“Plis Yu Tijim Mifala Blong Mifala i Prea”
“Wan man blong hem i talem long hem, i se ‘Masta, plis yu tijim mifala blong mifala i prea.’”—LUK 11:1.
1-3. (a) ?From wanem ol disaepol blong Jisas oli askem long hem blong tijim olgeta blong oli prea? (b) ?Wanem sam kwestin we yumi save askem long saed blong prea?
GOD i givim gudfala voes long sam man, taswe oli save singsing gud. Mo samfala oli save mekem gudfala myusek long gita, no wan narafala samting. Be blong kam gud moa, oli nidim wan man blong tijim olgeta. Sem mak long prea. Ol disaepol blong Jisas Kraes oli luksave se sipos oli wantem we God i harem ol prea blong olgeta, oli nidim wan man blong tijim olgeta.
2 Kolosap evri taem, Jisas i prea long Papa blong hem taem hem i stap hem wan nomo. Hem i stap wan ful naet we hem i prea hem wan, nao biaen hem i jusumaot ol 12 aposol blong hem. (Luk 6:12-16) Hem i talem long ol disaepol blong hem se oli mas prea taem oli stap wanwan. Be Jisas i bin talem sam prea long open ples tu. Mo ol disaepol blong hem oli harem ol prea ya mo oli luk we fasin blong hem i narakaen olgeta long fasin blong ol lida blong skul, we oli gat tu fes. Olgeta oli prea long open ples, blong ol man oli save luk olgeta. (Matyu 6:5, 6) Taswe i stret nomo we ol disaepol blong Jisas oli wantem se hem i tijim sam moa samting long olgeta long saed blong speret. Taswe Baebol i talem se: “Wan taem, Jisas i stap long wan ples, i stap prea. Mo taem hem i finis, wan man blong hem i talem long hem, i se ‘Masta, plis yu tijim mifala blong mifala i prea, olsem we Jon Baptaes i bin tijim ol man blong hem bifo.’”—Luk 11:1.
3 ?Jisas i ansa olsem wanem? ?Eksampel blong hem i save lanem yumi long wanem samting? ?Olsem wanem ol samting we hem i tijim long olgeta long saed blong prea i save givhan long yumi?
Ol Lesen We Yumi Save Lanem
4. ‘Oltaem yumi mas stap prea.’ ?From wanem? ?Olsem wanem yumi mekem olsemia?
4 Yumi save lanem plante samting long ol tok blong Jisas mo eksampel blong hem, from we hem i wan man blong prea. Faswan lesen: Sipos Pikinini blong God we hem i stret gud olgeta i nidim blong prea oltaem, ol disaepol blong hem we oli sinman oli nidim moa blong askem long God oltaem blong lidim olgeta, blong leftemap tingting blong olgeta, mo blong givim paoa long olgeta long saed blong speret. Taswe ‘oltaem yumi mas stap prea.’ (1 Tesalonaeka 5:17) Samting ya i no minim se oltaem nomo yumi mas nildaon mo yumi mas stap prea. Be yumi mas laekem blong mekem prea. Yumi mas dipen long God blong lidim yumi long evri samting long laef. Olsem ya nao, yumi save wokbaot wetem fasin luksave, mo oltaem God bambae i glad long yumi.—Proveb 15:24.
5. ?Wanem i save kakae taem we yumi mas yusum blong prea? ?Yumi save mekem wanem blong stretem samting ya?
5 Long “ol las dei ya,” i gat plante samting we oli save kakae taem blong yumi. From samting ya, maet yumi no moa prea plante. (2 Timote 3:1, NW) Sipos ol trabol long famle, no long wok, no samting olsem i stap blokem yumi blong yumi no save prea oltaem long Papa blong yumi long heven, samting ya i min se yumi stap tingting tumas long ol trabol blong laef ya. Yumi mas stretem samting ya kwiktaem nomo, from we sipos yumi no stap prea, bambae bilif blong yumi i lus olgeta. Ating yumi mas katem taem we yumi spenem long wok blong yumi. No ating yumi nidim blong askem strong moa mo askem bakegen long God wetem ful hat blong yumi blong lidim yumi, blong yumi no moa tingting tumas from laef blong yumi. Yumi mas “wekap gud long saed blong prea.”—1 Pita 4:7, NW.
6. ?Bambae yumi stadi long wanem prea naoia? ?Yumi wantem lanem wanem?
