man ya mo saen blong paoa blong hem, wokingstik we oli wokem long aean. Bambae hem i mekem i strong long olgeta, olsem we man i purumpurumbut long frut ya blong rop blong mekem wora blong hem i kamaot blong mekem waen. Fasin ya i olsem we God ya we i gat olgeta paoa, hem i kros tumas, nao kros blong hem i kasem olgeta. Long klos blong man ya, mo long leg blong hem oli raetem se “King blong ol king, mo Masta blong ol masta.” (Revelesen 19:​11-16) Bigfala naef we i sap gud i pija blong paoa we Jisas i gat blong panisim ol man we oli no wantem sapotem Kingdom blong God. (Revelesen 1:16; 2:16) Yes, sam enjel we oli gat bigfala paoa oli rere nomo blong mekem faet blong Amageden.

Ol enemi blong olgeta hemia Setan, wetem ol taosen rabis devel blong hem mo ol king blong wol. Be yumi no mas ting long ol lida blong wol nomo, from we ol man we ol lida ya oli rulum, olgeta tu oli joen long faet ya. Profet Aesea i bin talem finis se: “Jeova i no glad nating long ol nesen mo hem i kros nogud long olgeta ami blong olgeta.”​—Aesea 34:2.

?Faet Ya i Bigwan Olsem Wanem?

Bambae Amageden i mas kamtru from we God i gat stret fasin mo hem i no save letem ol rabis fasin oli gohed longtaem moa. (Ol Sam 11:7) Ol rabis enjel mo ol man we oli sakemaot rul blong God oli joen long ogenaesesen blong Devel Setan. Ogenaesesen ya i stampa blong ol trabol mo ol rabis fasin we i kamaot long wol plante taosen yia finis kam kasem tede. Be bambae ogenaesesen ya i lus. (Ridim Jenesis 3:15) Stret long Amageden, Jeova bambae i soemaot long olgeta man se hem nomo i gat raet blong rul long wol. Ale, bambae hem i wasemaot ol doti we ol man oli putum long nem blong hem long plante handred yia finis. Traem tingbaot ol tok ya we God i talemaot tru long profet Esikel: “Bambae mi no moa letem ol man oli spolem tabu nem blong mi. Mo ol nesen bambae oli save se Mi mi Jeova.”​—Esikel 39:7.

Be i tru tumas, faet blong God, Amageden, bambae i mekem se ol man blong wol oli no lus olgeta. Jeova i mekem wol ya blong ol man oli stap long hem, taswe hem i no save letem ol man oli spolem wol ya wetem ol nyuklea bom, ol doti no ol samting nogud bakegen. (Aesea 45:18) God i mekem promes se bambae hem i “spolem ol man ya we oli stap spolem wol.” (Revelesen 11:18) Be man blong raetem Ol Sam i talem tu se: “!Hae God, hem i king! Hem i putum wol ya [long Hibru, te·velʹ; hemia graon we i karem gudfala kakae mo ol man oli stap long hem, wol ya we ol man oli save laef long hem] i stap strong long ples blong hem, we i no save muf.”​—Ol Sam 96:10.

Ol samting we God bambae i mekem long Amageden oli stret gud long ol stampa fasin blong hem: Jeova i gat stret fasin, hem i waes gud, hem i gat olgeta paoa, mo hem i laekem tumas ol samting we hem i wokem. (Dutronome 32:4; Job 12:13; Aesea 40:26; 1 Jon 4:8) Bambae hem i panisim “ol man we oli no obei long hem,” be bambae hem i stap glad nomo long ol stret man. (Jud 14, 15) ‘Bambae Jeova i mekem faet agens ol rabis man’ nomo. (Jeremaea 25:31) Faet ya bambae i kamaot fastaem, ale biaen wol i save kam wan paradaes olsem bifo. Olsemia nao, bambae plan blong God long saed blong wol mo ol man i kamtru.​—Luk 23:43.

?Weples Bambae Faet Ya i Stap Long Hem?