6 Prea we Jisas i lanem long ol disaepol blong hem, samfala oli kolem gudfala eksampel blong prea. Long prea ya, Jisas i no talem long ol disaepol blong hem olgeta wod we oli mas yusum taem oli prea. No gat. Hem i tijim ol disaepol blong hem long fasin blong prea. Store we Luk i raetemdaon i defren long store blong Matyu, from we hem i tokbaot wan prea we Jisas i mekem long narafala dei. Naoia yumi save stadi long prea ya, blong yumi luksave gudfala fasin blong prea, we ol disaepol blong Jisas mo ol Wetnes blong Jeova oli mas yusum.
Papa Blong Yumi Mo Nem Blong Hem
7. ?Hu i gat raet fulwan blong talem “Papa” long God?
7 “Papa blong mifala we yu stap long heven.” (Matyu 6:9; Luk 11:2) Jeova i givim laef long ol man, mo hem i stap long heven. Taswe i stret nomo we yumi singaot hem se “Papa blong mifala we yu stap long heven.” (1 King 8:49; Ol Wok 17:24, 28) Taem yumi talem “mifala,” yumi soemaot se yumi luksave we God i stap frengud wetem plante narafala man tu. Be i no olgeta man evriwan we oli gat raet fulwan blong talem ‘Papa’ long God. ?Hu nomo i save mekem olsem? Olgeta man we oli givim laef blong olgeta i go long God finis mo oli tekem baptaes, nao oli wosip long hem olsem famle blong hem. Taem yumi singaot Jeova se “Papa blong mifala,” yumi soemaot se yumi gat bilif long God. Mo yumi soemaot se yumi luksave we i gat wan rod nomo blong frengud bakegen wetem God, hemia blong bilif fulwan long sakrafaes blong Jisas.—Hibrus 4:14-16; 11:6.
8. ?From wanem yumi mas wantem prea oltaem long Jeova?
8 !Yumi mas harem se yumi stap kolosap tumas long Papa blong yumi long heven! Ol pikinini oli no les blong stap kolosap long papa blong olgeta. Taswe yumi mas wantem prea long God oltaem. God i stap givim plante blesing long yumi long saed blong speret mo long saed blong bodi. Bigfala tangkyu we i stap dip long hat blong yumi from, samting ya nao i mas pusum yumi blong talem tangkyu long hem. Yumi mas glad blong talemaot long hem ol samting we oli hevi long tingting blong yumi, from we yumi save se hem bambae i givim paoa long yumi blong gohed. (Ol Sam 55:22) Yumi save sua se sipos yumi stap tru long God, evri samting bambae i kam gud, from we hem i laekem yumi tumas.—1 Pita 5:6, 7.
9. ?Taem yumi prea long God blong hem i mekem nem blong hem i tabu, yumi stap askem wanem?
9 “Plis, yu mekem nem blong yu i tabu.” (Matyu 6:9, NW; Luk 11:2) Samtaem wod ya “nem” i save minim wan man. Mo blong mekem “i tabu” i minim “blong mekem i klin, blong mekem i seraot long ol narafala samting no blong putum i antap long ol narafala samting, olsem we hem i tabu.” (Skelem wetem Revelesen 3:4.) Taswe taem yumi prea blong askem God blong mekem nem blong hem i tabu, i olsem we yumi stap askem long Jeova blong mekem wan samting blong leftemap hem wan. ?Olsem wanem? Hem i save tekemaot ol doti we plante man oli bin sakem long nem blong hem. (Ol Sam 135:13) Blong mekem olsemia, God bambae i spolem ol rabis fasin long wol. Bambae hem i leftemap hem wan, mo bambae hem i fosem ol nesen blong save se hem nomo hem i Jeova. (Esikel 36:23; 38:23) Sipos yumi wantem tumas blong luk taem ya we God bambae i mekem olsemia, mo yumi rili tinghae long paoa mo hae nem blong Jeova, bambae yumi kam kolosap long hem oltaem. Mo bambae yumi soemaot ona long hem long fasin we prea i talem: “Mekem nem blong yu i tabu.”
Kingdom Blong God Mo Wil Blong Hem
10. ?Taem yumi prea blong Kingdom blong God i kam, yumi minim wanem?
10 “Yu mekem Kingdom blong yu i kam.” (Matyu 6:10, NW; Luk 11:2) Kingdom ya hemia hae rul blong Jeova. Hem i yusum gavman blong Mesaea long heven long han blong Jisas Kraes mo kampani blong hem we Baebol i kolem se “ol tabu man.” (Daniel 7:13, 14, 18, 27; Aesea 9:6, 7; 11:1-5) ?Taem yumi prea blong Kingdom ya i “kam,” yumi minim wanem? Yumi stap askem se Kingdom blong God bambae i kam agens long ol man long wol we oli agensem rul blong God. Kingdom ya bambae i ‘smasem mo finisim olgeta kingdom blong wol.’ Afta, bambae hem i jenisim wol ya i kam olsem wan bigfala paradaes.—Daniel 2:44; Luk 23:43.
11. ?Sipos yumi wantem tumas we wil blong Jeova i kamaot long heven mo long wol, bambae yumi mekem wanem?
11 “Yu mekem ol samting we yu yu wantem oli kamaot long wol, olsem we oli kamaot finis long heven.” (Matyu 6:10, NW) Taem yumi prea olsem ya, yumi stap askem long God blong mekem plan blong hem i kamtru long wol. Haf blong plan ya blong hem i blong tekemaot ol enemi blong hem long wol. (Ol Sam 83:9-18; 135:6-10) Tok ya i min se yumi wantem tumas we wil blong God i kamaot long olgeta ples long heven mo long wol. Sipos samting ya i stap long hat blong yumi, bambae oltaem yumi traehad wetem ful hat blong yumi blong mekem ol samting we Jeova nomo i wantem. Yumi no save prea olsem ya sipos yumi no rili traehad blong mekem ol samting we God i wantem long laef blong yumi wanwan. Sipos yumi stap prea olsem ya, ale, yumi mas no mekem ol samting we oli agensem wil blong God, olsem sipos yumi fren wetem wan we i no gat bilif, no yumi folem ol fasin blong wol. (1 Korin 7:39; 1 Jon 2:15-17) Defren olgeta, oltaem yumi mas tingting se: ‘?Wanem wil blong Jeova long saed blong bisnes ya?’ Yes, sipos yumi laekem God wetem ful hat blong yumi, bambae yumi lukaot rod we hem i stap lidim yumi long hem, long olgeta samting long laef.—Matyu 22:37.
Naf Kakae Blong Tede
12. ?Olsem wanem prea blong askem ‘kakae blong tede’ nomo i save mekem i gud long yumi?
12 “Plis yu givim kakae long mifala, i naf blong tede.” (Matyu 6:11) Store blong Luk i talem se: “Plis, evri dei yu givim kakae long mifala i naf blong wan dei.” (Luk 11:3) Sipos yumi stap askem God blong givim kakae we yumi nidim blong “tede” nomo, samting ya i save pulum yumi blong trastem God moa, se bambae hem i givim olgeta samting we yumi nidim evri dei. Bifo, taem wan man Isrel i pikimap mana, hem i save tekem “i naf blong wan dei nomo.” Hem i no pikimap i naf blong wan wik, no plante wik. (Eksodas 16:4) Prea ya i no blong askem ol flas samting no blong askem moa antap long ol samting we yumi nidim. No gat. Hem i blong askem ol samting we yumi nidim blong wan dei nomo. Mo tu, taem yumi askem kakae blong tede nomo, samting ya i givhan long yumi blong blokem fasin we man i wantem plante tumas samting.—1 Korin 6:9, 10.
13. (a) ?Taem yumi askem God blong givim kakae we i naf blong tede nomo, yumi stap soemaot wanem? (b) ?Nating we yumi wok had blong kasem i naf nomo, yumi mas gat wanem tingting?