From we tok ya Amageden i kam long wan Hibru tok we i min “Hil blong Megido,” maet yumi save gat tingting se faet ya bambae i hapen long wan hil we nem blong hem i olsem. Be sore tumas, i neva gat wan hil we nem blong hem Megido. Samwe long 100 kilomita long not-wes blong Jerusalem i bin gat wan strong taon we oli kolem Megido. Be tede, stret long ples ya, i gat wan smosmol hil we i hae long 20 mita nomo i stap.​—Josua 17:11.

Taon ya blong bifo i stap antap long “flat ples blong Megido.” (2 Kronikel 35:22) Tok ya Amageden (no Ha-Mageden) i laenap gud wetem ples ya from we plante bigfala faet oli hapen long ples ya bifo. Yes, long ples ya nao Jeova i givhan long jaj Barak, ale hem i winim Jabin, king blong ol man Kenan mo ol ami we Sisera i bos long hem. (Jajes 4:​12-24; 5:​19, 20) Long ples ya bakegen, Gideon mo smol kampani blong hem oli ronem ol man Midian. (Jajes 7:1 kasem 8:35) King Ahasaea mo King Josaea, tufala i lusum laef long ples ya tu.​—2 King 9:27; 23:​29, 30.

Be wan samting bakegen, se flat ples ya we ol man oli singaot hem tu se flat ples blong Esdrelon, hem i long long 32 kilomita nomo mo hem i big long is saed blong hem long 29 kilomita nomo. Ol king blong evri ples long wol mo ol ami blong olgeta, neva oli save mekem faet long wan smol ples olsem. Mo tu, long Megido i gat wan smosmol hil mo wan flat ples nomo. I no gat wan bigfala hil. Taswe, i klia nomo se faet blong Amageden bambae i no hapen samples long ol kantri blong Is. Nating se Amageden i karem mining blong hem long Megido, mo from ol samting we oli kamaot long ples ya bifo, Amageden (Ha-Mageden) bambae i kasem olgeta ples long wol.

?Wetaem Bambae Amageden i Kamtru?

From we Megido i stap long kantri blong ol man blong God blong bifo, ol samting we bambae oli kamaot long Amageden oli laenap wetem ol Wetnes blong Jeova tede, “long taem blong en.” (Daniel 12:4) Ol lida blong politik we oli agensem Jeova mo Kingdom blong hem we Kraes i rulum, bambae oli hivap long “ples ya” Amageden. (Revelesen 16:​14, 16) Be “ples ya” (long Grik toʹpos) i no rili wan ples we i stap long wol, no gat. Hem i wan samting we bambae i kamaot long olgeta ples long wol. Bambae Amageden i kamtru stret long taem ya we wan trabol i kasem ol Wetnes blong Jeova we oli stap raonabaot long wol.

Ol Wetnes blong Jeova oli harem gud nomo long saed blong speret. Taswe Devel Setan i kros tumas long olgeta. I no longtaem bambae Setan i mekem bigfala faet agens long ol Kristin ya we oli no strong blong faet. Bigfala faet we Setan bambae i mekem, Esikel i tokbaot long japta 38 mo 39 blong buk blong hem. Nem blong Setan long ples ya, se Gog. Bambae Setan i hivimap olgeta nesen blong oli mekem sem samting nomo long ol man blong God. Bambae hem i pusum ol gavman ya blong oli agensem ol kwaet man blong Jeova we oli stap long olgeta nesen. Yes, bambae Setan i agensem ol man we oli prij mo oli karem tok blong Kingdom blong God long wol.