13 Taem yumi stap askem God blong givim kakae we i naf blong tede nomo, yumi stap soemaot se yumi no wantem bos long laef blong yumi wan. Yumi stap soemaot se oltaem yumi dipen long God blong hem i givim kakae, dring, klos, mo ol narafala samting we yumi nidim. Yumi givim laef blong yumi i go long God finis, taswe yumi olsem wan memba blong famle blong hem, we oli stap mekem wosip long hem. Taswe yumi trastem Papa blong yumi. Be samting ya i no min se yumi stap sidaon nomo, yumi wet nomo long hem blong mekem wan merikel blong givim ol samting we yumi nidim. Yumi mas wok from, mo yumi mas yusum ol samting we yumi gat blong kasem kakae mo ol narafala samting we yumi nidim. Be i stret nomo we yumi talem tangkyu long God long prea, from we taem Papa blong yumi long heven i givim ol samting we yumi nidim, yumi luksave se hem i laekem yumi, hem i gat waes, mo paoa. (Ol Wok 14:15-17; skelem wetem Luk 22:19.) Maet, sipos yumi wok had, yumi save kasem plante samting. No maet yumi save kasem i naf nomo. Be nating, yumi mas harem gud long hem, mo yumi mas talem tangkyu long God from. (Filipae 4:12; 1 Timote 6:6-8) Maet wan man i gat smol nomo long saed blong bodi mo klos, be sipos hem i wosip tru long God hem i save hapi moa bitim samfala we oli gat plante samting long saed blong bodi. From ol samting we oli kamaot long laef blong yumi, maet yumi gat smol nomo. Be yumi no mas letem tingting blong yumi i foldaon from. Yumi save stap rij long saed blong speret. Yes, yumi no mas kam puaman long saed blong bilif, hop, mo lav long Jeova. Long prea, yumi save presem hem mo talem tangkyu long hem oltaem wetem ful hat blong yumi.
Fogivim Ol Kaon Blong Mifala
14. ?Yumi stap askem long God blong hem i fogivim wanem kaon? ?Fogif blong God i stanap long wanem?
14 “Yu fogivim mifala from ol kaon blong mifala, olsem we mifala i stap fogivim ol man we oli gat kaon long mifala.” (Matyu 6:12, NW) Long store blong Luk, hem i soem se ol kaon ya i minim ol sin blong yumi. (Luk 11:4) Taem yumi bon, yumi sinman finis. From samting ya, samtaem yumi mekem sam samting we oli no laenap wetem samting we Papa blong yumi i wantem. Wil blong hem i stret olgeta. Taswe yumi save talem se ol sin oli olsem kaon we yumi gat long God, i stat long taem we yumi stat blong ‘wokbaot mo stap laef long speret.’ (Galesia 5:16-25; skelem wetem Rom 7:21-25.) Yumi gat ol kaon ya from we yumi no stret gud olgeta, mo from we yumi no save kasem ol hae mak we God i putum long saed blong stret fasin. Ol sin ya nao, yumi save prea from, blong askem God blong fogivim yumi from olgeta. Hemia i wan blesing ya. Yumi glad tumas we God i save yusum sakrafaes blong Jisas blong fogivim ol kaon no sin ya.—Rom 5:8; 6:23.
15. ?Taem God i stretem yumi, yumi mas gat wanem tingting?
15 Sipos yumi wantem se God i fogivim ol kaon no sin blong yumi, yumi mas tanem tingting blong yumi from ol sin ya, mo yumi mas rere blong letem hem i stretem yumi. (Proveb 28:13; Ol Wok 3:19) Jeova i laekem yumi tumas, taswe hem i stap stretem yumi long rod we yumi wanwan i nidim. Olsem ya nao, yumi save stretem ol slak fasin blong yumi. (Proveb 6:23; Hibrus 12:4-6) Sipos yumi bigman i naf long saed blong bilif mo save, hat blong yumi bambae i agri fulwan long ol loa mo rul blong God. From samting ya, maet yumi neva mekem bigfala sin no mekem fasin stronghed agens long God. Sipos i olsemia, yumi save glad from. ?Be olsem wanem sipos yumi luksave se yumi mekem i no stret from we yumi wantem mekem i no stret lelebet? Long taem ya, dip insaed long hat blong yumi, yumi mas sore tumas. Mo yumi mas prea strong blong askem long God blong fogivim yumi. (Hibrus 10:26-31) Yumi mas mekem ol advaes we yumi kasem i wok long laef blong yumi, ale kwiktaem yumi save stretem rod blong yumi.
16. ?From wanem i gud we yumi stap askem long God blong hem i fogivim ol sin blong yumi?
16 I gud we oltaem yumi stap askem long God blong hem i fogivim ol sin blong yumi. Samting ya i save mekem yumi luksave se yumi sinman, mo yumi mas gat tingting daon. (Ol Sam 51:3, 4, 7) Yumi nidim we Papa blong yumi long heven i “fogivim yumi from ol sin blong yumi mo i mekem yumi klin long ol fasin blong yumi we i no stret.” (1 Jon 1:8, 9) Mo tu, taem yumi talemaot ol sin blong yumi long prea, samting ya i givhan long yumi blong faet strong agens long ol rong fasin. From samting ya, oltaem yumi save tingbaot we yumi nidim sakrafaes blong Jisas, mo praes blong blad blong hem.—1 Jon 2:1, 2; Revelesen 7:9, 14.
17. ?Olsem wanem prea blong askem God blong fogivim yumi i save givhan long yumi blong frengud wetem ol narafala?
17 Sipos yumi prea oltaem blong askem God blong fogivim ol sin blong yumi, samting ya i save givhan long yumi blong soemaot sore, kaen fasin, mo gladhat long olgeta we oli mekem i no stret long yumi, nating we i long wan smol samting no long wan bigfala samting. Luk i talem se: “Yu fogivim mifala from ol sin blong mifala, from we mifala i stap fogivim ol man we oli mekem i nogud long mifala.” (Luk 11:4) Taswe, fastaem yumi mas “fogivim ol man we oli mekem i nogud” long yumi. Afta nomo, God i save fogivim yumi. (Matyu 6:12; Mak 11:25) Jisas i gohed, i se: “From we sipos yufala i stap fogivim ol man we oli stap mekem i nogud long yufala, Papa blong yufala long heven bambae i fogivim yufala tu. Be sipos yufala i no fogivim ol man we oli mekem i nogud long yufala, bambae Papa blong yufala i no save fogivim yufala from ol sin blong yufala.” (Matyu 6:14, 15) Ol prea blong yumi blong askem God blong fogivim ol sin blong yumi oli mas pulum yumi blong soemaot longfala tingting long ol narafala mo blong fogivim olgeta tu. Aposol Pol i talem se: “Yufala i mas fofogivim yufala, long sem fasin ya we [Jeova, NW] i fogivim yufala.”—Kolosi 3:13; Efesas 4:32.
Ol Traem Mo Setan
18. ?Taem sam samting i kam traem yumi, from wanem yumi neva mas talem se ol traem ya oli kamaot long God?
18 “Yu no lidim mifala long ol samting we i save traem mifala.” (Matyu 6:13, NW; Luk 11:4) Tok ya i no minim se Jeova i save pulum yumi blong mekem sin. Samtaem Baebol i tok olsem we God i mekem wan samting no i stampa blong wan samting, be trufala mining blong tok ya se hem i letem wan samting i kamaot. (Rut 1:20, 21; skelem wetem Eklesiastis 11:5.) Disaepol Jemes i talem se: “I no gat samting nogud we i save kam traem God. Mo i no fasin blong God blong traem man.” (Jemes 1:13) Taswe taem ol samting oli kam traem yumi, yumi neva mas talem se ol samting ya oli kamaot long Papa blong yumi long heven. Setan nomo i Man blong Traem man. Hem i stap traehad blong pulum yumi blong yumi mekem sin agens long God.—Matyu 4:3; 1 Tesalonaeka 3:5.
19. ?Yumi save prea olsem wanem long saed blong ol traem we yumi kasem?
19 Taem yumi askem long God se: “Yu no lidim mifala long ol samting we i save traem mifala,” i olsem we yumi stap askem long Jeova blong no letem ol samting oli kam traem yumi tumas, gogo yumi sin no yumi brekem loa blong hem. Yumi save askem long Papa blong yumi blong lidim yumi, blong i no gat wan samting we i strong tumas i kam traem yumi. Long saed ya, Pol i talem se: “Ol samting ya we oli stap traem yufala, oli sem mak nomo long olgeta samting we oli stap traem olgeta man. Be God i stap holem promes blong hem. Mo hem i no save letem wan samting bambae i traem yufala, we i strong tumas long yufala. Be stret long taem ya we samting olsem i traem yufala, God bambae i mekem rod blong yufala, blong yufala i winim samting ya.” (1 Korin 10:13) Yumi save prea long Jeova blong askem long hem blong lidim yumi long rod we i no gat wan samting we i strong tumas i kam traem yumi. Mo taem yumi harem nogud tumas, yumi save askem long hem blong mekem rod blong yumi winim samting ya. Ol traem oli kamaot long Setan, no long bodi blong yumi we sin i stap long hem, no long ol rong fasin blong narafala. Be Papa blong yumi we i laekem yumi tumas i save lidim yumi, blong yumi no save foldaon long ol traem ya.