Plante taem, ol man oli save gud long wan faet from we hem i tekem nem blong ples ya we hem i hapen long hem. Taswe, bigfala samting we God bambae i mekem blong sevem ol man blong hem, bambae i karem nem ya se faet blong Amageden. !Taem Jeova bambae i girap blong protektem ol man blong hem, be Amageden i stat finis! Ol gavman blong ol man bambae oli lus. Bambae ol man we oli no joen long ol Wetnes blong Jeova oli fraet tumas long ol bigfala wok we Jeova God i mekem. Bambae i gat bigfala ren, ol ston blong aes we oli aot long skae oli folfoldaon oli spolem gud olgeta samting. Bambae i gat ren blong faea mo salfa, mo strong sik bambae i kasem ol man. Ol man bambae oli stikim olgeta bakegen wetem naef blong faet blong olgeta, mo olgeta we bambae oli no ded long taem ya, Jeova nao bambae i smasem gud olgeta.​—Esikel 38:​18-23; Daniel 2:44.

Bambae ol man oli fraet we oli fraet, ale oli leftemap han blong olgeta agens long ol narawan, blong oli save stap laef. Be no moa nao, olgeta evriwan bambae oli lus. (Sekaraea 14:​12, 13) Baebol i talem se “long dei ya, ol man we Jeova bambae i kilim olgeta, oli stap long wan en blong wol go kasem narafala en blong wol. Bambae i no gat man i krae long olgeta, bodi blong olgeta bambae i stap olsem nomo mo man i no berem olgeta. Bambae oli kam olsem gudfala kakae blong graon nomo.” (Jeremaea 25:33) Taem God bambae i mekem faet blong hem long Amageden, ol man we oli no agens long God, be oli no sapotem hem, ol man ya tu bambae oli mas ded. Mo olsem we mifala i soemaot plante taem finis long magasin ya, ol man we oli laef naoia bambae evriwan i no ded, be Amageden i kamtru fastaem.​—Matyu 24:​21, 34.

Ol Samting We Amageden Bambae i Mekem

Amageden bambae i flatem gud ol laswan haf blong ogenaesesen blong Setan long wol. Mo tu, Devel Setan mo ol devel blong hem, God bambae i satem olgeta long wan bigfala hol. (Revelesesen 20:​1-3) !Ol man blong Jeova bambae oli harem gud tumas from we oli gotru long bigfala faet blong Amageden! Traem tingbaot ol bigfala blesing we bambae oli kasem. Bambae oli glad nomo blong joen long wok ya blong jenisim wol i kam wan paradaes, wan ples we i no moa gat doti i stap olbaot. Ol man bambae oli harem gud nomo, bambae i no moa gat krae mo ded from we tufala samting ya bambae i lus blong olwe long Amageden. (Revelesen 11:​15, 18; 21:​3, 4) Sipos yu tingtinggud long ol tok ya we man blong raetem Ol Sam i talem, yu tu bambae yu save laef long ples ya. Man blong raetem Ol Sam i talem se: “Yu mas putum tingting blong yu i stap strong long Hae God [Jeova], mo yu mas obei long ol tok blong hem, nao bambae hem i ona long yu, i givim graon ya long yu. Bambae yu luk we hem i ronemaot ol man nogud.” (Ol Sam 37:34) !Yes, bambae yu save luk Amageden, bigfala dei blong faet blong God, mo yu save mekem kampani wetem ol man we oli harem gud from we oli stap laef biaen long faet ya!

“From we . . . olgeta samting ya bambae oli lus olsem, yufala i mas lukluk gud long laef blong yufala. Yufala i mas tabu, yufala i man blong God, mo yufala i mas mekem ol fasin we hem i wantem. Yufala i mas stap wet long Dei blong God bambae i kamtru, we yufala i stap wok blong mekem i kamtru kwik.”​—2 Pita 3:​11, 12

[Bokis blong pija long pej 4]

Amageden i no wan fasin blong joen long politik, hem i no wan bigfala trabol long saed blong ekonomi, mo hem i no wan nyuklea faet we olgeta man bambae oli lus long hem, mo hem i no wan faet we man nomo i mekem. Amageden i faet ya we God nomo i mekem

[Bokis blong pija long pej 5]

Faet blong God, Amageden, bambae i mekem se ol geta man oli no ded

[Bokis blong pija long pej 6]

Taem bambae God i mekem faet long Amageden, ol man we oli no agens long God, be oli no sapotem hem, ol man ya tu bambae oli mas ded