20. Yumi mas prea long God blong hem i blokem “rabis man ya” blong i no kam spolem yumi. ?From wanem?
20 “Yu blokem [rabis man ya, NW] i no kam spolem mifala.” (Matyu 6:13) God i save blokem “rabis man ya” Setan, blong hem i no kam spolem yumi. (2 Pita 2:9) Yumi nidim we God i blokem Setan moa naoia, i bitim ol narafala taem bifo. From we Setan “i kros tumas, . . . i save, i gat smol taem nomo blong hem i stap yet.” (Revelesen 12:12) Yumi save gud ol plan blong Setan. Be hem tu i save gud ol slak fasin blong yumi. Taswe yumi nidim blong prea long Jeova blong askem long hem blong lukaot long yumi, blong Enemi ya blong yumi we i olsem wan laeon, i no save kam spolem yumi. (2 Korin 2:11; 1 Pita 5:8, 9; skelem wetem Ol Sam 141:8, 9.) Wan eksampel: Sipos yumi wantem mared, yumi save askem long Jeova blong blokem Setan blong hem i no pulum yumi blong fren wetem wan man no woman blong wol. Sipos yumi no mekem olsem ya, yumi save brekem loa blong God, from we maet yumi mekem rabis fasin long saed blong seks, no maet yumi mared wetem wan we i no gat bilif. (Dutronome 7:3, 4; 1 Korin 7:39) ?Yumi wantem kam rijman? Oraet, yumi save prea long God blong askem long hem blong givhan long yumi, blong yumi no foldaon long ol traem olsem fasin blong plelake, no blong yusum sam fasin blong stilim mane long narafala man. Setan i save yusum enikaen samting blong traem yumi. Hem i wantem spolem fasin fren blong yumi wetem Jeova. Taswe oltaem yumi mas prea long Papa blong yumi long heven. Hem i no save letem wan stret man i foldaon long ol traem blong Setan. Hem i save blokem rabis man ya, blong i no kam spolem yumi.
Prea i Givim Paoa Long Bilif Mo Hop
21. ?Olsem wanem prea blong askem Kingdom blong God i kam i bin givhan long yumi?
21 Papa blong yumi long heven, we hem i stap blokem rabis man ya i no kam spolem yumi, hem i glad tumas blong givim fulap blesing long yumi. Be longtaem finis ol man blong hem oli bin prea long hem se: “Yu mekem Kingdom blong yu i kam.” ?From wanem hem i mekem se ol gudfala man blong hem oli mas gohed plante yia blong prea olsemia? Samting ya i mekem se yumi wantem moa Kingdom blong hem, yumi tinghae moa long Kingdom ya. Prea olsem ya i save pulum yumi blong tingbaot we yumi nidim tumas gudfala gavman ya long heven. Mo tu i save pulum yumi blong tingbaot laef long fyuja aninit long rul blong Kingdom ya.—Revelesen 21:1-5.
22. ?Yumi mas holem wanem tingting long saed blong prea long Papa blong yumi long heven, Jeova?
22 I klia nomo se prea i save mekem se yumi bilif moa long Jeova. Taem hem i ansarem ol prea blong yumi, yumi harem we yumi kam kolosap moa long hem. Taswe neva yumi mas les blong prea long hem evri dei. Yumi save presem hem, talem tangkyu long hem, mo askem sam samting long hem. Tru, yumi save glad long gudfala ansa we Jisas i givim long ol disaepol blong hem, taem oli askem long hem se: “Masta, plis yu tijim mifala blong mifala i prea.”
Tingtingbak:
◻ ?Wanem sam lesen we yumi save lanem from ol tok mo eksampel blong Jisas long saed blong prea?
◻ ?Long saed blong Papa blong yumi long heven mo nem blong hem, yumi save prea olsem wanem?
◻ ?Taem yumi prea blong askem Kingdom blong God i kam mo wil blong hem i kamaot long wol, yumi stap askem wanem?
◻ ?Taem yumi prea long God blong askem long hem blong givim kakae we i naf blong tede, yumi stap askem wanem?
◻ ?Taem yumi prea blong askem God blong fogivim ol kaon blong yumi, yumi minim wanem?
◻ ?From wanem i impoten blong prea long saed blong ol traem we yumi stap kasem, mo blong askem God blong blokem rabis man ya, Setan?
[Tok Blong Pija Long Pej 17]
Sam disaepol oli askem long Jisas blong tijim olgeta blong oli save prea. ?Yu yu save olsem wanem ol rul we hem i oli save givhan long yumi?